Santiago 5 - Dios Iwene

Santiago yöawina wene: —Juna̧ladöma tjubudekwobö jo̧be usula tjemakwa̧ omukwatö— jö̧ba̧lö

¹ Ja̧danö, juna̧ladönö yötawa, A̧ja̧kwaduwitjö, jö̧ba̧lö. Ju'winö jwiinö usula kwemawaduwakobe. ¡Ayö! ja̧ baledakwa̧ omukwatö budekwabinö jwöbeba̧laduwi, ¡Ökwödöwe! jö̧ba̧lö.

² Wanedö yötawaduwakwö: Batjo junawa 'wibö kwujuninaduwi̧ma ida̧ökö 'dolobö loajabe. Ja̧danö, kwu̧kwaduwi̧ kamisibi̧, nöinö mikwawi̧ kwujuna̧linaduwi̧ma ida̧ökö pjȩlȩbö̧ tjukwajabe.

³ Ja̧danö, kwiteaduwi orobi, platabi kwujuninaduwi̧ma ida̧ökö duwetjekwachajabe. Mikwawokobe yelösöda. Isabenö yötawaduwakwö, Dios lȩbebö yöawakwa̧ möle ichena kwiteaduwi oro, plata duwatjekwachaji̧ma i̧sekwakobe, Bidöma idödada tjösödi̧ tjujuna̧lobö omukwatö tjujuninobe, ju'wedönö pjabatökönö, jö̧ba̧lö. ¡Ayö! Jejenö kwiteaduwi oro, plata duwetjekwachajö loawadanö Diosma ökwödönö ökwöla ubolanö loakobe. Yelösöda Dios lȩbebö yöawakwa̧ möle ichena usula kwemawaduwakobe. Yayonö ökwödöma bajaliyapo möle ida̧ökö yöneawachijayonö ina ju'winö kwujuna̧laduwobö omukwatö kwujunaduwobe. Isabenö yötawaduwakwö. Ja̧ kwujuninaduwi̧ma mikwawokobe Dios lȩbebö yöawakwa̧ möle ichena.

⁴ Ina yötawa jobadö, juna̧ladönöma. Ökwödöma yelösöda sulabenö omukwatö kwömöayedö batjoduwinö 'wibadönö midö kwiyinaduwokobe. A̧ja̧kwaduwitjö. Jobadöma Diosnö budekwabinö jwötjeba̧linobe ökwödönöma, Tjimidinokobe, sula, jö̧ba̧lö. Ja̧danö, jwötjeba̧li̧ a̧ja̧kwiökwe jwiinö juluwo̧, Duluwo̧ Diosma ökwödö midöködönöma lȩbebo̧.

⁵ Isabenö ökwödöma böjȩnö ja̧nö nöinö kwujuna̧laduwobe, ju'wi jawabi ju'wi jawabi, okobe jwiinö kwösödaduwi̧ma. Ja̧danö, sulabenö omukwatö kwösödaduwi̧da ja̧bö kwö̧jaduwobe. Wanedö yötawaduwakwö, ökwödö juna̧ladönö wanekwachaduwobema: Bakwo̧ ajwi pakayanö kwakwawama nöinö kwajebo̧, nöamobö. Ja̧danö, ajwima nöbo̧ baibena ajikwo̧ma kwabö loobe ajwi pakayanöma, tjukwobö. Ja̧danö, pakayama wajwibo̧, ajikwo̧ jo̧banö ju'winö kwabö loakwa̧ma. Jejenö ökwödö juna̧ladöma. Pakaya ajikwo̧ jo̧banö kwabö loakwa̧ wajwii̧danö ökwödöma wajwibadöja ju'winö Dios ökwödönö lȩbebö loakwa̧ma.

