Santiago 2 - Dios Iwene

Santiago yöawina wene: —Jojodönö, juna̧ladönöbi, jwibadönöbi bakwainö kwedaduwobö jo̧be— jö̧ba̧lö

¹ Chö̧ja̧wo̧dö, ökwödöma Duluwo̧ Jesucristonö ösödadöja, Jesús ökwöma isabenö jwiinö mikwawo̧ja, jö̧ba̧lö. Ja̧danö, Duluwo̧ Jesucristonö ösödadöma jojodönö okobe deinö bakwainö kwedaduwobö jo̧be, Mikwawadö, jö̧ba̧lö. Jo̧kwaobetjö̧ baikwö lȩtebaduwakwö: Juna̧ladönö edö, Bidöma ju'wedötjö o̧penönö mikwawadö, jö̧ba̧lö, kwomukwataduwoko chö̧ja̧wo̧dö. Jesucristonö kwösödaduwobetjö̧ jejenö kwomukwataduwobö jwiobe.

² Ja̧danö, wanedö yötawaduwakwö: Bakwo̧ juna̧lo̧ma cultoseju okwa tebacho̧. Jo̧bama yelösöda otiwanö 'dubawo̧. Ja̧danö, ötö'anö orotjö otikwabi nönawo̧. Ja̧danö, jelo̧ usulaso̧ jeju okwa tebacho̧. Jo̧bama yelösda ökamijido̧ sulabado̧ yȩado̧ 'dubawo̧.

³ Ja̧danö, ökwödöma otiwanö 'dubawo̧nö edö, Bena ba̧wi, jwiinö otiwakanö, jö̧ba̧lö, kwösödaduwobe nöinö. Jo̧kwaijayonö usulaso̧nö, Yena jamataji, ja̧danö, bena chömasapa la'akanö bamati, weköbaduwobe, jo̧banö nijakwönönö edö.

⁴ Chö̧ja̧wo̧dö, jejenö kwomukwataduwitjö̧ma ¿otiwanö kwomukwataduwenaji̧? Otiwökö. Jejenö, Bidöma otiwadö, bidöma sulabedö, jö̧ba̧lö, kwedaduwitjö̧ma kwo̧'wo̧ luwo̧duwinö sulabenö omukwatö kwedaduwobe. Jojodönö, juna̧ladönöbi, jwibadönöbi bakwainö kwedaduwobö jo̧be chö̧ja̧wo̧dö.

⁵ Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.

⁶ Chö̧ja̧wo̧dö, Diosma usulasedönö, Jwiinö mikwawadö, jö̧ba̧lö, edijayonö ökwödöma kwo̧'wo̧ luwo̧duwinö sulabenö kwedaduwobe, Mikwawöködö, jö̧ba̧lö. Jejenö kwomukwataduwobö jwiobe chö̧ja̧wo̧dö. Ja̧danö, ju'wi jawabi omukwataduwi: ¿Tijidöda ökwödönö sulabenö inia tjököbaduwinö baledobö webadöma? ¿Juna̧löködöji̧? Jobadömaökö, juna̧ladöda. Jau omukwataduwi. Juna̧ladöma ökwödönö lȩekwa yöbawo̧ ö̧jobekwö e'ewö jwötjeba̧lobe jo̧banöma, Lȩbebidönö, jö̧ba̧lö.

⁷ Ju'wi jawabi chö̧ja̧wo̧dö: Jobadö juna̧ladöda jwiinö otiwo̧ Jesucristonö sulabenö yöba̧ladö, ökwödö dö̧jibinö pjabato̧nöma.

