१ पत्रुस 3 - पश्चिम तामाङर्हेम्बोमातेङ् म्रीङ्मा 1 बीस्वासी म्रीङ्मा, एङ्यीमा र्हङ्की र्हेम्बोमाइ अधीन्री टीथोब। होले लबतेङ् पर्मेस्वर्की फ्रोइत बीस्वास् अस्य्हेङ्बे र्हेम्बोमाचेएनो एङ्यीमाकी बानी ब्यहोर् म्रङ्ज्यीम् एङ्यीमाचे तेए अस्येत्लेएनो बीस्वास् स्य्हेङ्स्ये मुब। 2 एङ्यीमाकी चोखो जीवन्तेङ् एङ्यीमाचे पर्मेस्वर्त स्य्हेङ्बे स्य्हेस म्रङ्ज्यीम् थेङ्यीमाचे बीस्वास् स्य्हेङ्स्ये मुब। 3 एङ्यीमा ल्ही:री दो पट्टीचे क्र बा छ्ये:ज्यीम्, म्हर् म्हुइमा येन्ज्यीम् ओसेम् य्हक्को सेइ फाबे गोइलमा येन्ज्यीम् थछ्येको। 4 बरु एङ्यीमा म्हज्यीम् अय्हर्बे नम्रतेङ् सान्त आत्माचे न्हङ् ज्यब तउ। हुजुमी पर्मेस्वर्की ङोन्री य्हक्को ज्यबे तम् य्हीन्ब। 5 पर्मेस्वर्त तेन्बे दङ्बोइ पबीत्र अमकोलमाचे र्हङ्की र्हेम्बोमाकी अधीन्री टीज्यीम् र्हङ्त ज्यब स्य्हेङ्ज्यी। 6 सारा होतेबे अमकोल मुबल, थेचे र्हङ्की र्हेम्बो अब्राहामत मालीक् पङ्ज्यीम् र्हेम्बोइ अर्ती ङ्येन्ज्यी। एङ्यीमा तातएनो अलोङ्नले ज्यबे लक् स्य्हेङ्ज्यी पङ्सम् एङ्यीमा साराइ जमेमा य्हीन्ब। 7 र्हेम्बोमा, एङ्यीमाचेएनो र्हङ्की म्रीङ्मात ज्यबे ब्यबहार स्य्हेङ्ज्यीम् स्य्हेस स्य्हेङो, तलेपङ्सम् एङ्यीमाकी म्रीङ्मा एङ्यीमागदे बङ्ज्येन् अरेलेनो पर्मेस्वर्चे न्हङ्बे खेमेनो अबेबे जीवन् एङ्यी म्रीङ् र्हेम्बोमा जम्मचेनो यङ्स्ये मुब। एङ्यीमाकी प्रार्थनारी ताचेएनो उन्न अलखइ पङ्ज्यीम् चोले स्य्हेङो। ज्यबे लक् स्य्हेङ्बतेङ् खबे दुख 8 ज्युरी ङ पङ्ब, एङ्यीमा सेम् गी: तज्यीम् गीचे गीइ दुख गोउ। दीम् गी:की म्हेम्यत र्हङ्ले गी:चे गी:त म्होइगो ओसेम् दयालुतेङ् नम्र तउ। 9 एङ्यीमात अज्यब स्य्हेङबलमात दोज्यीम् एङ्यीमाचे अज्यब थस्य्हेङो, एङ्यीमात पेत्न लबलमात एङ्यीमाचे दोज्यीम् थेङ्यीमात पेत्न थलउ। बरु थेङ्यीमात मोलम् पीनो तलेपङ्सम् एङ्यीमात पर्मेस्वर्चे होले स्य्हेङ्बे लागीरी ङ्होत्जेत्पल य्हीन्ब, ओसेम् एङ्यीमाचे मोलम् यङ्स्ये मुब। 10 तलेपङ्सम् धर्म छ्ये:चे पङ्ब, “एङ्यीमाचे जीवन्त म्होइसम् ओसेम् सुखले टीब म्हेन्सम्, एङ्यीमाचे दुस्ट तम्म पङ्बनो अत ओसेम् भ्यु पङ्ब अत। 11 एङ्यीमाचे अज्यबे लक् स्य्हेङ्ब पीत्ज्यीम् ज्यबे लक् स्य्हेङ्थोब। एचे सेम् य्हङ्सेनो जम्मत थुन्न लज्यीम् टीबे लक् स्य्हेङ्थोःब। 