१ पत्रुस 1 - पश्चिम तामाङ1 ङ पत्रुस, येसु ख्रीस्ट्की प्रेरीत ग्यम्से पोन्टस, गलातीया, कापाडोकीया, एसीया ओसेम् बीथीनीया पङ्बे प्रदेस्मारी ल्हो-ल्हो य्हुल्ल र्हङ्ले छर्छुर् तज्यीम् टीबे पर्मेस्वर्चे दम्जेत्पे म्हीमात चु चीठी ब्रीटीब। 2 पर्मेस्वर् अपचे य्हक्को ङोन्ग्यम्नो थेङ्की योजना अनुसार् एङ्यीमात र्हङ्की पबीत्र म्हीमा तबरी दम्जेत्पल य्हीन्ब। येसु ख्रीस्ट्की काःचे पबीत्र तज्यीम् येसु ख्रीस्ट्चे कुल्जेत्पे अर्ती एङ्यीमाचे ङ्येन्ब खमो पङ्ज्यीम् थेङ्चे एङ्यीमात आत्मा ग्यम्से र्हङ्ल स्य्हेङ्जेत्ज्यी। एङ्यीमात अनुग्रहतेङ् सान्ती य्हक्को तखइ। सोम्बो आस् 3 ङ्य्हङ्की प्रभु येसु ख्रीस्ट्की अप पर्मेस्वर्त तोप्प तखइ। तलेपङ्सम् पर्मेस्वर्चे येसु ख्रीस्ट्त स्यीब ग्यम्से सोम्बो स्य्हेङ्जेत्ज्यीम् थेङ्की ङ्य्हच्छ्यङ् कृपाचे ङ्य्हङ्मात छार् जीवन् न्हङ्जेत्ज्यी। होत्तज्यीम् ङ्य्हङ्मा ङ्हच्छ्यङ् आस् थेन्ज्यीम् सोब। 4 ओसेम् पर्मेस्वर् अपचे स्वर्गरी एङ्यीमाकी लागीरी खेमेएनो नास् अतबे, न्होङ्ज्यीम् अय्हर्बे ओसेम् म्हज्यीम् अय्हर्बे मोलम्मा टोप्ले थेन्जेत्पल मुब। 5 ओसेम् बीस्वास् ग्यम्से एङ्यीमात पर्मेस्वर्की सक्तीचे मुक्ती अयङ्गदे सम्म जोगइतीज्यीम् थेन्जेत्पल मुब। एङ्यीमाकी लागीरी टोप् लबे हुजु मुक्ती ज्युकी बेलोरी म्रङ्खस्ये मुब। 6 एङ्यीमा चु तम्मारी य्हक्को तङो, होलेतलेनो देरे एङ्यीमाचे य्हम्की लागीरी य्हक्को थोइ दुखमा नाथोबल मुब। 7 चुइ उदेस्यमी एङ्यीमाचे स्य्हेङ्बे बीस्वास् देमेन् य्हीन्ब पङ्ज्यीम् ङोन्ब य्हीन्ब। तीरेत् नास् तज्यीम् य्हर्स्येकी म्हर्त मेरी ख्रङ्ज्यीम् सुद्द स्य्हेङ्ब पङ्सम् एङ्यीमाकी बीस्वास्मी सुद्द म्हर् बीमएनो य्हक्को ङ्हच्छ्यङ् य्हीन्ब। होत्तज्यीम् चु बीस्वासत सुद्द स्य्हेङ्बरी छोत् च्याब। ओसेम् एङ्यीमाकी बीस्वास्चे येसु ख्रीस्ट् म्रङ्खजेत्पतेङ् एङ्यीमा तोप्प, महीमातेङ् स्य्हेसचे जेःबल तस्ये मुब। 8 एङ्यीमाचे येसु ख्रीस्ट्त म्रङ्बल अरेलेएनो म्होइब, ओसेम् एङ्यीमाचे थेङ्त देरे अम्रङ्लएनो बीस्वास् स्य्हेङ्ब, ओसेम् स्येत्ज्यीम् स्येत्प अखम्बे ङ्हच्छ्यङ् महीमीत तङ्बचे एङ्यीमाकी सेम् प्लीङ्बल मुब। 9 तलेपङ्सम् एङ्यीमाचे थेङ्त बीस्वास् स्य्हेङ्बल तज्यीम् आत्माइ मुक्ती यङ्बल मुब। 10 पर्मेस्वर्चे एङ्यीमात न्हङ्जेत्स्येकी अनुग्रहकी बारेरी अगम्बानी पङ्बे अगम्बक्तमाचे एङ्यीमाचे यङ्बे चु मुक्तीइ बारेरी य्हक्को गोबे सेम् लज्यीम् ङ्योत्प थीःब लबल मुबल। 11 थेङ्यीमान्हङ् मुबे ख्रीस्ट्की आत्माचे थेङ्यीमात ख्रीस्ट्चे दुख नाजेत्स्ये मुब, ओसेम् हुजु लीप्चे ङ्हच्छ्यङ् महीमा यङ्जेत्स्ये मुब बी ङोन्नो पङ्ज्यीन्बल मुबल। होत्तज्यीम् अगम्बक्तमाचे चु खले ओसेम् खेम तब पङ्ज्यीम् स्येःब म्हइज्यी। 