१ कोरीन्थी 3 - पश्चिम तामाङपर्मेस्वर्की योक्पोमा 1 बीस्वासी र्होमा, ङ एङ्यीमातेङ् मुबे बेलोरी ङचे एङ्यीमातेङ् पबीत्र आत्मा मुबे म्हीमातेङ् र्हङ्ले तम् लब अखम्। ङचे एङ्यीमातेङ् ल्हीःकी पाप् स्वभाब अनुसार् ब्रबे म्हीमातेङ् र्हङ्ले तम् लज्यी। ओसेम् ख्रीस्ट्री एङ्यीमातेङ् ज्यीद कोलमातेङ् र्हङ्ले तम् लज्यी। 2 होत्तज्यीम् ङचे एङ्यीमात कोङ्बे चबे स्हेः अख्वानले ङ्य्हे ख्वाज्यी। तलेपङ्सम् एङ्यीमाचे कोङ्बे चब ङोन्ग्यम्एनो चब अखम्बल मुबल, ओसेम् देरे सम्मएनो खम्बल अरे। 3 दवम् एङ्यीमा र्हङ्की ल्हीःकी पाप् स्वभाब अनुसार्कीनो ब्रब। ओसेम् एङ्यीमा र्हङ्न्हङ् गीःचे गीःतेङ् स्हेर्बतेङ् बङ्ब-छेत्प स्य्हेङ्ब। होत्तज्यीम् ता एङ्यीमा ल्हीःकी पाप् स्वभाब अनुसार्कीनो ब्रबे जम्बुलीङ्की ल्हो-ल्हो म्हीमा र्हङ्ब अत स्यीम्? 4 तलेपङ्सम् एङ्यीमान्हङ् गीःचे, “ङ पावल्ल” ओसेम् ल्होल्होचे “ङमी अपोल्लोस्ल” य्हीन्ब पङ्सम् ल्हीःकी स्वभाब अनुसार्कीनो ब्रबे जम्बुलीङ्की ल्हो-ल्हो म्हीमा र्हङ्ब अत स्यीम्? 5 अपोल्लोस् खल य्हीन्ब? ओसेम् पावल खल य्हीन्ब? ङ्यी ङ्य्हीनो एङ्यीमात बीस्वास्री बबे पर्मेस्वर्की योक्पोमाकीनो य्हीन्ब। ओसेम् प्रभुचे कुल्जेत्पे लक् ङ्यीमाचे स्य्हेङ्ब। 6 ङचे ब्लु सुःज्यी, अपोल्लोस्चे यी युःज्यी, तर पर्मेस्वर्चे छर्नलजेत्ज्यी। 7 होत्तज्यीम् सुःबतेङ् यी युःबे म्ही ङ्हच्छ्यङ् अय्हीन्, तर छर्नलजेत्पे पर्मेस्वर् ङ्हच्छ्यङ् य्हीन्ब। 8 सुःबलतेङ् यी युःबल ङ्य्हीलनो उदेस्य गी: य्हीन्ब, ओसेम् थेङ्य्हीचेनो र्हङ्-र्हङ्की लक् अनुसार्की म्हेल यङ्स्ये मुब। 9 तलेपङ्सम् ङ्यी ङ्य्हीनो पर्मेस्वर्की लक् स्य्हेङ्बे म्हीमा य्हीन्ब, ओसेम् एङ्यीमामी पर्मेस्वर्की म्रङ् य्हीन्ब। एङ्यीमा पर्मेस्वर्चे स्य्हेङ्जेत्पे दीम्एनो य्हीन्ब। 10 पर्मेस्वर्की अनुग्रहचे लज्यीम् ङचे ज्यनले जग युब स्येःबे कर्मीचे र्हङ्ले जग युबल मुब, ओसेम् ल्हो-ल्होमाचे हुजु जोरी दीम् स्य्हेङ्टीबल मुब। तर हुजु जोरी दीम् स्य्हेङ्टीबलमा जम्मचेनो ज्यनले च्याज्यीम् स्य्हेङ्थोब। 