⁸ Chö̧ja̧wo̧dö, Dios iwenetjö iteda wei̧ma nöinö laebobe, ökwödö dö̧jobö wei̧ma. Ja̧danö, okobe jwiinö Dios wei̧tjö o̧penönö mikwawi̧ wei̧ma biya̧: Ökwödödada ile nikekwaduwakwawi̧danö kwömöledöduwinö ile nibebö ja̧duwi, jö̧ba̧lö. Isabenö chö̧ja̧wo̧dö, jejenö Dios wei̧ a̧ja̧kwö kwö̧jaduwitjö̧ma otiwanö omukwatö kwö̧jaduwena.

⁹ Jo̧kwaijayonö okobe deinö juna̧ladönöbi jwibadönöbi bakwainö kwedaduwökötjö̧ma, yelösöda sulabenö ja̧bö kwö̧jaduwena chö̧ja̧wo̧dö, Dios wei̧ a̧ja̧kwökönö. Ja̧danö, jejenö Dios wei̧ kwa̧ja̧kwaduwiökökwe Diosma ökwödönö lȩbebö yöawobe, Bidöma sulabenö ja̧badö ötjö weti̧ tja̧ja̧kwokobetjö̧, jö̧ba̧lö.

¹⁰ Ja̧danö bakwo̧ma, Dios ju'wi wei̧ okobe jwiinö a̧ja̧kwijayonö sule bakwöta jawa wei̧da a̧ja̧kwiökökwe Diosma jo̧banö lȩebobe, Weti̧ma a̧ja̧kwö̧kö̧ja, jö̧ba̧lö. Jau chö̧ja̧wo̧dö, sule bakwöta jawada a̧ja̧kwököjayonö okobe jwiinö Dios wei̧ a̧ja̧kwokobedanö ichejekwa, Dios lȩebökwe baibanö.

¹¹ Jejenö jo̧be chö̧ja̧wo̧dö, Dios wei̧ma bakwöta wei̧danö ji̧, Dios wei̧da. Ja̧danö kwöwaisaduwa, Dios wei̧tjö laebobe biya̧: Kwalewaduwoko kwilekwobökujukwöbi, kwilekwebö̧kö̧kwöbi. Ja̧danö, ju'wi wei̧bi laebobe biya̧: Jelo̧nöbi kwabö loköbaduwoko. Ja̧danö chö̧ja̧wo̧dö wanedö yötawaduwakwö: Bakwo̧ma Dios wei̧danö a̧ja̧kwö, ilekwobökujukwö alewokobe. Jo̧kwaijayonö jo̧ba jelujukwö alewö̧kö̧ma jojonö kwabö loobe. Ja̧danö, ¿dakwö yöda̧lena jo̧banöma? Dios wei̧ a̧ja̧kwo̧, jö̧ba̧lö, ¿yöda̧lobeji̧? Yöda̧lökö chö̧ja̧wo̧dö, jo̧bama okobe jwiinö Dios wei̧ a̧ja̧kwokobetjö̧. Jo̧bama Dios wei̧ a̧ja̧kwökö, bakwöta jawada a̧ja̧kwokobetjö̧.

Santiago yöawina wene: —Jojodönö lȩlö̧jino edö kwö̧jaduwo— jö̧ba̧lö

¹² Ja̧danö chö̧ja̧wo̧dö, yötawaduwakwö. Cristoma ökwödönö lȩlö̧jino edö dö̧jibinö pjaatinobe. Jo̧kwaobetjö̧ ökwödöbi jojodönö lȩlö̧jino edö dö̧jobö jo̧be chö̧ja̧wo̧dö. Ja̧danö, ju'wi möle ökwödöma Dios öba a'o ja̧nö datadakwedösa. Ja̧ möle Diosma ökwödönö bakwo̧nökwena edakobe, Bite Cristo ö̧jibinö pjaatinökwema ¿Cristo lȩlö̧jino edinadanö edinaji̧ ju'wedönö? jö̧ba̧lö. Isabenö, ökwödöma babe, böjȩnö ina dö̧jayi Dios lȩbebö yöawakwa̧ domukwatobö jo̧be. Ja̧danö, ju'wi jawabi. Yöda̧li̧ma jweinöda yöba̧lö, ja̧di̧bi otiwanöda ja̧bö dö̧jobö jo̧be chö̧ja̧wo̧dö, jojodönö lȩlö̧jino edö.

