१ कोरीन्थी 2 - पश्चिम तामाङक्रुस्री स्यीजेत्पे ख्रीस्ट् 1 बीस्वासी र्होमा, ङ एङ्यीमाज पर्मेस्वर्की रहस्यइ तम् स्येत्परी खबे बेलोरी ङचे ङ्हच्छ्यङ् छीःमा अपङ्, ओसेम् र्हङ्की ज्ञान् बुद्दीइ तोःरएनो अङोन्। 2 तलेपङ्सम् ङ एङ्यीमातेङ् मुबे बेलोरी येसु ख्रीस्ट्तेङ् थेङ् क्रुस्री च्योज्यीम् स्यीजेत्पे तम्कीनो स्येत्पे सेम् लज्यी। 3 ङ एङ्यीमातेङ् मुबे बेलोरी कम्जोर् मुबल, ओसेम् लोङ्-लोङ्ज्यीम् थर्बल मुबल। 4 ङचे एङ्यीमात लोप्पतेङ् प्रचार् स्य्हेङ्बे बेलोरी म्हीमाइ बुद्दीतेङ् व्हम्बे तम्की छीःमा कोल्ज्यीम् अपङ्, तर पर्मेस्वर्की आत्माइ सक्तीचे ङोन्ब र्हङ्ले स्येत्ज्यी। 5 होत्तज्यीम् एङ्यीमाकी बीस्वास् म्हीइ बुद्दीरी अय्हीन्, तर पर्मेस्वर्की सक्तीरी तखइ। 6 होले तलेनो बीस्वास्री च्यीप्पे म्हीमात ङ्यीमाचे बुद्दीइ तम्मा स्येत्प, तर हुजु बुद्दीइ तम्मा चु जम्बुलीङ्ल अय्हीन्, ओसेम् चु जम्बुलीङ्की सासक्माकी बुद्दी र्हङ्बएनो अय्हीन्। चु जम्बुलीङ्की सासक्माकी बुद्दीमी ग्योनेनो नास् तज्यीम् य्हर्स्ये मुब। 7 तर ङ्यीमाचेमी म्हीइ बुद्दीचे गोअखम्बे परमेस्वर्की रहस्यइ ङ्हच्छ्यङ् बुद्दीइ बारेरी स्येत्प। चु बुद्दी पर्मेस्वर्चे जम्बुलीङ् स्य्हेङ्ब बीम ङोन्ग्यम्नो ङ्य्हङ्माकी महीमाकी लागीरी स्य्हेङ्थेन्जेत्पल मुबल। 8 ओसेम् चु जम्बुलीङ्की सासक्मा खल्चेएनो चु बुद्दीइ तम् अगो। थेङ्यीमाचे गोबल य्हीन्सम् महीमाकी प्रभुत क्रुस्री च्योलास्ये अरेबल। 9 तर धर्म छ्येःरी चोले ब्रीबल मुब, “खल्चेएनो खेमेएनो अम्रङ्बलतेङ् खेमेएनो अथ्येःबल, ओसेम् सेम्री खेमेएनो अम्हेन्बे चु तम् पर्मेस्वर्चे थेङ्त म्होइबलमाकी लागीरी टोप् लजेत्पल मुब।” 10 पर्मेस्वर्चे र्हङ्की आत्मा ग्यम्से ङ्य्हङ्त थेङ्की तम् स्येःनलजेत्पल मुब। तलेपङ्सम् पबीत्र आत्माचे जम्मनो तम् म्हइजेत्प, पर्मेस्वर्की गोबरी गारो तबे ङ्हच्छ्यङ् तम्माएनो म्हइजेत्प। 11 खल्चेएनो र्होइ सेम्चे म्हेन्बे तम् स्येःब अखम्, र्हङ्की सेम्चे म्हेन्बे तम्कीनो र्हङ्चे स्येःब। होलेनो पर्मेस्वर्की सेम्की तम् पर्मेस्वर्की आत्मा बीम ल्हो-ल्हो खल्चेएनो अस्ये। 12 ओसेम् ङ्य्हङ्माचे जम्बुलीङ्की आत्मा यङ्बल अय्हीन्, तर पर्मेस्वर्चे ङ्य्हङ्मात न्हङ्जेत्पे मोलम्मा स्येःब खम्खइ पङ्ज्यीम् पर्मेस्वर्चेनो र्हङ्की आत्मा ङ्य्हङ्मात न्हङ्बल मुब। 13 होत्तज्यीम् ङ्यीमाचे स्येत्पे चु तम्मा म्हीमाकी बुद्दीचे लोप्पे छीःमारी अय्हीन्, तर पबीत्र आत्मा मुबलमात पबीत्र आत्माचे लोप्जेत्प अनुसार् आत्माइ छीःमारी आत्माइ देमेन्की तम्मा लोप्प। 14 पर्मेस्वर्की आत्मा अरेबे म्हीचे आत्माइ तम्मा स्वीकार् अस्य्हेङ्, तलेपङ्सम् हुजु तम्मा थेइ लागीरी मुर्ख तम्मा तब, ओसेम् थेचे हुजु तम्मा गोब अखम्, तलेपङ्सम् हुजु तम्मा पर्मेस्वर्की आत्मा ग्यम्सेकीनो गोब खम्ब। 15 पर्मेस्वर्की आत्मा मुबे म्हीचे जम्मनो तम्मात ज्यनले जाच्तीब खम्ब, तर थेतमी खल्चेएनो जाच्तीब अखम्। 16 तलेपङ्सम् धर्म छ्येःरी चोले ब्रीबल मुब, “खल्चे प्रभुइ सेम् स्ये:बल मुब? ओसेम् खल्चे थेङ्त लोप्प खम्ब?” तर ङ्य्हङ्माचे ख्रीस्ट्की सेम् यङ्बल मुब, होत्तज्यीम् गोब खम्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.