Santiago 1 - Dios Iwene

Santiago ajayinö yöawina wene

¹ Chömöledö, Cristotjö chö̧ja̧wo̧dö dokwa. Ötjö Santiago böja kwialusöjanö wȩyudö yötawa ökwödö judío jojodönö, Israelbetjö labebinadö jelobebi, jelobebi ju̧kwadönöma. Ötjöma Dios ömöayo̧sa. Ja̧danö, Duluwo̧ Jesucristo ömöayo̧sa ötjöma. Böja kwialusöja weta ökwödönö Jesúsnö ösödadönöma.

Santiago yöawina wene: —Wene baledena kwo̧'wo̧duwi ösöwanö kwö̧jaduwo kwöda̧peachaduwobö— jö̧ba̧lö

^2-3 Chö̧ja̧wo̧dö yötawaduwakwö. Böjȩnö dö̧jenama nöinö sulabe wene baledobe okobe deinö ökwödönöma. Usula demawinö, ja̧danö, inia tjödinö, yelösöda ju'wi jawabi sulabe wene baledobe chö̧ja̧wo̧dö. Ja̧danö chö̧ja̧wo̧dö, wene ökwödönö baledena ¿dakwö dö̧jobö jo̧beda? Sulabe baledena ¿do̧'wo̧ tjo̧bekwö dö̧jobö jo̧beji̧? Do̧'wo̧ tjo̧bekwökönö dö̧jaduwo chö̧ja̧wo̧dö. Baikwö domukwatobö jo̧be: Sulabenö baledijayonö do̧'wo̧ ösöwanö dö̧jobö jo̧be, jö̧ba̧lö. Jau chö̧ja̧wo̧dö. Ökwödönö wene baledijayonö do̧'wo̧ ösöwanö dö̧jaduwo. Ja̧danö chö̧ja̧wo̧dö, wene ökwödönö baledena baikwö kwomukwataduwo. Diosma ökwödönö wene baledi̧ma webo̧, söbebö lobökönö. Ja̧danö ¿tajawedö söbebö lookobeda ökwödönö wene baledi̧ma? Biya̧ chö̧ja̧wo̧dö: Ökwödönö wene baledena Diosma, Ötjönö tjo̧'wo̧ wana̧lö, jwaikwöda tji̧'yojobö chedo, jö̧ba̧lö, edobe. Chö̧ja̧wo̧dö, wene ökwödönö baledijayonö do̧'wo̧ ösöwanö dö̧jobö jo̧be. Ja̧danö kwo̧'wo̧duwi ösöwanö, Diosnö kwo̧'wo̧duwi wana̧lö kwö̧jaduwobetjö̧, wene baledijayonö, kwo̧'wo̧duwi 'dibachibö jwaikwöda kwi̧'yadaduwakwedöja.

⁴ Jejenö kwi̧'yaduwo, kwo̧'wo̧duwi 'dibachibö jwaikwöda 'ya̧nö chö̧ja̧wo̧dö, kwo̧'wo̧ luwo̧duwinö kwöda̧peachaduwobö. Ja̧danö jejenö, da̧peachadö kwö̧jaduwobetjö̧ kwö̧jaduwi̧ma bakwai̧da, otiwanö ji̧da kwi̧sekwaduwobe. Kwomukwataduwi̧bi, ja̧köbaduwi̧bi otiwanö ji̧da kwi̧sekwaduwobe, ja'yubebi ji̧bökönö, kwo̧'wo̧ luwo̧duwinö kwöda̧peachaduwobetjö̧. Jo̧kwaobetjö̧ chö̧ja̧wo̧dö ökwödönö wene baledena kwo̧'wo̧duwi ösöwanö kwö̧jaduwo, Otiwa, jö̧ba̧lö. Jejenö baledi̧ma döda̧peachobö pjaatobe, dö̧ji̧ma bakwai̧da, otiwanö ji̧da di̧sekwinö, jö̧ba̧lö.

