Santiago 3 - Dios Iwene

Santiago yöawina wene: —Dios iwene yöawobö ösödo̧ma omukwatobö jo̧be, Diosma iteda iwene yöbawo̧nö ju'wedö ösödadötjö o̧penönö edobetjö̧ yötawoböma jwiena— jö̧ba̧lö

^1-2 Chö̧ja̧wo̧dö, ökwödö Jesúsnö ösödadöma okobe deinö ju'wikwenama ju'wi jawa, ju'wi jawabi, jelobekwö domukwatobe, jweinömaökö. Jejenö ökwödö yöda̧li̧bi yelösöda jelobekwö omukwatö yöda̧lobe. Jejenö ju'wikwenama jelobekwö omukwatö yöda̧lobetjö̧ yötawaduwakwö. Dios iwene yöbawadö bakibaduwobö kwösödaduwitjö̧ma kwomajadeduwinö ö'wiakwalö̧jönö kwomukwataduwobö jo̧be. Omukwataduwi. Diosma iteda iwene yöbawadö bakwo̧nökwena tjö̧jina edobe ¿chiwenema jweinö yötjawobeji̧? jö̧ba̧lö. Jau chö̧ja̧wo̧dö. Ju'wi möle, Dios lȩekwa yöawi̧ möle badekwachena Diosma ökwödö iteda iwene yöbawadö bakwo̧nökwena dö̧jina edö aebakobe ¿kwö̧ja̧wo̧dönö jweinö yökawinaji̧ chiwenema? jö̧ba̧lö. Isabenö chö̧ja̧wo̧dö, ökwödö Dios iwene yöbawadönö ju'wedö Jesúsnö ösödadönötjö o̧penönö eda̧lobe Diosma, dö̧ji̧ma, iteda iwene yödawobetjö̧. Isabenö, bakwo̧ ba̧kwȩlö̧jatebö jweinö omukwatö yöba̧lo̧ma yelösöda jo̧bama otiwanö da̧peachö jo̧, Dios ö̧jobö ösödi̧danö. Ja̧danö, jo̧ba otiwanö omukwatö yöba̧lo̧ma, ju'wi jawabi, okobe jwiinö ö̧ji̧ma jweinöda omukwatö jo̧. Jo̧bama sulabenö ja̧inö öibökökwe. Chö̧ja̧wo̧dö otiwanöda yöda̧lobö jo̧be, Dios dö̧jobö ösödi̧da ja̧nö, da̧peachö.

Santiago yöawina wene: —Dinenema ja'yuwijayonö juluwobe sulabenö yöda̧lobö— jö̧ba̧lö

^3-5 Chö̧ja̧wo̧dö, yöda̧li̧ma ¿tajinö yöda̧lobeda? Dinenenö chö̧ja̧wo̧dö. Ja̧danö, dinenema ja'yuwijayonö juluwobe okobe jwiinö domukwati̧ yöda̧linö. Ja̧danö, a̧ja̧kwaduwi, wanedö yötawaduwakwö, kabayunö wanedö: Bakwo̧ kabayunö wa̧nö 'yo̧ma, kabayu aa okwa 'dii̧ jawanö jwebeba̧lö 'yo̧, kabayunöma. Ja̧danö, kabayuma yelösöda nöbo̧ ¿jö̧tö? Ja̧danö, 'dii̧ jawama ja'yube. Ja̧'yuwijayonö ja̧ 'dii̧ jawama jweeba̧lobe nöbo̧ kabayunöma. Ja̧danö, ju'wi wanedö yötawaduwakwö, isowinö wanedö: Ojwe nöödö 'ya̧kwawowima yelösöda nöowi. Ja̧danö, jowi oto'obema ja'yuwapi̧ ji̧, jowi nöowi jweebalapi̧. Ja̧danö, jwa̧lȩ'epjo jelobekwö 'yo̧bö labinö jwa̧lȩ'ewijayonö ja'yuwapi̧nöma jweebalobe jowima, jweinö 'yi̧nö, jwebeba̧lo̧ i̧'yobö ösödi̧da. Chö̧ja̧wo̧dö, jejenö ökwödö dinenema. Ja'yuwijayonö juluwanö jweeba̧lobe sulabenö yöda̧lobö. Yelösöda bakwo̧ma itetjöda möakwönönö omukwatö inenenö yöa̧lobe, Otiwo̧sa, ja̧danö, Juluwo̧sa, ja̧danö, Waiso̧sa, jö̧ba̧lö. Ja̧danö ju'wi wanedö yötawaduwakwö: Döwaisa. ökwöla juwawa ja'yubetjö isa'wonö nötekwajenama okobe jwiinö ubi̧, jö̧ba̧lö. Jejenö ja'yubetjö nötekwajö ubijayonö okobe jwiinö ubö loi̧.

