१ कोरीन्थी 11 - पश्चिम तामाङ1 ङचे ख्रीस्ट्चे स्य्हेङ्जेत्प र्हङ्ले स्य्हेङ्ब, एङ्यीमाचेएनो ङचे स्य्हेङ्ब र्हङ्ले स्य्हेङो। 2 ङ एङ्यीमात तोप्प तलेपङ्सम् एङ्यीमाचे ङत खेम पङ्लेनो व्हल् लज्यीम् ङचे लोप्पे तम् ङ्येन्ज्यीम् ब्रब। 3 तर एङ्यीमाचे चु तम् गोखइ पङ्बे सेम् ङल मुब। ख्रीस्ट् जम्मनो अपकोलमाकी क्र य्हीन्ब। म्रीङ्की क्र र्हेम्बो य्हीन्ब, ओसेम् ख्रीस्ट्की क्र पर्मेस्वर् य्हीन्ब। 4 प्रार्थना स्हेङ्बे बेलोरी वुइ अगम्बानी पङ्बे बेलोरी र्हङ्की क्र उप्पे अपकोलचे ख्रीस्ट्त स्हेस अल। 5 तर क्र अउप्नले प्रार्थना स्य्हेङ्ब वुइ अगम्बानी पङ्बे अमकोलचे र्हङ्की र्हेम्बोत स्हेस अस्य्हेङ्, तलेपङ्सम् चुमी थेचे र्हङ्की क्रबा पोन्टोङ्टोङ्ले ब्रेःब र्हङ्ब य्हीन्ब। 6 तलेपङ्सम् अमकोलचे क्र अउप्ज्यी पङ्सम् थेचे क्रबा ब्रेःखइ। तर अमकोलचे क्रबा ब्रेःब वुइ पोन्टोङ्टोङ्ले ब्रे:ब पेत्पे तम् य्हीन्ब, होत्तज्यीम् थेचे र्हङ्की क्र उप्थोब। 7 अपकोलचे प्रार्थना वुइ अगम्बानी पङ्बे बेलोरी क्र उप्अथो, तलेपङ्सम् थेचे पर्मेस्वर्की स्वरुप्तेङ् महीमात ङोन्ब। तर अमकोलचेमी अपकोलइ महीमात ङोन्ब। 8 तलेपङ्सम् अपकोल अमकोल ग्यम्से स्य्हेङ्बल अय्हीन्, तर अमकोल अपकोल ग्यम्से स्य्हेङ्बल य्हीन्ब। 9 ओसेम् अपकोल अमकोलइ लागीरी स्य्हेङ्बल अय्हीन्, तर अमकोल अपकोलइ लागीरी स्य्हेङ्बल य्हीन्ब। 10 होत्तज्यीम् अमकोलमाचे अधीन्री टीबल मुब बी ङोन्बे लागीरी क्र उप्थोब, तलेपङ्सम् स्वर्गदुत्माचे च्याटीबल तब। 11 होलेतलेनो प्रभुइ ङोन्री अमकोलत अपकोल तोःब, ओसेम् अपकोलतएनो अमकोल तोःब। 12 तलेपङ्सम् अमकोल अपकोल ग्यम्से स्य्हेङ्जेत्ज्यी, ओसेम् अपकोलएनो अमकोल ग्यम्सेनो न्हब। तर जम्मइ म्रु: पर्मेस्वर्नो य्हीन्ब। 13 एङ्यीमा र्हङ्चेनो बीचार् स्य्हेङो, अमकोलचे क्र अउप्नले प्रार्थना स्य्हेङ्ब छन्द खल स्यीम? 14 अपकोलचे क्र बा र्हीङ्नले न्हब पेत्पे तम् य्हीन्ब बी जम्मचेनो स्येब अय्हीनो स्यीम्? 15 तर अमकोलचे क्र बा र्हीङ्नले न्हबल मुसम् हुजु थेइ स्य्हेसइ तम् य्हीन्ब। तलेपङ्सम् अमकोलइ क्र बा थेइ क्रत उप्परी पीन्बल य्हीन्ब। 16 चु तम्की बारेरी खल्चे पङ्लेनो तम् ज्योप्प म्हेन्सम्, चु बीम् ल्हो-ल्हो पे ङ्यीमातेङ् तएनो अरे, ओसेम् पर्मेस्वर्की मन्डलीमातेङ्एनो ल्हो-ल्हो पे तएनो अरे। प्रभु डोन् ( मत्ती २६:२६-२९ ; मर्कुस् १४:२२-२५ ; लुका २२:१४-२० ) 17 देरेम् ङचे एङ्यीमात कुल्ब म्हइटीबे अर्तीरी ङ एङ्यीमात अतोप्, तलेपङ्सम् एङ्यीमा र्हुब् तबतेङ् ज्यब बीमएनो अज्यब य्हक्को स्य्हेङ्ब। 18 पहीलो तम्, एङ्यीमा मन्डलीरी र्हुब तबतेङ् एङ्यीमाकी गुङ्री अडीःज्यीम् थीबल मुब पङ्बे तम् ङचे थ्येःबल मुब। ओसेम् एङ्यीमाचे होले स्य्हेङ्स्यील बी ङएनो पतइतीबल मुब। 