१ कोरीन्थी 9 - पश्चिम तामाङप्रेरीत्की अधीकार् 1 ता ङ स्वतन्त्र अरे? ता ङ प्रेरीत अय्हीनो स्यीम्? ता ङचे ङ्य्हङ्की प्रभु येसुत म्रङ्बल अय्हीनो स्यीम्? ता एङ्यीमा प्रभुचे ङत र्हो लज्यीम् ङचे स्य्हेङ्बे लक्की रोःरोमा अय्हीनो स्यीम्? 2 ल्हो-ल्हो म्हीमाचे ङत प्रेरीत अय्हीन् पङ्लेनो एङ्यीमाकी लागीरीमी ङ प्रेरीत य्हीन्ब, तलेपङ्सम् एङ्यीमा ख्रीस्ट्री मुबे तम्चेनो ङ प्रेरीत य्हीन्ब बी ङोन्ब। 3 ङइ अधीकारकी बारेरी तम् ङ्होत्पलमात ङइ जोहब् चुनो य्हीन्ब, 4 ता ङ्यीमाचे एङ्यीमा ग्यम्से चब थुङ्बे अधीकार् अयङो स्यीम्? 5 ता ल्हो-ल्हो प्रेरीत्मा, प्रभुइ अलेमा ओसेम् पत्रुसचे र्हङ्ले ङ्यीमाचेएनो ख्रीस्ट्त बीस्वास् स्य्हेङ्बे म्रीङ्त बक्च्य बोर्ज्यीम् ब्रबे अधीकार् अरेउ स्यीम्? 6 ता बार्नाबासतेङ् ङचेकीनो र्हङ्चेनो लक् स्य्हेङ्ज्यीम् फो न्हथोब? 7 ता स्यीपाइमाचे सरकार ग्यम्से चब थुङ्ब अय्हङ् स्यीम्? ता अङ्गुर्की खेती स्य्हेङ्बे म्हीचे अङ्गुर् अच? ता ग्युः न्हबे गोर्तेन्चे ग्युःकी ङ्य्हे अथुङ्? 8 ता ङचे चु तम् म्हीमाचे सेम्री म्हेन्ब अनुसार्कीनो पङ्बल य्हीन्बो स्यीम् वुइ मोसाचे ब्रीबे पर्मेस्वर्की नीयम्चेएनो चु तम् पङ्बल अरेउ स्यीम्? 9 तलेपङ्सम् मोसाचे ब्रीबे पर्मेस्वर्की नीयम्री चोले ब्रीबल मुब, “दइ स्य्हेङ्बे ग्लब्की सुङ्री बुरु थतागो।” ता पर्मेस्वर्चे ग्लब्माकी बारेरीकीनो छेर्जेत्प? 10 ता थेङ्चे ङय्हङ्माकी लागीरीएनो सुङ्जेत्पल अय्हीनो स्यीम्? ङय्हङ्माकी लागीरीनो चु तम् ब्रीबल य्हीन्ब, तलेपङ्सम् म्रङ् मोइबलतेङ् दइ स्य्हेङ्बल ङ्य्हीचेनो र्हङ्की अन्नइ बो यङ्बे आस् थेन्ज्यीम् लक् स्य्हेङ्ब। 11 ङ्यीमाचे एङ्यीमाकी गुङ्री ज्यबे सम्तर् ब्लुत्पल मुब पङ्सम्, ङ्यीमाचे ल्हीरी तोबे स्हे एङ्यीमा ग्यम्से यङ्ब अचम्मइ तम य्हीन्बो स्यीम्? 12 ल्हो-ल्होमाचे एङ्यीमा ग्यम्से चु हक् यङ्ब पङ्सम् ङ्यीमाचेम् थेङ्यीमा बीम् झेन् य्हक्को हक् यङ्थोबल अय्हीनो स्यीम्? तर ङ्यीमाचे चु हक् कोल्बल अरे। ख्रीस्ट्की ज्यबे सम्तर् स्येत्परी ताचेएनो अगुःखइ पङ्ज्यीम् ङ्यीमाचे जम्मनो तम्मा नापल य्हीन्ब। 13 पर्मेस्वर्की दीम्री लक् स्य्हेङ्बलमाचे पर्मेस्वर्की दीम्री ल्हो-ल्होमाचे बबे चबे स्हेमा चम्यङ्ब, ओसेम् बेदीरी लक् स्य्हेङ्बलमाचे बेदीरी ठा पीन्बे स्हेमा ग्यम्से र्हङ्की बो यङ्ब पङ्बे तम ता एङ्यीमाचे स्येःबल अरे? 14 होलेनो ज्यबे सम्तर् प्रचार् स्य्हेङ्बलमाचे हुजु ग्यम्सेनो चब थुङ्ब यङ्थोब बी प्रभुचे कुल्जेत्पल मुब। 15 तर चु हक्मान्हङ्री ङचे गीःएनो कोल्बल अरे, ओसेम् ङचे देरेम् हुजु हक्मा यङ्बे लागीरी चु चीठी ब्रीबलएनो अय्हीन्। होले स्य्हेङ्ब बीममी ङ स्यीबनो ज्यब तल। खल्चेएनो ङइ चु घमन्डत लक् अतबल पङ्ब अखम्। 