१ कोरीन्थी 12 - पश्चिम तामाङपबीत्र आत्माइ बर्दान्मा 1 बीस्वासी र्होमा, देरेम् पबीत्र आत्माइ बर्दान्की बारेरी एङ्यीमात ज्यनले गोनलबे सेम् ङल मुब। 2 एङ्यीमाचे स्येःबलनो मुब, ख्रीस्ट्त बीस्वास् स्य्हेङ्ब बीम ङोन्ग्यम् ल्हो-ल्हो म्हीमाइ तम् ङ्येन्ज्यीम् य्हक्को र्हङ्ब एङ्यीमाचे तम्नो पङ्ब अखम्बे ख्लमात तेन्बल मुबल। 3 होत्तज्यीम् एङ्यीमाचे चु तम् गोखइ पङ्बे सेम् ङल मुब, पर्मेस्वर्की आत्मा ग्यम्से तम् पङ्बे म्ही खल्चेएनो “येसुत केम्लङ् फोःखइ” बी अपङ्, ओसेम् पबीत्र आत्माइ अगुवाइ यङ्बे म्हीचेकीनो, “येसुनो प्रभु य्हीन्ब” बी पङ्ब खम्ब। 4 पबीत्र आत्माइ बर्दान्मा य्हक्को थोल मुब, तर बर्दान् न्हङ्बे पबीत्र आत्मा गीःकीनो मुब। 5 सेवमा य्हक्को थोल तब, तर प्रभु गीःकीनो मुब। 6 लक्मा य्हक्को थोल मुब, तर ङ्य्हङ्मा जम्मतनो हुजु जम्मनो लक्मा स्य्हेङ्ब खम्नलजेत्पे पर्मेस्वर् गीःकीनो मुब। 7 ङ्य्हङ्मा जम्मनो बीस्वासीमात पबीत्र आत्माचे गीःचे गीःत र्हो लबे लागीरी बर्दान्मा न्हङ्जेत्पल मुब। 8 डेत्त पबीत्र आत्माचे बुद्दीइ तम् पङ्बे बर्दान् न्हङ्जेत्प, ओसेम् डेत्त हुजु पबीत्र आत्माचेनो ज्ञान्की तम् पङ्बे बर्दान् न्हङ्जेत्प। 9 हुजु पबीत्र आत्माचे डेत्त ङ्हच्छ्यङ् बीस्वास् न्हङ्जेत्प, ओसेम् डेत्तम् नबे म्ही फेन्नलबे बर्दान्मा न्हङ्जेत्प। 10 डेत्त अचम्मइ लक्मा स्हेङ्बे बर्दान्, डेत्त अगम्बानी पङ्बे बर्दान्, डेत्त ज्यबतेङ् अज्यबे आत्माम फेःबे बर्दान्, ओसेम् डेत्त ल्हो-ल्हो ग्योत्मारी तम् पङ्बे बर्दान्, डेत्त हुजु ग्योत्माकी अर्त स्येत्पे बर्दान् पबीत्र आत्माचेनो न्हङ्ब। 11 चु जम्मनो गीःकीनो पबीत्र आत्माइ लक्मा य्हीन्ब। थेङ्चेनो जम्मत थेङ्की थुः अनुसार्की बर्दान्मा न्हङ्जेत्प। ल्हीःगीःकी य्हक्को अङ्गमा 12 ङ्य्हङ्की ल्हीःरी य्हक्को अङ्गमा मुब, ओसेम् अङ्गमा य्हक्को मुलेएनो ल्हीः गीः य्हीन्ब। होलेनो ख्रीस्ट्त बीस्वास् स्य्हेङ्बलमा य्हक्को मुलेएनो ख्रीस्ट् ल्ही गीः य्हीन्ब। 13 तलेपङ्सम् ङ्य्हङ्मा यहुदी य्हीन्लेएनो, ग्रीक् य्हीन्लेएनो, बान य्हीन्लेएनो ओसेम् बाना अय्हीन्लेएनो ङ्य्हङ्माचे गीःनो पबीत्र आत्मा ग्यम्से बप्तीस्मा यङ्बल तज्यीम् ल्हीः गीःनो तबल मुब, ओसेम् ङ्य्हङ्मा जम्मचेनो गीःनो पबीत्र आत्मा यङ्बल मुब। 14 म्हीइ ल्हीः अङ्ग गीःचेकीनो स्य्हेङ्बल अय्हीन्, तर य्हक्को अङ्गमा ग्यम्से स्य्हेङ्बल य्हीन्ब। 