१ थेस्लोनीकी 1 - पश्चिम तामाङ1 ङ पावल ओसेम् सीलासतेङ् तीमोथी ग्यम्से पर्मेस्वर् अपतेङ् प्रभु येसु ख्रीस्ट्त बीस्वास् स्य्हेङ्बे थेस्लोनीकीइ मन्डलीकी म्हीमात अनुग्रहतेङ् सान्ती। थेस्लोनीकीमाकी जीवन्तेङ् बीस्वास् 2 ङ्यीमाचे एङ्यीमा जम्मइ लागीरी पर्मेस्वर्त खेम पङ्लेनो व्होर्छ्ये पीन्ब, ओसेम् ङ्यीमाचे प्रार्थना स्य्हेङ्बे बेलोरी खेमा पङ्लेनो एङ्यीमात व्हल् लब। 3 ङ्य्हङ्माकी पर्मेस्वर् अपइ ङोन्ग्यम् एङ्यीमाचे ङ्य्हङ्की प्रभु येसु ख्रीस्ट्री बीस्वास् लज्यीम् स्य्हेङ्बे लक्तेङ् म्होइज्यीम् स्य्हेङ्बे लक् ओसेम् एङ्यीमाचे थेङ्री धैर्य लज्यीम् थेन्बे आस्त ङ्यीमाचे व्हल् लब। 4 र्होमा, ङ्यीमाचे स्येबल मुब, एङ्यीमात पर्मेस्वर्चे म्होइजेत्ज्यीम् थेङ्की म्हीमा तबरी दम्जेत्पल य्हीन्ब। 5 तलेपङ्सम् ङ्यीमाचे एङ्यीमात स्येत्पे सम्तर् छीःकीनो अय्हीन्, तर सक्तीतेङ् पबीत्र आत्मा ग्यम्से स्येत्पे देमेन्की सम्तर् य्हीन्ब। एङ्यीमातेङ् बक्च्य मुबे बेलोरी ङ्यीमाचे एङ्यीमात खले र्हो लज्यी बी एङ्यीमाचे स्येब। 6 एङ्यीमाचेएनो ङ्यीमातेङ् प्रभुचे र्हङ्लेनो म्हीमा ग्यम्से य्हक्को दुख यङ्मेएनो पबीत्र आत्माचे न्हङ्बे सम्तर्त तङ् तङ्ज्यीम् ग्रहन् स्य्हेङ्ज्यी। 7 होत्तज्यीम् एङ्यीमा माकेडोनीयातेङ् अखैयारी मुबे जम्मनो बीस्वासीमाकी लागीरी नमुना तज्यी। 8 तलेपङ्सम् एङ्यीमाचे प्रभुइ फ्रोइ माकेडोनीयातेङ् अखैयारीकीनो अय्हीन्, तर पर्मेस्वर्री एङ्यीमाचे स्य्हेङ्बे बीस्वास् खन गोदोब्नो ग्लामारी ठम्बल मुब। हुजुइ बारेरी ङ्यीमात ल्हो-ल्हो तएनो पङ्अथो। 9 तलेपङ्सम् ङ्यीमात एङ्यीमाचे खले स्वागत स्य्हेङ्ज्यी, ओसेम् ख्लमात तेन्ब पीत्ज्यीम् सोम्बोतेङ् देमेन्की पर्मेस्वर्की सेवा स्य्हेङ्बरी खज्यी पङ्बे तम् हुजु जम्मनो म्हीमाचे पङ्ब। 10 ओसेम् थेङ्यीमाचे चोलेएनो पङ्ब, एङ्यीमा पर्मेस्वर्चे स्यीब ग्यम्से सोनलजेत्पे थेङ्की ज येसु स्वर्ग ग्यम्से दोःज्यीम् ब्योन्युब पङ्ज्यीम् ब्रेन्टीब। ओसेम् खस्येकी सजाय ग्यम्से ङ्य्हङ्त येसुचेनो थर्न लजेत्प। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.