१ पत्रुस 4 - पश्चिम तामाङपर्मेस्वर्की लागीरी सोबल 1 ख्रीस्ट्चे ल्हीरी दुख नाजेत्ज्यी, होलेनो एङ्यीमाचे थेङ्चे र्हङ्ले दुख नाबे सेम् थो:ज्यीम् आर् लथोब, तलेपङ्सम् ल्हीरी दुख नाबलचे पाप स्य्हेङ्ब पीत्लाबल तब। 2 होत्तज्यीम् देरे य्हङ्से थेङ्यीमाचे सोगदे म्हीइ अज्यबे सेम् अनुसार अय्हीन्, तर पर्मेस्वर्की थु: अनुसार सोब। 3 ङोन्ग्यम्की बेलोरी एङ्यीमाचे पर्मेस्वर्त अस्येबे म्हीमाचे र्हङ्ले बेलो बेन लब मुबल। एङ्यीमाचे व्यभीचार् स्य्हेङ्ज्यीम्, प्रो नाबतेङ् नापीन्बे सेम् थोज्यीम्, रक्सी थुङ्ज्यीम्, ङ्य्हेज्यीम् मनमोज्यी लज्यीम्, रक्सीइ डोन् स्य्हेङ्ज्यीम् ओसेम् नइबे ख्लामात तेन्ज्यीम् बेलो बेन लब मुबल। 4 देरेम् एङ्यीमाचे पर्मेस्वर्त अस्येबे म्हीमातेङ् बक्च्य होतेबे अज्यबे लक् अस्य्हेङ्बल म्रङ्ज्यीम् थेङ्यीमा अचम्म तब, ओसेम् थेङ्यीमाचे एङ्यीमाकी नीन्द स्य्हेङ्ब। 5 तर सोम्बोमातेङ् स्यीबलमाकी न्याय स्य्हेङ्जेत्परी तयार्ले मुबे पर्मेस्वर्त थेङ्यीमाचे लेखा पीन्थोस्ये मुब। 6 होत्तज्यीम् थेङ्यीमाचे जम्बुलीङ्की ल्हो-ल्हो म्हीमाचे र्हङ्ले ल्हीरी न्याय यङ्लेनो आत्मारी पर्मेस्वर् र्हङ्ले सोब खम्खइ पङ्ज्यीम् स्यीज्यीम् य्हर्बलमातएनो ज्यबे सम्तर् स्येत्पल मुबल। 7 जम्बुलीङ्की जम्मनो स्हेमा बेबे बेलो ज्यतङ् खबल मुब। होलेतज्यीम् एङ्यीमा प्रार्थनाकी लागीरी सेम् दुल्ज्यीम् चोङ्ले टीउ। 8 जम्मन्हङ्री ङ्हच्छ्यङ् तम्मी र्हङ्की सेम् य्हङ्सेनो गीःचे गीःत म्होइज्यीम् टीब य्हीन्ब, तलेपङ्सम् म्होइबचे य्हक्को पापमा गप्प। 9 ओसेम् एङ्यीमाचे र्हङ् र्हङ्की दीम्री गी:चे गी:त गन्गन अलनले स्य्हेस लज्यीम् क्योङो। 10 पर्मेस्वर्की अनुग्रहरी जम्मचेनो थोचे थोइ बर्दान्की जीम्म यङ्बल मुब, र्हङ्चे यङ्बे वर्दान्त गीःचे गीःत र्हो लबरी ज्यनले कोलो। 11 प्रचार स्य्हेङ्बे बर्दान् यङ्बलचे पर्मेस्वर्की फ्रोइ प्रचार स्य्हेङ्थो:ब, सेव स्य्हेङ्ब पङ्बलचे पर्मेस्वर्चे न्हङ्जेत्पे सक्ती ग्यम्से स्य्हेङ्थो:ब। होलेनो जम्म तम्री येसु ख्रीस्ट् ग्यम्से पर्मेस्वरलनो तोप्प तखइ। ओसेम् थेङ्तनो खेम पङ्लेनो महीमातेङ् सक्ती तखइ! आमेन्। ख्रीस्ट्त बीस्वास् स्य्हेङ्बल तज्यीम् यङ्बे दुख 12 म्होइबे र्होमा, मेचे क्रोब र्हङ्बे दुखचे एङ्यीमाकी जाच तबतेङ तातनो तब र्हङ्ले अचम्म थतउ। 13 तर ख्रीस्ट्चे नाजेत्पे दुख जुज्यीम् एङ्यीमाचेएनो नाम्यङ्बल मुब पङ्ज्यीम् य्हक्को तङो। तलेपङ्सम् थेङ्की ङ्हच्छ्यङ् महीमा म्रङ्खबतेङ् एङ्यीमा तङ्म्यङ्ल। 14 एङ्यीमाचे ख्रीस्ट्त बीस्वास् स्य्हेङ्ब पङ्ज्यीम् म्हीमाचे एङ्यीमाकी नीन्द स्य्हेङ्ब पङ्सम् एङ्यीमाचे र्हङ्त पर्मेस्वर् ग्यम्से मोलम् यङ्बल बी म्हेनो। तलेपङ्सम् एङ्यीमातेङ् पर्मेस्वर्की महीमाकी आत्मा स्य्हुजेत्प। 15 एङ्यीमाचे दुख यङ्लेनो खल्चेएनो म्ही सेत्पल, य्हो लबल, अज्यबे लक्मा स्य्हेङ्बल वुइ र्होइ लक्री या जङ्बल तज्यीम् दुख यङ्बल अतखइ। 16 तर ख्रीस्ट्त बीस्वास् स्य्हेङ्बल तज्यीम् दुख नाथोबतेङ् थपेतो। तर एङ्यीमा ख्रीस्ट्की म्हीमा तबल तज्यीम् पर्मेस्वर्त तोपो। 17 तलेपङ्सम् न्यायकी बेलो खबल मुब, ओसेम् पर्मेस्वर्चे र्हङ्की म्हीमा य्हङ्से न्याय स्य्हेङ्ब तीप्जेत्स्ये मुब। ओसेम् ङोन्ग्यम् ङ्य्हङ्मालमी न्याय तब पङ्सम् पर्मेस्वर्की ज्यबे सम्तर्त अङ्येन्बे म्हीमालमी झेन् खतेबे लोङ्बे न्याय तल? 18 धर्म छ्येरी चोले ब्रीबल मुब, “धर्मी म्हीत थर्बरी गारो तब पङ्सम् पर्मेस्वर्त अङ्येन्बे पापीमालमी झेन् गदे गारो तल?” 19 होत्तज्यीम् पर्मेस्वर्की थुः अनुसार् दुख नाबलमाचे ज्यबे लक् स्य्हेङ्स्यीनो टीखइ। ओसेम् थेङ्यीमात स्य्हेङ्जेत्पे पर्मेस्वर्री थेङ्यीमाचे र्हङ्त सोप्तीखइ। थेङ्चे र्हङ्की बाचा खेम पङ्लेनो टोप्ले स्य्हेङ्जेत्प। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.