१ कोरीन्थी 5 - पश्चिम तामाङ1 एङ्यीमाकी गुङ्रीम् पर्मेस्वर्त अस्येबे म्हीमाकी गुङ्रीएनो अतबे बेस्याइ लक् तबल मुब पङ्बे तम् ङचे थ्येबल मुब। एङ्यीमान्हङ्री गीःचे र्हङ्की अम च्यङ्बतेङ्नो बक्च्य न्हुःबल मुब रो। 2 ओसेम् एङ्यीमा र्हङ्चे र्हङ्त ङ्हच्छ्यङ् म्हेन्ब रो स्यीम्! होले अय्हीन् बरु दुख म्हन्तीउ, ओसेम् होतेबे लक् स्य्हेङ्बे म्हीतमी एङ्यीमाकी गुङ्चेनो तेत्लागो। 3-4 ङ ल्हीःरी एङ्यीमा ग्यम्से थारीङ् मुलेएनो आत्मारी एङ्यीमातेङ्नो मुब। ओसेम् ङ हुजुरी मुम र्हङ्लेनो चोतेबे नइबे लक् स्य्हेङ्बे म्हीइ न्याय ङचे स्य्हेङ्ज्यीन्बल मुब। एङ्यीमा ङ्य्हङ्की प्रभु येसुइ छेन्री र्हुब् तबे बेलोरी ङएनो प्रभु येसुइ सक्तीतेङ् आत्मारी एङ्यीमातेङ् बक्च्य तब। 5 हुजु म्हीइ पापी स्वभाब नास् तखइ बी एङ्यीमाचे हुजु म्हीत सैतान्की यारी सोप्तीपीनो, ओसेम् प्रभु दोःज्यीम् ब्योन्युबे दीन्री थेइ आत्मामी थर्ब खम्खइ। 6 एङ्यीमाचे र्हङ्तनो ङ्हच्छ्यङ् म्हेन्ब ज्यब अय्हीन्। ज्योप्पे ब्रारी चेक्पजाकी खमीर् युलेएनो जम्मनो ब्रात फुनलब पङ्बे तम् ता एङ्यीमाचे अस्य्हे? 7 एङ्यीमाचे ङोन्ग्यम्की न्होङ्ज्यीन्बे खमीर्त ख्लाथोःब। ओसेम् एङ्यीमा सुद्द तस्ये मुब। हुजु लीप्चे एङ्यीमा खमीर् अयुनले ज्योप्पे छार् ब्रा र्हङ्ब तस्ये मुब, पङ्थोसम् एङ्यीमामी देमेन्नो खमीर् अयुबे छार् ब्रानो य्हीन्ब। तलेपङ्सम् नीस्तार् पर्बरी ग्यु बोकइ ठा पीन्ब र्हङ्ले ख्रीस्ट् ङोन्नो ङ्य्हङ्माइ लागीरी स्यीज्यीन्बल मुब। 8 होत्तज्यीम् ङ्य्हङ्माचे अज्यबतेङ् दुस्ट लक्मा र्हङ्बे न्होङ्ज्यीन्बे खमीर्चे स्य्हेङ्बे गेङ् चज्यीम् अय्हीन्, तर सुद्दतेङ् देमेन्की लक्मा र्हङ्बे खमीर् अयुबे ग्येङ् चज्यीम् पर्ब म्हन्दीइ। 9 ङचे ब्रीबे ङोन्ग्यम्की चीठीरी एङ्यीमात ब्यभीचार् स्य्हेङ्बे म्हीमातेङ् बक्च्य थब्रउ बी ब्रीबल मुबल। 10 ङचे एङ्यीमात चु जम्बुलीङ्की ब्यभीचारीमा, लोभीमा, डाकुमा ओसेम् ख्लत तेन्बे म्हीमातेङ् ब्रनो थब्रउ पङ्बलमी अय्हीन्। होले थेङ्यीमा ग्यम्से फेःज्यीम् ब्रज्यी पङ्सम् एङ्यीमा जम्बुलीङ् ग्यम्सेनो डोङ्ज्यीम् य्हर्थोब। 11 तर ङचेम् खल म्हीचे थे ख्रीस्ट्त बीस्वास् लबे म्ही य्हीन्ब बी पङ्ज्यीम्एनो ब्यभीचार् स्य्हेङ्ब, लोभ् स्य्हेङ्ब, ख्लत तेन्ब, नीन्द स्य्हेङ्ब, ज्यीचे ङ्य्हेज्यीम् ब्रब, ओसेम् डाकुतेङ् ब्रब अत पङ्बल मुबल। होतेबे म्हीतेङ्मी बक्च्य टीज्यीम् चबएनो थचउ। 12-13 बीस्वास् अलबे म्हीमाकी न्याय स्य्हेङ्बे लक् ङल अय्हीन्। फीर्च्योर्लमाकी न्याय पर्मेस्वर्चेनो स्य्हेङ्जेत्प। तर मन्डलीन्हङ् मुबलमाकी न्याय एङ्यीमाचे स्य्हेङ्थोब, अय्हीनो स्यीम्? धर्म छ्येःचे पङ्ब, “एङ्यीमाचे दुस्ट म्हीमात र्हङ्की गुङ्से तेत्लाको।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.