12 अगम्बक्तमाचे स्य्हेङ्बे सेव थेङ्यीमाकी लागीरी अय्हीन्, तर एङ्यीमाकी लागीरी य्हीन्ब बी पर्मेस्वर्चे हुजु अगम्बक्तमात ङोन्जेत्पल मुबल। देरे एङ्यीमात चु ज्यबे सम्तर् स्वर्ग ग्यम्से पीत्युबे पबीत्र आत्माइ सक्तीरी प्रचार स्य्हेङ्बलमाचे स्येत्पल मुब। स्वर्गदुत्माचेएनो चु तम् गोबे सेम् लब। पबीत्र जीवन् सोउ 13 होत्तज्यीम् एङ्यीमाचे र्हङ्की सेम् दुल्ज्यीम् तयार्ले टीउ। ओसेम् येसु ख्रीस्ट् दोःज्यीम् ब्योन्युजेत्पतेङ् एङ्यीमाचे यङ्स्येकी अनुग्रहरी एङ्यीमाचे आस् लउ। 14 ओसेम् एङ्यीमा पर्मेस्वर्चे कुल्बे तम् ङ्येन्बे कोलमा तबल तज्यीम् ङोन्ग्यम् पर्मेस्वर्की देमेन्त अस्येःबे बेलोरी स्य्हेङ्ब र्हङ्ले र्हङ्की सेम्चे म्हेन्ब र्हङ्ले अज्यबे लक्मा थस्य्हेङो। 15 तर एङ्यीमात ङ्होत्जेत्पे पर्मेस्वर् पबीत्र मुब। होत्तज्यीम् एङ्यीमाएनो र्हङ्की जम्मनो तम्मारी पबीत्र तउ। 16 तलेपङ्सम् धर्मसास्त्ररी चोले ब्रीबल मुब, “एङ्यीमा पबीत्र तथोब, तलेपङ्सम् ङ पबीत्र मुब।” 17 एङ्यीमाचे प्रार्थना स्य्हेङ्बे बेलोरी पर्मेस्वर्त अप बी पङ्ब। थेङ्चे खल्लएनो लीः अस्हीनले जम्मनो म्हीमात र्हङ् र्हङ्ले स्य्हेङ्बे लक् अनुसार् न्याय स्य्हेङ्जेत्प। होत्तज्यीम् जम्बुलीङ्री टीगदे एङ्यीमा पर्मेस्वर्तेङ् लोङ्ज्यीम् टीउ। 18 अप-म्हेमेमा ग्यम्से यङ्बे अतोःबे पेठीम्मा ग्यम्से एङ्यीमात फेःपीन्जेत्परी गत्ते ङ्हच्छ्यङ् सेइ फाजेत्ज्यी पङ्बे तम् एङ्यीमाचे स्येःबलनो मुब। हुजु सेइ्मी म्हर्तेङ् म्हुइ र्हङ्बे नास् तज्यीम् य्हर्बे स्हेमा ग्यम्से फा:बल अय्हीन्। 19 तर सेइ फाज्यीम् फाब अखम्बे ख्रीस्ट्की काःचे एङ्यीमात फेःपीन्जेत्पल य्हीन्ब। थेङ् तइ दोस्तेङ् खोट् अरेबे ज्यबे ग्यु बोक र्हङ्ब मुबल। 20 पर्मेस्वर्चे जम्बुलीङ्त स्य्हेङ्जेत्प बीम् ङोन्ग्यम्नो थेङ्त दम्जेत्पल मुबल, तर एङ्यीमाकी लागीरी थेङ् चु ज्यु:की दीन्मारी म्रङ्खजेत्ज्यी। 21 ख्रीस्ट् ग्यम्से एङ्यीमाचे पर्मेस्वर्त बीस्वास् स्य्हेङ्बल मुब, तलेपङ्सम् पर्मेस्वर्चेनो ख्रीस्ट्त स्यीब ग्यम्से सोनलजेत्ज्यीम् महीमा न्हङ्जेत्ज्यी, होत्तज्यीम् एङ्यीमाकी बीस्वास्तेङ् आस् पर्मेस्वर्री मुब। 22 देरेम् एङ्यीमाचे देमेन्की फ्रोइत ङ्येन्ज्यीम् र्हङ्की सेम् सुद्द स्य्हेङ्बल मुब, ओसेम् र्हङ्की बीस्वासी र्होमात देमेन्ले म्होइगो, एङ्यीमाचे गीःचे गीःत सेम्न्हङ् य्हङ्सेनो म्होइगो। 23 तलेपङ्सम् पर्मेस्वर्की सोम्बोतेङ् खेम बीबीनो टीबे फ्रोइ ग्यम्से एङ्यीमा छार् तज्यीम् न्हबल मुब। एङ्यीमा नास् तबे अपइ जजमे अय्हीन् तर पर्मेस्वर्की नास् अतबे फ्रोइ ग्यम्से छार् तज्यीम् न्हबे ज-जमे य्हीन्ब। 24 तलेपङ्सम् धर्म छ्येःचे पङ्ब, “जम्मनो म्हीमा छ्यी र्हङ्ब य्हीन्ब, ओसेम् थेङ्यीमाकी जम्मनो स्य्हेसएनो र्ही:इ म्हेन्दो र्हङ्ब य्हीन्ब। छ्यी ङ्य्हुल्ज्यीम् य्हर्ब, ओसेम् म्हेन्दो तइज्यीम् य्हर्ब, 25 तर प्रभुइ फ्रोइ खेम पङ्लेनो टीस्यीनोटीब।” ओसेम् एङ्यीमात स्येत्पे चु फ्रोइ्नो ज्यबे सम्तर् य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.