१ युहन्ना 2 - पश्चिम तामाङख्रीस्ट् ङ्य्हङ्माकी र्हो 1 ङइ कोलमा र्हङ्बे म्होइबे र्होमा एङ्यीमाचे पाप अस्य्हेङ्खइ पङ्ज्यीम् ङ एङ्यीमात चु तम्मा ब्रीटीब। तर खल्चे पङ्लेनो पाप स्य्हेङ्लएनो ङ्य्हङ्की लागीरी पर्मेस्वर् अपतेङ् तम् लपीन्जेत्पल गीः ङ्य्हङ्मातेङ् मुब, थेङ् धार्मीक् येसु ख्रीस्ट् य्हीन्ब। 2 थेङ् ङ्य्हङ्की पाप्मा क्षमा लबरी स्यीजेत्पल य्हीन्ब। ङ्य्हङ्माकी लागीरीकीनो अय्हीन्, तर जम्बुलीङ्की जम्मनो म्हीमाकी पापकी लागीरीएनो य्हीन्ब। 3 पर्मेस्वर्चे कुल्जेत्पे अर्तीमा ङ्य्हङ्माचे ङ्येन्ज्यी पङ्सम् ङ्य्हङ्माचे थेङ्त स्येब बी चु तम् ग्यम्सेनो ङोन्ब। 4 खल्चे पङ्लेनो “ङचे थेङ्त स्येःब” बी पङ्ब, तर थेङ्चे कुल्जेत्पे अर्तीमा अङ्येन्ज्यी पङ्सम् थे भ्यु य्हीन्ब, ओसेम् थेतेङ् देमेन् अत। 5 तर खल्चे थेङ्चे कुल्जेत्पे अर्ती ङ्येन्ब, थेचे पर्मेस्वर्त देमेन्नो सेम् य्हङ्सेनो म्होइब। ओसेम् चु ग्यम्सेनो ङ्य्हङ् थेङ्री मुब पङ्बे तम् स्येब। 6 खल्चे थे पर्मेस्वर्री मुब पङ्ज्यी थेचे येसुचे र्हङ्ले पर्मेस्वर्की फ्रोइ ङ्येन्ज्यीम् ब्रथोब। छार् अर्ती 7 म्होइबे र्होमा, ङचे ब्रीटीबे चु कुल्बे अर्ती छार् अय्हीन् तर ङोन्ग्यम् य्हङ्सेनो एङ्यीमातेङ् मुबे पुरानो कुल्बे अर्ती य्हीन्ब। चु ङोन्ग्यम् य्हङ्सेनो मुबे पुरानो कुल्बे अर्ती एङ्यीमाचे थ्येःबे फ्रोइनो य्हीन्ब। 8 होले तलेनो ङ एङ्यीमात छार् अर्ती गीः ब्रीटीब। चु अर्तीइ देमेन् ख्रीस्ट्री ओसेम् एङ्यीमातेङ् म्रङ्बल मुब, तलेपङ्सम् म्हुन्दुङ् म्हज्यीम् य्हर्टीबल मुब ओसेम् देमेन्की य्हल्मी सर्स्यीनोटीबल मुब। 9 खल्चे पङ्लेनो थे र्हङ् य्हल्री मुब पङ्ब, तर र्हङ्की बीस्वासी र्होमात हेल लज्यी पङ्सम् थे दवम् म्हुन्दुङ्रीनो मुब। 10 खल्चे र्हङ्की बीस्वासी र्होमात म्होइब, थे य्हल्री तब, ओसेम् र्हङ्त उन्नलबे तइ तमएनो थेतेङ् अत। 11 तर खल्चे र्हङ्की बीस्वासी र्होमात हेल स्य्हेङ्ब थे म्हुन्दुङ्री तब, म्हुन्दुङ्री ब्रब, ओसेम् थे खन य्हर्टीब, थेचे हुजु अस्य्हे, तलेपङ्सम् म्हुन्दुङ्चे लज्यीम् थेचे अम्रङ्। 12 म्होइबे कोलमा, ङ चु एङ्यीमात ब्रीटीब, तलेपङ्सम् ख्रीस्ट्की छेन्री एङ्यीमाकी पाप क्षमा तबल मुब। 13 अपमा, ङ एङ्यीमात चु ब्रीटीब, तलेपङ्सम् गोदोब्न्हङ् ङोन्ग्यम् य्हङ्से मुबे ख्रीस्ट्त एङ्यीमाचे स्येःब। ब्योन् म्हीमा, चु ङ एङ्यीमात ब्रीटीब तलेपङ्सम् एङ्यीमा सैतान् ग्यम्से डाबल मुब। 14 कोलमा चु ङ एङ्यीमात ब्रीटीब, तलेपङ्सम् एङ्यीमाचे पर्मेस्वर् अपत स्येःब। अपमा, चु ङ एङ्यीमात ब्रीटीब, तलेपङ्सम् एङ्यीमाचे गोदोब्न्हङ् ङोन्ग्यम् य्हङ्से मुबे ख्रीस्ट्त स्येःब। ब्योन् म्हीमा, चु ङ एङ्यीमात ब्रीटीब, तलेपङ्सम् एङ्यीमा बङ्ज्येन् मुब, पर्मेस्वर्की फ्रोइ एङ्यीमान्हङ् मुब, ओसेम् एङ्यीमा सैतान् ग्यम्से डाबल मुब। 15 जम्बुलीङ्तेङ् जम्बुलीङ्की स्हे:मात थम्होइगो। खल्चे पङ्लेनो जम्बुलीङ्त म्होइज्यी पङ्सम् थेचे पर्मेस्वर् अपत अम्होइ। 