⁶ Ja̧danö, ökwödö juna̧ladöma yelösöda sulabenö omukwatö ja̧köbinaduwobe ju'wedönö, ökwödönö sulabenö omukwatöködönöma. Ja̧danö, jobadö otiwanö omukwatö ju̧kwadönö jwökeba̧linaduwobe böjȩnö lȩbebö yöbawo̧nöma, Sulabenö ja̧tjinobe, jö̧ba̧lö. Ja̧danö, ju'wedönö kwabö lotjobö weköbinaduwobe. Isabenö, ökwödö sulabenö ja̧badöma, sulabenö ja̧böködönö kwabö loköbinaduwobe. Biya̧da yötawa ökwödö juna̧ladönöma. A̧ja̧kwaduwitjö. Isabenö, ju'wi möle usula kwemaduwakwedöja.

Santiago yöawina wene: —Kwo̧'wo̧duwi 'dibachibö ja̧nö kwite'ada̧laduwo Duluwo̧ yemidanö ichenanö kabatö— jö̧ba̧lö

⁷ Jo̧kwaobetjö̧ chö̧ja̧wo̧dö, juna̧ladöma ökwödönö usula kwemawaduwobö wetjijayonö kwo̧'wo̧duwi 'dibachibö ja̧nö kwite'ada̧laduwo Duluwo̧ Jesucristo yemidanö ichenanö kabatö. Wanedö yötawaduwakwö, batjo junawanö wanedöma: Bakwo̧ batjo ujunaja̧ ikena ite'ada̧lobe ujunaja̧ma pokwobö, ju'wi möle otiwanö tjukwakwa̧ma. Ite'ada̧lobe ajayinö ojwiyo o̧bakwa̧ma. Ja̧danö, ite'ada̧lobe jemi ikenabi ojwiyo o̧bakwa̧ma. Jo̧bama ite'ada̧li̧da ite'ada̧lobe. Omukwatokobe, Ayö lekwobe, dakwö chite'ada̧la, Chite'ada̧lökena, jö̧ba̧lö. Jejenömaökö. Jo̧bama te'ada̧löda ite'ada̧lobe, öpödawökönö.

⁸ Ja̧danö, ökwödöbi jejenö kwö̧jaduwobö jo̧be. Labi̧ jawa baledenabi, kwo̧'wo̧duwi 'dibachibö te'ada̧löda kwite'ada̧laduwo, kwo̧'wo̧ luwo̧ kwujuluwachaduwinö. Jejenö kwite'ada̧laduwo chö̧ja̧wo̧dö, Duluwo̧ ichakwa̧ma lekwokobetjö̧.

⁹ Ja̧danö, ju'wedönö yöka̧laduwoko, Sulabenö ja̧tjajabe, jö̧ba̧lö. Ökwödöma lȩbebö yökawaduwobö ¿jo̧beji̧? Jwiobe chö̧ja̧wo̧dö. Bakwo̧da, Duluwo̧ Jesucristoda lȩbebö yöbawo̧. Ju'wedönö lȩbebö yökawaduwoko, Jesucristoma ökwödönö, Sulabenö yökawaduwobe, jö̧ba̧lö, lȩbebö yöawapji jö̧ba̧lö. Ja̧danö, a̧ja̧kwaduwi chö̧ja̧wo̧dö. Inesö lȩebakwo̧ Jesucristo ichakwa̧ma lekwokobe. Kwömöledöso̧ ödötjö ichajo̧, ida̧ökö kweju apjudenö jo̧danö öwanekwachobe Jesucristoma. Ichakwa̧ma lekwokobe.

¹⁰ Chö̧ja̧wo̧dö omukwataduwi damötjö da'dödömine, Dios yöawi̧ yöbawadönö. Jobadöma Dios iwene yötjawobetjö̧ yelösöda usula emawiatjinobe. Ja̧danö, usula tjemawijayonö tjo̧'wo̧ 'dibachibö tji̧'yinobe. Chö̧ja̧wo̧dö, jobadö tjö̧jinadanö ökwödöbi kwö̧jaduwobö jo̧be.

