१ कोरीन्थी 14 - पश्चिम तामाङल्हो-ल्हो ग्योत्माकी बर्दान् 1 म्होइबनो एङ्यीमाकी लक्ष्य तथोब, ओसेम् आत्मीक् बर्दान्मा यङ्बरी य्हक्को सेम् लउ, हुजुमा न्हङ्रीएनो अगम्बानी पङ्बे बर्दान् यङ्बरी झेन् य्हक्को सेम् लउ। 2 तलेपङ्सम् ल्हो-ल्हो ग्योत्री तम् पङ्बलचे म्हीमातेङ् अय्हीन्, तर पर्मेस्वर्तेङ् तम् पङ्ब। थेचे पङ्बे तम् खल्चेएनो अगो, थेचे पबीत्र आत्माइ सक्तीचे म्हीचे अस्येःबे तम्मा पङ्ब। 3 तर अगम्बानी पङ्बलचे म्हीमाचे गोबे ग्योत्री तम् पङ्ब। ओसेम् हुजु तम् म्हीमाकी बीस्वास्त कोङ्न लबरी, आर् पीन्बरी ओसेम् सान्ती पीन्बरी पङ्ब। 4 ल्हो-ल्हो ग्योत्री तम् पङ्बे म्हीचे र्हङ्की बीस्वासतकीनो कोङ्नलब। तर अगम्बानी पङ्बे म्हीचेम् जम्मनो मन्डलीइ बीस्वास्त कोङ्नलब। 5 एङ्यीमा जम्मचेनो ल्हो-ल्हो ग्योत्री तम् पङ्खइ पङ्बे सेम् ङल मुब, तर हुजु बीमाएनो एङ्यीमाचे अगम्बानी पङ्खइ पङ्बे सेम् झेन् य्हक्को मुब। अगोबे ल्हो-ल्हो ग्योत्री तम् पङ्ब बीमम् अगम्बानी पङ्बनो य्हक्को ज्यब य्हीन्ब। ल्हो-ल्हो ग्योत्री तम् पङ्बतेङ् हुजुइ अर्थ स्येत्पे म्ही मुसम्मी हुजुचे मन्डलीत ज्यब स्य्हेङ्ब। 6 म्होइबे र्होमा, ङ एङ्यीमाज अगोबे ल्हो-ल्हो ग्योत् पङ्ज्यीम् खज्यी पङ्सम् एङ्यीमात तएनो ज्यब अत। तर पर्मेस्वर्चे ङोन्जेत्पे तम्, ज्ञान्की तम, अगम्बानीतेङ् एङ्यीमात लोप्थोबे तम् बज्यीम् लोप्ज्यी पङ्सम् एङ्यीमात ज्यब तब। 7 बुः अरेबे बाजा पुलीतेङ् बीना र्हप्पे म्हीचे व्हइकी धुन् ज्यनले तेत्ज्यीम् अर्हप्ज्यी पङ्सम् ङ्येन्बे म्हीचे खजु धुन् र्हप्पल बी खले स्येःब? 8 ओसेम् तुरही र्हप्पे स्यीपाइचे तुरहीकी केत् ज्यनले तेत्ज्यीम् अर्हप्ज्यी पङ्सम् लडाइकी लागीरी खल स्यीपाइ टोप् तब? 9 हुजु र्हङ्लेनो एङ्यीमाचे म्हीमात थेङ्यीमाचे अगोबे छीःमारी तम् पङ्ज्यी पङ्सम् एङ्यीमाचे ता पङ्टीब बी थेङ्यीमाचे खले स्ये:स्ये? एङ्यीमाचे पङ्बे तम्मी लाबोरी तम् पङ्बल र्हङ्ब तब। 10 जम्बुलीङ्री य्हक्को ग्योत्मा मुब, ओसेम् हुजुमा जम्मलनो अर्थ तब। 11 तर खल्चे पङ्लेनो पङ्बे तम् ङचे अगोज्यी पङ्सम् थेइ लागीरी ङ बीदेसी र्हङ्ब तब, ओसेम् ङइ लागीरीएनो थे बीदेसी र्हङ्ब तस्ये मुब। 12 हुजु र्हङ्लेनो एङ्यीमाचेएनो पबीत्र आत्मा ग्यम्से यङ्बे बर्दान्मा यङ्बरी य्हक्को सेम् लबल तज्यीम् खजु बर्दान्मा ग्यम्से मन्डलीत ज्यब तब हुजु बर्दान्मा म्हइगो। 13 होत्तज्यीम् ल्हो-ल्हो ग्योत् पङ्बे म्हीचे हुजुइ अर्थ गोन लबे सक्ती यङ्बे लागीरी प्रार्थना स्य्हेङ्खइ। 