१ कोरीन्थी 7 - पश्चिम तामाङभ्याकी बारेरी ङ्योत्पल 1 देरेम् ङ एङ्यीमाचे भ्या लबे बारेरी ङ्योत्पे तम्की जोहप् चोले ब्रीब। एङ्यीमाचे, “अपकोलचे भ्या अस्य्हेङ्नले टीब ज्यब य्हीन्ब” बी पङ्बल मुबल। 2 तर बेस्याइ लक् स्य्हेङ्बे परीक्ष य्हक्को खब, होत्तज्यीम् अपकोलमा जम्मलनो र्हङ्की म्रीङ् तखइ, ओसेम् अमकोलमालएनो र्हङ्की र्हेम्बो तखइ। 3 अपकोलमाचे भ्या स्हेङ्ब बीसेम् र्हङ्की म्रीङ्तेङ् न्हुथोब, ओसेम् होलेनो म्रीङ्चेएनो र्हेम्बोतेङ् न्हुथोब। 4 म्रीङ्की ल्हीः म्रीङ्ल अय्हीन्, तर थेइ र्हेम्बोल य्हीन्ब। होलेनो र्हेम्बोइ ल्हीः र्हेम्बोल अय्हीन्, तर थेइ म्रीङ्ल य्हीन्ब। 5 म्रीङ् र्हेम्बो बक्च्य न्हुःबरी गी:चे गी:त इन्कार् थस्हेङो, ङ्य्हीनो डीःज्यीम् प्रार्थना स्य्हेङ्बे लागीरी तोव बेलोसम्मकीनो बक्च्य अन्हुखइ, हुजु लीप्चे देबेएनो बक्च्य टीउ। अय्हीन् पङ्सम् एङ्यीमाचे सेम् दुल्ब अखम्बल तज्यीम् सैतान्चे एङ्यीमात परीक्षारी दोःनलस्ये मुब। 6 ङचे चु तम् एङ्यीमाचे स्य्हेङ्नोथोब बी कुल्बल अय्हीन्, तर एङ्यीमात अनुमती पीन्बल य्हीन्ब। 7 य्हीन्बरीम् जम्मनो म्हीमा ङ र्हङ्ले भ्य्ह अस्य्हेङ्नले टीखइ पङ्बे सेम ङल मुब। तर जम्मचेनो पर्मेस्वर् ग्यम्से थोचे थोइ बर्दान्मा यङ्बल मुब। गीःतेङ् थो गीःकी बर्दान् मुब पङ्सम् ल्हो-ल्होतेङ् ल्हो-ल्हो थोइ बर्दान् तब। 8 तर भ्या अस्य्हेङ्बलमातेङ् र्हेम्बो स्यीबे अमकोलमात पङ्ब, एङ्यीमाचे भ्या अस्य्हेङ्नले ङ र्हङ्ले टीब ज्यब तब। 9 तर एङ्यीमाचे र्हङ्की सेम् दुल्ब अखम्ज्यी पङ्सम् भ्या स्हेङो। तलेपङ्सम् सेम् नाअखम्ज्यीम् टीब बीमम् भ्या स्य्हेङ्बनो ज्यब य्हीन्ब। 10 देरेम् ङ भ्या स्य्हेङ्बलमात कुल्ब, (चु ङचे कुल्बल अय्हीन्, तर प्रभुचे कुल्जेत्पल य्हीन्ब)। म्रीङ्चे र्हेम्बोत अख्लाखइ। 11 तर म्रीङ्चे ख्लाज्यी पङ्सम् थेचे भ्या अस्य्हेङ्नले टीखइ, की दोःज्यीम् र्हङ्की र्हेम्बोतेङ्नो थुन्ज्यीम् टीखइ। ओसेम् र्हेम्बोचेएनो म्रीङ्त अख्लाखइ। 12 तर ल्हो-ल्होमात (प्रभु ग्यम्से अय्हीन्, ङ र्हङ्चेनो पङ्ब), खजु पङ्लेनो ख्रीस्टीयन् अपकोलल ख्रीस्ट्त बीस्वास् अस्य्हेङ्बे म्रीङ् मुब, ओसेम् थेइ म्रीङ् थेतेङ्नो टीबे सेम् लसम् थेचे म्रीङ्त ख्लाब अत। 13 होलेनो ख्रीस्टीयन् अमकोलल ख्रीस्ट्री बीस्वास् अस्य्हेङ्बे र्हेम्बो मुब, ओसेम् थेइ र्हेम्बो थेतेङ्नो टीबे सेम् लसम् थेचे र्हङ्की र्हेम्बोत ख्लाब अत। 14 तलेपङ्सम् बीस्वास् अस्य्हेङ्बे र्हेम्बो बीस्वास् स्य्हेङ्बे म्रीङ् ग्यम्से पबीत्र तब, ओसेम् बीस्वास् अस्य्हेङ्बे म्रीङ् बीस्वास् स्य्हेङ्बे र्हेम्बो ग्यम्से पबीत्र तब। अय्हीन् पङ्सम् थेङ्यीमाकी ज जमेमा असुद्द तस्ये मुबल, तर देरेम् कोलमाएनो पबीत्र तबल मुब। 