१ युहन्ना 4 - पश्चिम तामाङदेमेन्तेङ् भ्यु:की आत्मा 1 म्होइबे र्होमा, पबीत्र आत्मा र्हङ्तेङ् मुब पङ्बे जम्मनो म्हीमात बीस्वास् थस्य्हेङो, तर हुजु आत्मा पर्मेस्वर् ग्यम्से य्हीन्ब वुइ अय्हीन् छोत् च्यागो, तलेपङ्सम् भ्यु पङ्बे अगम्बक्तमा चु जम्बुलीङ्री खन गोदोब्नो डोङ्बल मुब। 2 खल्चे येसु ख्रीस्ट् म्हीइ ल्हीरी ब्योन्खज्यी बी पङ्ब थे पर्मेस्वर् ग्यम्से खबे आत्मा य्हीन्ब। चोले एङ्यीमाचे पर्मेस्वर्की आत्मात स्येस्ये मुब। 3 तर खल्चे येसुत म्ही तज्यीम् ब्योन्खज्यी बी अपङ् थे पर्मेस्वर् ग्यम्से खबे आत्मा अय्हीन्। चु ख्रीस्ट् बीरोधी ग्यम्से खबे आत्मा य्हीन्ब। थे खब पङ्बे तम् एङ्यीमाचे थ्येःबल मुबल, हुजु देरेम् जम्बुलीङ्री खज्यीन्बल मुब। 4 तर म्होइबे कोलमा, एङ्यीमाम् पर्मेस्वर्ल य्हीन्ब, एङ्यीमाम् भ्युकी अगम्बक्तमातेङ् डाबल मुब, तलेपङ्सम् एङ्यीमातेङ् मुबे पबीत्र आत्माम् जम्बुलीङ्री म्हीमातेङ् मुबे आत्मा बीम य्हक्को सक्तीसाली मुब। 5 हुजु भ्यु पङ्बे अगम्बक्तमा जम्बुलीङ्ल य्हीन्ब, होत्तज्यीम् थेङ्यीमाचे जम्बुलीङ्की तम् लब, ओसेम् जम्बुलीङ्की म्हीमाचे थेङ्यीमाकी तम् ङ्येन्ब। 6 तर ङ्य्हङ्माम् पर्मेस्वर्ल य्हीन्ब, खल्चे पर्मेस्वर्त स्येःब थेचे ङ्य्हङ्की तम् ङ्येन्ब। खल पर्मेस्वर्ल अय्हीन् थेचे ङ्य्हङ्माकी तम् अङ्येन्। चोले ङ्य्हङ्चे देमेन्की आत्मातेङ् भ्युकी आत्मात स्येःब। गीःचे गीःत म्होइथोब 7 ङइ म्होइबे र्होमा, ङ्य्हङ्मा गीःचे गीःत म्होइगे, तलेपङ्सम् म्होइब पर्मेस्वर् ग्यम्से खब। खल्चे र्हङ्की बीस्वासी र्होमात म्होइब, थे पर्मेस्वर्की कोल य्हीन्ब, ओसेम् थेचे पर्मेस्वर्त स्येःब। 8 र्हङ्की बीस्वासी र्होमात अम्होइबलचे पर्मेस्वर्त अस्ये, तलेपङ्सम् पर्मेस्वर् म्होइब य्हीन्ब। 9 पर्मेस्वर्चे थेङ्की म्होइब ङ्य्हङ्मात चोले ङोन्जेत्ज्यी, की ङ्य्हङ्माचे जीवन् यङ्खइ पङ्ज्यीम् थेङ्की गीःकीनो मुबे जत जम्बुलीङ्री पीत्युजेत्ज्यी। 10 म्होइब पङबलम् चुनो य्हीन्ब- ङ्य्हङ्चे पर्मेस्वर्त म्होइबल अय्हीन्, तर थेङ्चे ङ्य्हङ्त म्होइबल तज्यीम् थेङ्की जइ जीवन ङ्य्हङ्की लागीरी न्हङ्बरी ओसेम् ङ्य्हङ्त पाप ग्यम्से क्षमा न्हङ्बरी पीत्युजेत्ज्यी। 11 म्होइबे र्होमा, पर्मेस्वर्चे ङ्य्हङ्त चोले म्होइजेत्पल तज्यीम् ङ्य्हङ्चेएनो गीःचे गीःत म्होइथोब। 12 खल्चेएनो खेमेएनो पर्मेस्वर्त म्रङ्बल अरे। तर ङ्य्हङ्माचे गीःचे गीःत म्होइज्यी पङ्सम् पर्मेस्वर् ङ्य्हङ्मान्हङ् स्य्हुजेत्प, ओसेम् थेङ्की म्होइब ङ्य्हङ्तेङ् टोप् तब। 13 थेङ्चे ङ्य्हङ्मात थेङ्की पबीत्र आत्मा न्हङ्जेत्पल तज्यीम् ङ्य्हङ् पर्मेस्वर्तेङ् ओसेम् पर्मेस्वर् ङ्य्हङ्मातेङ् मुब पङ्बे तम् स्येःब। 14 ओसेम् अपचे र्हङ्की जत चु जम्बुलीङ्री मुक्ती न्हङ्बरी पीत्युजेत्पल ङ्य्हङ्माचे म्रङ्बल मुब, ओसेम् हुजु ल्हो-ल्होत स्येत्प। 15 येसुनो पर्मेस्वर्की ज य्हीन्ब बी स्वीकार लबे म्हीतेङ् पर्मेस्वर् स्य्हुजेत्प, ओसेम् थे पर्मेस्वर्तेङ् टीब। 16 चोले पर्मेस्वर्चे ङ्य्हङ्त म्होइब बी स्येःब ओसेम् पर्मेस्वर्चे ङ्य्हङ्त म्होइब बी बीस्वास् स्य्हेङ्ब। पर्मेस्वर् म्होइब य्हीन्ब, खल म्होइबरी तब, थे पर्मेस्वर्री तब, ओसेम् पर्मेस्वर् थेतेङ् तब। 17 चोले ङ्य्हङ्मान्हङ् म्होइब टोप् तबल तब, ओसेम् न्यायकी दीन्री ङ्य्हङ्मा लोङ्अथो, तलेपङ्सम् ख्रीस्ट् खतेब मुब जम्बुलीङ्री ङ्य्हङ्एनो होतेब मुब। 18 म्होइबरी लोङ्ब अत, सीद्द म्होइबचे लोङ्बत ल्हब्लाब। लोङ्बचे सजाय तब बी ङोन्ब, लोङ्बे म्हीतेङ् सीद्द म्होइब अत। 19 ङोन्ग्यम् पर्मेस्वर्चे ङ्य्हङ्त म्होइजेत्पल तज्यीम् ङ्य्हङ्चेएनो म्होइब। 20 खल्चे पङ्लेनो पर्मेस्वर्त म्होइब पङ्ब, ओसेम् ल्हो-ल्हो बीस्वासी र्होमात हेल लब पङ्सम् थे भ्यु य्हीन्ब। र्हङ्चे म्रङ्बे ल्हो-ल्हो बीस्वासी र्होमात अम्होइबलचे अम्रङ्बे पर्मेस्वर्त खले म्होइब? 21 खल्चे पर्मेस्वर्त म्होइब थेचे ल्हो-ल्हो बीस्वासी र्होमातएनो म्होइथोब। चुनो ङ्य्हङ्मात ख्रीस्ट्चे कुल्जेत्पे अर्ती य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.