१ कोरीन्थी 1 - पश्चिम तामाङ1 पर्मेस्वर्की थु: ग्यम्से येसु ख्रीस्ट्की प्रेरीत् तबरी दम्जेत्पे ङ पावलतेङ् ङ्य्हङ्की अले सोस्थेनेस ग्यम्से, 2 कोरीन्थरी मुबे पर्मेस्वर्की मन्डलीत, येसु ख्रीस्ट्री पबीत्र स्य्हेङ्जेत्पलमालतेङ् ख्रीस्ट्की पबीत्र म्हीमा तबरी ङ्होत्जेत्पलमात र्हङ्ले येसु ख्रीस्ट्तेङ् तबे सङ्गतीचे थेङ्ल तबलमातेङ् खन बीबीचेनो थेङ्यीमातेङ् ङ्य्हङ्की प्रभु येसु ख्रीस्ट्की छेन्त तेन्बलमात चु चीठी ब्रीबल य्हीन्ब। 3 ङ्य्हङ्की पर्मेस्वर् अपतेङ् प्रभु येसु ख्रीस्ट्चे एङ्यीमात अनुग्रहतेङ् सान्ती न्हङ्जेत्खइ। व्होरछ्ये पीन्बल 4 येसु ख्रीस्ट्री पर्मेस्वर्चे एङ्यीमात अनुग्रह न्हङ्जेत्पल तज्यीम् एङ्यीमाकी लागीरी ङ ङइ पर्मेस्वर्त खेम पङ्लेनो व्होर्छ्ये पीन्ब। 5 तलेपङ्सम् ख्रीस्ट्री एङ्यीमा जम्मनो तम्मारी बरु तबल मुब। होत्तज्यीम् एङ्यीमातेङ् तम्मा पङ्बे सक्तीतेङ् जम्मनो तम्मा गोब खम्बे ज्ञान् मुब। 6 चु ग्यम्सेनो ख्रीस्ट्की बारेरी ङ्यीमाचे स्येत्पे तम् देमेन् य्हीन्ब बी ङोन्ब। 7 होत्तज्यीम् ङ्य्हङ्की प्रभु येसु ख्रीस्ट् दो:ज्यीम् ब्योन्युबे बेलो ब्रेन्बतेङ् एङ्यीमाचे जम्मनो थोइ आत्मीक् बर्दान्मा यङ्ब। 8 ङ्य्हङ्की प्रभु येसु ख्रीस्ट् दो:ज्यीम् ब्योन्युबे दीन्री एङ्यीमा दोस् अरेबल तखइ पङ्ज्यीम् पर्मेस्वर्चे ज्युकी दीन्सम्मनो एङ्यीमाकी बीस्वास्त कोङ्नलजेत्स्ये मुब। 9 पर्मेस्वर् बीस्वासीलो मुब। थेङ्चेनो र्हङ्की ज येसु ख्रीस्ट्, ङ्य्हङ्की प्रभुइ सङ्गतीरी एङ्यीमात ङ्होत्जेत्ज्यी। मन्डलीन्हङ् अथुन्बल 10 बीस्वासी र्होमा, ङ्य्हङ्की प्रभु येसु ख्रीस्ट्की छेन्री ङ एङ्यीमात फ्या लब, एङ्यीमा गी:चे गी:तेङ् थुनो, एङ्यीमाकी गुङ्री थीबे तम्मा अतखइ ओसेम् एङ्यीमाकी बीचारतेङ् उदेस्य गीः तउ। 11 तलेपङ्सम् बीस्वासी र्होमा, एङ्यीमा र्हङ्-र्हङ् न्हङ् बङ्ब बी क्लेएकी दीम्की म्हीमाचे ङत स्येत्ज्यी। 12 ङचे थ्ये:बे तम् चु य्हीन्ब, एङ्यीमान्हङ्री डेत्चे “ङ पावल्ल” डेत्चे “ङ अपोल्लोस्ल” डेत्चे “ङ पत्रुस्ल” ओसेम् ल्हो-ल्हो डेत्चे “ङ ख्रीस्ट्ल य्हीन्ब” पङ्ब रो। 13 ता ख्रीस्ट् बो-बोले जुजेत्पल मुबो स्यीम्? ता पावल एङ्यीमाकी लागीरी क्रुस्री च्योज्यो स्यीम्? ता एङ्यीमाचे पावलकी मीन्री बप्तीस्मा कीन्ज्यो स्यीम्? 14 पर्मेस्वर्त व्होर्छ्ये तखइ, ङचे एङ्यीमा न्हङ्री क्रीस्पसतेङ् गायसत बीम ल्हो-ल्हो खल्तएनो बप्तीस्मा पीन्बल अरे। 15 होत्तज्यीम् ङइ मीन्री बप्तीस्मा कीन्ज्यी बी एङ्यीमा खल्चेएनो पङ्म्यङ्स्ये अरे। 16 (य्हीन्बमी ङचेएनो स्तीफनस्की दीम्की म्हीमात बप्तीस्मा पीन्ज्यी। हुजु बीम ल्हो-ल्हो खल्तएनो ङचे बप्तीस्मा पीन्बल ङत व्हल् अरे।) 