१ थेस्लोनीकी 4 - पश्चिम तामाङपर्मेस्वर्त तङ्नलबे जीवन् 1 ज्युरी ङइ र्होमा, एङ्यीमाचे ङ्यीमा ग्यम्से पर्मेस्वर् तङ्नले ब्रब लोप्पल मुब। ओसेम् एङ्यीमाचे हुजु र्हङ्लेनो ब्रटीबल मुब। देरेम् झेन्नो पर्मेस्वर्त य्हक्को तङ्नले ब्रस्यीनो टीउ बी प्रभु येसु ख्रीस्ट्की छेन्री एङ्यीमात फ्या लब। 2 तलेपङ्सम् ङ्यीमाचे प्रभु येसुइ अधीकार् ग्यम्से एङ्यीमात अर्तीमा पीन्बल मुब बी एङ्यीमाचे स्येबल मुब। 3 एङ्यीमा पबीत्र तउ पङ्बे थुः पर्मेस्वर्ल मुब, होत्तज्यीम् एङ्यीमा ब्यभीचार् ग्यम्से थारीङ् टीउ। 4-5 एङ्यीमा जम्मचेनो पर्मेस्वर्त अस्येबे म्हीमाचे र्हङ्ले प्रो नापीन्बे सेम् थो:ज्यीम् अय्हीन्, तर पबीत्रतेङ् स्य्हेस स्य्हेङ्ज्यीम् र्हङ्की म्रीङ्तेङ् टीथोब। 6 चु तम्री एङ्यीमा खल्चेएनो ल्हो-ल्हो बीस्वासीत अज्यब थस्य्हेङो। चोतेबे तम्मारी प्रभुचेनो सजाय न्हङ्जेत्प। ङ्यीमाचे एङ्यीमात चु तम्की बारेरी ङोन्नो ङ्हच्छ्यङ् चेतावनी पीन्ज्यीन्बल मुब। 7 तलेपङ्सम् पर्मेस्वर्चे ङ्य्हङ्मात अपबीत्र तबे लागीरी अय्हीन्, तर पबीत्र जीवन सोबरी दम्जेत्पल य्हीन्ब। 8 होत्तज्यीम् चु तम् अङ्येन्बलचे म्हीमात अय्हीन्, तर एङ्यीमात पबीत्र आत्मा न्हङ्जेत्पे पर्मेस्वर्तनो अङ्येन्बल य्हीन्ब। 9 एङ्यीमा गीःचे गीःत म्होइबे बारेरीम् खल्चेएनो तए ब्रीअतो, तलेपङ्सम् पर्मेस्वर्चेनो एङ्यीमात गीःचे गीःत म्होइब लोप्जेत्पल मुब। 10 एङ्यीमाचे माकेडोनीयाकी बीस्वासीमा जम्मतनो होलेनो म्होइबल मुब। देरे झेन् य्हक्को म्होइबोर्को पङ्ज्यीम् ङ्यीमा एङ्यीमात आर् पीन्ब। 11 ङ्यीमाचे एङ्यीमात ङोन्ग्यम्नो लोप्प र्हङ्ले थुन्ज्यीम् टीउ, र्हङ्की लक्री सेम् पीनो, ओसेम् र्हङ् सोबे लागीरी र्हङ्की या ग्यम्सेनो लक् स्य्हेङो। 12 होले स्य्हेङ्सम् बीस्वास् अस्य्हेङ्बे म्हीमाचे एङ्यीमात स्य्हेस स्य्हेङ्स्ये मुब, ओसेम् एङ्यीमात तोःबतेङ् तएनो र्होत र्हीत्थोस्ये अरे। प्रभु दोःज्यीम् ब्योन्युब 13 ङइ र्होमा, स्यीज्यीन्बे बीस्वासीमाकी लागीरी तइ आस्एनो अरेबे म्हीमा र्हङ्ले दुख थलउ बी ङ्यीमा एङ्यीमात पङ्ब। 14 तलेपङ्सम् ङ्य्हङ्माचे येसु स्यीजेत्ज्यीम् सोजेत्ज्यी बी बीस्वास् स्य्हेङ्ब। होलेनो येसुत बीस्वास् लज्यीम् स्यीबलमात पर्मेस्वर्चेनो येसुतेङ् तबरी नोम्जेत्स्ये मुब। 15 प्रभुइ फ्रोइ अनुसार्नो ङ्यीमा एङ्यीमात पङ्ब, प्रभु दोःज्यीम् ब्योन्युबे बेलोसम्म सोटीबे ङ्य्हङ्मा ता लज्यीमएनो स्यीज्यीन्बलमा बीम ङोन्चे ङ्यीब खम्स्ये अरे। 16 तलेपङ्सम् प्रभु दोःज्यीम् ब्योन्युबे बेलोरी क्रीङ्ज्यीम् कुल्बे केत्, ङ्हच्छ्यङ् स्वर्गदुत्की केत् ओसेम् पर्मेस्वर्की तुरही र्हब्बे केत्तेङ् बक्च्य स्वर्ग ग्यम्से दुङ्री ब्योन्युस्ये मुब, ओसेम् हुजु बेलोरीनो ख्रीस्ट्री बीस्वास् लज्यीम् स्यीबलमा गोदोब्न्हङ् ङोन्ग्यम् रेस्ये मुब। 17 हुजु लीप्चे ङ्य्हङ् जम्बुलीङ्री सोटीबलतेङ् ख्लेथेन्बमा प्रभुत खतु लबरी थेङ्यीमातेङ् बक्च्य नम्तीङ् मुक्परी कोत्बोर्स्ये मुब ओसेम् खेम पङ्लेनो प्रभुतेङ् बक्च्य तस्ये मुब। 18 होत्तज्यीम् चु तम्मा ग्यम्चे एङ्यीमा गीःचे गीःत आर् पीनो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.