१ युहन्ना 3 - पश्चिम तामाङपर्मेस्वर्की ज जमे 1 च्याको, ङ्य्हङ्मात पर्मेस्वर्चे गत्ते य्हक्को म्होइजेत्पल मुब, ङ्य्हङ्त थेङ्की ज जमे पङ्बरी थेङ्चे म्होइजेत्पल य्हीन्ब, ओसेम् ङ्य्हङ्मा देमेन्नो थेङ्की ज जमे य्हीन्ब। जम्बुलीङ्चे पर्मेस्वर्त अस्येबल तज्यीम् ङ्य्हङ्मातएनो अस्ये। 2 ङइ म्होइबे र्होमा, देरेम् ङ्य्हङ्मा पर्मेस्वर्की ज जमेमा य्हीन्ब, तर लीक्यम् ङ्य्हङ्मा ता तस्ये मुब बी देरेसम्म ताएनो ङोन्बल अरे। तर ङ्य्हङ्मात चु था मुब, ख्रीस्ट् दोःज्यीम् ब्योन्युबे बेलोरी ङ्य्हङ्एनो थेङ् र्हङ्ब तस्ये मुब, तलेपङ्सम् थेङ् खतेब मुब होतेबनो ङ्य्हङ्माचे थेङ्त म्रङ्स्ये मुब। 3 ओसेम् ख्रीस्ट्री चोतेबे आस् थेन्बलमा जम्मचे ख्रीस्ट् चोखो तब र्हङ्लेनो र्हङ्त चोखो थेन्स्ये मुब। 4 पाप स्य्हेङ्स्यीनो टीबलमाचे पर्मेस्वर्की नीयम् अङ्येन्, तलेपङ्सम् पाप स्य्हेङ्बनो पर्मेस्वर्की नीयम् अङ्येन्ब य्हीन्ब। 5 एङ्यीमाचे स्येःबलनो मुब ख्रीस्ट् ङ्य्हङ्माकी पाप ख्रुबरी म्रङ्खजेत्पल य्हीन्ब, ओसेम् थेङ्री ताइ पापएनो अरे। 6 होत्तज्यीम् थेङ्री तबलमाचे पाप स्य्हेङ्स्यीनो अटी। पाप स्य्हेङ्स्यीनो टीबलमाचे न्ह थेङ्त म्रङ्बल तब, न्ह थेङ्त स्येःबल तब। 7 म्होइबे कोलमा, एङ्यीमात खल्चेएनो लु अम्यङ्खइ। ज्यबे लक् स्य्हेङ्बे म्हीमानो ख्रीस्ट् र्हङ्बे धर्मी तब। 8 पाप स्य्हेङ्स्यीनो टीबे म्हीमा सैतान्ल य्हीन्ब। तलेपङ्सम् सैतान्चेम् चु:ब य्हङ्सेनो पाप स्य्हेङ्स्यीनो टीबल मुब। होत्तज्यीम् सैतान्की लक्मा नास् लबरी पर्मेस्वर्की ज म्रङ्खजेत्पल य्हीन्ब। 9 पर्मेस्वर्की ज जमेचे पाप स्य्हेङ्स्यीनो अटी, तलेपङ्सम् पर्मेस्वर्की स्वभाब थेङ्यीमातेङ् तब। थेङ्यीमाचे पाप स्य्हेङ्स्यीनो टीअखम् तलेपङ्सम् पर्मेस्वर् थेङ्यीमाइ अप य्हीन्ब। 10 पर्मेस्वर्की ज जमे खल ओसेम् सैतान्की ज जमे खल बी चु ग्यम्सेनो स्येःब खल पङ्लेनो धर्मीक्तरी अब्रबलमा, र्हङ्की बीस्वासी र्होमात अम्होइबलमा पर्मेस्वर्की ज जमे अय्हीन्। गीःचे गीःत म्होइगो 11 ङ्य्हङ्माचे गीःचे गीःत म्होइथोब पङ्बे सम्तर् एङ्यीमाचे चु:ब य्हङ्सेनो थ्येःबल मुब। 12 ङ्य्हङ्मा कयीन् र्हङ्ब तब अत। कयीन् दुस्टइ अधीन्री मुबल, ओसेम् थेचे र्हङ्की अलेत सेत्ज्यी। तले थेचे र्हङ्की अले सेत्ज्यी? तलेपङ्सम् थेचे स्य्हेङ्बे लक् दुस्ट मुबल, ओसेम् थेइ अलेचे स्य्हेङ्बे लक्मी धार्मीक् मुबल। 