१ तीमोथी 1 - पश्चिम तामाङ1 ङ्य्हङ्त मुक्तीदाता पर्मेस्वर्तेङ् ङ्य्हङ्चे आस् थेन्बे येसु ख्रीस्ट्चे कुल्जेत्प र्हङले ङ येसु ख्रीस्ट्की प्रेरीत पावल ग्यम्से, 2 चु चीठी बीस्वास्री ङइ देमेन्की ज र्हङ्बे तीमोथीत ब्रीटीब। पर्मेस्वर् अपतेङ् येसु ख्रीस्ट् ङ्य्हङ्की प्रभुचे एत अनुग्रह, दयतेङ् सान्ती न्हङ्खइ। भ्युकी तम् लोप्पे बीरुद्दरी चेतावनी 3 ङ माकेडोनीयारी ङ्यीबे बेलोरी ङचे एत पङ्ब र्हङ्लेनो ए एफीसस्रीनो टीउ। ओसेम् हुजुरी भ्युकी तम्मा लोप्पे म्हीमात होले थलोपो बी कुलो। 4 एचे थेङ्यीमात दङ्बोइ अर्तमातेङ् खेमेएनो अथुःबे पुस्तइ तम्मा ङ्येन्बरी बेलो थख्लाको पङो, हुजुचेम् लक् अतबे तम्माकीनो ज्योप्न लब ओसेम् म्हीमात बीस्वास् ग्यम्से पर्मेस्वर्की लक् स्य्हेङ्बरी र्हो अल। 5 ङ्य्हङ्चे लोप्पे चु तम्की उदेस्यमी चोखो सेम्तेङ् ज्यबे लो ओसेम् देमेन्की बीस्वास् ग्यम्से डोङ्बे म्होइबत छर्नलब य्हीन्ब। 6 डेत् डेत् म्हीमाम् चु तम्मा ग्यम्से ग्यब् दोःज्यीम् लक् अतबे तम्मारी उन्बल मुब। 7 थेङ्यीमा मोसाचे ब्रीबे पर्मेस्वर्की नीयम्की लोप्पोन् तबे सेम् लब, तर थेङ्यीमाचे न्ह र्हङ्चे तइ तम् पङ्टीब बी गोब न्ह र्हङ्चे तेत् लज्यीम् पङ्बे तम् गोब। 8 ङ्य्हङ्माचे स्येबलनो मुब ज्यनले कोल्ज्यी पङ्सम् मोसाचे ब्रीबे पर्मेस्वर्की नीयम य्हक्को ज्यब मुब। 9 ओसेम् ङ्य्हङ्माचे स्येःब, नीयम्मी ज्यबे म्हीमाकी लागीरी स्य्हेङ्बल अय्हीन्, तर नीयम् अङ्येन्बलमा, डाकुमा, पर्मेस्वर्त अम्हन्दीबलमा, पापीमा, अपबीत्रमा, पर्मेस्वर् तङ्बे लक् अस्य्हेङ्बलमातेङ्, र्हङ्की अप अम सेत्पलमा ओसेम् म्हीमा सेत्पलमाकी लागीरी स्य्हेङ्बल य्हीन्ब, 10 ओसेम् बेस्यमा, अपकोल-अपकोलन्हङ् स्य्हेङ्बे बेस्यमा, म्हीमात अपहर्न् स्य्हेङ्बलमा, भ्यु पङ्बलमा, भ्युकी साक्षी पीन्बलमा ओसेम् देमेन्की बीरुद्दरी लक् स्य्हेङ्बलमाकी लागीरी य्हीन्ब। 11 मोलम् मुबे पर्मेस्वर्चे ङत सोप्तीबे महीमीत ज्यबे सम्तर्री चु यङ्ब। पर्मेस्वर्की दयकी लागीरी व्होर्छ्ये 12 ङ ङ्य्हङ्की प्रभु येसु ख्रीस्ट्त, थेङ्की लक् स्य्हेङ्बरी ङत बङ् न्हङ्जेत्पे लागीरी व्होर्छ्ये पीन्ब। तलेपङ्सम् थेङ्चे ङत पतइतीजेत्ज्यीम् थेङ्की लक् स्य्हेङ्बरी दम्जेत्ज्यी। 13 य्हीन्बरीम् ङोन्ग्यम् ङचे थेङ्की नीन्द स्य्हेङ्ज्यीम् थेङ्की म्हीमात दुख पीन्बल मुबल, ओसेम् थेङ्यीमात पेत्नलबल मुबल। तर हुजु ङचे अस्येन, ओसेम् ङइ बीस्वास् अरेननो स्य्हेङ्बल तज्यीम् ख्रीस्ट्चे ङत दय स्य्हेङ्जेत्ज्यी। 14 ओसेम् ङ्य्हङ्की प्रभुचे ङत य्हक्को अनुग्रह न्हङ्जेत्ज्यी। येसु ख्रीस्ट्तेङ् मुबे म्होइबतेङ् बीस्वास् पर्मेस्वर्चेनो ङत न्हङ्जेत्ज्यी। 15 येसु ख्रीस्ट् पापीमात थर्न लबरी जम्बुलीङ्री ब्योन्युज्यी। चु गोदोब्चेनो बीस्वास् स्य्हेङ्थोबे देमेन्की तम् य्हीन्ब। ओसेम् पापीमा न्हङ्री गोदोब्न्हङ् य्हक्को पाप स्य्हेङ्बे म्ही ङ य्हीन्ब। 16 होलेतलेनो पर्मेस्वर्चे ङत दय स्य्हेङ्जेत्ज्यी। तलेपङ्सम् ङ र्हङ्बे गोदोब्न्हङ् य्हक्को पाप स्य्हेङ्बे म्हीत र्हङ्की धैर्य ङोन्जेत्परी येसु ख्रीस्ट्चे ङत नमुना स्य्हेङ्जेत्ज्यी। चु नमुना लीक्यम् थेङ्त बीस्वास् स्य्हेङ्ज्यीम् खेमेएनो अबेबे जीवन यङ्बलमाकी लागीरी य्हीन्ब। 17 खेम पङ्लेनो ग्यल्बो तटीबल, ओसेम् सोटीबतेङ् म्रङ्ब अखम्बे गीःकीनो पर्मेस्वर्त खेम पङ्लेनो स्य्हेसतेङ् तोप्प तखइ। आमेन्। 18 ङइ देमेन्की ज र्हङ्बे तीमोथी, ङोन्ग्यम् एइ बारेरी अगम्बानीमा पङ्ब र्हङ्लेनो ङ एत चु तम् कुल्टीब। स्यीपइमाचे ज्यनले छेत्प र्हङ्लेनो भ्युकी तम्माइ बीरोद् स्य्हेङ्बरी एचे चु तम्मा व्हल् लउ। 19 बीस्वास् लस्यीनो टीउ ओसेम् खजु तम् ठीक् य्हीन्ब हुजु तम् थपीतो। डेत् डेत् म्हीमाचे ठीक् तम्त ख्लाबल तज्यीम् थेङ्यीमाकी बीस्वास् म्हज्यीम् य्हर्बल मुब। 20 हुजुमा न्हङ्री हुमेनीयसतेङ् अलेक्जेन्डर् य्हीन्ब। थेङ्य्हीचे पर्मेस्वर्की नीन्द स्य्हेङ्ब अत पङ्बे तम् गोब खम्खइ बी ङ्चे थेङ्य्हीत सैतान्की यारी सोप्तीपीन्बल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.