१ युहन्ना 5 - पश्चिम तामाङजम्बुलीङ्त डाबल 1 येसुतनो ख्रीस्ट् य्हीन्ब पङ्ज्यीम् बीस्वास् लबलमा जम्मनो पर्मेस्वर्की कोलमा य्हीन्ब। ओसेम् खल्चे अपत म्होइब थेचे थेङ्की कोलमातएनो म्होइब। 2 ङ्य्हङ्चे पर्मेस्वर्त म्होइज्यी ओसेम् थेङ्चे कुल्जेत्पे अर्ती ङ्येन्ज्यी पङ्सम् चु ग्यम्सेनो ङ्य्हङ्चे थेङ्की कोलमात म्होइब बी स्येःब। 3 तलेपङ्सम् थेङ्चे कुल्जेत्पे अर्तीमा ङ्येन्ज्यीम् ब्रबनो थेङ्त म्होइब य्हीन्ब। थेङ्चे कुल्जेत्पे अर्तीमा य्हक्को ल्हीबल अरे। 4 तलेपङ्सम् पर्मेस्वर्की जम्मनो कोलमाचे जम्बुलीङ्त डास्ये मुब। ओसेम् ङ्य्हङ्की बीस्वास् ग्यम्सेनो जम्बुलीङ्त डाब। 5 जम्बुलीङ्त खल्चे डाब खम्ब? खल्चे येसुत पर्मेस्वर्की ज पङ्ज्यीम् बीस्वास् स्य्हेङ्ब थेचेनो जम्बुलीङ्त डाब। येसु ख्रीस्ट्की गबाहीमा 6 यीरी बप्तीस्मा कीन्जेत्ज्यी, ओसेम् क्रुसरी काः य्हर्पुङ्जेत्ज्यीम् ब्योन्खबल येसु ख्रीस्ट्नो य्हीन्ब, यी ग्यम्सेकीनो अय्हीन्, तर यीतेङ् काः ग्यम्सेनो ब्योन्खजेत्ज्यी। ओसेम् चु देमेन् य्हीन्ब बी पबीत्र आत्माचेनो गबाही न्हङ्ब, तलेपङ्सम् पबीत्र आत्मा देमेन् य्हीन्ब। 7 तलेपङ्सम् गबाही न्हङ्बल सोम् मुब- 8 पबीत्र आत्मा, यी ओसेम् काः- चु सोम्चेनो गीःकीनो गबाही न्हङ्ब। 9 म्हीमाचे पीन्बे गबाहीत ङ्य्हङ्माचे पतइतीब पङ्सम् झेन् पर्मेस्वर्चे न्हङ्बे गबाहीमी गदे ङ्हच्छ्यङ् मुब। ओसेम् थेङ्चेनो र्हङ्की जइ बारेरी गबाही न्हङ्बल मुब। 10 होत्तज्यीम् खल्चे पर्मेस्वर्की जत बीस्वास् स्य्हेङ्ब थेचे र्हङ्की सेम्री चु गबाही देमेन् य्हीन्ब बी ङ्येन्ब। तर खल्चे पर्मेस्वर्त बीस्वास् अस्य्हेङ् थेचे पर्मेस्वर्की गबाहीत भ्यु तन लब, तलेपङ्सम् जइ बारेरी न्हङ्बे गबाहीत थेचे बीस्वास् स्य्हेङ्बल अत। 11 पर्मेस्वर्चे न्हङ्बे गबाही चुनो य्हीन्ब, की पर्मेस्वर्चे ङ्य्हङ्त खेमेएनो अबेबे जीवन् न्हङ्जेत्ज्यी, ओसेम् हुजु जीवन थेङ्की जतेङ् मुब। 12 पर्मेस्वर्की ज मुबलतेङ् जीवन् तब, तर थेङ्की ज अरेबलतेङ् जीवन् अत। खेमेनो अबेबे जीवन् 13 खेमेएनो अबेबे जीवन् यङ्बल मुब बी एङ्यीमाचे स्येखइ पङ्ज्यीम् पर्मेस्वर्की जत बीस्वास् स्य्हेङ्बे एङ्यीमात ङ चु ब्रीटीब। 14 पर्मेस्वर्री ङ्य्हङ्ल भरोस मुब, थेङ्की थुः अनुसार ङ्य्हङ्चे तए र्हीत्ज्यी पङ्सम् थेङ्चे सेन्जेत्प। 15 ङ्य्हङ्चे प्रार्थनारी ता र्हीत्लेएनो थेङ्चे सेन्जेत्प बी स्येःबल तज्यीम् ङ्य्हङ्चे थेङ्त ता र्हीत्ज्यी हुजु यङ्बल मुब बीएनो स्येबल तब। 16 खल्चे पङ्लेनो र्हङ्की बीस्वासी र्होचे स्यीबरी दोःन अलबे पाप स्य्हेङ्बल म्रङ्सम् थेचे हुजु बीस्वासीइ लागीरी प्रार्थना स्य्हेङ्थोःब, ओसेम् थेत पर्मेस्वर्चे जीवन् न्हङ्स्ये मुब। चु स्यीबरी दो:न अलबे पाप स्हेङ्बलमाकी लागीरीकीनो य्हीन्ब। तर चोतेबे पापएनो मुब, हुजुचे स्यीबरी दोःन लब, ओसेम् होतेबे पाप स्य्हेङ्बलमाकी लागीरीम् प्रार्थना स्य्हेङ्थोःब बी अपङ्। 17 जम्मनो अज्यबे लक्मा पाप य्हीन्ब, तर जम्मनो पापचे स्यीबरी दोःन अल। 18 ङ्य्हङ्माचे स्येःब, पर्मेस्वर्की कोलचे पाप स्य्हेङ्स्यीनो अटी, तलेपङ्सम् पर्मेस्वर्की जचे थेङ्यीमात थर्नलजेत्प ओसेम् सैतान्चे थेत न्होङ्न लब अखम्। 19 ङ्य्हङ्माचे स्येःब, जम्मनो जम्बुलीङ् सैतान्की यारी मुलेएनो ङ्य्हङ्मामी पर्मेस्वर्की कोल य्हीन्ब। 20 ङ्य्हङ्माचे स्येःब, पर्मेस्वर्की ज ब्योन्युज्यीम् ङ्य्हङ्मात देमेन्की पर्मेस्वर्त स्येःबे लो न्हङ्जेत्ज्यी। देरेम् ङ्य्हङ्मा देमेन्की पर्मेस्वर्तेङ् मुब, तलेपङ्सम् ङ्य्हङ्मा थेङ्की ज येसु ख्रीस्ट्री मुब। थेङ्नो देमेन्की पर्मेस्वर् य्हीन्ब, ओसेम् थेङ्नो खेमेएनो अबेबे जीवन् य्हीन्ब। 21 म्होइबे कोलमा, एङ्यीमा ख्लमा ग्यम्से फेःज्यीम् टीउ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.