१ कोरीन्थी 8 - पश्चिम तामाङख्लत पीन्बे चबे स्हे: 1 देरेम् ङ एङ्यीमाचे ब्रीबे ख्लत पीन्बे चबे स्हे:इ तम्की बारेरी पङ्ब, “ङ्य्हङ्मा जम्मचेनो ज्ञान् यङ्बल मुब।” ज्ञान्चे घमन्ड बब, तर म्होइबचे मन्डलीत कोङ्नलब। 2 खल्चे पङ्लेनो य्हक्को तम् स्ये:ब बी म्हेन्बलचे स्ये:थो:बे तम्एनो स्ये:बल अत। 3 तर खजु म्हीचे पर्मेस्वर्त म्होइब थेत पर्मेस्वर्चे खेम्जेत्प। 4 होत्तज्यीम् ख्लत पीन्बे चबे स्हे: चब अत, ङ्य्हङ्माचे स्ये:बल मुब जम्बुलीङ्री ख्ल तेएनो अय्हीन्, ओसेम् गी:कीनो देमेन्की पर्मेस्वर् बीम ल्हो-ल्हो पर्मेस्वर् अरे। 5 स्वर्गतेङ् जम्बुलीङ्री मीन्लकीनो य्हक्को ख्लमा मुब, ओसेम् हुजु मीन्लकीनो य्हक्को ख्लमातेङ् य्हक्को प्रभुमात म्हीमाचे तेन्ब, 6 तर ङ्य्हङ्माकी लागीरीम् पर्मेस्वर् गीकीनो मुब थेङ्नो अप य्हीन्ब। जम्म थोइ स्हेःमा थेङ्चे स्य्हेङ्जेत्ज्यी, ओसेम् थेङ्की लागीरी ङ्य्हङ्मा सोब। ओसेम् ङ्य्हङ्माकी लागीरी प्रभु गी:कीनो मुब, थेङ् येसु ख्रीस्ट् य्हीन्ब। थेङ् ग्यम्सेनो जम्मनो स्हे:मा स्य्हेङ्जेत्ज्यी, ओसेम् थेङ् ग्यम्सेनो ङ्य्हङ्मा सोब। 7 तर जम्मनो म्हीमाचे चु तम् स्येःबल अरे। थेङ्यीमान्हङ्री डेत्डेत् म्हीमा ख्रीस्ट्त बीस्वास् स्य्हेङ्ब बीम ङोन्ग्यम् ख्लमा तेन्ज्यीम् खबल तज्यीम् देरेएनो होतेबे ख्लमात पीन्बे चब चबतेङ् दमेन्लेनो ख्लत पीन्बे चबनो चज्यी बी म्हेन्ब, ओसेम् थेङ्यीमाकी बीबेक् कम्जोर् तबल तज्यीम् थेङ्यीमा असुद्द तज्यी म्हेन्ब। 8 चबे स्हेचे ङ्य्हङ्मात पर्मेस्वर्ज दोःन अल। अचलेएनो ङ्य्हङ्मात न्होङ्न अल, चलेएनो तइ फाइद अरे। 9 तर होसीयार् तउ, एङ्यीमाचे जम्मनो चबे स्हेमा चम्यङ्बे अधीकार कोल्ज्यीम् बीस्वास्री अकोङ्बलमात पाप्री दोःन अलखइ। 10 तलेपङ्सम् एङ्यीमा ज्ञान मुबे म्हीमा तज्यीम्एनो ख्लइ दीम्री चब थुङ्ब स्य्हेङ्टीबल बीबेक्री अकोङ्बे म्हीमाचे म्रङ्ज्यी पङ्सम् थेङ्यीमाचेएनो ख्लत पीन्बे चब चबे आर् अस्य्हेङ्ल स्यीम्? 11 ओसेम् एइ ज्ञान्चे लज्यीम् बीस्वास्री अकोङ्बे म्हीमा नास् तब। तर थेङ्यीमाकी लागीरीएनो ख्रीस्ट् स्यीजेत्पल य्हीन्ब। 12 एङ्यीमाचे बीस्वासी र्होमाकी अकोङ्बे बीबेक् न्होङ्न लज्यीम् चोले ख्रीस्ट्की बीरुद्दरी पाप स्य्हेङ्ब। 13 होत्तज्यीम् ङचे चबे चबचे ङइ बीस्वासी र्होमात पाप् स्य्हेङ्नलब पङ्सम् ङ थेमाइ सेम् अन्होङ्बे लागीरी ङचे दोज्यीम् खेमेएनो ख्लत पीन्बे स्य चस्ये अरे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.