१ थेस्लोनीकी 3 - पश्चिम तामाङतीमोथीत थेसलोनीकीरी पीत्पल 1 ओसेम् ङ्यीमा एङ्यीमातेङ् फेःज्यीम् टीअखम्बल तज्यीम् एथेन्स् सहररी ङतेङ् सीलसकीनो टीब ज्यब तब म्हेन्ज्यी। 2 ङ्यीमातेङ् बक्च्य पर्मेस्वर्री ख्रीस्ट्की ज्यबे सम्तर् स्येत्पे लक् स्य्हेङ्बे ङ्य्हङ्की अले तीमोथीचे एङ्यीमात आर् पीन्ज्यीम् एङ्यीमाकी बीस्वासत कोङ्न लबरी ङ्यीङ्य्हीचे तीमोथीत एङ्यीमाज पीत्खज्यी। 3 म्हीमाचे दुख पीन्बे बेलोरी एङ्यीमा न्हङ्री खलएनो ख्रीस्ट् ग्यम्से दोःज्यीम् थारीङ् अय्हर्खइ पङ्बे सेम् ङ्यीङ्य्हील मुबल। एङ्यीमाचेनो स्येबल मुब, पर्मेस्वर्चे ङ्य्हङ्मात चुइ लागीरीनो दम्जेत्पल य्हीन्ब। 4 तलेपङ्सम् ङ्यीमा एङ्यीमातेङ् बक्च्य मुबे बेलोरीनो दुखमा खस्ये मुब बी ङ्यीमाचे ङोन्ग्यम्नो पङ्बल मुबल। देमेन्नो ङ्यीमाचे पङ्ब र्हङ् तज्यी, ओसेम् हुजु एङ्यीमाचेनो स्येबल मुब। 5 होत्तज्यीम् ङचे देरे य्हक्को नापअखम्मम् सैतान्चे एङ्यीमात परीक्षरी दोनलज्यीवा ओसेम् ङ्यीमाचे स्य्हेङ्बे दुख खेर य्हर्नलज्यीवा बी लोङ्ज्यीम् एङ्यीमाकी बीस्वास् च्याबरी ङचे तीमोथीत पीत्खबल मुबल। 6 तर तीमोथी एङ्यीमातेङ् खतु लज्यीम् देरेकीनो दोज्यीम् खबल मुब। थेचे एङ्यीमाकी म्होइबतेङ् बीस्वासकी बारेरी ज्यबे सम्तर् बबल मुब। ङ्यीमाचे र्हङ्लेनो एङ्यीमाचेएनो ङ्यीमात य्हक्को खतु लबे सेम् थोज्यीम् व्हल् लज्यीम् टीबल टीम्। 7 होत्तज्यीम् ङइ र्होमा, एङ्यीमाकी बीस्वासकी तम् थ्येःज्यीम् ङ्यीमात र्होचे अखोज्यीम् य्हक्को दुख यङ्बे बेलोरीएनो आर् यङ्बल मुब। 8 तलेपङ्सम् एङ्यीमा प्रभुरी कोङ्नले बीस्वास् स्य्हेङ्ज्यीम् टीबे सम्तर् थ्येःज्यीम् ङ्यीमात दोज्यीम् बुः खबर्हङ् तज्यी। 9 एङ्यीमाचे लज्यीम् ङ्यीमा ङ्य्हङ्की पर्मेस्वर्की ङ्होन्सङ् तङ्ब। चुइ लागीरी पर्मेस्वर्त गदे व्होर्छ्ये पीन्लेएनो अयो। 10 ङ्यीमा एङ्यीमातेङ् देबेएनो खतु लज्यीम् एङ्यीमाकी बीस्वासत झेन् य्हक्को कोङ्न लब खम्खइ पङ्ज्यीम् दीन् म्हुन् पर्मेस्वर्तेङ् प्रार्थना स्य्हेङ्टीब। 11 ङ्य्हङ्की पर्मेस्वर् अपतेङ् प्रभु येसुचेनो ङ्यीमात एङ्यीमाज खबे ग्यम् टोप् लजेत्खइ। 12 ङ्यीमाचे एङ्यीमात म्होइब र्हङ्लेनो एङ्यीमाचेएनो गीचे गीःत ओसेम् म्हीमा जम्मतनो झेन् झेन्नो म्होइबरी प्रभुचे र्हो लजेत्खइ। 13 ओसेम् प्रभु येसुचे एङ्यीमात होले एङ्यीमान्हङ् म्होइन लजेत्ज्यीम् ङ्य्हङ्की प्रभु येसु र्हङ्की पबीत्र म्हीमातेङ् ब्योन्युबे बेलोरी ङ्य्हङ्की पर्मेस्वर् अपइ ङोन्ग्यम् तइ दोस्एनो अतबरी ओसेम् पबीत्र तनलबरी एङ्यीमाकी सेम्त कोङ्न लजेत्खइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.