⁶ Chö̧ja̧wo̧dö, jejenö ökwödö dinenenö yöda̧li̧ma. Ja'yubetjö nötekwajö ubö okobe jwiinö ubi̧danö dinenema ja'yuwijayonö jwiinö sulabenö baibobe. Yelösöda daatjö laebi̧, dinenenö yöda̧li̧ma juluwobe okobe jwiinö dö̧ji̧ma sulabenö baibanö dö̧jobö. Chö̧ja̧wo̧dö, do̧'wo̧ luwo̧nö sulabenö edö dinenenö yöda̧li̧ma Awetja ökwöla juwawa önötekwaji̧danö, okobe jwiinö ubö loobema, okobe jwiinö dö̧ji̧ma sulabenöda baibanö.

^7-8 Ja̧danö chö̧ja̧wo̧dö ¿tida inenenö yöa̧li̧, otiwanö yöa̧lobö juluwo̧ma? Deobe. Wanedö yötawaduwakwö: Jojodöma tja̧jwi̧munö döyötö tjödöyötobö juluwadö, mejenö ju̧kwadönöbi, tebonö ju̧kwadönöbi, mö köba̧ladönöbi, nijinö töbawadönöbi, ojwe okwa luwanöbi. Jau, tja̧jwi̧mu baibanö tjödöyötobö juluwadö, ¿jö̧tö? Jau chö̧ja̧wo̧dö. Jojodöma okobe deinö jobadöjayedönö tjödöyötobö tjujuluwijayonö idöda tjinenema tjödöyötoböma juluwöködö. Bakwo̧bi deobe iteda inene döyötö juno̧ma, otiwanö yöa̧lobö. Tjo̧'wo̧ luwo̧nö sulabenö edö yötja̧lobö kaatakwawama jwiobe chö̧ja̧wo̧dö. Yelösöda labobe dinenema. Niekwadanö labobe dinenema jojodönö inia tjötinö.

⁹ Chö̧ja̧wo̧dö, ju'wikwenama dinenenö Duluwo̧ Dios, mölejȩbe jo̧ Dabe'donö dösödobe ¿jö̧tö? Jo̧kwaijayonö ju'wikwenama bakwanenö dinenenöda dömöledönö labinö, jwiinö sulabenö, jwöbeba̧lö yöda̧lobe. Chö̧ja̧wo̧dö, jobadöma Dios itedadajayedö otidinawö̧. Isabenö jejenö sulabenö yöda̧lobö jwiobe chö̧ja̧wo̧dö, jojodöma Dios itedadajayedönö otidinawö̧tjobetjö̧.

¹⁰ Yelösöda bakwanenöda dinenenöda Diosnö ösödö otiwanö yöda̧li̧bi, jojonö sulabenö yöda̧li̧bi yöda̧lobe. Jejenö dötölatajanö yöda̧lobö yelösöda jwiobe chö̧ja̧wo̧dö.

¹¹ Ja̧danö, wanedö yötawaduwakwö: Isabenö, bakwe'do ojwese'dotjöma o̧tobukwö lȩobukwöma okwatokobe, ¿jö̧tö? Bakwayobuda okwatobe. Ja̧danö, ökwödö daatjö laebi̧ dinenenö yöda̧li̧bi. Sule otiwanö yöda̧li̧da yöda̧lobö jo̧be.

¹² Ja̧danö, ju'wi wanedö yötawa: Towi, higuera mikwowima higo opobiyada wa̧ji̧. Ju'wi aceituna opobiyama wa̧jökö. Ja̧danö uba sa'banö higo opobiyama wa̧jökö. Ja̧danö, ju'wi wanedö yötawa: Ja̧danö, ojwiyo o̧tödökwöma ojwiyo leökökwöma pjabacha̧löma jö̧kö̧. Chö̧ja̧wo̧dö jejenö, ökwödö dinenenö bakwanenöda yöda̧lobö jo̧be, sule otiwanöda.

Santiago yöawina wene: —Waisanö omukwato̧ma jojodönö ösödö pjabato̧— jö̧ba̧lö,

¹³ Chö̧ja̧wo̧dö ökwödötjö bakwo̧, waisanö omukwato̧ma, ja̧danö, Dios iwene jweinö waiso̧ma jo̧ba öwaisi̧ma i̧sekwobö jo̧be. Ja̧danö ¿dakwö i̧sekwobö jo̧beda? Biya̧ chö̧ja̧wo̧dö: Bakwo̧, jweinö waiso̧ma jojodönö dösölö̧jinö pjabato̧. Jejenö dösölö̧jinö pjabatö i̧sekwobe, Ötjöma Dios öibökwesa waisanö chomukwatobö, jö̧ba̧lö.