¹¹ Jau chö̧ja̧wo̧dö, jobadö usula emawinadö, usula tjemawijayonö tjo̧'wo̧ 'dibachibö 'yi̧nadöma jwiinö tjo̧'wo̧ ösöwanö tjö̧jinobe. Ja̧danö, kwöwaisaduwa damötjö, Job mikwo̧ ö̧jinama. Jo̧bama yelösöda usula emawijayonö o̧'wo̧ 'dibachibö jwaikwöda i̧'yinobe. Ja̧danö, Duluwo̧ Diosma bajaliyanö pjaatinobe jo̧banö, o̧'wo̧ luwo̧ okwa juluwachibanö. Ja̧ baledinama ökwödönö i̧sekwobe, Duluwo̧ Diosma isabenö jojodönö ile nibebö, lȩlö̧jino edo̧, jö̧ba̧lö. Jejenö omukwataduwi chö̧ja̧wo̧dö, damötjö ji̧na Jobnö baledinama.

Santiago yöawina wene: —Yöbawö kwujunaduwena jweinöda yökawaduwo— jö̧ba̧lö

¹² Ja̧danö chö̧ja̧wo̧dö, a̧ja̧kwaduwitjö jwiinö mikwawi̧ yötawi̧ma, biya̧: Yöbawö kwujunaduwena, Jau jejenö ja̧tocha, jö̧ba̧lö, ju'wi wanedakwawö yökawaduwoko. Yökawaduwoko, Omönada yöta̧litjö̧ma, mölejȩbe jo̧ Dios ötjönö lȩebotjö, jö̧ba̧lö. Jejenö wanedakwawö yökawaduwoko chö̧ja̧wo̧dö. Ja̧danö, jelo̧nöbi böjȩnö kwuluwo̧duwinö wanedakwawö yökawaduwoko, Böjȩtjö chuluwo̧ma ötjönö lȩebo omönada yöta̧litjö̧ma, jö̧ba̧lö. Yelösöda jejenö yöka̧laduwoko. Chö̧ja̧wo̧dö jweinö yöka̧laduwo, Jejenö ja̧tocha, jö̧ba̧lö. Ja̧danö, ja̧köbaduwoböma jwiitjö̧ma jweinö yöka̧laduwo, Jejenö ja̧tökakobe, ja̧toböma jwia, jö̧ba̧lö.

Santiago yöawina wene: —Diosnö me'dawachibökönö akebaduwobö jo̧be kwö̧ja̧wo̧duwinö pjaatobö— jö̧ba̧lö

¹³ Chö̧ja̧wo̧dö, ökwödötjö bakwo̧nö usula emawinö baledena jo̧bama Diosnö aebobö jo̧be, jo̧banö pjaatobö. Ja̧danö, ökwödötjö bakwo̧ o̧'wo̧ ösöwanö jo̧ma, Diosnö lo̧obö jo̧be, Otiwanö pjakatajabe, jö̧ba̧lö.

¹⁴ Ja̧danö, ökwödötjö bakwo̧ ö'wöcho̧ma Jesúsnö ösödadönö te'ada̧lakwawa jojodönö jwöobö jo̧be, Diosnö akebaduwo ichaduwi, jö̧ba̧lö. Ja̧danö, ichajadöma o̧tesobu tobebö dutjebobö jo̧be ö'wöcho̧nö, Duluwo̧ Jesús ökwö kwujulunö bitenö otiwanö baibanö pjabati, jö̧ba̧lö.

¹⁵ Jobadö te'ada̧lakwawa jojodöma Diosnö tjo̧'wo̧ wana̧lö atjebobetjö̧, Diosma isabenö ö'wöcho̧ ö̧bibajinö pjabato̧, jö̧ba̧lö, ö'wöcho̧ma otiwanö baibakwo̧. Ja̧danö, jo̧ba ö'wöcho̧ma sulabenö ja̧inatjö̧ma, sulabenö omukwati̧ balewachö, Diosnö yöbawö aebobö jo̧be. Jejenö omukwati̧ balewachö, Diosnö yöbawö aebitjö̧ma Diosma söbebö lobo̧ jo̧ba sulabenö ja̧inama.

