१ कोरीन्थी 4 - पश्चिम तामाङप्रेरीत्मा 1 ङ्यीमात एङ्यीमाचे ख्रीस्ट्की योक्पो ओसेम् पर्मेस्वर्की रहस्यइ ङ्हच्छ्यङ् तम्मा स्येत्पे जीम्मा यङ्बे म्हीमा बी म्हेन्थोब। 2 जीम्म यङ्बे म्हीमामी बीस्वासीलो तथोब। 3 तर एङ्यीमाचे वुइ म्हीमाकी अदालत खजुचे पङ्लेनो ङइ न्याय स्य्हेङ्ब पङ्सम् हुजु ङइ लागीरी ज्यीद तम् य्हीन्ब, ङ र्हङ्चेएनो र्हङ्की न्याय अस्य्हेङ्। 4 ङचे ताए अज्यबे लक् स्य्हेङ्बल मुब बी ङचे स्येःबल अरे, तर ङत हुजुचे तइ दोस् अरेबे म्ही बी अङोन्। ङइ न्याय स्य्हेङ्बरी प्रभुनो मुब। 5 होत्तज्यीम् तेत् लबे बेलो बीम ङोन्ग्यम् खल्लएनो न्याय थस्य्हेङो। प्रभु दोःज्यीम् ब्योन्युबे बेलोसम्म ब्रेनो। थेङ्चेनो म्हुन्दुङ्री लाबे जम्मनो तम्मा य्हल्री नोम्खजेत्स्ये मुब, ओसेम् म्हीमाकी सेम्की तम्मा ङोन्पीन्जेत्स्ये मुब। हुजु बेलोरी जम्मनो म्हीमाचे पर्मेस्वर् ग्यम्से यङ्थोबे र्हङ्की तोप्प यङ्स्ये मुब। 6 बीस्वासी र्होमा, एङ्यीमाकी लागीरीनो ङतेङ् अपोल्लोस्की नमुन पीन्ज्यीम् चु जम्म तम्मा ब्रीबल मुब, तलेपङ्सम् धर्म छ्येःकी नीयम्मा ज्यनले ङ्येन्थोब बी एङ्यीमाचे ङ्यीमा ग्यम्से लोप्खइ, होले स्य्हेङ्ज्यी पङ्सम् एङ्यीमाचे खल्चेएनो गीःकी जोरी गर्ब स्य्हेङ्स्ये अरे, ओसेम् गीःबत हेल स्य्हेङ्स्ये अरे। 7 तलेपङ्सम् एङ्यीमात ल्हो-ल्हो म्हीमा बीम ङ्हच्छ्यङ् खल्चे स्य्हेङ्ज्यी? ता एङ्यीमातेङ् मुबे स्हे पर्मेस्वर्चेनो न्हङ्जेत्पल अय्हीन् स्यीम्? होले पङ्सम् तले एङ्यीमात पर्मेस्वर्चे न्हङ्बल अय्हीन्ब र्हङ्ले घमन्ड स्य्हेङ्ब? 8 एङ्यीमात तोःबे स्हेमा जम्मनो यङ्ज्यीन्बल मुब बी म्हेन्ब स्यीम्! एङ्यीमामी ङोन्ग्यम्नो बरु तज्यीन्बल मुब बी म्हेन्ब स्यीम्! ङ्यीमा बीमएनो एङ्यीमा ग्यल्बो तबल मुब बी म्हेन्ब स्यीम्! एङ्यीमा देमेन्लेनो ग्यल्बो तबल य्हीन्सम् ङ्यीमाचेएनो एङ्यीमातेङ् बक्च्य राज्य स्य्हेङ्ब खम्स्ये मुबल! 9 तलेपङ्सम् ङ्यीमा प्रेरीत्मात पर्मेस्वर्चे जम्म न्हङ्की दुङ्री थेन्जेत्पल मुब बी ङइ सेम्चे म्हेन्ब। पर्मेस्वर्चेनो ङ्यीमात जम्बुलीङ्की म्हीमातेङ् स्वर्गदुत्माकी ङोन्ग्यम् स्यीथोबे सजाय यङ्बे म्हीमात र्हङ्ले ङोन्जेत्पल मुब। 