१ कोरीन्थी 10 - पश्चिम तामाङख्लत तेन्ब अत पङ्बे बारेरी लोप्पल 1 बीस्वासी र्होमा, एङ्यीमाचे चु तम् स्येःखइ पङ्बे सेम् ङल मुब। मोसाचे ङ्य्हङ्की म्हेम्हेमा जम्मत मीस्र य्हुल् ग्यम्से बबे बेलोरी मुक्पचे ग्यम् सीत्ज्यीम् बज्यी, ओसेम् थेङ्यीमा जम्मचे लाल् समुन्द्रइ गुङ्से खर्ब ग्यम् तज्यीम् तार्तीज्यी। 2 ओसेम् थेङ्यीमा जम्मचेनो मोसाइ लीप्चे ब्रज्यीम् मुक्पतेङ् समुन्द्ररी बप्तीस्मा यङ्बल मुबल। 3 थेङ्यीमा जम्मचेनो थो गीःकी आत्मीक् चब चज्यी। 4 ओसेम् जम्मचेनो थो गीःकी आत्मीक् यी थुङ्ज्यी, तलेपङ्सम् थेङ्यीमातेङ् बक्च्य ब्रजेत्पे ङ्हच्छ्यङ् आत्मीक् युङ्बइ यी थेङ्यीमाचे थुङ्ज्यी, ओसेम् हुजु ङ्हच्छ्यङ् आत्मीक् युङ्बमी ख्रीस्ट्नो मुबल। 5 तर थेङ्यीमान्हङ्री य्हक्को र्हङ्ब म्हीमातेङ् पर्मेस्वर् तङ् अजेत्, ओसेम् थेङ्यीमा उजाड ग्लारीनो स्यीज्यी। 6 थेङ्यीमाचे अज्यबे सेम् थोःबल र्हङ्ले ङ्य्हङ्माचेएनो थोःब अत पङ्ज्यीम् चु जम्मनो तम्मा ङ्य्हङ्माकी चेताउनीकी लागीरी तबल य्हीन्ब। 7 ओसेम् थेङ्यीमान्हङ्री गदे म्हीमाचे ख्लमात तेन्ब र्हङ्ले एङ्यीमाचे तेन्बनो अत। धर्म छ्येःरी ब्रीबल मुब, “म्हीमा डोन्री चब थुङ्बरी टीज्यी, ओसेम् स्यज्यीम् अमकोलमातेङ् अमकोलमाचे अज्यबे लक् स्य्हेङ्ज्यी।” 8 थेङ्यीमान्हङ्री गदे म्हीमाचे बेस्य स्य्हेङ्ब र्हङ्ले ङ्य्हङ्माचे स्य्हेङ्ब अत। बेस्य स्य्हेङ्बल तज्यीम् थेङ्यीमा तीरेत्रीनो तेइस् हजार स्यीज्यी। 9 थेङ्यीमान्हङ्री गदे म्हीमाचे ख्रीस्ट्की जाच स्य्हेङ्ब र्हङ्ले ङ्य्हङ्माचे स्य्हेङ्ब अत। ख्रीस्ट्की जाच स्य्हेङ्बल तज्यीम्नो भीक् मुबे पुख्रीचे छाज्यीम् थेङ्यीमा स्यीज्यी। 10 थेङ्यीमाचे र्हङ्ले ङ्य्हङ्माचेमी गन्गन् स्य्हेङ्बनो अत। थेङ्यीमाचे गन्गन् स्य्हेङ्बल तज्यीम् स्यीन लबे चवचे नास् स्य्हेङ्बल मुबल। 11 थेङ्यीमात तबे चु तम्मा ङ्य्हङ्मात नुमनइ लागीरीतेङ् ङ्य्हङ्मात होसीयार् तनलबे लागीरी ब्रीबल य्हीन्ब। तलेपङ्सम् देरेम् चु जम्बुलीङ् बेबे बेलो खबल मुब। 12 होत्तज्यीम् खल्चे पङ्लेनो बीस्वास्री कोङ्नले रप्पल मुब बी म्हेन्बे म्हीचे थे होसीयार् तखइ्, अय्हीन् पङ्सम् थे पाप्री दोस्ये मुब। 13 म्हीइ जीवन्री खबे परीक्षमा बीम ल्हो-ल्हो परीक्षमा एङ्यीमात खबल अरे। तर पर्मेस्वर् बीस्वासीलो मुब, ओसेम् थेङ्चे एङ्यीमात एङ्यीमाचे नाब अखम्बे परीक्षरी दो:न लअजेत्, तर एङ्यीमाचे नाब खम्खइ पङ्ज्यीम् हुजु ग्यम्से डोङ्बे ग्यम्एनो ङोन्पीन्जेत्प। 14 होत्तज्यीम् म्होइबे र्होमा, एङ्यीमाचे ख्लत तेन्ब पीतो। 15 ङ एङ्यीमात स्येःबतेङ् गोब खम्बे म्हीमात र्हङ्ले पङ्ब। ङचे पङ्बे तम्त एङ्यीमा र्हङ्चेनो म्हेनो। 16 प्रभु डोन्की खोरे थोःज्यीम् ङ्य्हङ्माचे पर्मेस्वर्त व्होर्छ्ये पीन्ब, ओसेम् ङ्य्हङ्चे हुजु खोरे ग्यम्चे थुङ्बतेङ् ङ्य्हङ्मा ख्रीस्ट्की काःरी सहभागी तबल ङोन्ब अय्हीनो स्यीम्? गेङ् स्योइज्यीम् चबतेङ् ङ्य्हङ्मा ख्रीस्ट्की ल्हीःरी ख्रीस्ट्तेङ् गीः तबल ङोन्ब अय्हीनो स्यीम्? 