Tito 3 - Dios Iwene

Jesúsnö ösödadöma baikwö otiwanö ja̧bö tjö̧jo jö̧ba̧lö Pablo yöawina wene

¹ Tito, belö yödawina tjomukwatibobö yöbawi Cretanö ju̧kwadö Jesúsnö ösödadönö, la'aka tjuluwedö wetji̧bi, ju'wedö tjuluwedö wetji̧bi ja̧bö tjö̧jobö. Jau Tito, öpöjödabökönö tjo̧'wo̧ ösöwanö tjuluwedö wetji̧ ja̧bö tjö̧jobö jo̧be. Ja̧danö, okobe jwiinö otiwanö ja̧awa ja̧bö dö̧jo jö̧ba̧ladö batjibanö tjö̧jobö,

² ja̧danö, ju'wedönö sulabenö yöba̧lökönö tjö̧jobö, ja̧danö jwöjwöbökönö tjö̧jobö, ja̧danö, dösölö̧jinö yöba̧lö tjö̧jobö, ja̧danö okobe deinö ju'wedönö otiwanö dösölö̧jinö ja̧bö tjö̧jobö yökawodönö.

³ Ökwödö Jesúsnö ösödadöma, ina Jesúsnö dösödakwa̧ abönö böjȩ jojodö ja̧bö tjö̧ji̧danö ja̧bö dö̧jijatö Tito. Ja̧danö, wajwibadö ja̧nö, Dios wei̧ a̧ja̧kwökönö ja̧nö, omöna yöa̧lakwawa ösödö ja̧nö dö̧jijatö ajayinöma. Jejenö dö̧jenama, sulabe jawa dösödinama ökwödönö juluwinobedanö ichejekwa. Jau Tito, okobe jwiinö sulabe jawa dösödinama ökwödönö juluwinobedanö ichejekwa. Ja̧danö, ökwödönö juluwinobetjö̧, otiwanö ja̧bö dö̧joböma jwidinobe. Ja̧danö, jwaikwöda sulabenö dösödi̧ jawada ja̧bö dö̧jijatö. Ja̧danö, jejenö ja̧nö, kabatökönö sulabenö ja̧bö, ö'wiabinö edö dö̧jijatö. Ja̧danö, ju'wedönö öpöjödadö, ja̧danö ju'wedö tjöpöjödawö̧ dö̧jijatö ajayima.

⁴ Jo̧kwaijayonö, jejenö dö̧jemi ö'weje, dö̧jibinö pjabato̧ Diosma iteda lȩlö̧jinö edi̧ma i̧sebinobe ökwödönöma, ökwödönö dösölö̧jinö pjabatö,

⁵ ja̧danö dö̧jibinö pjaatinobe. Ökwödöda otiwanö ja̧diökwema ja̧inokobe dö̧jibinö ja̧böma, iteda lȩlö̧jinö edo̧obetjö̧, dö̧jibinö ja̧inobe. Jau Tito, Dios O̧'wo̧ Luwo̧ma ökwödö sulabe dujuna̧li̧ dichö loinobe, 'yabayedö badibanö, 'yayinö bötjachibadö badibanö.

⁶ Ja̧danö, dö̧jibinö pjabato̧ Jesucristo dö̧jibinö pjaatinobetjö̧, Diosma a̧'dȩlökönö iyinobe iteda O̧'wo̧ Luwo̧nö ökwödönöma.

⁷ Ja̧danö Diosma mikwa jwiinö otiwa jawa iyö ökwödönö yöawinobe, bidöma sulabe jwibadö jö̧ba̧lö, ja̧danö ba̧kwȩlö̧jatebö ja̧kwawa dujuna̧lakwedö badibanö ja̧inobe. Ja̧danö, isabenö Dios jö̧a̧linadanö ba̧kwȩlö̧jatebö ja̧kwawa dujuna̧lakwedösa jö̧ba̧lö, Diosnö do̧'wo̧ wana̧lö dö̧jobe ökwödö Jesúsnö ösödadöma.

