Santiago 4 - Dios Iwene

Santiago yöawina wene: —Sulabenö kwomukwataduwi̧ma kwomajadeduwitjöda ichobe— jö̧ba̧lö

¹ Chö̧ja̧wo̧dö, abebö cha̧ja̧kwaduwakwö: Ökwödöma ¿tajawedö kwömöledöduwikwö ölakwabikwawö kwö̧jaduwobeda? Ja̧danö ¿tajawedö kwömöledöduwinö kwo̧'wo̧ luwo̧duwinö sulabenö edö kwö̧jaduwobeda? Ja̧danö ¿tajawedö wene kwujuna̧lakwawaduwobeda kwömöledöduwikwö? Chö̧ja̧wo̧dö ¿detjö ichobeda jejenö sulabenö kwö̧jaduwobö kwomukwataduwi̧ma? Yötawaduwakwö chö̧ja̧wo̧dö. Kwomajadeduwitjöda ichobe, bakwo̧nökwena kwomajadeduwinö ökwödöda böjȩ jawa kwujuna̧laduwobö kwösödaduwi̧da kwomukwataduwobetjö̧. Ja̧danö chö̧ja̧wo̧dö, jejenö kwö̧jaduwi̧ma kwo̧'wo̧ luwo̧duwi okwanö ölakwabikwawöda jo̧be. Jau chö̧ja̧wo̧dö, Dios kwö̧jaduwobö ösödi̧ kwöwaisaduwijayonö ökwödö böjȩ jawa kwösödaduwi̧da juna̧lö kwö̧jaduwobö jö̧ka̧laduwobetjö̧ kwo̧'wo̧ luwo̧duwi okwanö ölakwabikwawöda jo̧be.

² Yelösöda, kwomajadeduwinö kwedaduwobe ju'wi jawabi, ju'wi jawabi böjȩ jawa kwujuna̧laduwobö. Jejenö kwujuna̧laduwobö kwösödaduwijayonö waekwobe. Kwujuna̧laduwokobe. Jo̧kwaobetjö̧ kwomajadeduwinö jwiinö sulabenö baibanö, Chujuna̧lobö chösöda jelo̧nö kwabö lotitjö̧bi, jö̧ba̧lö, kwomukwataduwena. Yelösöda, ju'wedö tjujuna̧li̧ sulabenö edö, ö'wiabinö, Ötjöbi chujuna̧lowe, jö̧ba̧lö, kwomukwataduwijayonö, kwujuna̧laduwoböma waekwobe. Jo̧kwaobetjö̧ dameakwö baibanö kwömöledöduwikwö wene juna̧lö, kwo̧'wo̧ luwo̧duwi okwanö sulabenö edö, ja̧danö jobadökwö ölakwabikwawö kwö̧jaduwobe. Ja̧danö chö̧ja̧wo̧dö, abebö cha̧ja̧kwaduwakwö. ¿Tajawedö kwujuna̧laduwobö kwösödaduwi̧ma kwujuna̧laduwokobeda? Yötawaduwakwö. Ju'wikwenama Diosnö akebaduwokobetjö̧ kwujuna̧laduwokobe.

³ Ja̧danö, Diosnö akebaduwenabi kwujuna̧laduwobö badekwachokobe chö̧ja̧wo̧dö, jweinö omukwatö akebaduwokobetjö̧. Isabenö, ökwödöma ökwödö böjȩ jawa kwösödaduwi̧da omukwatö akebaduwobe. Jo̧kwaobetjö̧ Diosnö akebaduwijayonö kwujuna̧laduwokobe, jelobekwö omukwatö akebaduwobetjö̧, böjȩ jawa kwösödaduwi̧da kwujuna̧laduwobö.

Santiago yöawina wene: —Böjȩ jawa ösödo̧ma Dios öpöjojo babibo̧— jö̧ba̧lö

⁴ Chö̧ja̧wo̧dö, kwo̧'wo̧ luwo̧duwi jawa omukwatökönö böjȩ jawa kwösödaduwi̧da omukwatö kwöwanekwachaduwobe bakwuju jilekwenö omukwatökönö, jelo̧nö alewujudanö. Diosnö dösöda, jö̧ba̧lö, yöka̧laduwijayonö böjȩ jawabi jwiinö kwösödaduwobe. ¿Kwöwaisaduwököji̧? Bakwo̧ böjȩ jawa, Dios öpöjödi̧ jawa ösödo̧ma Diosnöbi ösödö̧kö̧ ¿jö̧tö? Böjȩ jawa ösödo̧ma Dios öpöjojo babibo̧ chö̧ja̧wo̧dö.

