१ कोरीन्थी 6 - पश्चिम तामाङबीस्वासीमान्हङ्री मुद्द 1 एङ्यीमान्हङ्री गीःल, ल्हो-ल्हो बीस्वासी गीःतेङ् बङ्ब छेत्प तज्यी पङ्सम् न्यायकी लागीरी तले एङ्यीमा पर्मेस्वर्त बीस्वास् स्य्हेङ्बे म्हीमाज अङ्य्हीनले पर्मेस्वर्त बीस्वास् अस्य्हेङ्बे म्हीमाज ङ्यीब? 2 पर्मेस्वर्की म्हीमाचे जम्बुलीङ्की म्हीमाकी न्याय स्य्हेङ्ब पङ्बे तम् एङ्यीमाचे स्येःबल अरे? ओसेम् एङ्यीमाचे जम्बुलीङ्की म्हीमाकी न्याय स्य्हेङ्ब पङ्सम् ता एङ्यीमाचे र्हङ्न्हङ्री चोतेबे ज्यीद तम्मा डीःनलब अखम्? 3 ङ्य्हङ्माचे स्वर्गदुत्मालएनो न्याय स्य्हेङ्स्ये मुब बी एङ्यीमाचे स्येःबल अरे? होले पङ्सम् ङ्य्हङ्माचे चु जीवन्री तबे तम्माकी न्याय स्य्हेङ्ब खम्थोब। 4 होत्तज्यीम् चोतेबे बङ्ब छेत्पमा तबतेङ् तले एङ्यीमाचे पर्मेस्वर्त बीस्वास् अस्य्हेङ्बे म्हीमात न्याय स्य्हेङ्पीनो बी पङ्ब? 5 एङ्यीमात पेत्नलबरी ङ चु तम् पङ्ब। बङ्ब छेत्प तबतेङ् थुन्न लपीन्ब खम्बे बुद्दी मुबे बीस्वासी म्ही एङ्यीमाकी गुङ्री गीःएनो अरे? 6 तर एङ्यीमान्हङ्री बीस्वासी अले गीःचे ल्हो-ल्हो बीस्वासी अलेतेङ् बङ्ब छेत्प स्य्हेङ्ब, ओसेम् पर्मेस्वर्त बीस्वास् अस्य्हेङ्बे म्हीमाज न्याय स्य्हेङ्पीनो पङ्ज्यीम् अदालत्री ङ्यीब। 7 एङ्यीमा र्हङ्न्हङ्रीनो गीःचे गीःकी बीरुद्दरी अदालत्री मुद्द युःबनो एङ्यीमा ब्रेःब य्हीन्ब। बरु एङ्यीमाचे अन्याय नापनो ज्यब य्हीन्ब। बरु ल्होल्होचे एङ्यीमात ठक्तीबनो ज्यब य्हीन्ब। 8 तर एङ्यीमा बीस्वासीन्हङ्नो गीःचे गीःत अन्याय स्य्हेङ्ब, ओसेम् गीःचे गीःत ठक्तीब। 9 अज्यबे लक् स्य्हेङ्बे म्हीमाचे पर्मेस्वर्की य्हुल्री वङ्बे हक् यङ्स्ये अरे पङ्बे तम् एङ्यीमाचे अस्ये? एङ्यीमाचे र्हङ्चे र्हङ्तनो धोक थपीनो। छर म्हीमा, ख्लत तेन्बलमा, ब्यभीचारीमा, अपकोल बेस्यमा, अपकोला- अपकोलन्हङ् ओसेम् अमकोल-अमकोलान्हङ् न्हुब, 10 य्होमा, लोभीमा, ङ्य्हेज्यीम् ब्रबलमा, नीन्द स्य्हेङ्बलमा ओसेम् र्होत ठक्तीज्यीम् चबलमाचे पर्मेस्वर्की य्हुल्री बङ्बे हक् यङ्स्ये अरे। 