१ कोरीन्थी 13 - पश्चिम तामाङम्होइब 1 ङचे म्हीमाकी थोचे थोइ ग्योत्मातेङ् स्वर्गदुत्माकी ग्योत्री तम् पङ्लेनो ङचे ल्हो-ल्होत अम्होइसम्, ङमी नर्सु तनले र्हप्पे छ्येलेम्तेङ् स्यङ् र्हङ्बकीनो तब। 2 ङतेङ् अगम्बानी पङबे सक्ती मुलेएनो, ओसेम् रहस्यइ तम्मा गोब खम्लेएनो, जम्म थोइ ज्ञान् मुलेएनो, ओसेम् गङ्त स्याब खम्बे सक्ती मुलेएनो ङतेङ् म्होइब अरेज्यी पङ्सम् ङ तेएनो अय्हीन्। 3 ङचे र्हङ्की जम्मनो सम्पती प्रङ्नमात जुपीन्लेएनो, ओसेम् ङचे र्हङ्की ल्हीःनो मेरी ख्रङ्बरी सोप्तीपीन्लेएनो ङतेङ् म्होइब अरेज्यी पङ्सम् ङत तएनो ज्यब अत। 4 म्होइबचे धैर्य लब, ओसेम् दय स्य्हेङ्ब। म्होइबचे अस्हेर्, र्हङ्तनो ङ्हच्छ्यङ् अम्हेन् ओसेम् घमन्ड अस्य्हेङ्, 5 म्होइबचे र्होत अज्यब अस्य्हेङ्, र्हङ्तकीनो ज्यब तखइ बी अम्हेन्, ग्योने बोमो अल, ल्हो-ल्हो अज्यबे तम्तेङ् लक्त व्हल् लस्यीनो अटी। 6 म्होइब अज्यबे तम्तेङ् अतङ्, तर देमेन्की तम्तेङ् तङ्ब। 7 म्होइबचे खेम पङ्लेनो नाप, खेम पङ्लेनो बीस्वास् थेन्ब, खेम पङ्लेनो आस् थेन्ब, ओसेम् खेम पङ्लेनो धैर्य लज्यीम् नाप। 8 म्होइब खेमेएनो म्हज्यीम् य्हर्स्ये अरे। तर अगम्बानीमा म्हज्यीम् य्हर्स्ये मुब, ग्योत्की बर्दान्मा म्हज्यीम् य्हर्स्ये मुब, ओसेम् ज्ञान्की फ्रोइमा म्हज्यीम् य्हर्स्ये मुब। 9 तलेपङ्सम् ङ्य्हङ्चे गोबे तम् अपुरो मुब, ओसेम् ङ्य्हङ्की अगम्बानीएनो अपुरो मुब। 10 तर लीक्यम् ङ्य्हङ्माचे चु जम्मनो तम्मा पुर स्येस्ये मुब, ओसेम् ङ्य्हङ्माचे चेक्कीनो स्येबे चु अपुरो तम्मा म्हज्यीम् य्हर्स्ये मुब। 11 ङ कोल मुबे बेलोरी कोलचे र्हङ्ले तम् पङ्ब मुबल, कोलचे र्हङ्ले म्हेन्ब मुबल, ओसेम् कोलचे र्हङ्ले गोब मुबल। तर देरेम् ङ ग्रेन् तबल मुब, ओसेम् कोलचे स्य्हेङ्ब र्हङ्ब अस्य्हेङ्। 12 देरे ङ्य्हङ्माचे दुलु मुबे दर्बन्री म्रङ्ब र्हङ्ले र्हीदीदीले म्रङ्ब, तर हुजु खस्येकी बेलोरीम् ज्यनले म्रङ्स्ये मुब। देरे ङचे गोबे तम् अपुरो मुब, तर हुजु खस्येकी बेलोरीम् पर्मेस्वर्चे ङइ बारेरी जम्मनो खेम्जेत्प र्हङ्ले ङ्चेएनो स्येःस्ये मुब। 13 देरेम् बीस्वास्, आस्, ओसेम् म्होइब चु सोम्मी खेम पङ्लेनो टीस्यीनोटीस्ये मुब, तर चु सोम् न्हङ्री ङ्हच्छ्यङ्मी म्होइबनो य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.