11 तलेपङ्सम् हुजु जग्मी येसु ख्रीस्ट् य्हीन्ब, ओसेम् खल्चेएनो ल्हो-ल्हो जग युब अखम्। 12 चु जग जोरी डेत् म्हीमाचे म्हर् म्हुइतेङ् य्हक्को सेइ ङ्यीबे युङ्बमा युःज्यीम् स्य्हेङ्ल, ओसेम् ल्हो-ल्हो डेत्चेम् स्यीङ्, खर्बे छ्यीमातेङ् लेमाचे दीम् स्य्हेङ्ल। 13 जम्मनो म्हीमाचे स्य्हेङ्बे लक् न्यायकी दीन्री म्रङ्स्ये मुब। तलेपङ्सम् हुजु दीन्री थेङ्यीमाचे स्हेङ्बे लक् खतेब टीम् बी मेरी युज्यीम् जाच्तीस्ये मुब। 14 हुजु जग्री स्य्हेङ्बे म्हीइ लक् मेरी युःबतेङ् अस्य्होप्ज्यी पङ्सम् थेचे बक्सीस् यङ्स्ये मुब। 15 खजु पङ्लेनो म्हीचे स्य्हेङ्बे लक् मेचे स्य्होप्ज्यी पङ्सम् थेचे बक्सीस् यङ्स्ये अरे। तर थे र्हङ्मी मे ग्यम्से तज्यीम् स्योर्ब र्हङ्ले थर्स्ये मुब। 16 एङ्यीमा पर्मेस्वर्की दीम् य्हीन्ब, ओसेम् पर्मेस्वर्की आत्मा एङ्यीमातेङ् स्य्हुजेत्प बी ता एङ्यीमाचे अस्ये स्यीम्? 17 खल म्हीचे पङ्लेनो पर्मेस्वर्की दीम्त नास् लब पङ्सम् पर्मेस्वर्चे थेतएनो नास् स्य्हेङ्जेत्स्ये मुब। तलेपङ्सम् पर्मेस्वर्की दीम् पबीत्र तब, ओसेम् हुजु पर्मेस्वर्की दीम्मी एङ्यीमा य्हीन्ब। 18 खल्चेएनो र्हङ्चे र्हङ्त धोक अपीन्खइ। एङ्यीमान्हङ्री खल्चे पङ्लेनो र्हङ्तनो चु जम्बुलीङ्की बुद्दी मुबे म्ही य्हीन्ब बी म्हेन्सम् थे देमेन्लेनो बुद्दी मुबे म्ही तबे लागीरी मुर्ख म्ही तबल तथोब। 19 तलेपङ्सम् पर्मेस्वर्की ङोन्री चु जम्बुलीङ्की बुद्दीमी मुर्ख तम् य्हीन्ब। धर्म छ्येःरी चोले ब्रीबल मुब, “पर्मेस्वर्चे बुद्दी मुबलमात थेङ्यीमाकी चलाक् लक्री चुङ्जेत्प।” 20 देबेएनो ल्हो-ल्हो ग्लारी चोलेएनो ब्रीबल मुब, “बुद्दी मुबलमाचे म्हेन्बे तम् लक् अतबे तम् य्हीन्ब बी परमप्रभुचे खेम्जेत्प।” 21 होत्तज्यीम् खल्चेएनो म्हीचे स्य्हेङ्ब खम्बे लक्री घमन्ड अस्य्हेङ्खइ। तलेपङ्सम् जम्मनो एङ्यीमालनो य्हीन्ब, 22 पावल, अपोल्लोस् ओसेम् पत्रुस, जम्बुलीङ्, स्यीबतेङ् सोब, देरेइ बेलो ओसेम् लीक्यम्की बेलो जम्मनो एङ्यीमालनो य्हीन्ब। 23 ओसेम् एङ्यीमामी ख्रीस्ट्ल, ख्रीस्ट्मी पर्मेस्वर्ल य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.