19 पर्मेस्वर्चे दम्जेत्पे म्हीमा स्येःबरी एङ्यीमान्हङ्री थीएनो थीथोःब। 20 एङ्यीमा र्हुब् तबतेङ् चब थुङ्ब स्य्हेङ्बमी देमेन्नो प्रभु डोन् अय्हीन्। 21 तलेपङ्सम् एङ्यीमान्हङ्री गदेचेम् र्हङ्की चब खल्तएनो अजुनले र्हङ्कीनो चब, होत्तज्यीम् गदे म्हीम् फोइतेन् तब, ओसेम् गदेम् ङ्य्हेब। 22 चब थुङ्ब स्य्हेङ्बरी ता एङ्यीमाल र्हङ्-र्हङ्की दीम्मा अरे स्यीम्? वुइ ता एङ्यीमाचे तएनो अरेबे म्हीमात हेल लज्यीम् पर्मेस्वर्की मन्डलीत पेत्नलब? ङ एङ्यीमात ता पङ्ब? ता चु तम्की लागीरी एङ्यीमात तोप्प? अय्हीन्, ङ एङ्यीमात अतोप्। 23 तलेपङ्सम् ङचे प्रभु ग्यम्से ता लोप्ज्यी हुजु एङ्यीमातएनो लोप्पीन्ज्यी। प्रभु येसुत चुङ्न लपीन्बे म्हुन थेङ्चे गेङ् थोजेत्ज्यी, 24 ओसेम् पर्मेस्वर्त व्होर्छ्ये न्हङ्जेत्ज्यीम् हुजु क्युत्जेत्ज्यी, ओसेम् सुङ्ज्यी, “चु एङ्यीमाकी लागीरी ङइ ल्ही: य्हीन्ब, चु ङइ व्हल्री स्य्हेङ्स्यीनो टीउ।” 25 होलेनो डोन् चब बीसेम् येसुचे खोरे थोःजेत्ज्यीम् सुङ्ज्यी, “चु खोरे ङइ काःरी तबे छार् करार् य्हीन्ब। खेम-खेम एङ्यीमाचे चु थुङ्ब, ङइ व्हल्री चोले स्य्हेङ्स्यीनो टीउ।” 26 तलेपङ्सम् खेम-खेम एङ्यीमाचे चु गेङ् चब ओसेम् चु खोरे ग्यम्से थुङ्ब, प्रभु दोःज्यीम् ब्योन्युअजेत् गदे एङ्यीमाचे थेङ् स्यीजेत्पे तम्की घोसना स्य्हेङ्स्ये मुब। 27 होत्तज्यीम् खल म्हीचे प्रभुत स्य्हेस अलनले प्रभुइ गेङ् चब, ओसेम् थेङ्की खोरे ग्यम्से थुङ्ब, हुजु म्हीचे प्रभुइ ल्हीःतेङ् काःकी बीरुद्दरी पाप् स्य्हेङ्बल तस्ये मुब। 28 होले तज्यीम् जम्मचेनो ङोन्ग्यम् र्हङ्त जाच्तीखइ, ओसेम् हुजु लीप्चेकीनो थेचे गेङ् चखइ, ओसेम् खोरे ग्यम्से थुङ्खइ। 29 तलेपङ्सम् प्रभुइ ल्हीःकी बारेरी ज्यनले अगोननो चबतेङ् थुङ्बे म्हीचे हुजु चबतेङ् थुङ्बचे लज्यीम् र्हङ्त सजाय बस्ये मुब। 30 होत्तज्यीम् एङ्यीमान्हङ्री य्हक्को म्हीमा कम्जोर्तेङ् नबल मुब, ओसेम् गदे म्हीमामी स्यीज्यीन्बल मुब। 31 ङ्य्हङ्माचे र्हङ्चे र्हङ्त ठीक्ले जाच्तीबल मुसम् पर्मेस्वर्चे ङ्य्हङ्मात दोस् ल्हइतीजेत्स्ये अरे। 32 तर जम्बुलीङ्की म्हीमातेङ् बक्च्य नास् अतखइ पङ्ज्यीम् प्रभुचे ङ्य्हङ्मात दोस् ङोन्जेत्प, ओसेम् दुल्जेत्प। 33 होत्तज्यीम् म्होइबे र्होमा, एङ्यीमा प्रभु डोन् चबरी र्हुब् तबतेङ् गीःचे गीःत ब्रेनो। 34 खल पङ्लेनो ख्रेन्बल मुसम् थेचे दीम्री चखइ, होले तज्यीम् प्रभु डोन् चबरी र्हुब् तबतेङ् एङ्यीमाचे सजाय नाअथोखइ। ल्हो-ल्हो तम्माकी बारेरीम् ङ खबतेङ् लोप्पीन्स्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.