14 तलेपङ्सम् ङचे ल्हो-ल्हो ग्योत्री प्रार्थना स्य्हेङ्ज्यी पङ्सम् ङइ आत्माचे प्रार्थना स्य्हेङ्ब, तर ङइ लोचेमी अगो। 15 होलेपङ्सम् ङचे ता लब स्यीम्? ङ आत्मारी प्रार्थना स्य्हेङ्ब तर लोचेएनो ङचे गोबे छीःमारी प्रार्थना स्य्हेङ्ब। ङ आत्मारी कोब तर लोचेएनो ङचे गोबे छीःमारी कोब। 16 एचे आत्मरीकीनो पर्मेस्वर्त तोप्ज्यीम् व्होर्छ्ये पीन्बतेङ् ल्हो-ल्हो म्हीमाचे अगोज्यी पङ्सम् प्रार्थना स्य्हेङ्ब बुत्पतेङ् थेङ्यीमाचे खले “आमेन्” पङ्स्ये? 17 एचेमी ज्यनले व्होर्छ्ये पीन्ज्यीम् प्रार्थना स्य्हेङ्ल, तर हुजु ग्यम्से ल्हो-ल्हो म्हीमात तएनो ज्यब अत। 18 ङ पर्मेस्वर्त व्होर्छ्ये पीन्ब, तलेपङ्सम् एङ्यीमा जम्मनो बीम ङचे य्हक्को ल्हो-ल्हो ग्योत्मारी तम् पङ्ब। 19 तर मन्डलीरी ल्हो-ल्हो ग्योत्री हजार्मा छी:री तम् पङ्ब बीमम् बरु ङ मन्डलीचे गोबे ग्योत्री छीः ङ्ह पङ्लेनो तम् लोप्पीन्बे सेम् लब। 20 म्होइबे र्होमा, कोलमाचे म्हेन्ब र्हङ्ले म्हेन्ब पीत्थोब। एङ्यीमामी ताएनो दुस्ट लक्मा अस्य्हेङ्बे ज्यीद कोलमा र्हङ्ब तथोब, तर सेम्री म्हेन्बतेङ् बीचार् लबरीम् सेम् च्यीप्पे म्हीमा र्हङ्ब तथोब। 21 धर्म छ्येःरी ब्रीबल मुब; “ङ ङइ म्हीमातेङ् ल्हो-ल्हो ग्योत्री, बीदेसी म्हीमाइ सुङ्ग्यम्से तम् पङ्स्ये मुब, होलेतलेनो थेङ्यीमाचे ङइ तम् ङ्येन्स्ये अरे” बी प्रभुचे सुङ्जेत्प। 22 होत्तज्यीम् ल्हो-ल्हो ग्योत्मारी तम् पङ्बलमी बीस्वासीमाकी लागीरी अय्हीन्, तर अबीस्वासीमाकी लागीरी चीनो य्हीन्ब। तर अगम्बानी पङ्बलमी अबीस्वासीमाकी लागीरी अय्हीन्, तर बीस्वासीमाकी लागीरी य्हीन्ब। 23 मन्डलीरी जम्मनो र्हुब् तज्यीम् जम्मचेनो ल्हो-ल्हो ग्योत्री तम् पङ्ब तीप्ज्यी पङ्सम् ख्रीस्ट्त बीस्वास् अस्य्हेङ्बे म्हीमातेङ् चु तम्मा अगोबे म्हीमा हुजुरी खबल मुसम् ता थेङ्यीमाचे एङ्यीमात म्योनेम् बी अपङो स्यीम्? 24 तर जम्मचेनो अगम्बानी पङ्टीबे बेलोरी ख्रीस्ट्त बीस्वास् अस्य्हेङ्बलतेङ् चु तम्मा अगोबे म्हीमा हुजुरी खबल मुसम् थेङ्यीमाचे हुजु तम्मा ङ्येन्ज्यीम् र्हङ्की पापमा स्येःस्ये मुब, ओसेम् पर्मेस्वर्चे न्याय स्य्हेङ्जेत्स्ये मुब बी थेङ्यीमाचे स्येस्ये मुब। 