15 तर बीस्वास् अस्य्हेङ्बे र्हेम्बो वुइ म्रीङ् खल्चे पङ्लेनो बीस्वास् स्य्हेङ्बे र्हङ्की र्हेम्बो वुइ म्रीङ् खलत पङ्लेनो ख्लाके म्हेन्सम् पीत्ज्यीम् य्हर्ब खम्ब। ओसेम् हुजु बेलोरी हुजु ख्रीस्ट्री बीस्वास् स्य्हेङ्बे र्हेम्बो वुइ म्रीङ् खजु पङ्लेनो बीस्वास् अस्य्हेङ्बे म्रीङ् वुइ र्हेम्बो ग्यम्से स्वतन्त्र तब। तलेपङ्सम् पर्मेस्वर्चे ङ्य्हङ् बीस्वासीमात सान्तीले टीबरी ङ्होत्जेत्पल य्हीन्ब। 16 बीस्वासी म्रीङ्चे बीस्वास् अस्य्हेङ्बे र्हङ्की र्हेम्बोत थर्न लबएनो खम्ब, ओसेम् बीस्वासी र्हेम्बोचे बीस्वास् अस्य्हेङ्बे र्हङ्की म्रीङ्त थर्न लबएनो खम्ब पङ्बे तम् ता एङ्यीमाचे अस्ये? 17 पर्मेस्वर्चे ङ्होत्जेत्पे बेलोरी एङ्यीमा जम्मनो खतेब मुबल हुजु बेलोरी र्हङ्बे जीवन्नो सोथोब। ङचे जम्मनो मन्डलीमात लोप्पे तम् चुनो य्हीन्ब। 18 बीस्वास् स्य्हेङ्ब बीम् ङोन्नो खतन स्य्हेङ्ज्यीन्बे म्हीचे हुजु खतनइ चीनो ख्लाब म्हइब अत। ओसेम् खतन अस्य्हेङ्बे म्हीत पर्मेस्वर्चे ङ्होत्जेत्पल मुसम् थेचेएनो खतन स्य्हेङ्ब अत। 19 तलेपङ्सम् खतन स्य्हेङ्लेनो अस्य्हेङ्लेनो हुजु तेएनो अय्हीन्, तर ङ्हच्छ्यङ् तम्मी पर्मेस्वर्चे कुल्जेत्पे फ्रोइ ङ्येन्ज्यीम् ब्रब य्हीन्ब। 20 पर्मेस्वर्चे ङ्होत्जेत्पे बेलोरी एङ्यीमा जम्मनो खतेब मुबल होतेबनो तथोब। 21 पर्मेस्वर्चे ङ्होत्जेत्पे बेलोरी बान मुबल य्हीन्सम् थछेरो, तर ए बानाइ लक् पीत्ज्यीम् य्हर्म्यङ्सम् य्हर्ब खम्ब। 22 तलेपङ्सम् प्रभुचे ङ्होत्जेत्पे बेलोरी बान मुबे म्ही, देरेम् थे प्रभुरी स्वतन्त्र तबल मुब। होलेनो प्रभुचे ङ्होत्जेत्पे बेलोरी स्वतन्त्र मुबे म्ही देरेम् ख्रीस्ट्की बान तबल मुब। 23 पर्मेस्वर्चे एङ्यीमात य्हक्को सेइ फाज्यीम् ग्लुजेत्पल य्हीन्ब। होत्तज्यीम् म्हीइ बाना थतउ। 24 बीस्वासी र्होमा, एङ्यीमात पर्मेस्वर्चे ङ्होत्जेत्पे बेलोरी एङ्यीमा खतेब मुबल होतेबनो पर्मेस्वर्तेङ् टीउ। 25 देरेम् ङ एङ्यीमाचे कङ्य अमकोलाकी बारेरी ङ्योत्पे तम्की जोहब् चोले पीन्ब। ङचे कङ्य अमकोलमाकी लागीरी कुल्बरी ङत प्रभुचे तइ अर्तीएनो न्हङ्जेत्पल अरे, तर प्रभुइ क्रीपाचे ङ बीस्वासीलो तबल तज्यीम् एङ्यीमात र्हङ्की तम्मा पङ्ब। 26 चु बेलोइ ङ्हच्छ्यङ् दुख च्याज्यीम्मी देरे खतेब मुब होतेबनो टीब ज्यब तल बी ङचे म्हेन्ब। 27 भ्या स्य्हेङ्बल मुसम् र्हङ्की म्रीङ्त ख्लाब थम्हयो। भ्या अस्य्हेङ्बल मुसम् भ्या स्य्हेङ्ब थम्हयो। 28 तर भ्या स्य्हेङ्लेनो हुजु पाप् अय्हीन्। कङ्य अमकोलचे भ्या स्य्हेङ्लेनो हुजु पाप् अय्हीन्। तर भ्या स्य्हेङबलमाचे चु जीवन्री दुखमा नाथोस्ये मुब, ओसेम् एङ्यीमात ङचे हुजु दुख ग्यम्से गु:ब म्हइबल य्हीन्ब। 