10 ङ्यीमा ख्रीस्ट्की लागीरी मुर्ख तबल मुब, तर एङ्यीमामी ख्रीस्ट्री बुद्दी मुबे म्हीमा तबल मुब बी म्हेन्ब स्यीम्! ङ्यीमा बङ् अरेबल मुब, तर एङ्यीमामी बङ्ज्येन् मुब बी म्हेन्ब स्यीम्! ङ्यीमात म्हीमाचे स्हेस अल, तर एङ्यीमात स्हेस लब बी म्हेन्ब स्यीम्! 11 देरे सम्मनो ङ्यीमा ख्रेन्बलतेङ् फीःबल मुब, ओसेम् डोनले येन्बरी गोइल अरे। म्हीमाचे ङ्यीमात तोब, ङ्यीमाल दीम् नम् तएनो अरे। 12 ङ्यीमाचे चब थुङ्बतेङ् येन्बे येन्की लागीरी र्हङ्की याचेनो य्हक्को दुखले लक् स्य्हेङ्ब। र्होचे केत्पतेङ् ङ्यीमाचे मोलम् पीन्ब। ङ्यीमात म्हीमाचे पीन्बे दुख ङ्यीमाचे नाप। 13 ङ्यीमात नीन्द स्य्हेङ्बे म्हीमात ङ्यीमाचे म्होइज्यीम् ज्यबे तम्नो पङ्ब। देरे सम्मनो ङ्यीमा जम्बुलीङ्की दुलुतेङ् ख्रीदी र्हङ्ब तबल मुब। 14 ङचे चु तम एङ्यीमात पेत्नलबे लागीरी ब्रीबल अय्हीन्, तर र्हङ्की म्होइबे कोलमात र्हङ्ले अर्ती पीन्बरी ब्रीबल य्हीन्ब। 15 तलेपङ्सम् एङ्यीमात ख्रीस्ट्की बारेरी लोप्पे म्हीमा य्हक्को मुलेएनो एङ्यीमाल अपमी य्हक्को अरे। तलेपङ्सम् एङ्यीमात ज्यबे सम्तर् स्येत्ज्यीम् येसु ख्रीस्ट्त स्येःनलबल तज्यीम् ङ एङ्यीमाकी अप र्हङ्ब तबल मुब। 16 होत्तज्यीम् एङ्यीमाचेएनो ङचे र्हङ्ले स्हेङो बी ङ एङ्यीमात फ्या लब। 17 होत्तज्यीम् ङचे एङ्यीमाज तीमोथीत पीत्खटीबल मुब। थे प्रभुरी ङइ म्होइबतेङ् बीस्वासीलो ज य्हीन्ब। ङचे जम्मा ग्लामातेङ् मन्डलीमारी लोप्प र्हङ्ले येसु ख्रीस्ट्री ङइ छार् जीवन् खतेब मुब पङ्बे तम् थेचे एङ्यीमात व्हल् लपीन्स्ये मुब। 18 एङ्यीमान्हङ्री गदे म्हीमामी ङ एङ्यीमाज दोःज्यीम् अख म्हेन्ज्यीम् ङ्हच्छ्यङ् लज्यीम् ब्रब रो। 19 तर प्रभुइ थुः मुसम् ङ एङ्यीमाज ग्योनेनो खस्ये मुब, ओसेम् हुजु ङ्हच्छ्यङ् म्हेन्ज्यीम् ब्रबलमाकी तम्कीनो अय्हीन्, तर थेङ्यीमाकी सक्ती खतेब टीम् च्यास्ये मुब। 20 तलेपङ्सम् पर्मेस्वर्की य्हुल् तम्मारी अय्हीन्, तर सक्तीरी मुब। 21 एङ्यीमाकी सेम्री ता म्हेन्ब? ङ एङ्यीमाज बेर्क बज्यीम् खब वुइ म्होइबतेङ् नम्रइ आत्मा बज्यीम् खब? |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.