१ पत्रुस 5 - पश्चिम तामाङएल्डर्मातेङ् ब्योन् म्हीमात पीन्बे सल्लह 1 ङएनो मन्डलीइ एल्डर् ओसेम् ख्रीस्ट्चे नाजेत्पे दुख म्रङ्बे म्ही, ओसेम् पर्मेस्वर्चे ङोन्जेत्स्येकी महीमारी ङएनो तस्ये तज्यीम् देरेम् ङ एङ्यीमान्हङ् मुबे मन्डलीइ एल्डर्मात फ्या लज्यीम् पङ्ब। 2 गोर्तेन्चे ग्यु बगल ज्यनले छब र्हङ्ले पर्मेस्वर्चे एङ्यीमाकी जीम्मरी न्हङ्जेत्पे म्हीमात ज्यनले च्याको। एङ्यीमाचे चु लक् कर्ले अय्हीन्, तर पर्मेस्वर्की थु: अनुसार् सेम् य्हङ्सेनो स्य्हेङो, टङइ लोभ्री अय्हीन् तर तङ्तङ्ज्यीम् स्य्हेङो। 3 एङ्यीमाकी जीम्मरी मुबलमात हक् लब अय्हीन्, तर थेङ्यीमाकी ङोन्ग्यम् र्हङ् नमुन तउ। 4 ओसेम् एङ्यीमाचे गोदोब्न्हङ् ङ्हच्छ्यङ् गोर्तेन् र्हङ्बे येसु ख्रीस्ट् ब्योन्युजेत्पतेङ् खेमेएनो सर्ब अम्हबे महीमाकी क्रेःकी यङ्स्ये मुब। 5 होलेनो ब्योन् अमकोलमातेङ् छमे अमकोलमा मन्डलीइ एल्डर्माकी तम् ङ्येन्ज्यीम् ब्रथोब। ओसेम् एङ्यीमा जम्मचेनो नम्र तज्यीम् गीःचे गीःकी स्य्हप्तो स्य्हेङ्थोब। तलेपङ्सम् धर्म छ्येःचे चोले पङ्ब, “पर्मेस्वर्चे घमन्डी म्हीमाकी बीरोद् स्य्हेङ्जेत्प, तर नम्र म्हीमात अनुग्रह स्य्हेङ्जेत्प।” 6 होत्तज्यीम् पर्मेस्वर्की सक्तीसाली फ्यारी टीज्यीम् एङ्यीमाचे र्हङ्त नम्र स्य्हेङो, ओसेम् एङ्यीमात थेङ्चे तेत् लजेत्बे बेलोरी ङ्हच्छ्यङ् स्य्हेस न्हङ्जेत्स्ये मुब। 7 एङ्यीमाकी जम्मनो छेर्बमा थेङ्की फ्यारी सोप्तीपीनो, तलेपङ्सम् थेङ्चे एङ्यीमाकी वास्त स्य्हेङ्जेत्प। 8 छोर्ज्यीम् चोङ्ले टीउ, एङ्यीमाकी सत्तुर् सैतान्, ङ्हर्बे ता र्हङ्ले खल्त स्यप्ल ओसेम् चम्यङ्ल पङ्ज्यीम् दज्यीम् ब्रटीब। 9 बीस्वास्री कोङ्ज्यीम् सैतान्की बीरोद् स्य्हेङो, तलेपङ्सम् एङ्यीमात तटीब र्हङ्बे दुखमी जम्बुलीङ्की जम्मनो ग्लामारी मुबे ल्हो-ल्हो बीस्वासीमातएनो तटीब पङ्बे तम् एङ्यीमाचे स्येःब। 10 जम्मनो अनुग्रह न्हङ्बे पर्मेस्वर्चे ख्रीस्ट्री र्हङ्की खेमेएनो अबेबे महीमा जुबे लागीरी एङ्यीमात ङ्होत्जेत्पल मुब। एङ्यीमाचे य्हम् दुख नाब बीसेम् थेङ्चेनो एङ्यीमात छार् स्य्हेङ्जेत्स्ये मुब, ओसेम् सक्ती न्हङ्ज्यीम् य्हङ्य्होङ् अतनले कोङ्नलजेत्स्ये मुब। 11 खेम पङ्लेनो सक्ती थेङ्लनो तखइ। आमेन्। 12 बीस्वासीलो अले सीलासत र्हो लबुङ्ज्यीम् ङचे चु तुन्ज चीठी एङ्यीमात ब्रीबल मुब। ङचे चु जम्मनो तम्मा पर्मेस्वर्की देमेन्की अनुग्रहकी गवाही पीन्बरी ओसेम् एङ्यीमात आर् पीन्बरी ब्रीबल य्हीन्ब। चु अनुग्रहरी एङ्यीमा कोङ्नले टीउ। 13 पर्मेस्वर्चे एङ्यीमात र्हङ्ले दम्जेत्पे बेबीलोन्की बीस्वासी र्होमाचे एङ्यीमात लस्सो पीत्खबल मुब, ओसेम् ङइ ज र्हङ्बे मर्कुस्चेएनो एङ्यीमात लस्सो पीत्खबल मुब। 14 एङ्यीमाचे गीःचे गीःत म्होइज्यीम् लस्सो पङो। एङ्यी ख्रीस्ट्री मुबलमा जम्मतनो सान्ती। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.