12 तलेपङ्सम् प्रभुचे धर्मीमात स्हीःजेत्प ओसेम् थेङ्यीमाचे स्य्हेङ्बे प्रार्थना सेन्जेत्प। तर दुस्ट लक् स्य्हेङ्बलमा ग्यम्सेमी थेङ् ग्यब् दोजेत्प।” 13 ओसेम् एङ्यीमाचे ज्यबे लक् स्य्हेङ्बे सेम् थो:ब पङ्सम् खल्चे एङ्यीमात न्होङ्नलब? 14 तर एङ्यीमाचे ज्यबे लक् स्य्हेङ्माएनो दुख यङ्ज्यी पङ्सम् एङ्यीमात पर्मेस्वर्चे मोलम् न्हङ्स्ये मुब। होत्तज्यीम् खल्तेङेनो थलोङो ओसेम् थछेरो। 15 बरु ख्रीस्ट्त एइ जीवनकी प्रभु म्हेन्ज्यीम् तेनो। ओसेम् खल्चे पङ्लेनो एङ्यीमाचे थेन्बे आस्की बारेरी ङ्योत्ज्यी पङ्सम् खेम पङ्लेनो स्येत्परी टोप् तज्यीम् टीउ। 16 तर एङ्यीमाचे होले स्येत्पे बेलोरी नम्र तज्यीम् स्य्हेस लज्यीम् स्येतो। ओसेम् एङ्यीमाचे ख्रीस्ट्की लीप्चे ब्रज्यीम् ज्यबे ब्यहोर् स्य्हेङ्बल म्रङ्ज्यीम् एङ्यीमाकी बीरोद् लबलमातेङ् एङ्यीमात नीन्द स्य्हेङ्बलमा थेङ्यीमा र्हङ्नो पेत्खइ पङ्ज्यीम् एङ्यीमाइ बीबेक्त चोखो थेनो। 17 तलेपङ्सम् पर्मेस्वर्की थु:नो य्हीन्सम्, अज्यबे लक् स्य्हेङ्ज्यीम् दुख नाब बीमम् ज्यबे लक् स्य्हेङ्ज्यीम् दुख नाब ज्यब य्हीन्ब। 18 तलेपङ्सम् खेम पङ्लेनो योनले ख्रीस्ट् पाप्माकी लागीरी तीक्ख्यप् स्यीपीन्जेत्ज्यी। थेङ्चे पाप स्य्हेङ्अजेत्लेनो एङ्यीमात पर्मेस्वर्ज बबरी एङ्यी पापीमाकी लागीरी स्यीपीन्जेत्ज्यी। थेङ् ल्हीरी स्यीजेत्ज्यी, तर आत्मारी सोम्बो तजेत्ज्यी। 19 ओसेम् हुजु आत्मरीनो थेङ् आत्मामा च्युप्पे ग्लारी स्ये:ज्यीम् प्रचार स्य्हेङ्जेत्ज्यी। 20 हुजु आत्ममामी नोआचे ङ्हच्छ्यङ् दोङ्ग स्य्हेङ्बे बेलोरी पाप ग्यम्से दोःमुवा बी पर्मेस्वर्चे धैर्य लज्यीम् ब्रेन्जेत्पे बेलोरी पर्मेस्वर्त अङ्येन्बे म्हीमाकी आत्मामा मुबल। दोङ्गन्हङ् मुबे म्ही ब्रेत्कीनो ङ्हच्छ्यङ् भल् ग्यम्से थर्ज्यी। 21 हुजु यीचे बप्तीस्माकी सङ्केत् स्य्हेङ्ब, हुजुचे देरेम् एङ्यीमात थर्नलब। चु ल्हीइ ख्रीती ख्रुप र्हङ्ब अय्हीन्, तर चोखो बीबेक्चे पर्मेस्वर्तेङ् स्य्हेङ्बे बाचा य्हीन्ब। येसु ख्रीस्ट् स्यीजेत्ज्यीम् सोजेत्पल ग्यम्से एङ्यीमा थर्ब। 22 थेङ् स्वर्गरी स्येजेत्ज्यी, ओसेम् देरे पर्मेस्वर्की केत् पट्टीचे स्य्हेस यङ्बे ग्लारी स्य्हुजेत्ज्यी। ओसेम् जम्मनो स्वर्गइ स्वर्गदुत्मा, स्वर्गइ अधीकार्तेङ् सक्ती मुबे आत्मामा थेङ्की अधीन्री मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.