⁵ Ja̧danö chö̧ja̧wo̧dö, omukwataduwi Dios iteda iwenetjö yöawi̧ma, biya̧: Dios O̧'wo̧ Luwo̧, do̧'wo̧ luwo̧nö tebachibö ö̧jobö weinökwema, ö'wiabinö a̧'dȩlobe ökwödönöma. Jo̧bama böjȩ jawa dösödi̧ junibö Diosnö ösödö dö̧jobö ösödo̧ chö̧ja̧wo̧dö. Jejenö laebobe Dios iwenetjö. Ja̧danö, ja̧ Dios iwenetjö yöawi̧ma ¿omöna yöawobeji̧? Omöna yöawokobe. Chö̧ja̧wo̧dö, Dios O̧'wo̧ Luwo̧ma böjȩ jawa dösödi̧ junibö Diosnöda ösödö dö̧jobö ösödo̧.

⁶ Jo̧kwaijayonö Diosma ökwödönö pjaatobö juluwo̧ ökwödö dösödi̧da omukwatö junibö dö̧jobö. Chö̧ja̧wo̧dö, Diosma ökwödönö pjabatö ujuluwobe ökwödö sulabe dösödi̧ma. Isabenö chö̧ja̧wo̧dö, Dios pjaati̧ma ökwödö sulabenö dösödi̧tjö o̧penönö juluwobe. Jejenöobetjö̧ Dios iwenetjö baikwö laebobe: Diosma, Luwedösa, jö̧ba̧lö, omukwatadönö ölakwabikwawö jo̧. Jo̧kwaijayonö, Jo̧kwadabedösa, jö̧ba̧lö omukwatadönö lȩlö̧jinö pjabato̧. Jejenö laebobe Dios iwenema. Chö̧ja̧wo̧dö, Luwedösa, jö̧ba̧lö, domukwataduwoko. Jejenö omukwatökönö dö̧jiökwe Diosma lȩlö̧jino edö pjaatakwo̧.

Santiago yöawina wene: —Kwo̧'wo̧duwi tjo̧bekwö, Sulabenö omukwatadösa, jö̧ba̧lö, kwomukwataduwi̧ balewachibö Dios ösödi̧da ja̧bö kwö̧jaduwo— jö̧ba̧lö

⁷ Jo̧kwaobetjö̧ chö̧ja̧wo̧dö, Ökwödöma luwedösa, jö̧ba̧lö, omukwatökönö, Dios ösödi̧da isakwö kwö̧jaduwo. Jejenö ja̧nö Awetjanö kwöpöjödaduwo, jo̧ba ösödi̧ ja̧bökönö. Jejenö jo̧banö öpöjödö, jo̧ba ösödi̧ ja̧bökönö kwö̧jaduwiökwe jo̧bama kwö̧jaduwobetjö döibajakwo̧.

⁸ Ja̧danö chö̧ja̧wo̧dö, kwomukwataduwi̧ balewachö, böjȩ jawatjö 'da̧bachibö Diosnö tjekachajaduwo, kwo̧'wo̧ luwo̧duwi okwanö jo̧bakwö 'dötewinö ja̧nö. Ja̧danö, jo̧banö tjekachajaduwiökwe Diosma ökwödökwö 'dötewinö ö̧jobe. Chö̧ja̧wo̧dö, ökwödöma sulabenö ja̧bö ju̧kwadöja. Ja̧ sulabenö ja̧köbaduwi̧ kabatibö otiwanö ja̧bö kwö̧jaduwo. Yelösöda ökwödöma dötölatajanö omukwatadöja, Diosnö ösödöbi, böjȩ jawa ösödöbi. Ja̧ kwomajadeduwinö sulabenö kwomukwataduwi̧ma kabatibö otiwanöda kwomukwataduwo.

⁹ Chö̧ja̧wo̧dö, sulabenö ja̧köbaduwi̧ omukwatö kwo̧'wo̧duwi tjo̧bekwibö omukwataduwi, Jwiinö sulabedösa, jö̧ba̧lö. Ja̧danö, ökwödöda kwomajadeduwinö inia tjököbaduwinö omukwataduwi, sulabenö ja̧köbaduwi̧ omukwatö. Chö̧ja̧wo̧dö budekwaduwi sulabenö ja̧köbaduwi̧ omukwatö. Isabenö, oböda obö ja̧döja, böjȩ jawa ösödö. Jo̧kwaijayonö kwomukwataduwi̧ balewachö oköbaduwi̧ma budekwöda balewachibö ja̧duwi chö̧ja̧wo̧dö.

¹⁰ Ja̧danö, isabenö omukwataduwi, Ökwödöma luwedöböködösa, sulabedösa, mikwawöködösa, juluwöködösa, jö̧ba̧lö. Ja̧danö, Dios pjaati̧kwöda dujulu juna̧ladösa, jö̧ba̧lö, omukwataduwi. Jejenö jweinö kwomukwataduwiökwe Duluwo̧ Diosma ökwödönö kwo̧'wo̧ luwo̧duwi okwanö möakwö kaebi̧danö kabebö öwanakwo̧, Bidöma isabenö jwiinö mikwawadö, jö̧ba̧lö.

