१ तीमोथी 2 - पश्चिम तामाङमन्डलीइ प्रार्थना 1 ङोन्ग्यम् ङ एत पङ्ब, जम्मनो म्हीमात तोबे तम्मा न्हङ्जेत्परी पर्मेस्वर्त र्हीतो, ल्होल्होमाकी लागीरी प्रार्थना स्य्हेङो ओसेम् थेङ्यीमाकी लागीरी पर्मेस्वर्त व्होर्छ्ये पीनो। 2 ओसेम् ङ्य्हङ्मा अलोङ्नले सान्तीरी ब्रज्यीम् पर्मेस्वर्त सेम्री ङ्यीबतेङ् पबीत्र जीवन सोब खम्खइ बी ग्यल्बोमातेङ् ङ्हच्छ्यङ् पद्री मुबलमाकी लागीरी प्रार्थना स्य्हेङो। 3 चोले स्य्हेङ्ब ज्यब तब, ओसेम् ङ्य्हङ्की मुक्तीदाता पर्मेस्वर्एनो तङ्जेत्प। 4 जम्मनो म्हीमा थर्खइ ओसेम् थेङ्यीमाचे देमेन्त ज्यनले स्येःखइ पङ्बे थुः थेङ्ल मुब। 5 तलेपङ्सम् पर्मेस्वर् गीःकीनो मुब। ओसेम् म्हीमात पर्मेस्वर्ज ङ्यीब खम्न लबे म्हीएनो गीःकीनो मुब। हुजु लक् स्य्हेङ्बे म्ही येसु ख्रीस्ट् य्हीन्ब। 6 थेङ्चे जम्मनो म्हीमात थेङ्यीमाकी पाप ग्यम्से फेःपीन्जेत्पे लागीरी र्हङ्की बुः न्हङ्जेत्ज्यी। थेङ्चे चु तम् ठीक् बेलोरीनो ङोन्जेत्ज्यी। 7 होत्तज्यीम् बीस्वास्तेङ् देमेन्की चु सम्तर्की बारेरी यहुदी अय्हीन्बे म्हीमात स्येत्पे लागीरी पर्मेस्वर्चे ङत प्रचारक्तेङ् प्रेरीत्की जीम्म न्हङ्जेत्ज्यी। ङचे भ्यु पङ्बल अय्हीन्, देमेन् पङ्बल य्हीन्ब। 8 अपकोलमा थुन्ज्यीम् ओसेम् बोमो अलनले जम्मनो ग्लामारी पबीत्र या रेःज्यीम् प्रार्थना स्य्हेङ्खइ पङ्बे सेम् ङल मुब। 9 होलेनो अमकोलमाचे छन्दखबतेङ् जेःबे गोइल येन्खइ, ओसेम् क्र अछ्येखइ, म्हर्तेङ् मोती अयेन्खइ ओसेम् य्हक्को सइ फाबे गोइल अयेन्खइ पङ्बे सेम् ङल मुब। 10 तर पर्मेस्वर्त सेम्री ङ्यीबे लक् स्य्हेङ्बे अममाचे र्हङ्त जेःबे ज्यबे लक् स्य्हेङ्ज्यीम् ब्रथोब। 11 अमकोलमा लोप्पे म्हीइ अधीन्री कुटीले टीज्यीम् लोप्थोब। 12 ङचेमी अमकोलमाचे अपकोलमात लोप्अपुङ् ओसेम् हक्एनो लअबुङ्, थेङ्यीमामी कुटीले टीज्यीम् ङ्येन्थोब। 13 तलेपङ्सम् पर्मेस्वर्चे ङोन्ग्यम् आदमत, हुजु लीप्चे हब्बत स्य्हेङ्जेत्ज्यी। 14 ओसेम् सैतन्की छल्री फस्तीबल आदम अय्हीन्, तर हब्ब छल्री फस्तीज्यीम् पाप स्य्हेङ्बल य्हीन्ब। 15 तर थेङ्यीमा नम्र तज्यीम् बीस्वास्तेङ् म्होइब ओसेम् पबीत्र तज्यीम् टीज्यी पङ्सम् कोल न्हब ग्यम्से थेङ्यीमा थर्स्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.