Santiago yöawina wene: —Wene baledena Diosnö kwo̧'wo̧duwi wana̧lö akebaduwobö jo̧be, Dios ösödi̧ kwöwaisaduwobö— jö̧ba̧lö

^5-7 Jo̧kwaijayonö chö̧ja̧wo̧dö, ökwödötjö bakwo̧, wene baledena ¿dakwö chö̧jobö jo̧bejö? jö̧ba̧lö wajwiköbitjö̧ma Diosnö akebobö jo̧be, Dios ösödi̧danö jwaikwö kwi̧'yi̧ kwöwaisobö. Isabenö chö̧ja̧wo̧dö, Diosma okobe deinö jo̧banö abebadönö, Pjatato, jö̧ba̧lö, ösödö pjabato̧. Ja̧danö, Diosma jo̧banö abebo̧nö la'akatjöda jö̧ba̧lö̧kö̧, Sulabo̧ja. Pjatatökö, jö̧ba̧lö. Jo̧kwaobetjö̧ chö̧ja̧wo̧dö, wene baledena jwaikwöda kwi̧'yaduwobö wajwiköbaduwitjö̧ma Diosnö akebaduwobö jo̧be, ökwödönö pjaatobö. Jo̧kwaijayonö akebaduwena Diosnö kwo̧'wo̧duwi wana̧lö akebaduwobö jo̧be, Diosma isabenö pjabato̧, jö̧ba̧lö. Jejenö Diosnö kwo̧'wo̧duwi wana̧lö akebaduwiökwe Diosma ökwödönö pjabato̧. Chö̧ja̧wo̧dö, Diosma pjabatö̧kö̧ jo̧banö o̧'wo̧ wana̧lökönö abebo̧nö, Diosma pjaatenawe, pjaatökena, jö̧ba̧lö, dötölatajanö omukwato̧nöma. Wanedö yötawaduwakwö, Diosnö o̧'wo̧ wana̧lökönö jo̧nö wanedöma: Jo̧bama ojwe balawa loi̧danö jo̧, jwa̧lȩ'epjo dobibajö ojwe nöinö balawa loi̧danö. Jo̧bama jelobekwö, jelobekwö 'yo̧, jwaikwöda 'yö̧könö.

⁸ Chö̧ja̧wo̧dö, Diosma jo̧banö pjaatoböma jwiobe. Isabenö, jejenö Diosnö o̧'wo̧ wana̧lökönö abebo̧ma dötölatajanö, Diosnöbi, böjȩ jawabi omukwatö jo̧. Jo̧bama Dioskwö jwaikwöda 'yö̧kö̧. Ja̧danö, jejenö ö̧jobetjö̧ jo̧bama Diosnö aebena pjaatökökwe. Jo̧kwaobetjö̧ chö̧ja̧wo̧dö yötawaduwakwö. Ökwödönö wene baledena Diosnö kwo̧'wo̧duwi wana̧lö akebaduwo, waisanö kwi̧'yaduwi̧ma kwöwaisaduwobö.

Santiago yöawina wene böjȩ jawa juna̧ladönöbi, ja̧danö, jwibadönöbi

⁹ Ja̧danö, ökwödö chö̧ja̧wo̧dötjö böjȩ jawa jwibadönö, usulasedö, jö̧ba̧lö, ötjabiwö̧nö yötawaduwakwö. Ökwödöma jwiköbaduwobetjö̧ kwö̧jaduwi̧ma waiya, yelösöda. Jo̧kwaijayonö, ¡Ökwödöwe, usulasedösa! jö̧ba̧lö, kwomukwataduwoko chö̧ja̧wo̧dö. Ju'wi kwomukwataduwobö jo̧be, biya̧: Diosma ökwödönö möakwö kabebö edö yöa̧lobe, Bidöma jwiinö mikwawadö, jö̧ba̧lö. Chö̧ja̧wo̧dö böjȩ jawa jwiköbaduwijayonö kwo̧'wo̧duwi ösöwanö, Dios i̧tji̧mudobetjö̧ jwiinö mikwawadösa, jö̧ba̧lö, omukwatö kwö̧jaduwo.

¹⁰ Ja̧danö, ökwödö chö̧ja̧wo̧dötjö böjȩ jawa juna̧ladönöbi yötawaduwakwö. Diosma ökwödönö nijakwö lödö yöa̧lobe, Ökwödö kwujuna̧laduwi̧ma mikwawökö, jö̧ba̧lö. Ja̧danö, chö̧ja̧wo̧dötjö juna̧ladö, ökwödönö yötawa. Kwo̧'wo̧duwi ösöwanö kwomukwataduwobö jo̧be, Dujuna̧lijayonö ja̧ dujuna̧li̧ma mikwawadö badibobö jwiobe, jö̧ba̧lö. Do̧'wo̧ luwo̧ jawada isabenö mikwawi̧, jö̧ba̧lö, kwomukwataduwobö jo̧be chö̧ja̧wo̧dö, böjȩtjö kwujuna̧laduwima ba̧kwȩlö̧jatebö kwujuna̧laduwökakobetjö̧. Ja̧danö, juna̧ladönöma ina yötawaduwa, wanedö: Mejenö pokwi̧ o̧bu̧bi̧ya bo̧i̧ imiamenö woi̧danö ökwödöbi woköbaduwakwedöja. Ja̧danö, kwujuna̧laduwi̧bi ju'wi mölema jwiakwa̧.