¹³ Chö̧ja̧wo̧dö, Diosma le jwiinö lȩebakobe jojodönö lȩlö̧jino edökönöma. Jo̧kwaobetjö̧ jojodönö lȩlö̧jino edö dö̧jobö jo̧be. Ja̧danö, jojodönö lȩlö̧jino dedenama di̧sekwobe, Böjȩnö ja̧nö jojodönö lȩlö̧jino dedobetjö̧ Dios ö̧jobekwö dichibenama lȩebökakwawö̧sa, jö̧ba̧lö.

Santiago yöawina wene: —Usula emawadönö pjadatobö jo̧be— jö̧ba̧lö

¹⁴ Chö̧ja̧wo̧dö, bakwo̧, Ötjöma Jesúsnö cho̧'wo̧ wana̧lo̧sa, jö̧ba̧lö, yöa̧lijayonö usula emawadönö lȩlö̧jino edökönö, jobadönö pjabatökönö ö̧jitjö̧ma ¿dakwö mikwawobö jo̧ba Jesúsnö o̧'wo̧ wana̧lö ö̧ji̧ma? Mikwawokobe, ja̧ o̧'wo̧ öwana̧li̧ma i̧sekwökönö, usula emawadönö pjabatökönö ö̧jobetjö̧. Chö̧ja̧wo̧dö jo̧bama ¿Dios lȩebi̧tjöma ö̧jibakwa̧ji̧ 'dö̧ibaji̧ mölema? Ö̧jibökakwo̧. Diosma jo̧banö lȩbebö yöawakobe, Kwo̧'wo̧ kwöwana̧li̧ma kwi̧sekwinokobe, jö̧ba̧lö.

¹⁵ Chö̧ja̧wo̧dö, wanedö yötawaduwakwö: Ökwödöma Cristotjö kwö̧ja̧wo̧dötjö bakwo̧, usulaso̧nö edö, ökamijido̧ sulabado̧ kȩ'achinado̧ 'dubawo̧nö, kwakwawabi jwibo̧nö

¹⁶ dedenama ¿jo̧banö yöba̧löda yöda̧lobö jo̧beji̧, Otiwanö da̧ji kwejube, jö̧ba̧lö? Ja̧danö, Kamisi̧ kwujuna̧lobö tiyuwökönö kwö̧jobö chösöda, ja̧danö, kwakwawabi kwomeawachibanö kwukwobö chösöda, jö̧ba̧lö, ¿jejenöda yöba̧löda yöda̧lobö jo̧beji̧ chö̧ja̧wo̧dö? Yöba̧lödamaökö. Jejenö yöda̧li̧ma ¿dakwö pjaatobö bakwo̧, jwibo̧nöma? Pjaatokobe.

¹⁷ Isabenö chö̧ja̧wo̧dö, jejenö bakwo̧ jwibo̧nö pjabatö̧kö̧ma, Jesúsnö cho̧'wo̧ wana̧lo̧sa, jö̧ba̧lö, yöa̧lijayonö jö̧ba o̧'wo̧ wana̧lö ö̧ji̧ma mikwawokobe, böjȩnö ja̧nö i̧sekwokobetjö̧. Wanedö yötawa, ö'wö babibajo̧nö wanedöma: Bakwo̧ ida̧ökö ö'wö babibajo̧ma ¿jojodönö pjaatobeji̧? Pjaatokobe. Jejenö bakwo̧, Jesúsnö o̧'wo̧ öwana̧li̧ i̧sebö̧kö̧ma. Jo̧bama ö'wö babibajo̧danö jo̧, jojodönö pjaatokobetjö̧. Chö̧ja̧wo̧dö otiwanö kwo̧'wo̧ wana̧ladöja Jesúsnöma. Jo̧kwaijayonö ja̧ kwo̧'wo̧ kwöwana̧laduwi̧ kwi̧sekwaduwobö jo̧be. Jau chö̧ja̧wo̧dö, kwo̧'wo̧ kwöwana̧laduwi̧ma kwi̧sekwaduwo usula emawadönö lȩlö̧jino edö pjabatö.