25 ओसेम् थेङ्यीमाइ सेम्न्हङ्की रहस्यइ तम्मा डोङ्स्ये मुब, ओसेम् थेङ्यीमाचे पुइ जुःज्यीम् “देमेन्नो पर्मेस्वर् एङ्यीमाकी गुङ्री टीम्” बी पङ्ज्यीम् थेङ्त तेन्स्ये मुब। तङ्रले स्य्हेङ्बे सङ्गती 26 बीस्वासी र्होमा, ङचे पङ्ब म्हइबल चुनो य्हीन्ब, एङ्यीमा सङ्गतीरी र्हुब् तबतेङ् गीःचे व्हइ कोब, ल्हो-ल्हो गीःचे फ्रोइ लोप्प, ल्हो-ल्हो गीःचे पर्मेस्वर्चे ङोन्जेत्पे तम् स्येत्प, ल्हो-ल्हो गीःचे ल्हो-ल्हो ग्योत्री सम्तर् स्येत्प ओसेम् ल्हो-ल्हो गीःचे हुजुइ अर्थमा स्येत्प। मन्डलीत ज्यब तन लबे लागीरी चु जम्मनो तम्मा स्य्हेङ्थोःब। 27 खल्चे पङ्लेनो ल्हो-ल्हो ग्योत्री तम् पङ्सम् ङ्हीदे सोम्देचेकीनो पालो पालोले पङ्खइ, ओसेम् ल्हो-ल्हो गीःचे हुजुइ अर्थ स्येत्खइ। 28 तर अर्थ स्येत्प खम्बे म्ही खलएनो अरेसम् ल्हो-ल्हो ग्योत्री तम् पङ्बलमा मन्डलीरी कुटीले टीखइ, ओसेम् थे र्हङ्चे र्हङ्तेङ्कीनो ओसेम् पर्मेस्वर्तेङ् तम् पङ्खइ। 29 अगम्बानी पङ्बलमाएनो ङ्हीदे सोम्देचेकीनो पङ्खइ, ओसेम् ल्हो-ल्होमाचे थेङ्यीमाचे पङ्बे तम् ठीक् य्हीन्ब अय्हीन् बी जाच्तीखइ। 30 तर गीः अगम्बानी पङ्टीबे बेलोरी ल्हो-ल्हो गीःत पर्मेस्वर्चे तइ तम् पङ्लेनो ङोन्जेत्ज्यीम् पङ्पुङ्सम् ङोन्ग्यम् तम् पङ्टीबे म्ही कुटीले टीखइ। 31 एङ्यीमा जम्मचेनो पालो पालोले अगम्बानी पङ्ब खम्ब, ओसेम् ङ्येन्बलमा जम्मचेनो लोप्स्ये मुब, ओसेम् आर् यङ्स्ये मुब। 32 अगम्बक्तमाचे र्हङ्की आत्मात र्हङ्की अधीन्री थेन्थोब। 33 तलेपङ्सम् पर्मेस्वर् थोम्नलबे पर्मेस्वर् अय्हीन्, तर सान्ती न्हङ्बे पर्मेस्वर् य्हीन्ब। पर्मेस्वर्की म्हीमाकी जम्मनो मन्डलीमारी र्हङ्ले 34 मन्डलीइ सङ्गतीरी अमकोलमा कुटीले टीखइ। थेङ्यीमाचे तम् पङ्ब अत, ओसेम् मोसाचे ब्रीबे नीयम्री पर्मेस्वर्चे सुङ्ब र्हङ्ले थेङ्यीमा ल्हो-ल्होइ अधीन्री टीथोब। 35 ओसेम् तइ तम्की बारेरी पङ्लेनो ङ्योत्के म्हेन्सम् थेङ्यीमाचे दीम्री र्हङ्की र्हेम्बोतेङ्नो ङ्योत्खइ। तलेपङ्सम् मन्डलीरी अमकोलमाचे तम् पङ्ब पेत्पे तम् य्हीन्ब। 36 ता पर्मेस्वर्की फ्रोइ एङ्यीमा ग्यम्से ङोन्ग्यम् तीप्पल य्हीन्ब? ता एङ्यीमाचेकीनो पर्मेस्वर्की फ्रोइ थ्येःबल य्हीन्ब? 37 खल्चे पङ्लेनो र्हङ्त अगम्बक्त वुइ पबीत्र आत्मा ग्यम्से बर्दान् यङ्बे म्ही य्हीन्ब बी म्हेन्सम् ङचे ब्रीबे तम्मा प्रभुचेनो कुल्जेत्पल य्हीन्ब बी स्वीकार स्य्हेङ्थोःब। 38 तर थेचे चु तम् अङ्येन्सम् थेचे पङ्बे तमएनो थङ्येनो। 39 होत्तज्यीम् म्होइबे र्होमा, अगम्बानी पङ्बरी य्हक्को सेम् लउ, ओसेम् ल्हो-ल्हो ग्योत्री तम् पङ्बलमात थर्होदो। 40 तर जम्मनो लक् ठीक्ले ओसेम् तङ्रले स्य्हेङो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.