१ कोरीन्थी 15 - पश्चिम तामाङयेसु स्यीब ग्यम्से सोजेत्पल 1 ओसेम् म्होइबे र्होमा, ङचे एङ्यीमात प्रचार स्य्हेङ्बे ज्यबे सम्तर् ङ एङ्यीमात देबेनो व्हल् लपीन्ब। एङ्यीमाचे हुजु ज्यबे सम्तर्त ग्रहन् लज्यी, ओसेम् हुजुरी बीस्वास् स्य्हेङ्स्यीनोटीबल मुब। 2 ओसेम् हुजु ज्यबे सम्तर् ग्यम्से एङ्यीमा थर्बल मुब। ओसेम् ङचे एङ्यीमात प्रचार स्य्हेङ्बे हुजु सम्तर्त कोङ्नले बीस्वास् स्य्हेङ्स्यीनो अटीज्यी पङ्सम् एङ्यीमाचे स्य्हेङ्बे बीस्वास्मी लक् तस्ये अरे। 3 ङचे एङ्यीमात प्रचार स्य्हेङ्बे तम्नो ङचे यङ्बे जम्मन्हङ्री ङ्हच्छ्यङ् तम् य्हीन्ब। ओसेम् धर्म छ्येःचे पङ्ब अनुसार हुजु ङ्हच्छ्यङ् तम् ख्रीस्ट् ङ्य्हङ्माकी पाप्की लागीरी स्यीपीन्जेत्ज्यी, 4 थेङ्त बुप्लाज्यी, ओसेम् धर्म छ्येः अनुसार् सोम्रेत्कुनो पर्मेस्वर्चे स्यीब ग्यम्से सोनलजेत्ज्यी, 5 ओसेम् थेङ् पत्रुसज म्रङ्खजेत्ज्यी, हुजुलीप्चे जम्मानो चुङ् ङ्ही डबमाजाएनो म्रङ्खजेत्ज्यी। 6 हुजु लीप्चे थेङ् पाच सय बीमएनो य्हक्को बीस्वासीमाज तीख्यप्रीनो म्रङ्खजेत्ज्यी। थेङ्त म्रङ्बे म्हीमा य्हक्को र्हङ्ब दवम् सम्मनो मुब, तर गदेमी स्यीज्यीम् य्हर्ज्यी। 7 हुजु लीप्चे येसु याकुबज म्रङ्खजेत्ज्यी। हुजु लीप्चे थेङ् जम्मनो प्रेरीत्माज म्रङ्खजेत्ज्यी। 8 ओसेम् ङ ल अयोननो न्हबे कोल र्हङ्ब मुलेएनो जम्मा न्हङ् ज्युःरी थेङ् ङजएनो म्रङ्खजेत्ज्यी। 9 तलेपङ्सम् प्रेरीत्मान्हङ्री गोदोब्न्हङ् ज्यीद ङ य्हीन्ब। ङ प्रेरीत् पङ्बरी जेःबल अरे, तलेपङ्सम् ङचे पर्मेस्वर्की मन्डलीत य्हक्को दुख पीन्ज्यी। 10 तर देरे ङ खतेब मुब हुजु पर्मेस्वर्की अनुग्रह ग्यम्से मुब, ओसेम् थेङ्चे ङत न्हङ्जेत्पे अनुग्रह खेर अय्हर्। ङचे ल्हो-ल्हो जम्मनो प्रेरीत्माचे बीम् य्हक्को लक् स्य्हेङ्ज्यी। तर हुजु जम्मनो लक्मा ङचे र्हङ्चेनो स्य्हेङ्बल अय्हीन्, ङतेङ् स्य्हुजेत्पे पर्मेस्वर्की अनुग्रह ग्यम्से स्य्हेङ्बल य्हीन्ब। 11 होत्तज्यीम् ङचे प्रचार स्य्हेङ्लेनो, थेङ्यीमाचे प्रचार स्य्हेङ्लेनो, ङ्यीमाचे प्रचार स्य्हेङ्बे तम्मी गीःनो य्हीन्ब। ओसेम् हुजु तम्री एङ्यीमाचे बीस्वास् स्य्हेङ्बल मुब। स्यीबलमाकी पुनरुत्थान् 12 ङ्यीमाचे ख्रीस्ट् पुनरुत्थान तजेत्ज्यी बी प्रचार् स्य्हेङ्ब, होत्तज्यीम् खले एङ्यीमान्हङ्री गदे म्हीमाचे स्यीबलमाकी पुनरुत्थान अत बी पङ्ब खम्ब? 13 होले स्यीबलमाकी पुनरुत्थान अत पङ्सम् ख्रीस्ट्एनो स्यीब ग्यम्से सोजेत्स्ये अरेबल। 