१ पत्रुस 2 - पश्चिम तामाङसोम्बो यङ्बतेङ् पबीत्र जाती 1 होत्तज्यीम् एङ्यीमाचे जम्मनो अज्यबे ब्यबहार्मा, र्होत लुब, छल्-कपट स्य्हेङ्ब, ओसेम् स्हेर्बतेङ् नीन्द स्हेङ्ब पीतो। 2 छार् न्हबे कोलमाचे ङ्य्हे थुङ्ब म्हइब र्हङ्ले एङ्यीमाचे पर्मेस्वर्की देमेन्की फ्रोइत म्हयो। ओसेम् हुजु फ्रोइ यङ्ज्यीम् एङ्यीमा छर्स्ये मुब ओसेम् थर्स्ये मुब। 3 तलेपङ्सम् प्रभु गदे दयलु मुब पङ्बे तम् एङ्यीमाचे ङोन्नो स्येःबल मुब। 4 एङ्यीमा प्रभु येसुज खोउ, थेङ् सोम्बो युङ्ब य्हीन्ब। म्हीमाचे थेङ्त लक् अतबल पङ्ज्यीमा ख्लाज्यी, तर पर्मेस्वर्चेमी थेङ्त दम्जेत्ज्यीम् य्हक्को सेइकी युङ्ब स्य्हेङ्जेत्ज्यी। 5 ओसेम् एङ्यीमाएनो पर्मेस्वर्चे आत्मीक् दीम् स्य्हेङ्जेत्परी कोल्जेत्पे सोम्बो युङ्बमा र्हङ्ब तज्यीम् खोउ। एङ्यीमाचे येसु ख्रीस्ट् ग्यम्से पर्मेस्वर्त सेम्री ङ्यीबे आत्मीक् ठा पीन्बे पबीत्र लम्बुमाइ लक् स्य्हेङ्स्ये मुब। 6 तलेपङ्सम् धर्म छ्येःचे पङ्ब, “च्याको, ङ सीयोन्री ङचे दम्बे य्हक्को सेइ ङ्यीबे स्हुर् युङ्ब थेन्ब, ओसेम् खल्चे थेङ्त बीस्वास् स्य्हेङ्ब, थे खेमेएनो पेत्थोःस्ये अरे।” 7 होत्तज्यीम् बीस्वास् स्य्हेङ्बलमाकी लागीरी चु युङ्ब य्हक्को सेइल य्हीन्ब। तर बीस्वास् अस्य्हेङ्बलमाकी लागीरीमी, “दीम् स्य्हेङ्बे म्हीमाचे लक्अत पङ्ज्यीम् ख्लाबे युङ्ब स्हुर् युङ्ब तज्यी।” 8 ओसेम्, “चुनो म्हीमात थोक्स्येकी युङ्ब य्हीन्ब, चु युङ्बचे लज्यीम् म्हीमा गुर्स्ये मुब।” पर्मेस्वर्की फ्रोइत अङ्येन्बल तज्यीम् थेङ्यीमा थोक्स्ये मुब। थेङ्यीमाकी लागीरी चोतेब तबुङ्बे सेम् पर्मेस्वर्ल मुबल। 9 तर एङ्यीमामी पर्मेस्वर्चे दम्जेत्पे म्हीमा, ग्यल्बोइ लम्बुमा, ओसेम् पबीत्र जाती य्हीन्ब, एङ्यीमा पर्मेस्वर्की र्हङ्की म्हीमा य्हीन्ब। थेङ्चे एङ्यीमात थेङ्की अचम्मइ लक्माकी बारेरी प्रचार स्य्हेङ्बरी म्हुन्दुङ् ग्यम्से अचम्मइ य्हल्री नोम्खजेत्ज्यी। 10 तीख्यप्की बेलोरी एङ्यीमा तएनो अय्हीन्ब मुबल, तर देरेम् पर्मेस्वर्की म्हीमा तबल मुब। तीख्यप्की बेलोरी एङ्यीमाचे पर्मेस्वर्की कृपा यङ्बल अरेबल, देरेम् थेङ्की कृपा यङ्बल मुब। सासक्मातेङ् मालीक्माकी अधीन्री टीब 11 म्होइबे र्होमा, चु जम्बुलीङ्री एङ्यीमा ल्हो-ल्हो य्हुल्की म्हीमा ओसेम् र्होइ य्हुल्री य्हम्की लागीरी टीबे म्हीमा र्हङ्ब य्हीन्ब। ङ एङ्यीमात फ्या लब, ल्हीःकी लागीरी र्हङ्की सेम्चे म्हेन्बे अज्यबे लक्मा थस्य्हेङो। होतेबे सेम् खेम पङ्लेनो आत्माइ बीरुद्दरी तब। 