16 तलेपङ्सम् जम्बुलीङ्री मुबे ल्हीःचे स्य्हेङ्गे म्हेन्बे जम्मनो अज्यबे तम्मा, मीःचे म्रङ्ज्यीम् स्य्हेङ्गे म्हेन्बे अज्यबे तम्मा ओसेम् जम्बुलीङ्की जम्म स्हेःमाकी लागीरी स्य्हेङ्बे जीवन्की घमन्ड पर्मेस्वर् अप ग्यम्से खबल अय्हीन्। चु जम्मनो जम्बुलीङ् ग्यम्से खबल य्हीन्ब। 17 जम्बुलीङ्तेङ् जम्बुलीङ्री म्हीमाचे म्हेन्बे अज्यबे सेम्मा म्हज्यीम् य्हर्ब, तर पर्मेस्वर्की थुः टोप् लबे म्हीम् खेम पङ्लेनो टीब। ख्रीस्ट्की सत्रु 18 म्होइबे कोलमा, चु ज्युःकी बेलो य्हीन्ब। ख्रीस्ट्की बीरोधी खटीब बी एङ्यीमाचे थ्येःबल मुब, ख्रीस्ट्की य्हक्को बीरोधीमा खज्यीन्बल मुब। चु ग्यम्सेनो चु ज्युःकी बेलो य्हीन्ब बी स्येःब। 19 थेङ्यीमा ङ्य्हङ्ल अय्हीन्ब मुबल, होत्तज्यीम् थेङ्यीमा ङ्य्हङ्मात ख्लेथेन्ज्यीम् य्हर्ज्यी। थेङ्यीमा ङ्य्हङ्ल य्हीन्सम् ङ्य्हङ्मातेङ् टीस्येल। ङ्यीमाचे ङ्य्हङ्मात ख्लेथेन्ज्यी हुजु तम्चे थेङ्यीमा ङ्य्हङ्ल अय्हीन् पङ्बे तम् ङोन्ब। 20 तर एङ्यीमातमी ख्रीस्ट्चे पबीत्र आत्मा तेपीत्युजेत्पल मुब, होत्तज्यीम् एङ्यीमा जम्मचेनो देमेन्त स्येःब। 21 एङ्यीमाचे देमेन्त अस्य्हे पङ्ज्यीम् ङचे चु ब्रीबल अय्हीन्, तर एङ्यीमाचे देमेन्त स्येःबल तज्यीम् ब्रीबल य्हीन्ब। ओसेम् देमेन् ग्यम्से भ्यु अडोङ् पङ्बे तमएनो एङ्यीमाचे स्येःब। 22 भ्यु खल? खल्चे येसुत मुक्ती न्हङ्बे ख्रीस्ट् अय्हीन् पङ्ज्यी थेङ्यीमा भ्यु य्हीन्ब। खल्चे पर्मेस्वर् अपतेङ् जत इन्कार् स्य्हेङ्ब थेङ्यीमानो ख्रीस्ट्की बीरोधी य्हीन्ब। 23 जत इन्कार् स्य्हेङ्बलचे अपतएनो इन्कार् स्य्हेङ्ब। ओसेम् जत स्वीकार् स्य्हेङ्बलचे अपतएनो स्वीकार स्य्हेङ्ब। 24 होत्तज्यीम् एङ्यीमाचे चुःब य्हङ्सेनो थेःबे सम्तर्त सेम्री थेनो। हुजु सम्तर् एङ्यीमाचे सेम्री थेन्ज्यी पङ्सम् एङ्यीमा अप ओसेम् जतेङ् बक्च्य तस्ये मुब। 25 ख्रीस्ट्चे न्हङ्ब बी बाचा स्य्हेङ्जेत्पे खेमेएनो अबेबे जीवन् चुनो य्हीन्ब। 26 चु जम्मनो तम्म एङ्यीमात भ्यु लुब म्हइबलमाकी बारेरी ङचे एङ्यीमात ब्रीबल य्हीन्ब। 27 तर एङ्यीमातम् ख्रीस्ट्चे पबीत्र आत्मा तेपीत्युजेत्पल मुब। ओसेम् पबीत्र आत्मा एङ्यीमातेङ् स्य्हुगदे एङ्यीमात खल्चेएनो तएनो लोप् अथो। तलेपङ्सम् थेङ्की आत्माचे एङ्यीमात जम्मनो तम्मा लोप्जेत्स्ये मुब, ओसेम् थेङ्चे लोप्जेत्पे तम देमेन् य्हीन्ब, भ्यु अय्हीन्। पबीत्र आत्माचे लोप्जेत्पे तम् ङ्येन्ज्यीम् ब्रउ, ओसेम् ख्रीष्टतेङ् गी: तउ। 28 ओसेम् म्होइबे कोलमा, थेङ् दोःज्यीम् ब्योन्युबे बेलोरी ङ्य्हङ्माचे आर् यङ्खइ, ओसेम् थेङ् ब्योन्युबे बेलोरी ङ्य्हङ्मा पेत् अतोःखइ पङ्ज्यीम् थेङ्तेङ् गी तउ। 29 तलेपङ्सम् ख्रीस्ट् धर्मी मुब बी एङ्यीमाचे स्येःबल मुब, ओसेम् ज्यबे लक् स्य्हेङ्बलमा जम्मनो परमेस्वरकी ज जमे य्हीन्ब बीएनो एङ्यीमाचे स्येःबल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.