⁸ Jau Tito, biya̧ yötawaja̧ma, jweinö yötawajabe. Tito, biya̧ ökwönö yötawaja̧ma, Jesúsnö ösödadönö yökawobö chösöda. Ja̧danö, otiwanö tja̧ja̧kwobö webidönö, jobadö Diosnö ösödadöma jwaikwöda otiwanö ja̧awa ja̧badö batjibanö tjuju̧kwakobetjö̧. Jejenö ja̧bö ja̧kwawama otiwa, ja̧danö jojodönö pjaatakwawa ji̧.

⁹ Ja̧ jawa yöbawi Tito, jo̧kwaijayonö ju'wedö mikwa jwii̧ jawa jwöjwötjakwawi̧ma jwöjwöbökönuwi. Ju'wedöma jwöjwöbakwawadö, Aaa, ötjötjö ajayinö ji̧nadöma bidö, bidö, jö̧ba̧lö. Ja̧danö, ju'wibi ölakwabikwawö jwöjwöbakwawadö Moisés iwȩyudina weawa jawama. Ja̧ jawa jwöjwötjakwawi̧ma mikwawa jwii̧, ja̧danö jojodönö pjaatakwawa jwii̧, jo̧kwajabetjö̧ jwöjwöbökönuwi ja̧ jawama.

¹⁰ Tito, Jesúsnö ösödadötjö bakwo̧ma Jesúsnö ösödadö ju'wedö Jesúsnö ösödadökwö tjölakwabikwawobö ja̧bo̧ ö̧jitjö̧ma, jo̧banö weköbo, jejenö ja̧bö ö̧ji̧ kaatibobö. Bakwötanö weköbajökwe ina a̧ja̧kwökötjö̧ma, yemidanö weköbonö, kaatibobö. Ja̧danö, dötölatajanö kaatibobö weköbajökwe ina a̧ja̧kwökönö jwaikwöda sulabenö tjölakwabikwawobö ja̧bo̧ ö̧jitjö̧ma, jo̧batjö 'da̧bachibö kwö̧jaduwo ökwödö Jesúsnö ösödadöma.

¹¹ Jo̧batjö 'da̧bachibö kwö̧jaduwo jo̧banö kwöwaisaduwobetjö̧, Isabenö wene öpöjödo̧, sulabenö ja̧bö jo̧, jö̧ba̧lö. Jau Tito, jejenö ja̧bo̧ma iteda ja̧bö i̧sebö yöawobe, Sulabenö ja̧bö jo̧sa, jö̧ba̧lö.

Pablo Titonö bajaleapo yöawina wene

¹² Tito, bakwo̧nö wetocha, kwö̧jobe Cretabe i̧'yobö, Artemasnö wetena, Tíquiconö wetena. Ja̧danö, jejenö wetökwe jobe ichibenama, ökwöma Cretatjö labebö, Nicópolisbe kwi̧'yobö omukwati. Ja̧danö, Nicópolisbe kwi̧'yitjö̧ma, bakobe dichibena, ötjöbi jobe chi̧'yobö chomukwatobetjö̧, jobetjö o̧ba chöbaledobö.

¹³ Ja̧danö, abogado jawa otido̧ Zenasnöbi, Apolosnöbi pjakatobö omukwati, kwö̧jobetjö latjebobö jö̧tja̧lenama juluwanö labebö tji̧'yobö. Ja̧danö, okobe jwiinö jwitji̧ jawa ökwödö Cretanö ju̧kwadö Jesúsnö ösödadöma pjabatö kwiyaduwo, okobe jwiinö tji̧'yakwa̧ jawa tjujuna̧lakobetjö̧.

¹⁴ Jau Tito, ökwödö dömöledö jobe Cretanö ju̧kwadö Jesúsnö ösödadöma tjöwaisachibobö jo̧be, otiwanö ja̧bö tjö̧jobö. Ja̧danö, inesö pjatjato jö̧tja̧li̧ma otiwanö pjatjatena, mikwa jwii̧ jawada ja̧bö tjö̧japji jö̧ba̧lö.

¹⁵ Okobe deinö ötjökwö ju̧kwadöma dokwa atjebobe ökwönö Tito, ja̧danö ökwödö dömöledö Jesúsnö ösödadönö yökawo, jobadönö dokwa jö̧ba̧lö adebi̧ma. Duluwo̧ okobe deinö ökwödönö lȩlö̧jinö edobö ateba Diosnö Tito. Biya̧data.