29 बीस्वासी र्होमा, ङ एङ्यीमात पङ्ब, बेलो य्हक्को अरे, ओसेम् देरे य्हङ्से म्रीङ् मुबलमा म्रीङ् अरेबलमा र्हङ्ब तज्यीम् टीउ। 30 क्राबलमा अक्राबलमा र्हङ्ले, ओसेम् तङ्बलमा अतङ्बलमा र्हङ्ब तज्यीम् टीखइ। ओसेम् ग्लुज्यीम् बबलमाचे र्हङ्तेङ् तएनो अरेबल र्हङ्ब तज्यीम् टीखइ। 31 ओसेम् चु जम्बुलीङ्की स्हे:मा कोल्बलमाचे हुजु स्हे:मा कोल्बरी सेम्नो अपीन्खइ, तलेपङ्सम् चु जम्बुलीङ् ग्योनेनो म्हज्यीम् य्हर्स्ये मुब। 32 एङ्यीमा जम्मनो अछेर्नले टीखइ पङ्बे सेम् ङल मुब। भ्या अस्य्हेङ्बे म्हीचे प्रभुइ लक् स्य्हेङ्ब, ओसेम् प्रभुत खले तङ्नलब पङ्बे तम्की बारेरीकीनो म्हेन्ब। 33 तर भ्या स्य्हेङ्बे म्हीचेम् म्रीङ्त खले तङ्नलब पङ्ज्यीम् जम्बुलीङ्की तम्माइ बारेरीकीनो म्हेन्ब। 34 ओसेम् चोतेबे म्हीइ सेम् ङ्य्ही तब। भ्य्ह अस्य्हेङ्बे अमकोल वुइ कङ्य अमकोल खल्चे पङ्लेनो ल्ही:तेङ् आत्मा ङ्य्हीरीनो खले पबीत्र टीब पङ्ज्यीम् प्रभुइ बारेरीकीनो म्हेन्ब। तर भ्या स्य्हेङ्बे अमकोलचेम् र्हङ्की र्हेम्बोत खले तङ्नलब पङ्ज्यीम् जम्बुलीङ्की तम्माइ बारेरीकीनो म्हेन्ब। 35 ङचे चु तम् एङ्यीमात खी:बरी अय्हीन्, तर ज्यब तखइ पङ्ज्यीम् पङ्बल य्हीन्ब। तर एङ्यीमा प्रभुतेङ् ज्यनले ब्रज्यीम् सेम् न्हङ्य्हङ्सेनो प्रभुत तेनो पङ्ब म्हइटीबल य्हीन्ब। 36 खजु म्हीचे पङ्लेनो र्हङ्तेङ् भ्या स्य्हेङ्बरी र्हीत्ज्यीन्बे अमकोलतेङ् र्हङ्चे ज्यबे ब्यबहार अस्य्हेङ्नेम् म्हेन्सम्, ओसेम् हुजु अमकोलएनो उमेर् यो:बल मुसम्, ओसेम् हुजु म्हील भ्या स्य्हेङ्बे सेम् मुसम् थेङ्यीमात भ्या स्य्हेङ्पुङो। चोले स्य्हेङ्ब पाप् अय्हीन्। 37 तर खजु म्हीचे र्हङ्की सेम् कोङ्न लब, ओसेम् ल्हो-ल्हो म्हीचे कर् लज्यीम् अय्हीन्, तर र्हङ्की सेम्चेनो र्हङ्चे भ्या स्य्हेङ्बरी र्हीत्पे अमकोलत भ्या स्य्हेङ्बे सेम् अलब, ओसेम् र्हङ्की सेम्त र्हङ्चेनो दुल्ब खम्सम् हुजुएनो ज्यबनो य्हीन्ब। 38 होत्तज्यीम् खल्चे भ्या स्य्हेङ्बरी र्हीत्पे अमकोलत भ्या स्य्हेङ्ब, हुजु म्हीचे ज्यबनो स्य्हेङ्ब, तर खल्चे भ्या अस्य्हेङ्, थेचे झेन्नो ज्यब स्य्हेङ्ब। 39 र्हेम्बो सोगदे म्रीङ् र्हङ्की र्हेम्बोतेङ्नो टीथोब। तर र्हेम्बो स्यीज्यी पङ्सम् थेचे सेम्री ङ्यीबे म्हीतेङ् भ्या स्य्हेङ्ब खम्ब, तर हुजु म्हीम् प्रभुत बीस्वास् स्य्हेङ्बे म्हीनो तथोब। 40 तर थेचे भ्या अस्य्हेङ्नले टीज्यी पङ्सम् थेत झेन् सुख तस्ये मुब। चु ङचे म्हेन्बे तम् य्हीन्ब, ओसेम् पर्मेस्वर्की आत्मा ङतेङ् मुब बी ङचे म्हेन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.