Santiago yöawina wene: —Isabenö do̧'wo̧ döwana̧li̧ di̧sekwobö jo̧be— jö̧ba̧lö

¹⁸ Jo̧kwaijayonö jejenö, Yöba̧löda yöka̧laduwoko, kwo̧'wo̧ kwöwana̧laduwi̧ma kwi̧sekwaduwoböbi jo̧be, jö̧ba̧lö, yötawiökwe bakwo̧ ötjönö yöa̧lena: —Jesúsnö ösödadöma bakwainöma tjomukwatokobe. Jobadötjö ju'wedöma Jesúsnö tjo̧'wo̧ wana̧löda ja̧dö, i̧sekwökönö, ja̧danö usula emawadönö pjabatökönö. Ja̧danö, Jesúsnö ösödadötjö ju'wedöma i̧sekwadö, usula emawadönö pjabatö. ¿Dakwö yöka̧lobö, kwo̧'wo̧ kwöwana̧laduwi̧ma kwisȩbaduwobö jo̧be, jö̧ba̧lö? Jejenö jö̧kena— yöa̧lena ötjönöma. Ja̧danö, ötjönö jejenö jö̧a̧litjö̧ma jo̧banö chatadena: —Jojodöma ökwö Jesúsnö kwo̧'wo̧ kwöwana̧li̧ma ¿tjedobeji̧? Tjedokobe. Ökwönö edö, dakwö tjöwaisobö, Aaa, itema Jesúsnö o̧'wo̧ wana̧lo̧, jö̧ba̧lö. Jojodönö pjakatokobetjö̧ kwi̧sekwokobe, Ötjöma Jesúsnö cho̧'wo̧ wana̧lo̧sa, jö̧ba̧lö. Jo̧kwaijayonö ötjöma otiwanö pjabatö chö̧jobetjö̧ wajuwanö chi̧sekwobe, Jesúsnö cho̧'wo̧ wana̧lo̧sa, jö̧ba̧lö. Isabenö yötawa, dötölataja jawa bakobe dötewinö ji̧ma. Jesúsnö tjo̧'wo̧ wana̧lakwawakwö, ja̧danö, otiwanö pjabatö ja̧awakwö bakobe dötewinö ji̧— chatadena ötjönö jöba̧lo̧nö, Ju'wedöma Jesúsnö tjo̧'wo̧ wana̧löda ja̧dö, i̧sekwökönö, jö̧ba̧lo̧nöma.

¹⁹ Ju'wibi chatadena jo̧banö: —Yöta̧lakwö. Ökwöma jweinö yöka̧lobe, Diosma isabenö ö̧jobe, bakwo̧da, jö̧ba̧lö. Isabenö, otiwanö yöka̧lobe. Jo̧kwaijayononö ¿ja̧ yöba̧löda yöka̧li̧ma kwi̧sekwobeji̧ Diosnö kwo̧'wo̧ wana̧lö kwö̧ji̧ma? Kwi̧sekwokobe. ¿Wajwiköbiji, Awetja ömöayedö isapjobedöbi jejenö yötja̧lobe, Diosma isabenö ö̧jobe, bakwo̧da, jö̧ba̧lö? Jejenö jö̧ba̧lö yebabinö tjö̧bawadö, Diosma lȩebakwo̧, jö̧ba̧lö. Jo̧kwaobetjö̧ sule yöba̧löda yöka̧litjö̧ma jobadö Awetja ömöayedö isapjobedö yötja̧li̧danö yöka̧lobe, Diosma isabenö ö̧jobe, jö̧ba̧lö. Yötawakwö. Yöba̧löda yöka̧loko. Kwo̧'wo̧ kwöwana̧li̧ kwi̧sebobö jo̧be, jojodönö pjabatö— jejenö chatadena.