14 ओसेम् ख्रीस्ट् स्यीब ग्यम्से सोअजेत्पल य्हीन्सम् ङ्यीमाचे स्य्हेङ्बे प्रचार्तेङ् एङ्यीमाकी बीस्वास् लक् अत। 15 हुजु बीम य्हक्को ङ्यीमा पर्मेस्वर्की बारेरी भ्युकी साक्षीमा तब, तलेपङ्सम् पर्मेस्वर्चे ख्रीस्ट्त स्यीब ग्यम्से सोनलजेत्ज्यी बी ङ्यीमाचेनो गबाही पीन्बल मुब। तर स्यीबलमाकी पुनरुत्थान् देमेन्नो अतज्यी पङ्सम् पर्मेस्वर्चे ख्रीस्ट्त सोन लअजेत्। 16 तलेपङ्सम् स्यीबे म्हीमाएनो पुनरुत्थान तबल अय्हीन्सम् ख्रीस्टतएनो पर्मेस्वर्चे स्यीब ग्यम्से सोनलजेत्पल अय्हीन्। 17 ख्रीस्ट्त स्यीब ग्यम्से सोनलजेत्पल अय्हीन्सम् एङ्यीमाकी बीस्वास् लक् अत, ओसेम् एङ्यीमा दवम् सम्मनो र्हङ्की पाप्रीनो मुब। 18 होलेपङ्सम् ख्रीस्ट्त बीस्वास् स्य्हेङ्ज्यीम् स्यीबलमाएनो जम्मनो नास् तज्यी। 19 ङ्य्हङ्माचे चु जीवन्की लागीरीकीनो ख्रीस्ट्री आस् थेन्बल य्हीन्सम् जम्मनो म्हीमा न्हङ्री ङ्य्हङ्मामी य्हक्को तीङ् छबे म्हीमा तब। 20 तर ख्रीस्ट्मी देमेन्नो स्यीब ग्यम्से सोजेत्पल मुब। स्यीब ग्यम्से सोजेत्स्येलमा न्हङ्री ख्रीस्ट् जम्मन्हङ्री ङोन्ग्यम् सोजेत्ज्यी। 21 तलेपङ्सम् म्ही गीःचे लज्यीम् जम्मनो म्हीमा स्यीथोज्यी, होलेनो म्ही गीःचे लज्यीम् पुनरुत्थान्एनो खज्यी। 22 खले आदम्री जम्मनो म्हीमा स्यीब, होलेनो ख्रीस्ट्री जम्मचेनो जीवन् यङ्स्ये मुब। 23 तर जम्मनो र्हङ् र्हङ्की पालो अनुसार् स्यीब ग्यम्से सोस्ये मुब। जम्मन्हङ्री ङोन्ग्यम् ख्रीस्ट्त सोनलजेत्ज्यी, ओसेम् ख्रीस्ट् दोःज्यीम् ब्योन्युबे बेलोरी थेङ्त बीस्वास् स्य्हेङ्बलमा सोस्ये मुब। 24 हुजु लीप्चे चु जम्बुलीङ्की ज्युःकी बेलो खस्ये (जम्बुलीङ्की बेलो बेस्ये) मुब। हुजु बेलोरी जम्मनो सासन्, अधीकार् ओसेम् सक्तीत नास् स्य्हेङ्जेत्ज्यीम् ख्रीस्ट्चे र्हङ्की य्हुल् पर्मेस्वर् अपत सोप्तीपीन्जेत्स्ये मुब। 25 तलेपङ्सम् ख्रीस्ट्चे जम्मनो सत्तुर्मात र्हङ्की स्य्हब् थीङ् दुङ्री थेन्अजेत्गदे ख्रीस्ट्चे सासन् स्य्हेङ्नोथोब। 26 जम्मन्हङ्की लीक्यम् नास् स्य्हेङ्थोबे सत्तुर्मी स्यीब य्हीन्ब। 27 तलेपङ्सम् धर्म छ्येःचे, “पर्मेस्वर्चे जम्मनो स्हेःमा ख्रीस्ट्की स्य्हब् दुङ्री थेन्जेत्पल मुब” बी पङ्ब। चु पङ्बलमी पर्मेस्वर्एनो ख्रीस्ट्की अधीन्री तस्ये मुब बी पङ्बल अय्हीन्, तर पर्मेस्वर्चेनो जम्मनो स्हेःमा ख्रीस्ट्की अधीन्री तनलजेत्स्ये मुब बी पङ्बल य्हीन्ब। 28 ओसेम् जम्मनो स्हेःमा ख्रीस्ट्की अधीन्री थेन्ब बीसेम् पर्मेस्वर्की ज ख्रीस्ट्चेएनो जम्मनो स्हेःमात र्हङ्की अधीन्री न्हङ्जेत्पे पर्मेस्वर्की अधीन्री र्हङ्तएनो थेन्जेत्स्ये मुब। ओसेम् पर्मेस्वर्चेनो जम्म स्हेःमाकी जोरी सासन् लजेत्स्ये मुब। 