17 तलेपङ्सम् ख्रीस्ट्चे ङत बप्तीस्मा पीन्बरी पीत्जेत्पल अय्हीन्, तर ज्यबे सम्तर् स्येत्परी पीत्जेत्पल य्हीन्ब। चु प्रचार्की लक् ङचे र्हङ्की बुद्दीतेङ सेम्चेकीनो म्हेन्ज्यीम् अस्य्हेङ्, होले स्य्हेङ्सम् ख्रीस्ट् क्रुस्री स्यीजेत्पल स्यीत्तीरी तस्ये मुब। ख्रीस्ट्नो पर्मेस्वर्की सक्तीतेङ् ज्ञान् 18 तलेपङ्सम् नास् तटीबलमाकी लागीरी क्रुस्की सम्तर् मुर्ख तम् य्हीन्ब, तर ङ्य्हङ् उदार् यङ्टीबलमाकी लागीरी पर्मेस्वर्की सक्ती य्हीन्ब। 19 तलेपङ्सम् धर्म छ्येरी चोले ब्रीबल मुब, “बुद्दी मुबलमाकी बुद्दी ङचे नास् स्य्हेङ्स्ये मुब, ओसेम् स्ये:ब खे:बमाकी तम् न्होङ्न लस्ये मुब।” 20 बुद्दी मुबे म्हीमा खन मुब? धर्म लोप्पोन्मा खन मुब? ओसेम् चु बेलोइ तम्मा ज्योप्प खम्बे ज्ञान मुबे म्हीमा खन मुब? ता पर्मेस्वर्चे चु जम्बुलीङ्की बुद्दीत मुर्ख तनलअजेत् स्यीम्? 21 तलेपङ्सम् जम्बुलीङ्की म्हीमाचे र्हङ्की बुद्दी ग्यम्से पर्मेस्वर्त स्ये:ब खम्स्ये अरे पङ्ज्यीम् पर्मेस्वर्चे खेम्जेत्ज्यी। होत्तज्यीम् ङ्यीमाचे स्येत्पे ज्यबे सम्तर्त म्हीमाचे मुर्ख तम् य्हीन्ब पङ्लेनो, हुजु सम्तर्त बीस्वास् स्य्हेङ्बलमात पर्मेस्वर्चे थर्नलबरी ज्यब म्हेन्जेत्ज्यी। 22 तलेपङ्सम् यहुदीमाचे तेङेन्की चीनो र्हीत्प ओसेम् ग्रीक् म्हीमाचे बुद्दी म्हइब। 23 तर ङ्यीमाचेमी क्रुस्री च्योज्यीम् सेत्पे ख्रीस्ट्की प्रचार् स्य्हेङ्ब। यहुदीमाकी लागीरी चु तम् थोक्पे तम् तज्यी, ओसेम् ग्रीक्माकी लागीरी चु मुर्ख तम् तज्यी। 24 तर पर्मेस्वर्चे ङ्होत्जेत्पे यहुदी म्हीमातेङ् यहुदी अय्हीन्बे ल्हो-ल्हो म्हीमा जम्मइ लागीरी ख्रीस्ट्नो पर्मेस्वर्की सक्तीतेङ् पर्मेस्वर्की ज्ञान य्हीन्ब। 25 तलेपङ्सम् पर्मेस्वर्की मुर्ख म्हीइ ज्ञान् बीमएनो ङ्हच्छ्यङ् मुब, ओसेम् पर्मेस्वर्की कम्जोरी म्हीमाकी बङ् बीमएनो सक्तीसाली मुब। 26 बीस्वासी र्होमा, पर्मेस्वर्चे ङ्होत्जेत्पे बेलोरी एङ्यीमा खतेब मुबल व्हल् लउ। म्हीमाचे म्हेन्ब अनुसार् एङ्यीमान्हङ्री य्हक्को म्हीमा ज्ञानी अरेबल। ओसेम् य्हक्को र्हङ्ब सक्तीसालीतेङ् ङ्हच्छ्यङ् खान्दन्री न्हबलएनो अरेबल। 27 तर बुद्दी मुब बी म्हेन्बे म्हीमात पेत्नलबरी पर्मेस्वर्चे बुद्दी अरेबे म्हीमात दम्जेत्ज्यी, ओसेम् बङ्ज्येन्मात पेत्नलबरी पर्मेस्वर्चे बङ् अरेबे म्हीमात दम्जेत्ज्यी। 28 ओसेम् र्हङ्कीनो ङ्हच्छ्यङ्तेङ् बुद्दी मुबे म्ही म्हेन्बलमात पेत्नलबरी, पर्मेस्वर्चे ज्यीदतेङ् म्हीचे अखोबल ओसेम् तइ लकएनो अतबे म्हीमात दम्जेत्ज्यी। 29 होत्तज्यीम् खल्चेएनो पर्मेस्वर्की ङोन्ग्यम् घमन्ड अस्येङ्खइ। 30 पर्मेस्वर्चे एङ्यीमात येसु ख्रीस्ट्तेङ् गीः तनलजेत्ज्यी। पर्मेस्वर्चेनो ख्रीस्ट्त ङ्य्हङ्की लागीरी बुद्दी स्य्हेङ्जेत्ज्यी। ओसेम् ख्रीस्ट्चे ङ्य्हङ्त पर्मेस्वर्की ङोन्री धार्मीक् स्य्हेङ्जेत्ज्यी, थेङ्चेनो ङ्य्हङ्त पर्मेस्वर्की पबीत्र म्ही स्य्हेङ्जेत्ज्यी, ओसेम् पाप ग्यम्से फेःपीन्जेत्ज्यी। 31 होत्तज्यीम् धर्म छ्येःचे पङ्ब, “घमन्ड स्य्हेङ्बलचे प्रभुरीनो घमन्ड स्य्हेङ्खइ।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.