१ थेस्लोनीकी 2 - पश्चिम तामाङथेस्लोनीकीरी पावलकी लक् 1 ङइ र्होमा, ङ्यीमाचे एङ्यीमातेङ् खतु लज्यीम् टीबे बेलो खेर अय्हर् बी एङ्यीमा र्हङ्चेनो स्येबल मुब। 2 हुजुरी खब बीम ङोन्ग्यम्नो ङ्यीमात फीलीप्पीकी म्हीमाचे दुख पीन्ज्यीम् पेत्न लज्यी पङ्बे तम् एङ्यीमाचेएनो स्येःबल मुब। होले बीरोद् स्य्हेङ्लेनो पर्मेस्वर्चे ङ्यीमात आर् न्हङ्जेत्पल तज्यीम् ङ्यीमाचे एङ्यीमात ज्यबे सम्तर् स्येत्ज्यी। 3 ङ्यीमाचे लोप्पे तम् न्ह भ्युले य्हीन्ब, न्ह असुद्द तखइ बी य्हीन्ब, न्ह लुपरी य्हीन्ब। 4 तर ङ्यीमा पर्मेस्वर्की थुः अनुसार तम् लब, तलेपङ्सम् पर्मेस्वर्चे ङ्यीमात बीस्वास् स्य्हेङ्जेत्ज्यीम् ज्यबे सम्तर् स्येत्पे जीम्मा न्हङ्जेत्ज्यी। ङ्यीमा म्हीमात तङ्न लबरी अय्हीन्, तर सेम्की तम् जाच स्य्हेङ्जेत्पे पर्मेस्वर्त तङ्न लबरी तम् लब। 5 एङ्यीमाचे स्येबलनो मुब, ङ्यीमाचे एङ्यीमात भ्युले व्हम्ज्यीम् तम् अल, ओसेम् तए यङ्बे लोभ लज्यीमएनो तम् अल। चु तम्की साक्षी पर्मेस्वर् मुब। 6 ङ्यीमाचे खेमेएनो खल ग्यम्सेएनो स्य्हेस म्हइबल अरे, न्ह एङ्यीमा ग्यम्से म्हइज्यी न्ह ल्हो-ल्होमा ग्यम्से म्हइज्यी। य्हीन्बरीम् ख्रीस्ट्की प्रेरीत तबल तज्यीम् ङ्यीमाचे एङ्यीमाइ जोरी अधीकार् लब खम्स्येल। 7 तर र्हङ्की कोलमात स्य्हप्तो स्य्हेङ्बे अम र्हङ्ले एङ्यीमाकी गुङ्री ङ्यीमा नम्र तज्यी। 8 ङ्यीमाचे एङ्यीमात य्हक्को म्होइबल तज्यीम् एङ्यीमात पर्मेस्वर्की ज्यबे सम्तर्कीनो स्येत्परी अय्हीन्, तर ङ्यीमा र्हङ्की जीवन पीन्बरीएनो तयार मुबल। 9 ङइ र्होमा, ङ्यीमाचे य्हक्को दुखले लक् स्य्हेङ्बल एङ्यीमात व्हल् मुब, ङ्यीमात तोःबे स्य्हेमा एङ्यीमात र्हीत्अतोखइ पङ्ज्यीम् ङ्यीमाचे दीन् म्हुन् लक् स्य्हेङ्ज्यीम् पर्मेस्वर्की ज्यबे सम्तर् एङ्यीमात स्येत्ज्यी। 10 ङ्यीमा बीस्वासीमाकी ङोन्ग्यम् खले पबीत्रतेङ् धर्मी ओसेम् तारीएनो दोस् अरेनले ब्रब मुबल। चु तम् एङ्यीमातेङ् पर्मेस्वर्चेएनो खेम्जेत्प। 11 एङ्यीमाचेएनो स्येबल मुब, अपचे र्हङ्की कोलमात स्य्हेङ्ब र्हङ्बे ब्यबहार् ङ्यीमाचे एङ्यीमा जम्मत स्य्हेङ्ज्यी। 