Santiago yöawina wene: —Ökwödöda sulabenö yöka̧laduwakwawi̧ kakatibaduwo— jö̧ba̧lö

¹¹ Chö̧ja̧wo̧dö, ökwödöda edinö sulabenö yöka̧lakwawaduwoko kwö̧ja̧wo̧döduwinö, Sulabenö ja̧tja, jö̧ba̧lö. Jejenö yöka̧laduwena kwö̧ja̧wo̧dönö lȩbebadödanö yöka̧laduwobe, jobadötjö möakwönönö omukwatö. Ja̧danö, ökwödö ¿lȩkebaduwobö jo̧beji̧, kwö̧ja̧wo̧döduwinö? Jwiobe chö̧ja̧wo̧dö. ¿Wajwiköbaduwiji̧ Dios ökwödönö wei̧, Kwö̧ja̧wo̧dökwö ösödabikwawö kwö̧jaduwo, jö̧ba̧lö, wei̧ma? Jejenö kwö̧jaduwobö jo̧be chö̧ja̧wo̧dö. Kwömöledöduwinö lȩbebö yöka̧laduwobö weokobe Diosma. Jo̧kwaobetjö̧ jejenö kwömöledöduwinö, Sulabenö ja̧tja, jö̧ba̧lö, lȩbebö yöka̧laduwena Dios wei̧ma öpöjödö kwö̧jaduwobe. Dios wei̧ma junibö, Sula, da̧ja̧kwökö, jö̧ba̧lö, ju'wida lȩbebö yöbawöda kwö̧jaduwobe.

¹² Chö̧ja̧wo̧dö, dö̧jibinö pjabato̧ma bakwo̧da ¿jö̧tö? Ja̧danö, jo̧bada jojodönö lȩbebo̧ ¿jö̧tö? Jo̧bada juluwo̧ jojodönö lȩbebö yöawobö, Bidöma tjö̧jibinö tjö̧jakwedö, ja̧danö, Bidöma tjö̧jibinö tjö̧jökakwedö, jö̧ba̧lö. Ökwödöma lȩbeböködösa chö̧ja̧wo̧dö.

Santiago yöawina wene: —Ökwödö ju'winö kwö̧jaduwakwa̧ yöka̧laduwoko, Diosda baledakwa̧ waiso̧ma— jö̧ba̧lö

¹³ Chö̧ja̧wo̧dö a̧ja̧kwaduwitjö. Ökwödötjö bakwo̧ jö̧ka̧lena, Aaa, makökö̧ itekwayikö̧ jelobe chi̧'yakwo̧sa o̧ba bakwaba baledinö chö̧jobö, jö̧ba̧lö. Ja̧danö jö̧ka̧lena, Jobe ja̧nö, iyöbi emöbi chö̧jakwo̧sa, baladanö nöinö emö, jö̧ba̧lö, kwomukwataduwena.

¹⁴ Jo̧kwaijayonö yötawaduwakwö. Jejenö kwomukwataduwa. ¿Ökwödöma kwöwaisaduwiji̧ itekwayi kwö̧jaduwakwa̧ma? Wajwiköbaduwa. Isabenö, itekwayima ö'wö bakibaduwena. Yȩayi jo̧pji̧yakwawö omönanö jwiachi̧danö ökwödöbi omönanö deköbaduwena böjȩtjöma.

¹⁵ Jo̧kwaobetjö̧ yötawaduwakwö. Bejenöda yöka̧laduwo: Duluwo̧ Dios weitjö̧ma ina 'yabayedö dö̧jakwedösa, itekwayi jelobe di̧'yobö, ja̧danö jobetjö dotidobö.

¹⁶ Jo̧kwaijayonö ökwödöma Diosnö omukwatökönö ökwödöda yöka̧laduwobe kwi̧'yaduwakwa̧bi, kwotidaduwakwa̧bi. Jejenö yöka̧laduwi̧ma otiwökö. Sulabenö kwomukwataduwobe chö̧ja̧wo̧dö, jejenö yöka̧laduwena.

¹⁷ Jo̧kwaobetjö̧ chö̧ja̧wo̧dö, yötawaduwakwö. Bakwo̧, otiwanö ja̧bö ö̧jobö waiso̧ma, otiwanö ja̧bö ö̧jobö jo̧be. Isabenö öwaisobe böjanö yötawaja̧, Dios jo̧ba ö̧jobö ösödi̧ma. Jo̧kwaijayonö jo̧bama Dios otiwanö ja̧bö ö̧jobö wei̧ öwaisijayonö jelobekwö omukwatö sulabenö ö̧jitjö̧ma, jo̧bama yelösöda sulabenö ja̧obe, jweinö öwaisijayonö jelobekwö omukwatö i̧'yobetjö̧.