Tito 1 - Dios Iwene

Pablo Titonö iwȩyudinatjö ajayi jawa

¹ Tito, böja kwialusöjanö ötjö Pablo mikwo̧ma wȩyudö wetakwö. Ötjöma Dios ömöayo̧sa, ja̧danö Jesucristo webawo̧sa. Ötjöma Dios 'da̧batö ujuninökwesa, Dios omudawö ujuninawö̧nö pjabatö chöba̧ja̧do jö̧ba̧lö. Ja̧danö, jobadönö chöba̧ja̧dobe, jwaikwöda Dios yöawi̧ tjösödakobetjö̧. Ja̧danö, isabenö wene tjöwaisakobetjö̧ chöba̧ja̧dadönö. Ja̧danö, Dios ösödi̧danö ja̧bö tjö̧jakobetjö̧ chöba̧ja̧dadönö.

² Ja̧danö, Dios omudawö ujuninawö̧nö chöba̧ja̧dobe, Diosnö tjo̧'wo̧ wana̧lö tjomukwatobö, Aaa, isabenö ökwödöma ba̧kwȩlö̧jatebö ja̧kwawa dujuna̧lakwedösa, Dios jö̧a̧li̧danö, jö̧ba̧lö tjomukwatobö. Ja̧ ba̧kwȩlö̧jatebö ja̧kwawa dujuna̧lakwa̧ wenema omöna yöba̧lö̧kö̧ Diosma yöbawö ujuninobe, ina böjȩ otidakwa̧ abönö.

³ Ja̧danö, ujunina möle badekwachenama, ja̧ wene i̧sebö yöawinobe Diosma. Ja̧danö, ja̧ wene yötawobö 'da̧batö ujuninökwesa, ja̧danö dö̧jibinö ja̧bo̧ Diosda weobetjö̧, ja̧ wene yötawobe.

⁴ Tito, ökwöma ötjöda chitji̧danöbo̧ja bakobe Jesúsnö ösödö dö̧jobetjö̧. Ja̧danö, böja kwialusöja wȩyudö wetakwö. Dabe'do Diosnöbi, dö̧jibinö pjabato̧ Cristo Jesúsnöbi ateba, ökwönö lȩlö̧jinö edö, kwo̧'wo̧ luwo̧ ösöwachibanö tupakwö pjatjato jö̧ba̧lö.

Jesúsnö ösödadönö te'ada̧lakwawa luwedö jawa Pablo yöawina wene

⁵ Tito, ina Creta nijinö dö̧jayi, jenada kwö̧jibobö wetijatö, ina kadatinökö jawa kakatobö, ja̧danö Jesúsnö ösödadötjö te'ada̧lakwawa luwedönö kwujunobö, comunidadkwena te'ada̧lakwawa luwedönöma. Ja̧danö, te'ada̧lakwawa luwedönö kwujunenama, ökwönö yötawina kwomukwato, baikwö yötawina:

⁶ Te'ada̧lakwawa luwo̧ otidakwo̧ma ju'wedö jo̧banö sulabenö yötja̧loböma jwibo̧, ja̧danö ilekwo bakwujunöda juna̧lo̧, jobujukwöda jo̧. Ja̧danö, te'ada̧lakwawa luwo̧ otidakwo̧ i̧tji̧muma Jesúsnö ösödadö, ja̧danö i̧tji̧munö bidöma omukwatöködö, weawa a̧ja̧kwöködö jö̧ba̧lö ju'wedö yötja̧lököwö̧.

⁷ Jau Tito, Jesúsnö ösödadönö te'ada̧lakwawa luwo̧ma Dios otidawa jawa luwo̧ baibanö jo̧. Jo̧kwajabetjö̧ te'ada̧lakwawa luwo̧ otidobö kwujunakwo̧ma ju'wedö jo̧banö sulabenö yötja̧lobö jwibo̧nöda kwujunobö jo̧be. Ja̧danö, te'ada̧lakwawa luwo̧ otidakwo̧ma, Aaa, ötjöma waiso̧sa, jö̧ba̧lö omukwatö̧kö̧, ja̧danö juluwanö o̧'wo̧ sulachibö jö̧kö̧, ja̧danö 'dukwachinö nio ojwiyo owa̧lö̧kö̧, ja̧danö ju'wedönö ölakwabikwawö kwakwabö̧kö̧, ja̧danö iteda nöinö balada emotö jö̧ba̧lö ösödö̧kö̧, te'ada̧lakwawa luwo̧ otidakwo̧ma.

