१ कोरीन्थी 16 - पश्चिम तामाङ1 देरेम् यसुस्लेम्री टीबे पर्मेस्वर्की म्हीमाकी लागीरी र्हुप्पे टङइ बारेरीमी ङ चोले ब्रीब, ङचे गलातीयकी मन्डलीमात लोप्पल र्हङ्लेनो एङ्यीमाचे स्य्हेङो। 2 एङ्यीमाचे र्हङ् र्हङ्की कमाइ अनुसार् सतइ ङोन्ग्यम्की दीन् र्हङ्स्यीनो र्हङ्चे गदे पीन्गे म्हेन्ज्यी होदे टङ सोज्यीम् थेनो। होले स्य्हेङ्ज्यी पङ्सम् ङ खबे बेलोरी टङ र्हुब्अथो। 3 ओसेम् ङ खब बीसेम् यरुसलेम्की म्हीमाचे स्येखइ बी ङचे चीठीमाएनो ब्रीज्यीम् एङ्यीमाचे टङ सबरी दम्बे म्हीमातनो यरुसलेम्री पीत्स्ये मुब। 4 ओसेम् ङएनो ङ्यीबरी ज्यब तसम् थेङ्यीमात ङतेङ् बक्च्य बोर्ज्यीम् ङ ङ्यील। 5 ङ माकेडोनीयारी ङ्यीज्यीम् खब बीसेम् एङ्यीमात खतु लबरी खस्ये मुब, तलेपङ्सम् ङ माकेडोनीय तज्यीम् ङ्यीब छ्येटीब। 6 ओसेम् ङ एङ्यीमातेङ् तोव बेलो वुइ चु सेर्क गी सम्मनो टील। हुजु लीप्चे ङ खन ङ्यीलेएनो एङ्यीमाचे ङत ग्यम्री तोःबे स्हेमा पीन्ज्यीम् र्हो लब खम्स्ये मुब। 7 चु पालो ङ एङ्यीमातेङ् य्हम्बगीकीनो खतु लब अय्हीन्, तर प्रभुइ थुः मुसम् य्हक्को बेलो सम्मनो टील पङ्बे आस् थेन्बल मुब। 8 तर पेन्तीकोस्की पर्ब सम्म ङ चुरी एफीसस्रीनो टीस्ये मुब। 9 तलेपङ्सम् ङ्हच्छ्यङ् लक् स्य्हेङ्बे लागीरी जेप्प म्रप् गी ङइ लागीरी ठोङ्बल मुब, ओसेम् बीरोद् स्य्हेङ्बलमाएनो य्हक्को मुब। 10 तीमोथी एङ्यीमाज खबतेङ् थेत एङ्यीमाचे स्य्हेस लज्यीम् थेनो। तलेपङ्सम् थेचेएनो ङचे र्हङ्ले प्रभुइ लक् स्य्हेङ्टीब। 11 होत्तज्यीम् खल्चेएनो थेत अज्यब अलखइ। ङ मुबे ग्लारी खबे बेलोरी थेत तोःबे स्हेःमा पीन्ज्यीम् ज्यनले पीत्खोउ। तलेपङ्सम् थे बीस्वासी अलेमातेङ् बक्च्य खखइ बी ङ ब्रेन्टीब। 12 देरेम् ङ अले अपोल्लोस्की बारेरी चु तम् पङ्ब, ङचे थेत ल्हो-ल्हो बीस्वासी अलेमात बक्च्य बोर्ज्यीम् एङ्यीमात खतु लबरी ङ्यीउ बी य्हक्को पङ्ज्यी, तर थेत एङ्यीमाज खबे सेम् देरे अत। लीक्यम् मौक यङ्बतेङ् थे खस्ये मुब। ज्यु:री लोप्पे तम् 13 होसीयार् तज्यीम् टीउ, कोङ्ज्यीम् टीउ, आर् लज्यीम् टीउ ओसेम् बीस्वास्री य्हङ्य्होङ् अतनले टीउ। 14 ओसेम् जम्मनो लक्मा म्होइज्यीम् स्य्हेङो। 15 अखैया प्रदेस्री स्तीफनस्तेङ् थेइ दीम्की म्हेम्यमाचे जम्मन्हङ्री ङोन्ग्यम् बीस्वास् स्य्हेङ्बल पङ्बे तम् एङ्यीमाचे स्येःबलनो मुब। थेङ्यीमाचे पर्मेस्वर्की म्हीमात र्हो लबरी र्हङ्की जीवन्नो पीन्बल मुब। बीस्वासी र्होमा, ङ एङ्यीमात फ्या लब, 16 चोतेबे म्हीमाचे पङ्बलतेङ् चोले दुख स्य्हेङ्बे ल्हो-ल्हो म्हीमाचे पङ्बे तम् ङ्येनो। 17 स्तीफनस्, फोर्टुनाटस ओसेम् अखाइकस् खज्यीम् ङ य्हक्को तङ्ज्यी, तलेपङ्सम् एङ्यीमा चुरी अरेबे बेलोरी थेङ्यीमाचे ङत तोबे जम्मनो स्हेःमा पीन्ज्यीम् र्हो लज्यी। 18 तलेपङ्सम् थेङ्यीमाचे ङइ आत्मतएनो एङ्यीमाकी आत्मात र्ह्ङ्लेनो आर् खनलबल मुब। चोतेबे म्हीमात स्हेस लउ। 19 एसीया प्रदेस्की मन्डलीमाचे एङ्यीमात लस्सो पीत्खटीब मुब। अकीलासतेङ् प्रीस्कीलाचे ओसेम् थेङ्यीमाकी दीम्री र्हुब् तबे मन्डलीचे एङ्यीमात प्रभुरी सेम् य्हङ्सेनो लस्सो पीत्खटीब मुब। 20 चुरी मुबे जम्मनो बीस्वासी र्होमाचे एङ्यीमात लस्सो पीत्खटीब मुब। एङ्यीमाचेएनो गीःचे गीःत म्होइज्यीम् लस्सो लउ। 21 ङ पावल र्हङ्की लस्सोमी ङइ याचेनो ब्रीटीब मुब। 22 खल्चे पङ्लेनो प्रभुत अम्होइज्यी पङ्सम् थेत पर्मेस्वर्की केम्लङ् फोःखइ। ओ प्रभु, ब्योन्युजेतो। 23 प्रभु येसुइ अनुग्रह एङ्यीमातेङ् तखइ। 24 येसु ख्रीस्ट्री ङइ म्होइब एङ्यीमा जम्मतेङ्नो तखइ। आमेन्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.