²⁰ Ina jo̧ba ötjönö yöba̧lo̧nö chatadena: —Yelösöda ökwöma kwuu 'dibo̧ja. Do̧batibö̧kö̧ja. Jweinö yötawakwö, kwöwaisachibobö. Bakwo̧, Jesúsnö cho̧'wo̧ wana̧lo̧sa, jö̧ba̧lö, yöa̧lijayonö jojodönö pjabatö i̧sekwökötjö̧ma jo̧ba yöa̧li̧ma mikwawokobe. Isabenö mikwawokobe ju'wedönö pjaatokobetjö̧. Ja̧danö, itedanöbi pjaatokobe o̧'wo̧ öwana̧li̧ma i̧sekwökötjö̧ma— chatadena ötjönö yöbawo̧nöma. Ja̧danö, ina jo̧banö yötawena:

²¹ —Omukwati damötjö da'dömine Abraham ö̧jina. Jo̧bama Diosnö o̧'wo̧ wana̧lö, Dios wei̧ a̧ja̧kwinobe, itji̧ Isaacnö u̧lume'a 'wibebö juwö iyobö wei̧ma. Jejenö Diosnö o̧'wo̧ wana̧lö, Dios wei̧ a̧ja̧kwiökwe Diosma, Chedemi bitema suli̧ jwibo̧, jö̧ba̧lö, yöa̧linobe Abrahamnöma.

²² Isabenö yötawa. Abrahamma Diosnö o̧'wo̧ wana̧löbi, ja̧danö Dios wei̧ a̧ja̧kwö i̧seböbi ö̧jinobe. Jo̧ba o̧'wo̧ wana̧lö ö̧ji̧kwö, ja̧danö i̧sebö ö̧ji̧kwö bakobe dötewinö ji̧nobe. Jejenö Abrahamma Diosnö o̧'wo̧ öwana̧li̧ i̧sekwobetjö̧ jo̧ba o̧'wo̧ luwo̧nö da̧peachibanö i̧'yinobe. Jejenö 'ya̧nö ja'ödamaökö jwiinö o̧'wo̧ wana̧lö ö̧jinobe Abrahamma Diosnöma.

²³ Ja̧danö, Abrahamma jejenö Diosnö o̧'wo̧ wana̧lö ö̧ji̧bi, ja̧danö, Dios wei̧ a̧ja̧kwöbi ö̧jobema Dios ajayinö yöawina badekwachinö ö̧jinobe. Ja̧ ajayinö yöawinama baikwö laebobe Dios iwenetjö: Abrahamma Dios yöawi̧ ösödinobe, Diosma jweinö yöbawo̧, jö̧ba̧lö. Jejenö ösödiökwe Diosma jo̧banö jö̧a̧linobe, Chedemi bitema suli̧ jwibo̧, jö̧ba̧lö. Jejenö laebobe. Ja̧danö, ju'wi jawabi laebobe, Dios Abrahamnö yöawina, baikwö: Abrahamma ötjö chömöledöso̧. Jejenö laebobe Dios iwenetjö, Abraham ö̧jina iwȩyudinama— jejenö yöbawö chatadena ötjönö yöba̧lo̧nö, Ju'wedöma Jesúsnö tjo̧'wo̧ wana̧löda ja̧dö, i̧sekwökönö, yöba̧lo̧nöma.