⁸ Te'ada̧lakwawa luwo̧ otidakwo̧ma wainö ja̧bö jo̧, baikwö yötawa: Te'ada̧lakwawa luwo̧ otidakwo̧ma, jelobetjö ichajadönö dösölö̧jinö pjabatö jo̧, ja̧danö otiwa jawada ösödo̧, otiwanö ja̧bö ö̧jo jö̧ba̧lö. Ja̧danö, ja̧i̧ma jweinö omukwatö ja̧bo̧, ja̧danö, bakwainö edo̧ jojodönöma, bakwo̧nö jelo̧nötjö o̧penönö omukwatökönö, ja̧danö, jwaikwöda Dios ösödi̧ jawada ja̧bo̧. Ja̧danö, ja̧bö ö̧ji̧ma, Aaa biya̧ma otiwanö ja̧awa jö̧ba̧lö öwaisi̧danö ja̧bö jo̧, sulabenö ösödi̧ jawa ja̧bökönö.

⁹ Te'ada̧lakwawa luwo̧ otidakwo̧ma a̧ja̧kwina wene isabenö wenema 'diinö do̧ba̧lö jo̧, jweinö ju'wedönö tjo̧'wo̧ luwo̧nö tjujuluwachibanö isabenö wene yöawakobetjö̧, ja̧danö isabenö wene öpöjödadönö sulabenö yöbawadönö jweebakobetjö̧.

Cretanö ju̧kwadö Jesúsnö ösödadötjö sulabenö yöbawadönö katjatibobö weköbo jö̧ba̧lö Pablo Titonö weina wene

¹⁰ Jau Tito, te'ada̧lakwawa luwo̧ma jweebobö jo̧be, Jesúsnö ösödadötjö omöna yöba̧ladö tjuju̧kwobetjö̧. Jobadöma weawa öpöjödadö, ja̧danö isabenö wene öpöjödö idöda tjomukwati̧ mikwa jwii̧ jawada yöba̧ladö. Ja̧danö, ju'wedö Jesúsnö ösödadönötjö o̧penönö judío jojodötjö ba̧jekwadö tjuju̧kwobe jejenö ja̧badöma.

¹¹ Jobadö 'wi̧inö batjibobö jo̧be, yötjawoko jö̧tja̧li̧ jawa yötjawobetjö̧. Ja̧danö, jejenö yötjawoko jö̧tja̧li̧ jawa yötjawobetjö̧, ju'wedö jojodö okobe deinö tjömöledökwö isabenö wene katjatibobe. Jejenö sulabenö yöbawadöma otiwanö omukwatöma yöbawöködö, sule nöinö balada tjemotö jö̧ba̧löda, jojodönö omöna yöbawadö.

¹² Jau Tito, Creta niji jojodötjö bakwo̧ waiso̧ ötjabökwema iteda ömöledönö iwȩyudinobe: Creta niji jojodöma ba̧kwȩlö̧jatebö omöna yöba̧ladö, 'dö̧wekwadö, ja̧danö labidö tebo luwadanö ichejekwadö, idöda tjemotö jö̧ba̧lö isakwö, jö̧ba̧lö iwȩyudinobe.

¹³ Ja̧ iwȩyudinama jweinö iwȩyudinobe Creta niji jojodönöma, jo̧kwajabetjö̧ jobadötjö sulabenö yöbawadönö labinö lȩkebo, isabenö weneda do̧ba̧lö tjösödakobetjö̧.

¹⁴ Ja̧danö, judío jojodö tja'dödö yötjawina jawa mikwa jwii̧ jawama tja̧ja̧kwoko, ja̧danö isabenö wene öpöjödadö wetji̧ tja̧ja̧kwoko.

¹⁵ Jobadö sulabenö yöbawadöma baikwö yötjawobe: Aaa, ju'wi jaye suli̧ waedakwawa ji̧, ju'wibi suli̧ waedakwawa ji̧, jö̧ba̧lö. Jo̧kwaijayonö, tjomajadenö sulabenö omukwatökönö bakwainö otiwanö omukwatadönöma, suli̧ waedakwawa ji̧ma jwia, okobe jwiinö otiwa. Jo̧kwaijayonö tjomajadenö sulabenö omukwatadöma, Cristonö öpöjödadöbi, tjomajadenö tjöwaisi̧ otiwa jawabi sulabe jawabi tjöwaisi̧ma wajwibadö, tjomajadenö bakwainö sulabenö omukwatadöda baibanö tjuju̧kwobetjö̧.

¹⁶ Jobadöma, Aaa, Diosnö waisadösa. jö̧ba̧lö yötjawijayonö, ja̧tji̧ma wainö i̧sebö yöbawadö, Diosnö öpöjödadösa, jö̧ba̧lö. Ja̧danö, jobadöma sulabedö, Dios wei̧ a̧ja̧kwökönö ja̧badö, ja̧danö ja'yubebi otiwanö ja̧bö tjuju̧kwoböma jwibadö.