¹⁴ Jo̧kwaijayonö ökwödötjö bakwo̧ ju'wedönö o̧'wo̧ luwo̧nö jwiinö sulabenö edö, ja̧danö, ö'wiawö edö, ja̧danö, iteda ösödi̧da omukwatö, Ötjödasa, jö̧ba̧lö, omukwato̧ma ¿jweinö omukwatö waiso̧ji̧? Waisö̧kö̧ inesö waisakwawama. Jo̧bama, Waisanö omukwato̧sa, jö̧ba̧lö, yöa̧lobö jwiobe, chö̧ja̧wo̧dö. Jejenö yöa̧litjö̧ma omönada yöa̧lena.

¹⁵ Isabenö bakwo̧ ju'wedönö o̧'wo̧ luwo̧nö sulabenö edö, ja̧danö, ö'wiawö edö, ja̧danö, iteda ösödi̧da omukwatö, Ötjödasa, jö̧ba̧lö, omukwato̧ma Dios öibökökwe. Jo̧bama Awetjada öibökwe, jelobekwö sulabenö omukwatinö öibökwema. Waisanö omukwatö̧kö̧. Ja̧danö, böjȩ jawa ösödadö tjomukwati̧da omukwato̧, Diosnö wajwibadö tjomukwati̧danö.

¹⁶ Ja̧danö jejenö omukwato̧ma, o̧'wo̧ luwo̧nö ju'wedönö sulabenö, ö'wiawö edö, iteda ösödi̧da omukwatö, Ötjödasa, jö̧ba̧lö, yelösöda sulabenö jo̧. Jo̧bama ju'wedökwö wene juna̧lö, ja̧danö okobe jwiinö sulabenö ja̧awa ja̧bö ö̧jobe.

¹⁷ Jo̧kwaijayonö chö̧ja̧wo̧dö, jejenöma jö̧kö̧ Dios öibökwema. Diosma jo̧banö pjabatö öibobe waisinö omukwatobö, Dios omukwati̧danö. Ja̧danö, jo̧bama suli̧tjö 'da̧bachibö ö̧jobe, o̧'wo̧ luwo̧nö bakwainö otiwanöda edö. Ja̧danö, jejenö otiwanö edö ju'wedökwö wene jwiinö ö̧jobe. Ja̧danö ju'wedönö ösödö, tjo̧'omanö yöba̧lö, jo̧. Ja̧danö, ö̧ja̧wo̧döma jo̧banö jwebeba̧lö yötja̧lenabi jo̧ba Dios öibökwe waisanö omukwato̧ma otiwanö a̧ja̧kwobe, öwaisachibobö. Ja̧danö, jo̧bama ömöledönö lȩlö̧jino edobe, ba̧kwȩlö̧jatebö pjabatö. Jo̧bama isabenö iteda yöa̧li̧danö i̧sekwo̧, jojodönö ba̧kwȩlö̧jatebö pjabatö. Ja̧danö chö̧ja̧wo̧dö, jo̧ba Dioskwö jwaikwöda 'yo̧. Ja̧danö, jo̧ba Dios öibökwe waisanö omukwato̧ma jojodönö okobe deinö bakwainö edobe, jwibadönöbi, juna̧ladönöbi bakwaibedöda. Ja̧danö, jo̧ba waisanö omukwato̧ma yöba̧löda yöba̧lö̧kö̧, i̧sekwökönö. Jo̧bama iteda yöa̧li̧danö i̧sekwö jo̧.

Santiago yöawina wene: —Otiwanö dösölö̧jinö omukwatö ju̧kwadöma ju'wedönö pjabatadö jobadöbi otiwanö wene jwiinö tjö̧jobö— jö̧ba̧lö

¹⁸ Chö̧ja̧wo̧dö, Dios öibawö̧ waisanö omukwatadöma tjömöledönö dösölö̧jinö pjabatö, wene jwiinö isakwö ja̧dö. Jejenö ja̧nö tjisakwobetjö̧, wene jwiinö tjö̧jobö, tjömöledöbi wene jwiinö tjö̧jobö tjisakwobe. Wanedö yötawaduwakwö: Dösölö̧jinö omukwatö pjabatadöma batjo junawadanö tjujunobe. Tjujuni̧ önebiama idöda dösölö̧jinö tjomukwati̧, ja̧danö, tjömöledönö otiwanö omukwatö pjatjati̧ma. Ja̧ dösölö̧jinö tjomukwati̧ma, ja̧danö tjömöledönö pjatjati̧ma junawa tjujuni̧danö tjujunobe tjömöledökwö otiwanö tjö̧ji̧ma. Ikenama ja̧ tjujuni̧ma otiwanö pokwobe ju'wedö tjömöledö tjomajade okwa, otiwanö wene jwiinö omukwatö tjö̧jobö. Isabenö chö̧ja̧wo̧dö, otiwanö dösölö̧jinö omukwatö ju̧kwadöma ju'wedönöbi otiwanö wene jwiinö tjö̧jobö pjabatadö.