¹⁶ Isabenö yötawaduwakwö. Jojodö atjebiökwe pjabato̧ Duluwo̧ma, ö'wöchadönö tjö̧bibajinö pjabatöbi, sulabenö ja̧tji̧ yöbawö lobadö tjusuli̧ söbebö loböbi. Jo̧kwaobetjö̧ chö̧ja̧wo̧dö suli̧ ja̧köbaduwi̧ma yökawakwawaduwo ökwödödada. Ja̧danö, ökwödödada Diosnö akebakwawaduwo kwö̧bibaduwinö pjaatobö. Isabenö, bakwo̧ Dios ösödi̧danö ja̧bö jo̧ma Diosnö aebena, Pjabati, jö̧ba̧lö, Diosma iteda ujulunö pjaatobe.

¹⁷ Chö̧ja̧wo̧dö döwaisa damötjö Elías mikwo̧ ö̧jinama. Elíasma ökwödödanö ji̧na. Ja̧danö, ökwödö domukwati̧danö omukwatö ji̧na. Isabenö, jo̧kwadabo̧ ö̧jijayonö Diosnö abeböda aebinobe, yemidanö yemidanöbi, o̧'wo̧ luwo̧nö me'dawachibökönö, Diosma ojwiyo o̧binö weokobö. Jejenö aebiökwe Diosma lekwe, o̧ba wa̧pötakwa ja'öbi ojwiyo o̧binö weinokobe böjȩnöma.

¹⁸ Jemi ikenama o̧ba wa̧pöbakwatjö ja'ö baibena yemidanö aebinobe Diosnö, ojwiyo o̧bobö weobö. Jejenö aebiökwe Diosma ojwiyo o̧bobö weinobe mölejȩbetjö. Jejenö otiwanö ojwiyo o̧bobetjö̧ batjo junawa pokwinobe, böjȩma kwakwawa iyi̧danö. Ja̧danö chö̧ja̧wo̧dö, ökwödöma Elías o̧'wo̧ luwo̧nö me'dawachibökönö aebinadanö adebobö jo̧be, Dios yöawi̧ ösödö.

Santiago bajaliyapo yöawina wene: —Jelobekwö 'yi̧nadönö jwebeba̧lö yöbawö pjakataduwo— jö̧ba̧lö

¹⁹ Chö̧ja̧wo̧dö, ökwödötjö bakwo̧, Dios isabenö yöawi̧ a̧ja̧kwökönö, jelobekwö le'dewinö i̧'yitjö̧ma ökwödöma jo̧banö yöbawö jwekebaduwobö jo̧be. Jejenö yöbawö jwekebaduwo, Yemidanö tjebachaji Dios yöawi̧ ösödö kwö̧jo, jö̧ba̧lö, jo̧bama yemidanö tjeachajobö, Dios isabenö yöawi̧ ösödö.

²⁰ Isabenö jo̧banö pjabato̧, jelobekwö 'yo̧nö omukwati̧ öbalewachobö pjabato̧ma, otiwanö pjaatobe jo̧banöma. Yelösöda otiwanö pjaatobe jo̧banö, Diostjö 'da̧bachibö ö̧ji̧tjö ö̧jibinö. Jejenö pjaatobetjö̧ jelobekwö 'yo̧ nöinö sulabenö ja̧i̧ma Diosma söbebö loakwo̧. Chö̧ja̧wo̧dö, yelösöda otiwanö pjakataduwobe jo̧ba jelobekwö le'dewinö 'yo̧nö jwebeba̧lö yöbawö pjakataduwenama. Chö̧ja̧wo̧dö tjo̧wi̧ta. Biya̧da wȩyudö weta.