17 गेङ् गीःनो य्हीन्ब, ङ्य्हङ्मा य्हक्को मुलेएनो ल्हीः गीःनो य्हीन्ब, तलेपङ्सम् ङ्य्हङ्मा जम्मचेनो गेङ् गीः ग्यम्सेनो जुज्यीम् चबल मुब। 18 इस्राएलीमात च्याको, बेदीरी ठा पीन्बे स्हेःमा चबे म्हीमाचे ता बेदीरी सहभागी अत स्यीम्? 19 ङचे ता पङ्ब म्हइटीब? ख्लत पीन्बे चबे स्हेः तए य्हीन्ब? ओसेम् ख्लएनो तए य्हीन्ब? 20 तर ङचे पङ्ब म्हइबे तम् चु य्हीन्ब की, ख्लत तेन्बे म्हीमाचे पीन्बे ठा पर्मेस्वर्त पीन्बल अय्हीन्, तर म्हङ्मात पीन्बल य्हीन्ब। ओसेम् एङ्यीमा म्हङ्मातेङ् अडीःखइ पङ्बे सेम् ङल मुब। 21 एङ्यीमाचे प्रभुइ खोरेतेङ् म्हङ्माकी खोरे ङ्ही ग्यम्सेनो थुङ्ब अखम्। होलेनो एङ्यीमाचे प्रभुइ टेबल्तेङ् म्हङ्माकी टेबल ङ्य्ही ग्यम्सेनो चब अखम्। 22 ता ङ्य्हङ्माचे प्रभुत स्हेर्नलजेत्ब? ता ङ्य्हङ्मा थेङ् बीम बङ्ज्येन् मुब? 23 गदे म्हीमाचे, “ङ्य्हङ्माचे ता स्य्हेङ्लएनो तब” पङ्ब, तर जम्मनो तम्चे ज्यब अस्य्हेङ्। ओसेम् गदे म्हीमाचे, “ङ्य्हङ्माचे स्य्हेङ्गे म्हेन्बे जम्मनो तम् स्य्हेङ्म्यङ्ब” पङ्ब तर जम्मनो तम्चे बीस्वास्री फाइद अस्य्हेङ्। 24 खल्चेएनो र्हङ्लकीनो ज्यब तखइ बी सेम्री अम्हेन्खइ, तर ल्हो-ल्हो म्हीमात ज्यब स्हेङ्बे सेम् थोखइ। 25 ओसेम् बीबेक्की लागीरी सेम्री तएनो अम्हेन्नले एङ्यीमाचे स्य पसल्री चुङ्बे जम्म थोइ स्य ग्लुज्यीम् चब खम्ब। 26 तलेपङ्सम् धर्म छ्येःचे पङ्ब, “जम्बुलीङ्तेङ् जम्बुलीङ्री मुबे स्हेःमा जम्मनो परम्प्रभुलनो य्हीन्ब।” 27 खल पङ्लेनो ख्रीस्ट्त बीस्वास् अस्य्हेङ्बे म्हीचे एङ्यीमात चब चबरी ङ्होत्ज्यी पङ्सम् एत ङ्यीइ म्हेन्सम् ङ्यीउ, तर बीबेक्की लागीरी ता पीन्लेएनो अङ्योत्नले चउ। 28 तर खल्चे पङ्लेनो “चुमी ख्लत ठा पीन्बे चब मुबल” पङ्सम् हुजु तम् स्येत्पे म्हीइ लागीरी ओसेम् बीबेक्की लागीरी हुजु चब थचउ। 29 ङचे पङ्बल एइ बीबेक्की लागीरी अय्हीन्, तर हुजु तम् स्येत्पे म्हीइ बीबेक्की लागीरी य्हीन्ब। एङ्यीमाचे पङ्ल, ल्हो-ल्होइ बीबेक्की लागीरी ङइ स्वतन्त्रत तले तम् थापुङ्ब? 30 ङचे पर्मेस्वर्त व्होर्छ्ये पीन्ज्यीम् चब पङ्सम्, व्होर्छ्ये पीन्ज्यीम् चबे चबइ लागीरी ल्होल्होचे तले दोस् पीन्ब? 31 होत्तज्यीम् एङ्यीमाचे चलेनो थुङ्लेनो ता स्य्हेङ्लेनो जम्मनो पर्मेस्वर्की महीमाकी लागीरी स्हेङो। 32 एङ्यीमाचे यहुदीमा य्हीन्लेनो, यहुदी अय्हीन्बे म्हीमा य्हीन्लेनो, ओसेम् पर्मेस्वर्की मन्डली य्हीन्लेनो खल्तएनो न्होङ्नलबे लक् थस्हेङो। 33 जम्मनो म्हीमाचे थर्ब यङ्खइ पङ्ज्यीम् ङचेएनो ङचे स्य्हेङ्बे जम्मनो लक्मारी जम्मनो म्हीमात तङ्नलब म्हइब, ङ र्हङ्ल अय्हीन् तर जम्मलनो ज्यब तखइ पङ्बे सेम् थोःज्यीम् लक् स्य्हेङ्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.