12 ओसेम् ख्रीस्ट्त बीस्वास् अस्य्हेङ्बे म्हीमाकी गुङ्री एङ्यीमाकी ब्यबहार्मा ज्यब तखइ। तलेपङ्सम् थेङ्यीमाचे एङ्यीमात अज्यबे तम्तेङ् लक् स्य्हेङ्बलमा पङ्ज्यीम् एङ्यीमाकी बीरुद्दरी तम् पङ्बतेङ् हुजु बेलोरी थेङ्यीमाचे एङ्यीमाकी ज्यबे लक्मा म्रङ्खइ, ओसेम् पर्मेस्वर् न्याय स्य्हेङ्बरी ब्योन्युबे बेलोरी थेङ्यीमाचे थेङ्त तोप्खइ। 13 प्रभुइ लागीरी म्हीमाकी सासन्की अधीन्री टीउ। ग्यल्बोइ अधीन्री टीउ, थेतेङ् गोदोब्न्हङ्री ङ्हच्छ्यङ् अधीकार् तब। 14 ओसेम् हाकीम्माकी अधीन्रीएनो टीउ, तलेपङ्सम् अज्यबे लक् स्य्हेङ्बलमात सजाय पीन्बरी ओसेम् ज्यबे लक् स्य्हेङ्बलमात तोप्पे लागीरी ग्यल्बोचे दम्जेत्पल तब। 15 तलेपङ्सम् एङ्यीमाचे स्य्हेङ्बे ज्यबे लक् ग्यम्से मुर्ख म्हीमाचे अगोननो तम् पङ्ब पीत्खइ पङ्बे सेम् पर्मेस्वर्ल मुब। 16 खलइ अधीन्रीएनो टीअथोबे म्हीमाचे र्हङ्ले र्हङ्की जीवन् सोउ, तर होले सोम्यङ्ज्यी पङ्ज्यीम् एङ्यीमाचे अज्यबे लक्मा स्य्हेङ्ब थम्हयो। तर पर्मेस्वर्की बाना तउ। 17 जम्मनो म्हीमात स्य्हेस स्य्हेङो, ओसेम् बीस्वासी र्होमात म्होइगो। पर्मेस्वर्तेङ् लोङो, ओसेम् ग्यल्बोत स्य्हेस स्य्हेङो। ख्रीस्ट्चे र्हङ्ले ङ्य्हङ्माचेएनो दुख नाथोब 18 योक्पोमा र्हङ्की मालीक्की अधीन्री टीथोब, ओसेम् थेङ्यीमात स्य्हेस स्य्हेङ्थोब। एङ्यीमात दय स्य्हेङ्बे मालीक्मातकीनो अय्हीन्, तर दय अस्य्हेङ्बे मालीक्मातएनो स्य्हेस स्य्हेङो। 19 एचे अज्यबे लक् तएनो अस्य्हेङ्मएनो ङ्हच्छ्यङ् दुख नाब पङ्सम् पर्मेस्वर्चे एत मोलम् न्हङ्जेत्स्ये मुब, तलेपङ्सम् एचे हुजु पर्मेस्वर्की थुः अनुसार्नो य्हीन्ब बी म्हेन्ब। 20 तलेपङ्सम् एचे अज्यबे लक् स्य्हेङ्ज्यीम् दुख यङ्बतेङ् नाप ङ्हच्छ्यङ् तम् अय्हीन्, तर एचे ज्यबे लक् स्य्हेङ्ज्यीमएनो दुख यङ्बतेङ् नासम् पर्मेस्वर् एतेङ् तङ्जेत्स्ये मुब। 21 तलेपङ्सम् पर्मेस्वर्चे एङ्यीमात दुख नापरीनो दम्जेत्पल य्हीन्ब। ख्रीस्टचेएनो दुख नाजेत्ज्यीम् एङ्यीमात नमुना ङोन्थेन्जेत्पल मुब। होत्तज्यीम् थेङ्चे ङोन्जेत्पे ग्यम्से ब्रथोब। 22 थेङ्चेम् तइ पापएनो स्य्हेङ्अजेत्, ओसेम् थेङ्चे तएनो भ्यु सुङ् अजेत्। 23 म्हीमाचे थेङ्त पेत्न लबे बेलोरीएनो थेङ्चे थेङ्यीमातमी पेत्न लअजेत्। म्हीमाचे थेङ्त दुख पीन्लेनो थेङ्चे धम्की न्हङ्अजेत् तर ठीक्ले न्याय स्य्हेङ्जेत्पे पर्मेस्वर्री भर् थेन्जेत्ज्यी। 24 ङ्य्हङ्माचे पाप स्य्हेङ्ब पीत्ज्यीम् धार्मीक् जीवन् सोखइ पङ्ज्यीम् ख्रीस्ट्चे ङ्य्हङ्माकी पाप थेङ्की ल्हीःरी नाजेत्ज्यीम् क्रुस्री च्योजेत्ज्यी। थेङ्की म्हगमा ग्यम्से एङ्यीमा फेन्बल मुब। 25 एङ्यीमा बराल्तीबे ग्युमा र्हङ्ब मुबल, तर देरेम् एङ्यीमाकी आत्माइ गोर्तेन्तेङ् ज्यनले जोगइतीबलइ लीप्चे ब्रबरी एङ्यीमात बबल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.