12 ङ्यीमाचे एङ्यीमात अर्ती पीन्ब, आर् पीन्ब ओसेम् लोप्प, ओसेम् एङ्यीमाचे पर्मेस्वर्त तङ्न लबे जीवन् सोथोब, तलेपङ्सम् थेङ्चे एङ्यीमात थेङ्की य्हुल्तेङ् महीमारी ङ्होत्जेत्प। 13 ङ्यीमाचे एङ्यीमात पर्मेस्वर्की सम्तर् स्येत्पे बेलोरी एङ्यीमाचे हुजुत म्हीचे लोप्पे तम् अय्हीन् पर्मेस्वर्चे लोप्पे तम् य्हीन्ब बी स्वीकार् लज्यी। होत्तज्यीम् ङ्यीमा पर्मेस्वर्त खेम पङ्लेनो व्होर्छ्ये पीन्स्यीनो टीब। हुजु पर्मेस्वर्की देमेन्की फ्रोइ मुबल। हुजु फ्रोइचे एङ्यी बीस्वासीमान्हङ् लक् स्य्हेङ्टीब। 14 ङइ र्होमा, एङ्यीमाएनो येसु ख्रीस्ट्त बीस्वास् स्य्हेङ्बे यहुदीयाकी पर्मेस्वर्की मन्डलीमा र्हङ्ब तबल मुब। तलेपङ्सम् यहुदीयाकी मन्डलीमाचे थेङ्यीमाकी र्हङ्की यहुदी म्हीमा ग्यम्सेनो दुख नाब र्हङ्ले एङ्यीमाचेएनो र्हङ्की म्हीमा ग्यम्से दुख नाबल मुबल। 15 हुजु यहुदीमाचे प्रभु येसुतेङ् अगम्बक्तमात सेत्ज्यी ओसेम् ङ्यीमातएनो ल्हब्ज्यी। थेङ्यीमाचे पर्मेस्वर्त सेम्री अङ्यीबे लक् स्य्हेङ्ज्यी ओसेम् जम्म म्हीमाइ बीरोद् स्य्हेङ्ब। 16 थेङ्यीमाचे ङ्यीमात यहुदी अय्हीन्बे म्हीमात मुक्ती यङ्बे ज्यबे सम्तर् स्येत्पे लक् स्य्हेङ् अपुङ्ब म्हइज्यी। चोले थेङ्यीमाचे झेन् य्हक्को पाप स्य्हेङ्बोर्ज्यी। तर ज्युःरी पर्मेस्वर्की बोमो थेङ्यीमाइ जोरी खबल मुब। पावलचे थेस्लोनीकीमात खतु लबरी य्हक्को सेम् लबल 17 ङइ र्होमा, एङ्यीमा ग्यम्से फेःज्यीम् य्हम्बकी ल्हीरी म्रङ्अम्यङ्लएनो ङ्यीमात सेम् य्हङ्सेनो एङ्यीमाइ म्होइब खज्यीम् एङ्यीमातेङ् देबेएनो खतु लबे सेम् य्हक्कोनो मुबल। 18 ओसेम् ङ्यीमा एङ्यीमाज दोज्यीम् खब म्हइज्यी। ङ पावल य्हक्को ख्यप् खब म्हइज्यी, तर सैतान्चे ङ्यीमात र्होत्ज्यी। 19 ङ्य्हङ्माकी प्रभु येसु दोःज्यीम् ब्योन्युजेत्पे बेलोरी थेङ्की ङ्होन्सङ् ङ्यीमाकी आस्तेङ् तङ्ब ओसेम् स्य्हेस यङ्बे मुकुट् एङ्यीमानो य्हीन्ब। 20 देमेन्नो एङ्यीमानो ङ्यीमाकी तङ्बतेङ् स्य्हेस य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.