16 ङचे ज्यबे सम्तर् स्येत्पतेङ् हुजुरी ङचे घमन्ड स्य्हेङ्थोःबल तएनो अरे, तलेपङ्सम् ङचे ज्यबे सम्तर् स्येत्नोथोब। ङचे ज्यबे सम्तर् अस्येत्ज्यी पङ्सम् ङत धीक्कार! 17 चु लक् ङचे र्हङ्की सेम्चेनो स्य्हेङ्बल य्हीन्सम् ङचे म्हेला यङ्बे आस् थेन्स्ये मुबल। तर चु लक् ङचे र्हङ्की सेम्चेनो स्य्हेङ्बल अय्हीन्। तलेपङ्सम् पर्मेस्वर्चेनो ङत चु लक् स्य्हेङ्बे जीम्म न्हङ्जेत्पल मुब। 18 होलेपङ्सम् ङइ म्हेल ता स्यीम्? ङचे हक् अनुसार् यङ्थोबे म्हेल अकीन्नले ओलेनो ज्यबे सम्तर् प्रचार् स्य्हेङ्म्यङ्बनो ङइ म्हेल य्हीन्ब। 19 ङ खलइ बानएनो अय्हीन्, होलेतलेनो य्हक्को म्हीमाचे ख्रीस्ट्त बीस्वास् स्य्हेङ्खइ पङ्ज्यीम् ङ जम्मलनो बान तबल मुब। 20 यहुदीमाचे ख्रीस्ट्त बीस्वास् स्य्हेङ्खइ पङ्ज्यीम् यहुदीमाकी गुङ्री ङचे यहुदीमाचे र्हङ्बनो स्हेङ्ज्यी। ङचे मोसाचे ब्रीबे नीयम् ङ्येन्अथोलेनो पर्मेस्वर्की नीयम्त ङ्येन्बलमाकी गुङ्री थेङ्यीमाचे ख्रीस्ट्त बीस्वास् स्य्हेङ्खइ पङ्ज्यीम् ङचेएनो मोसाचे ब्रीबे नीयम्त ङ्येन्ब र्हङ् स्य्हेङ्ज्यी। 21 यहुदी अय्हीन्बे म्हीमाकी गुङ्री थेङ्यीमाचे ख्रीस्ट्त बीस्वास् स्य्हेङ्खइ पङ्ज्यीम् ङचेएनो यहुदी नीयम् अरेबलमाचे रहङ्ब स्य्हेङ्ज्यी। चु पङ्बलमी ङचे मोसाचे ब्रीबे पर्मेस्वर्की नीयम्त अङ्येन् पङ्बल अय्हीन्, ङ ख्रीस्ट्की नीयम्त ङ्येन्ब। 22 कम्जोर्माकी गुङ्री लक् स्य्हेङ्बे बेलोरी थेङ्यीमाचे ख्रीस्ट्त बीस्वास् स्य्हेङ्खइ पङ्ज्यीम् ङएनो कम्जोर् तज्यी। चोले जम्मनो म्हीमाकी गुङ्री खले तमु जम्मनो म्हीमाचे ख्रीस्ट्री जीवन् यङ्खइ पङ्ज्यीम् ङ जम्मनो थोइ म्ही तज्यी। 23 ओसेम् ज्यबे सम्तर् ग्यम्से यङ्बे मोलम्मा जुम्यङ्खइ पङ्ज्यीम् ङचे चु जम्मनो ज्यबे सम्तर्की लागीरी स्य्हेङ्टीब। 24 एङ्यीमाचे स्ये:बलनो मुब, छ्योङ्बे म्हीमा जम्मनो तीख्यप्री छ्योङ्ब, तर खजु म्ही जम्मन्हङ्री ग्योनले छ्योङ्ज्यी हुजुचेनो डाबे पुरस्कार् यङ्ब। होलेनो एङ्यीमाएनो पुरस्कार् यङ्ब खम्नले छ्योङो। 25 छ्योङ्बरी बो कीन्बे म्हीमाचे र्हङ्की ल्ही:त ज्यनले दुल्ब। थेङ्यीमाचेम् नास् तज्यीम् य्हर्बे पुरस्कार् यङ्बरी होले स्य्हेङ्ब, तर ङ्य्हङ्मामी खेमेएनो नास् अतबे पुरस्कार् यङ्बे लागीरी चोले स्य्हेङ्ब। 26 होत्तज्यीम् ङ लक्ष्य थेन्ज्यीम् छ्योङ्ब। ङ लाबोरी र्हङ्की लेक्प अप्रुङ्। 27 तर ङ र्हङ्की ल्ही:त दुख पीन्ज्यीम् दुल्ब, अय्हीन् पङ्सम् ल्हो-ल्होत ज्यबे सम्तर् प्रचार् स्य्हेङ्ज्यीम् इनाम् यङ्बे बेलोरी र्हङ्नो अयोग्य तस्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.