11 एङ्यीमान्हङ्री गदे म्हीमामी ङोन्ग्यम् चोतेबनो मुबल। तर देरेम् एङ्यीमाकी पाप ख्रुपीन्जेत्ज्यी, एङ्यीमात पबीत्र स्य्हेङ्जेत्ज्यी, ओसेम् प्रभु येसु ख्रीस्ट्तेङ् ङ्य्हङ्की पर्मेस्वर्की आत्मा ग्यम्से एङ्यीमा पर्मेस्वर्की ङोन्री तइ दोस्एनो अरेबल तज्यी। 12 ओसेम् एङ्यीमान्हङ्री खल्चे पङ्लेनो, “ङचे ता स्य्हेङ्लेनो तब” बी पङ्ब। तर जम्मनो तम्चे एङ्यीमात ज्यबमी अत। ओसेम् ङचेएनो, “ङचे ता स्य्हेङ्लेनो तब” पङ्ब खम्स्येल। तर ङ र्हङ्त तइ तम्लएनो बान तबुङ्बे सेम् अरे। 13 एङ्यीमान्हङ्री खल्चे पङ्लेनो, “चबे स्हे फोइ लागीरी य्हीन्ब, ओसेम् फो चबे स्हेःकी लागीरी य्हीन्ब” बी पङ्ल। तर पर्मेस्वर्चे ङ्य्हीतनो नास् स्य्हेङ्जेत्स्ये मुब। म्हीइ ल्हीः बेस्या स्य्हेङ्बे लागीरी अय्हीन्, तर प्रभुइ लागीरी य्हीन्ब, ओसेम् ल्हीःत तोःबे स्हेमा प्रभुचेनो न्हङ्जेत्प। 14 पर्मेस्वर्चे थेङ्की सक्तीचे प्रभु येसुत सोनलजेत्ज्यी, ओसेम् ङ्य्हङ्मातएनो थेङ्की सक्ती ग्यम्से सोनलजेत्स्ये मुब। 15 एङ्यीमाकी ल्हीः ख्रीस्ट्की ल्हीःकी अङ्गमा य्हीन्ब पङ्बे तम् एङ्यीमाचे अस्ये? होले पङ्सम् ता ङचे ख्रीस्ट्की अङ्गत बेस्यइ अङ्ग तनलब? चोतेब खेमेएनो अतखइ! 16 बेस्यतेङ् ब्रबे म्हीम् बेस्यतेङ् ल्हीःरी गीः र्हङ्बनो तब पङ्बे तम् एङ्यीमाचे अस्ये? तलेपङ्सम् धर्म छ्येःचे पङ्ब, “थेङ्य्ही ल्हीः गीः र्हङ्ब तस्ये मुब।” 17 तर खल प्रभुतेङ् ब्रब, थे थेङ्तेङ् आत्मारी गीःनो तस्ये मुब। 18 बेस्या लक् स्य्हेङ्ब ग्यम्से थारीङ् टीउ, ल्हो-ल्हो पाप् म्हीचे र्हङ्की ल्हीः ग्यम्से फीर्च्योर् स्य्हेङ्ब, तर ब्यभीचार् स्य्हेङ्बे म्हीचे र्हङ्की ल्हीःकी बीरुद्दरी पाप स्य्हेङ्ब। 19 एङ्यीमाकी ल्हीः पबीत्र आत्माइ दीम् य्हीन्ब। पर्मेस्वर्चे न्हङ्जेत्पे पबीत्र आत्मा एङ्यीमाकी ल्हीरी स्य्हुजेत्प पङ्बे तम् एङ्यीमाचे अस्ये? एङ्यीमाकी ल्हीःएनो एङ्यीमा र्हङ्ल अय्हीन्। 20 तलेपङ्सम् पर्मेस्वर्चे एङ्यीमात सेइ फाज्यीम् ग्लुजेत्पल य्हीन्ब। होत्तज्यीम् एङ्यीमाचे र्हङ्की ल्हीःरी पर्मेस्वर्की महीमा स्य्हेङो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.