13 होत्तज्यीम् ङइ र्होमा, जम्बुलीङ्की म्हीमाचे एङ्यीमात हेल लबतेङ् अचम्म थतउ। 14 ङ्य्हङ्चे स्येःब ङ्य्हङ्मा स्यीब ग्यम्से जीवन्री वङ्ज्यीन्बल मुब तलेपङ्सम् ङ्य्हङ्चे बीस्वासी र्होमात म्होइबल मुब। ओसेम् बीस्वासी र्होमात अम्होइबे म्हीम् दवम् स्यीबरीएनो टीबल तब। 15 र्हङ्की बीस्वासी र्होमात अखोबे म्हीम् म्ही सेत्पे म्ही र्हङ्ब य्हीन्ब, ओसेम् म्ही सेत्पे म्हीतेङ् खेमेएनो अबेबे जीवन अत बी एङ्यीमाचे स्येबल मुब। 16 ख्रीस्ट्चे ङ्य्हङ्माकी लागीरी बुः न्हङ्जेत्ज्यी, चु ग्यम्सेनो ङ्य्हङ्चे म्होइब ता बी स्येःब। ओसेम् ङ्य्हङ्माचेएनो र्हङ्की बीस्वासी र्होमाकी लागीरी बुः पीन्बे सेम् थेन्थोब। 17 जम्बुलीङ्री सोबरी तोःबे स्हेःमा मुबलचे र्हङ्की बीस्वासी र्होमात हुजु स्हेः तोबल म्रङ्ज्यीमएनो सेम् कोङ्ज्यीम् अपीन्ज्यी पङ्सम् थेमाचे खले पर्मेस्वर्त म्होइब? 18 म्होइबे कोलमा, ङ्य्हङ्माचे तम् छीःमाचेकीनो म्होइब अय्हीन्, ङ्य्हङ्माकी म्होइब देमेन् तथोब, ओसेम् हुजु लक्री म्रङ्थोब। पर्मेस्वर्की ङोन्री आर् खबल 19 ङ्य्हङ्माकी लक् ग्यम्सेनो ङ्य्हङ्मा देमेन्ल य्हीन्ब बी स्येःब, ओसेम् पर्मेस्वर्की ङोन्री सेम् देब। 20 ङ्य्हङ्मात र्हङ्की सेम्चेनो दोसी ङोन्ब पङ्सम् ङ्य्हङ्चे स्येःब ङ्य्हङ्की पर्मेस्वर् ङ्य्हङ्की सेम् बीमएनो ङ्हच्छ्यङ् मुब, थेङ्चेम् जम्मनो तम्म खेम्जेत्प। 21 ङइ म्होइबे र्होमा, ङ्य्हङ्मात र्हङ्की सेम्चे दोस् अङोन्ज्यी पङ्सम् पर्मेस्वर्की ङोन्री ङ्य्हङ्माकी सेम् देब। 22 ओसेम् ङ्य्हङ्चे ता र्हीत्ज्यी हुजु यङ्ब, तलेपङ्सम् ङ्य्हङ्मा थेङ्चे कुल्जेत्पे अर्तीमा ङ्येन्ज्यीम् ब्रब, ओसेम् थेङ् तङ्बे लक् स्य्हेङ्ब। 23 पर्मेस्वर्चे कुल्जेत्पे अर्तीम् चुनो य्हीन्ब- ङ्य्हङ्चे थेङ्की ज येसु ख्रीस्ट्की छेन्री बीस्वास् स्य्हेङ्थोःब। ओसेम् ख्रीस्ट्चे कुल्जेत्प र्हङ्लेनो ङ्य्हङ्माचे गीःचे गीःत म्होइथोब। 24 खल्चे पर्मेस्वर्चे कुल्जेत्पे अर्तीमा ङ्येन्ब थेङ्यीमा पर्मेस्वर्तेङ् बक्च्य तब, ओसेम् पर्मेस्वर् थेङ्यीमातेङ् बक्च्य तब। चोले पर्मेस्वर् ङ्य्हङ्मातेङ् स्य्हुजेत्प पङ्बे तम् थेङ्चे ङ्य्हङ्मात न्हङ्जेत्पे पबीत्र आत्मा ग्यम्से स्येःब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.