²⁴ Ja̧danö Abraham ö̧jinama, ajayinö Dios yöawi̧ ösödiökwe, Chedemi bitema suli̧ jwibo̧, jö̧ba̧lö, jö̧a̧linobe Diosma. Ja̧danö jemi baikwö Abrahamma, Dios wei̧ a̧ja̧kwö ja̧obetjö̧ wajuwanö i̧sekwinobe ömöledönö, Diosnö cho̧'wo̧ wana̧lo̧sa, jö̧ba̧lö. Ja̧danö i̧sekwinobe, Ötjöma Dios jö̧a̧lökwesa, Suli̧ jwibo̧, jö̧ba̧lö, Diosnö o̧'wo̧ wana̧lö ö̧ji̧kwö, ja̧danö Dios wei̧ a̧ja̧kwö i̧sekwö ö̧ji̧kwö ö̧jinobetjö̧. Jo̧kwaobetjö̧ Abraham ö̧jina edö döwaisobö jo̧be, Diosnö do̧'wo̧ wana̧lö dö̧ji̧kwö, ja̧danö, Dios wei̧ a̧ja̧kwö i̧sekwö dö̧ji̧kwö dö̧jobö jo̧be, jö̧ba̧lö. Jejenö dö̧jena Diosma ökwödönö edö jö̧a̧lobe, Chedemi suli̧ jwibadöja, jö̧ba̧lö.

²⁵ Ja̧danö, omukwataduwi Rahabnö, ajayinö jitebiya weinokonöma. Jobujuma otiwanö pjajatinobe Israel jojodötjö ajayinö niji isakwö 'ya̧jadönöma, jobadö jelobekwö dötjibajinö pjabatö. Jejenö Rahabma Diosnö jo̧'wo̧ jöwana̧li̧ ji̧sekwinobe jojodönö, Ötjöma Diosnö cho̧'wo̧ wana̧lujusa, jö̧ba̧lö. Ja̧danö ji̧sekwinobe, Ötjöma Dios jö̧a̧lokosa, Chedemi suli̧ jwibuju, jö̧ba̧lö.

Santiago yöawina wene: —Böjȩnö dö̧jena do̧'wo̧ döwana̧li̧ di̧sekwökötjö̧ma mikwawökena— jö̧ba̧lö

²⁶ Chö̧ja̧wo̧dö ökwödö Jesúsnö do̧'wo̧ wana̧lö dö̧jijayonö jojodönö pjabatö di̧sekwökötjö̧ma ¿dakwö mikwawobö do̧'wo̧ döwana̧li̧ma, böjȩnö dö̧jena? Mikwawokobe. Wanedö yötawaduwakwö: Bakwo̧ ida̧ökö ö'wö baibena, o̧'wo̧ luwo̧ma jo̧batjö̧ma laebobe. Iteba'oda bi̧bo̧. Ja̧danö, o̧'wo̧ luwo̧ ȩwa̧jabe okobema iteba'oma ¿dakwö mikwawobö? Mikwawokobe. Chö̧ja̧wo̧dö jejenö jo̧be, bakwo̧, Jesúsnö cho̧'wo̧ wana̧lo̧sa, jö̧ba̧lö, yöa̧lijayonö o̧'wo̧ öwana̧li̧ma i̧sekwokobe, usula emawadönö pjabatökönö. Jo̧bama usula emawadönö pjabatökönö, o̧'wo̧ öwana̧li̧ i̧sekwokobetjö̧ o̧'wo̧ öwana̧li̧ma mikwawokobe böjȩnö ö̧jena. Jo̧bama ö'wö babibinadanö jo̧. Jau chö̧ja̧wo̧dö. Jo̧bama, ö'wö babibajo̧ omukwati̧ i̧sekwobö jwii̧danö jo̧ba jö̧a̧li̧ma i̧sekwokobe Jesúsnö o̧'wo̧ wana̧lö ö̧ji̧ma. Chö̧ja̧wo̧dö do̧'wo̧ wana̧lö dö̧ji̧kwö, do̧'wo̧ döwana̧li̧ di̧sekwi̧kwö bakobe dötewinö dö̧jobö jo̧be.