15 कङ्चे “ङ या अय्हीन्, होत्तज्यीम् ङ ल्हीःकी अङ्ग अय्हीन्” पङ्ज्यी पङ्सम्, ता हुजु ल्हीःकी अङ्ग अत स्यीम्? 16 ओसेम् न्हपीङ्चे “ङ मीः अय्हीन् होत्तज्यीम् ङ ल्हीःकी अङ्ग अय्हीन्” पङ्ज्यी पङ्सम्, ता हुजु ल्हीःकी अङ्ग अत स्यीम्? 17 ल्हीःरी मीःकीनो मुज्यीम् न्हपीङ् अरेज्यी पङ्सम् ताचे थ्येःब? ओसेम् ल्हीःरी न्हपीङ्कीनो मुसम् ताचे थङ् नङ्ब? 18 तर जम्मनो अङ्गमात पर्मेस्वर्चे थुः लजेत्प अनुसार ल्हीःरी थेन्जेत्पल मुब। 19 अङ्ग गीःचेनो जम्मनो ल्ही प्लीङ्ज्यी पङ्सम् ल्हीःमी खन तस्येल? 20 होत्तज्यीम् अङ्गमा य्हक्को मुब, तर ल्हीःमी गीःकीनो मुब। 21 मीःचे यात, “ङत ए अतो” पङ्ब अखम्, ओसेम् क्रचेएनो कङ्त “ङत ए अतो” पङ्ब अखम्। 22 बरु ङ्य्हङ्माचे ल्हीःकी कम्जोर् अङ्ग य्हीन्ब बी म्हेन्बे अङ्गमाएनो मुनो थोःब। 23 खजु अङ्गमात ङ्य्हङ्चे य्हक्को ङ्य्हच्छ्यङ् अय्हीन् बी म्हेन्ब, हुजु अङ्गमात ङ्य्हङ्चे झेन् ज्यनले थेन्ब। ओसेम् ङोन्ब अतबे अङ्गमातमी ङ्य्हङ्चे झेन् ज्यनले उप्ज्यीम् थेन्ब। 24 ङ्य्हङ्चे ङोन्ब तबे अङ्गमात उप्अथो, तर ङ्य्हङ्चे कम्जोर् अङ्गमात ङ्हच्छ्यङ् म्हेन्ज्यीम् ज्यनले थेन्खइ पङ्ज्यीम् पर्मेस्वर्चेनो ल्हीःकी अङ्गमात डीःनले थेन्जेत्पल मुब। 25 होत्तज्यीम् ल्हीःरी मुबे जम्मनो अङ्गमा र्हङ्न्हङ् अथुन्ज्यीम् अय्हीन्, तर गीः तज्यीम् गीःचे गीःत वास्त स्य्हेङ्खइ। 26 अङ्ग गीःचे दुख यङ्ज्यी पङ्सम् ल्हीःकी जम्मनो अङ्गमाचे दुख यङ्ब। ओसेम् अङ्ग गीःचे स्य्हेस यङ्ज्यी पङ्सम् ल्हीःकी जम्मनो अङ्गमा तङ्ब। 27 एङ्यीमा जम्मनो ख्रीस्ट्की ल्हीः य्हीन्ब, ओसेम् एङ्यीमा जम्मनो थेङ्की अङ्गमा य्हीन्ब। 28 पर्मेस्वर्चेनो ख्रीस्ट्की ल्हीः मन्डलीरी जम्मन्हङ्री ङोन्ग्यम् प्रेरीत्मा, हुजु लीप्चे अगम्बक्तमा, हुजु लीप्चे लोप्पोन्मा, हुजु लीप्चे अचम्मइ लक् स्य्हेङ्बलमा, नबमा फेन्नलबे बर्दान् यङ्बलमा, ल्हो-ल्होत र्हो लबलमा, अगुवामा ओसेम् थोचे थोइ ग्योत्री तम् पङ्बे बर्दान् यङ्बलमात थेन्जेत्पल मुब। 29 ता जम्मनो प्रेरीत तब? ता जम्मनो अगम्बक्त तब? ता जम्मनो लोप्पोन् तब? ता जम्मचेनो अचम्मइ लक् स्य्हेङ्ब? 30 ता जम्मतेङ्नो फेन्नलबे बर्दान् तब? ता जम्मचेनो थोचे थोइ ग्योत्री तम् पङ्ब? ता जम्मचेनो थोचे थोइ ग्योत्की अर्थ स्येत्प खम्ब? 31 होत्तज्यीम् एङ्यीमाचे झेन् ङ्हच्छ्यङ् बर्दान्मा यङ्बे सेम् थोको। देरेम् ङ एङ्यीमात झेन् य्हक्को ज्यबे ग्यम्की बारेरी स्येत्प। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.