29 स्यीबलमा देबेएनो असोसम् स्यीबलमाकी लागीरी बप्तीस्मा कीन्बे हुजु म्हीमात ता ज्यब तज्यी? स्यीबलमा असोसम् तले थेङ्यीमाचे स्यीबलमाकी लागीरी बप्तीस्मा कीन्ब स्यीम्? 30 ओसेम् ङ्य्हङ्माएनो तले य्हम्चे य्हम्री ल्हो-ल्हो म्हीमाचे पीन्बे दुखमा नाब? 31 म्होइबे र्होमा, चु देमेन् य्हीन्ब, ङ दीन् र्हङ्स्यीनो स्यीबतेङ् छेत्प! होलेनो ङ य्हक्को तङ्बलएनो देमेन् य्हीन्ब तलेपङ्सम् एङ्यीमा ङ्य्हङ्की प्रभु येसु ख्रीस्ट्तेङ् गीः तबल मुब। 32 ङचे एफीसस्री र्हीःइ सेज्येन्मा र्हङ्बे म्हीमातेङ् तम् ज्योब्ज्यीम् ङत ता ज्यब तज्यी स्यीम्? स्यीबे म्हीमा असो पङ्सम् म्हीमाचे पङ्ब र्हङ्ले “मनमोज्यीले चइ ओसेम् थुङ्के, तलेपङ्सम् न्हम्स्य्होम् स्यीज्यीम् य्हर्ब।” 33 एङ्यीमा र्हङ्चे र्हङ्त धोक थपीनो, अज्यबे म्हीमातेङ् ब्रज्यी पङ्सम् ज्यबे म्हीएनो न्होङ्ब। 34 होस्री खोउ, ओसेम् पाप् स्य्हेङ्ब पीतो। तलेपङ्सम् एङ्यीमान्हङ्री गदे म्हीमाचेम् पर्मेस्वर्त स्येःबलनो अरे। ङचे चु तम् एङ्यीमात पेत्खइ बी पङ्बल य्हीन्ब। पुनरुत्थान् तबे ल्हीः 35 तर खल्चे पङ्लेनो, “स्यीबे म्हीमा देबेएनो खले सोन लस्ये मुब, ओसेम् थेङ्यीमाकी ल्हीः खतेब तब?” बी ङ्योत्ल। 36 मुर्ख म्हीमा! एङ्यीमाचे तइ ब्लु ब्लुत्लेएनो हुजु अक्रम्गदे अफीः। 37 एङ्यीमाचे छर्ज्यीन्बे दोङ्बो असु, तर व्ह वुइ ल्हो-ल्हो तइ ब्लु पङ्लेनो फुम् ब्लुत्प। 38 पर्मेस्वर्चे र्हङ्की थुः अनुसार् हुजु ब्लुत रुप् न्हङ्जेत्प। ओसेम् जम्म थोइ ब्लुमात र्हङ् र्हङ्की रुप् न्हङ्जेत्प। 39 होलेनो म्हीमाकी ल्हीः, सेम्ज्येन्माकी ल्हीः, ङ्यम्ङ्यमाकी ल्हीः, ओसेम् तर्ङमाकी ल्हीः जम्मलनो र्हङ् र्हङ्की ल्ही तब। 40 स्वर्गइ स्हेःमातेङ् जम्बुलीङ्री मुबे स्हेमाल र्हङ् र्हङ्की रुप् तब। ओसेम् स्वर्गइ स्हेःमाकी महीमा जम्बुलीङ्की स्हेःमाकी महीमा बीम ल्हो-ल्हो तब। 41 दीनीइ महीमा खाल् गीःल तब, लनीइ महीमा ल्हो-ल्हो खाल्ल तब, ओसेम् सार्माकी महीमा ल्हो-ल्हो खाल्ल तब। हुजु जम्मनो सार्माल र्हङ् र्हङ्की महीमा मुब। 42 स्यीबलमाकी पुनरुत्थान्एनो चोतेबनो य्हीन्ब। ङ्य्हङ् स्यीब बीसेम् जम्बुलीङ्की ल्हीः बुब्लाज्यीम् क्रम् य्हर्ब तर स्यीब ग्यम्से सोब बीसेम् खेमेएनो क्रम् य्हर्स्ये अरे। 43 बुप्लाबे बेलोरी अज्यबतेङ् कम्जोर् तब, तर सोबे बेलोरी महीमातेङ् सक्तीसाली तस्ये मुब। 