Tito 2 - Dios Iwene

Jesúsnö ösödadönö ba̧ja̧dakwawa jawa Pablo Titonö yöawina wene

¹ Tito, ökwöma ju'wedö sulabenö yötjawi̧danöma yökawoko, bakwainö isabenö wene laebi̧ jawada yökawo.

² Jesúsnö ösödadötjö ömadö damöbedönö baikwö ja̧bö tjö̧jobö kwöba̧ja̧dodönö: Okobe jwiinö ja̧tji̧ma, jweinö omukwatö ja̧bö tjö̧jobö, ja̧danö obökönö ja̧bö tjö̧jobö, ja̧danö tjösödi̧ jawa ja̧bökönö, biya̧ma otiwanö ja̧awa jö̧ba̧lö tjöwaisi̧da ja̧bö tjö̧jobö. Ja̧danö, jobadönö kwöba̧ja̧do, jwaikwöda Jesúsnö ösödö tjö̧jobö, ja̧danö tjömöledö Jesúsnö ösödadönö tjösödobö, ja̧danö tjo̧'wo̧ luwo̧nö me'dawachibökönö tjö̧jobö kwöba̧ja̧dodönö.

³ Ja̧danö, ya̧dö damöbedönöbi baikwö ja̧bö tjö̧jobö kwöba̧ja̧dodönö: Ja̧bö tjö̧ji̧ma otiwanö Diosnö ösödadö ja̧bö tjö̧ji̧danö ja̧bö tjö̧jobö. Ju'wedönö omöna yöba̧lö tjoma'apekwönöma yötja̧loko, ja̧danö nio ojwiyo 'dukwachinö owa̧löma tjö̧joko, wainö ja̧bö tjö̧jobö kwöba̧ja̧dodönö, otiwa jawa ba̧ja̧dadö baibanö tjö̧jobö.

⁴ Jau Tito, jobadö ya̧dö damöbedöma ya̧dö ina möayedödanö ja̧dönö tjöba̧ja̧do baikwö: Bakwujukwena otiwanö tjilekwekwena ösödö tjö̧jobö, ja̧danö otiwanö tji̧tji̧mukwena ösödö tjö̧jobö,

⁵ ja̧danö idöda tjösödi̧ jawama ja̧bökönö, biya̧ma otiwanö ja̧awa jö̧ba̧lö tjöwaisi̧da ja̧bö tjö̧jobö, bakwainö otiwanöda ja̧bö sulabenö ja̧bökönö. Ja̧danö, tjejukwena otiwanö 'dawökanö tjö̧jobö, ja̧danö otiwanö tji̧lȩkwa̧mu wetji̧ öpöjödabökönö ja̧bö tjö̧jobö. Jau Tito, damöbedö ya̧döma ina möayedödanö ja̧dönö otiwanö ja̧bö ja̧kwawa tjöba̧ja̧dobö jo̧be, ju'wedö sulabenö yötja̧lapji jö̧ba̧lö Dios yöawi̧ma.

⁶ Ja̧danö, ömadö ina möayedödanö ja̧dönöbi ba̧ja̧di, tjösödi̧ jawama ja̧tjokobö, biya̧ma otiwanö ja̧awa jö̧ba̧lö tjöwaisi̧da ja̧bö tjö̧jobö.

⁷ Jau Tito, ökwöbi okobe jwiinö ökwö ja̧bö kwö̧ji̧ma, otiwanö ja̧bö ja̧kwawa i̧sebö kwö̧jo, ju'wedö edö tjöwaisakobetjö̧ otiwanö ja̧bö ja̧kwawama. Ja̧danö, jojodönö yöbawö kwö̧ji̧ma, bakwainö otiwanö omukwatö, obökönö yökawo,

⁸ jweinö isabenö weneda yökawo, ju'wedö bitema sulabenö yöbawo̧ jö̧ba̧lö yötja̧lobö jwitjakobetjö̧. Ja̧danö, jweinö yökawobetjö̧, ökwödönö öpöjödadöma taba lö̧jawö̧ tjö̧jakwedö, ökwödönö sulabenö yötja̧lobö jwiobetjö̧.

⁹ Ja̧danö tjömöayedö baibanö midö tjeminawö̧nö, baikwö ja̧bö tjö̧jobö kwöba̧ja̧dodönö: Tjuluwedö wetji̧ öpöjödabökönö, tjuluwedö tjösödi̧ jawa jwaikwöda ja̧bö tjö̧jobö. Ja̧danö, tjuluwedö jobadönö wetjenama, atadökönö wetji̧danö ja̧bö tjö̧jobö,

¹⁰ ja̧danö tjuluwedö tjujuna̧li̧ma naukwökönö tjö̧jobö. Jau Tito, jobadö tjö̧ji̧ma tji̧sebobö jo̧be, jwaikwöda chuluwo̧ wei̧ jweinö ja̧bö jo̧sa jö̧ba̧lö. Ja̧danö, jejenö tji̧sebobe edö, ju'wedöma dö̧jibinö pjabato̧ Dios yöawi̧ma tjösödakobe, otiwa jö̧ba̧lö.

¹¹ Jau Tito, Dios okobe deinö böjȩ jojodö tjö̧jibobö pjaatenama, öwaetjöda i̧sebinobe, Mikwa jwiinö otiwa jawa iyo̧sa, jö̧ba̧lö.

¹² Ja̧danö, ja̧ Dios mikwa jwiinö otiwa jawa iyi̧ma ökwödönö ba̧ja̧dobe Diosnö öpöjödö ja̧kwawama kadatibobö, ja̧danö böjȩ jojodö sulabe dösödi̧ jawa ja̧bökönö kabatibö ja̧dobö. Ja̧danö, tupakwö ba̧ja̧dobe ökwödönö, Dios mikwa jwiinö otiwa jawa iyi̧ma, obökönö dö̧jobö, ja̧danö sulabenö ja̧bökönö dö̧jobö, ja̧danö Diosnö ösödö dö̧jobö ina böjȩnö dö̧jayi.

¹³ Jau Tito, ina böjȩnö dö̧jayi, do̧'wo̧ wana̧lö dite'ada̧lobe, isabenö Dios jö̧a̧lina möle badekwachakobe jö̧ba̧lö, inesö otiwa möle, ökwödö dö̧jibinö pjabato̧ la'aka Dios Jesucristoma iteda ujulu i̧sebenama.

¹⁴ Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

¹⁵ Tito, biya̧ ökwönö yötawaja̧ma, jojodönö yöbawi. Ja̧danö, Diosda ökwönö ujuninobetjö̧, yebabökönö a̧ja̧kwajadönö lȩbeböbi lȩkebo, tjujuluwachibanö yöbawöbi yökawo. Ja̧danö, okobe deinö Jesúsnö ösödadö yökawi̧ otiwanö tja̧ja̧kwobö webidönö Tito.