१ थेस्लोनीकी 5 - पश्चिम तामाङप्रभुइ ग्यम् च्याज्यीम् टीउ 1 ङइ र्होमा, चु तम्मा खेमा ओसेम् खजु बेलोरी तब बी एङ्यीमात ब्रीटीअथो। 2 तलेपङ्सम् प्रभु ब्योन्युबे दीन् सेम्चे अम्हेन्बे बेलोरी म्हुन य्हो खब र्हङ्ले खस्ये मुब बी एङ्यीमाचे ज्यनले स्येब। 3 म्हीमाचे, “सान्ती मुब ङ्य्हङ्मात तइ दुखएनो अरे” पङ्टीबल तस्ये मुब, होदे बेलोरीनो अमकोलत कोल न्हबे ल्हङ्दु खब र्हङ्ले थेङ्यीमाइ जोरी दुख खस्ये मुब ओसेम् थेङ्यीमा खलएनो हुजु ग्यम्से स्योर्म्यङ्स्ये अरे। 4 तर ङइ र्होमा, एङ्यीमाम् म्हुन्दुङ्री अरे, होले तज्यीम् प्रभु ब्योन्युबे दीन् एङ्यीमाकी लागीरी य्हो खब र्हङ्ले खज्यीम् अचम्म तस्ये अरे। 5 तलेपङ्सम् एङ्यीमा दीन्तेङ् य्हल्की कोलमा य्हीन्ब। ङ्य्हङ्मा म्हुनातेङ् म्हुन्दुङ्की कोलमा अय्हीन्। 6 होत्तज्यीम् ल्हो-ल्होमा र्हङ्ले ङ्य्हङ्मा न्हुःब अत, तर चोङ् लज्यीम् र्हङ्चे र्हङ्त दुल्ज्यीम् टीथोब। 7 तलेपङ्सम् म्हीमा म्हुनरी न्हुःब ओसेम् म्हुनरीनो म्हीमा ज्यीचे ङ्य्हेज्यीम् ब्रब। 8 तर ङ्य्हङ्मा दीन्ल तज्यीम् र्हङ्चे र्हङ्त दुल्ज्यीम् टीथोब। ङ्य्हङ्माचे स्यीपइमाचे र्हङ्की कुत्तोत जोगइतीबरी भोटो र्हङ्बे कवज येन्ब र्हङ्ले बीस्वासतेङ् म्होइबइ कवज येन्थोब ओसेम् क्रत जोगइतीबरी कुःबे टुपी र्हङ्ले मुक्तीइ आस्की टुपी कुःथोब। 9 पर्मेस्वर्चे ङ्य्हङ्त थेङ्की बोमो साबरी अय्हीन् तर प्रभु येसु ख्रीस्ट् ग्यम्से मुक्ती न्हङ्बरी दम्जेत्पल य्हीन्ब। 10 ङ्य्हङ्मा स्यीलएनो सोलएनो थेङ् दोःज्यीम् ब्योन्युबे बेलोरी थेङ्तेङ् बक्च्य सोबरी प्रभु येसु ङ्य्हङ्माइ लागीरी स्यीजेत्ज्यी। 11 होत्तज्यीम् एङ्यीमाचे देरे स्य्हेङ्टीब र्हङ्ले गीःचे गीःत आर् पीन्ज्यीम् गीःचे गीःत कोङ्न लउ। ज्युःरी लोप्पे तम् 12 ङइ र्होमा ङ्यीमा एङ्यीमात फ्या लब, एङ्यीमाकी गुङ्री सेम् य्हङ्सेनो प्रभुइ लक् स्य्हेङ्बतेङ् एङ्यीमात प्रभुरी खले सोथोब बी लोप्पे अगुवामात स्य्हेस स्य्हेङो। 13 थेङ्यीमाचे स्य्हेङ्बे लक्की लागीरी एङ्यीमाचे थेङ्यीमात म्होइज्यीम् य्हक्को ङ्हच्छ्यङ् स्य्हेस स्य्हेङो। ओसेम् एङ्यीमा र्हङ्न्हङ् थुन्ज्यीम् टीउ। 14 ङइ र्होमा, ङ्यीमा एङ्यीमात फ्या लज्यीम् पङ्ब, लक् स्य्हेङ्बरी ब्लेकु तबलमात एङ्यीमाचे चेतावनी पीनो, लोङ्बलमात आर् पीनो, अखम्बलमात र्हो लउ, ओसेम् जम्मतनो नाको। 15 खल्चे पङ्लेनो अज्यब स्य्हेङ्सम् एङ्यीमाकी गुङ्री खल्चेएनो खीत् थफागो। तर एङ्यीमाचे खेम पङ्लेनो गीःचे गीःत ओसेम् जम्मतनो ज्यब स्य्हेङ्बे सेम् थोःगो। 16 खेम पङ्लेनो तङ्ज्यीम् टीउ। 17 खेम पङ्लेनो प्रार्थना स्य्हेङ्ज्यीम् टीउ। 18 खतेबे बेलोरी पङ्लेनो एङ्यीमाचे व्होर्छ्ये पीनो, तलेपङ्सम् येसु ख्रीस्ट्री तज्यीम् एङ्यीमाचे स्य्हेङ्थोबे पर्मेस्वर्की थुः चुनो य्हीन्ब। 19 पबीत्र आत्माचे एङ्यीमाकी गुङ्री लक् स्य्हेङ्बे बेलोरी थर्होदो। 20 पर्मेस्वर् ग्यम्से थोल्बे तम्त हेल थलउ। 21 तर जम्मनो तम् ज्यनले छोत् च्यागो, ओसेम् ज्यबे तम्तमी थेनो। 22 ओसेम् जम्मनो दुस्ट तम्मा ग्यम्से थारीङ् टीउ। 23 ङ्य्हङ्त सान्ती न्हङ्बे पर्मेस्वर्चे एङ्यीमात जम्मनो तम्री पबीत्र थेन्जेत्टीखइ, ओसेम् ङ्य्हङ्की प्रभु येसु ख्रीस्ट् दोःज्यीम् ब्योन्युबे बेलोरी एङ्यीमाकी आत्मा, बु:तेङ् ल्ही तइ दोस्एनो अरेनले थेन्जेत्टीखइ। 24 एङ्यीमात दम्जेत्पे पर्मेस्वर् बीस्वासीलो मुब। चु एङ्यीमात थेङ्चेनो स्य्हेङ्जेत्स्ये मुब। 25 ङइ र्होमा, ङ्यीमाइ लागीरीएनो प्रार्थना स्य्हेङो। 26 हुजुरी मुबे जम्मनो बीस्वासीमात ङ ग्यम्से म्होइबे लस्सो पङ्पीनो। 27 ङ एत प्रभुइ छेन्री कुल्ब चु चीठी एचे जम्मनो बीस्वासीमात खेत्ज्यीम् ङ्येन्पीनो। 28 ङ्य्हङ्की प्रभु येसु ख्रीस्ट्की अनुग्रह एङ्यीमातेङ् तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.