44 बुप्लाबे बेलोरी स्यतेङ् नख्रुत्की ल्हीःरी बुप्लाब, दोःज्यीम् सोबे बेलोरी आत्मीक् ल्हीःरी सोब। स्यतेङ् नख्रुत्की ल्हीः तब र्हङ्ले आत्मीक् ल्हीःएनो तथोब। 45 धर्मछ्येःरी चोले ब्रीबल मुब, “ङोन्ग्यम्की म्ही आदम्मी गोदोब्न्हङ् ङोन्ग्यम् ल्हीरी बुः यङ्बे म्ही य्हीन्ब।” तर ख्रीस्ट् ज्युकी आदम्मी जीवन् न्हङ्बे आत्मा य्हीन्ब। 46 आत्मीक् ल्हीः ङोन्ग्यम् अय्हीन् तर स्यतेङ् नख्रुत्की ल्हीः ङोन्ग्यम् खज्यी। हुजु लीप्चे आत्मीक् ल्हीः ब्योन्खजेत्ज्यी। 47 ङोन्ग्यम्की म्ही आदम्मी जम्बुलीङ्की सेप्रचे स्य्हेङ्जेत्ज्यी, लीक्यम्की म्ही ख्रीस्ट्मी स्वर्ग ग्यम्से ब्योन्युजेत्ज्यी। 48 जम्बुलीङ्री मुबे म्हीमामी जम्बुलीङ्की सेप्रचे स्य्हेङ्बे म्ही र्हङ्ब मुब, ओसेम् स्वर्गइ म्हीमामी स्वर्ग ग्यम्से ब्योन्युजेत्पे म्ही र्हङ्ब मुब। 49 ओसेम् देरे ङ्य्हङ्मा जम्बुलीङ्की सेप्रचे स्य्हेङ्बे म्ही र्हङ्ब मुब। होलेनो लीक्यम्मी ङ्य्हङ्मा स्वर्ग ग्यम्से ब्योन्युजेत्पे म्ही र्हङ्ब तस्ये मुब। 50 ङ्इ र्होमा, ङचे पङ्ब म्हइबे तम् चु य्हीन्ब, स्यतेङ् काकी ल्हीःचे पर्मेस्वर्की य्हुल्री वङ्बे हक् यङ्ब अखम्। नास् तज्यीम् य्हर्बलचे नास् अतबे हक् यङ्ब अखम्। 51-52 ङ्येनो, ङ एङ्यीमाचे अस्येबतेङ् अगोबे तम् गीः पङ्ब, ङ्य्हङ्मा जम्मनो स्यीस्ये अरे, तर ज्युःकी तुरहीकी केत् थेःब साच्चेनो, मीःथप् गीःरीनो ङ्य्हङ्मा जम्मल ल्हीः पोस्ये मुब। तलेपङ्सम्, तुरहीइ केत् थेःस्ये मुब, ओसेम् स्यीबलमा खेमेएनो अस्यीबे जीवन कीन्ज्यीम् सोस्ये मुब। 53 तलेपङ्सम् स्यीज्यीम् य्हर्बे ल्ही: खेमेएनो अस्यीबे ल्हीरी पोनोथोःब, ओसेम् क्रम्ज्यीम् य्हर्बे ल्हीः दोःज्यीम् खेमेएनो अक्रम्बे ल्हीःरी पोनोथोःब। 54 स्यीबे ल्हीः खेमेएनो अस्यीबे ल्हीरी पोबतेङ् धर्म छ्येःचे पङ्बे तम् टोप् तस्ये मुब, “स्यीबत डाबचे ग्लोङ्बल मुब।” 55 “ओ स्यीब, एचे खन डाज्यी? ओ स्यीब, एइ सक्ती खइ?” 56 म्हीमाचे पाप स्य्हेङ्बल तज्यीम् थेङ्यीमा स्यीब, ओसेम् मोसाचे ब्रीबे पर्मेस्वर्की नीयम्चे लज्यीम् पाप्चे थेङ्यीमाइ जोरी सक्ती यङ्बल मुब। 57 तर पर्मेस्वर्त व्होर्छ्ये तखइ, थेङ्चे ङ्य्हङ्की प्रभु येसु ख्रीस्ट् ग्यम्से ङ्य्हङ्मात डानलजेत्प। 58 होत्तज्यीम् म्होइबे र्होमा, एङ्यीमा बीस्वास्री कोङ्ज्यीम् य्हङ् य्होङ् अतनले टीउ। प्रभुइ लक् खेम पङ्लेएनो स्य्हेङ्स्यीनो टीउ। तलेपङ्सम् एङ्यीमाचे स्येःब, प्रभुरी एङ्यीमाचे दुख लज्यीम् स्य्हेङ्बे लक् खेर य्हर्स्ये अरे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.