¹¹ Ja̧danö, imiamenöma ja̧wo̧ jweinö ö̧jena jwa̧lȩ'epjo tubinö jwa̧lȩ'ewena meje'yema dejatibö woi̧. Ja̧danö, mejenö pokwi̧ o̧bu̧bi̧ya bo̧i̧bi dejatibö niyuwachibö nijibe tjoduwi̧bi. Jejenö baibena o̧bu̧bi̧yama ¿otiwobeji̧, ajayi ja̧ja̧danö? Otiwökö. Ja̧ o̧bu̧bi̧ya otiwi̧ma ba̧kwȩlö̧jatebö jökö, 'dö̧ibaji̧ jawa. Ja̧danö, böjȩ jawa juna̧lo̧ma, Lekwe chujuna̧lakobe, jö̧ba̧lö, otidö ö̧jemi ja'ötjö ö'wö babibo̧. Ja̧danö, jejenö ö'wö baibena ida̧ökö ujuna̧laja̧tjöma 'da̧bachibö jo̧, ba̧kwȩlö̧jatebö ji̧ jawaokobetjö̧. Jo̧kwaobetjö̧ chö̧ja̧wo̧dö, Jesúsnö ösödadötjö juna̧ladöma Diosnöda tjo̧'wo̧ wana̧lö, tjo̧'wo̧ ösöwanö tjö̧jobö jo̧be, Dios jawada mikwawobe, jö̧ba̧lö.

¹² Chö̧ja̧wo̧dö, wene baledena tjo̧'wo̧ 'dibachibö, jwaikwöda, Diosnö tjo̧'wo̧ wana̧lö 'ya̧döma, Dios pjaatawö̧. Ja̧danö, jwaikwöda tji̧'yi̧ma tji̧sekwobe, Diosnöda do̧'wo̧ wana̧lö ja̧dösa, jö̧ba̧lö. Ja̧danö chö̧ja̧wo̧dö, jobadöma Dios yöbawö ujunina tjemakwedö, ba̧kwȩlö̧jatebö ja̧kwawama. Jau chö̧ja̧wo̧dö, Diosma yöbawö ujuninobe, Ötjönö ösödadönö ba̧kwȩlöjatebo ja̧kwawa chiyakwo̧sa, jö̧ba̧lö.

Santiago yöawina wene: —Diosma jelobekwö di̧'yobö öbibö̧kö̧— jö̧ba̧lö

¹³ Chö̧ja̧wo̧dö, Diosnö ösödadötjö ju'wedöma, wene balediawö̧ tjime'dawachibobe Dioskwö tupakwö 'yö̧könö, Sula, jö̧ba̧lö. Jobadöma tjomukwatena, ¡Ayö! Diosma ökwödönö wene webö öibobe jelobekwö di̧'yobö, jö̧ba̧lö. Isabenö chö̧ja̧wo̧dö, jejenö tjomukwatobö jwiobe, Diosma la'akatjöda jelobekwö omukwatö di̧'yobö öibokobetjö̧. Ja̧danö, Diosma suli̧ wei̧ a̧ja̧kwö jelobekwö omukwatö i̧'yobö jwiobe, yelösöda. Chö̧ja̧wo̧dö kwöwaisaduwa, Diosma jwiinö otiwo̧, la'akatjöda öbibö̧kö̧ jojo sulabenö ja̧bö ö̧joböma.

¹⁴ Ja̧danö yötawaduwakwö. Ökwödö jojodö domajade okwatjöda jwiinö dösöda sulabenö ja̧doböma. Jo̧kwaobetjö̧ ökwödöda ödikwobe sulabenö dösödi̧ omukwata̧lö. Diosmaökö jojodönö sulabenö jelobekwö domukwatobö öbibo̧ma.

¹⁵ Ja̧danö, bakwo̧, jejenö sulabenö ösödi̧da omukwata̧lö ö̧jitjö̧ma sulabenö omukwata̧li̧danö ja̧bö ö̧jena. Jemi ikenama yemidanö, yemidanöbi jejenö sulabenö ja̧böda jo̧ma, sulabenö omukwati̧ öbalewachökötjö̧ma Diostjö 'da̧bachiböda jo̧, o̧'wo̧ luwo̧nö ö'wö babibo̧da.

Santiago yöawina wene: —Diostjö otiwi̧da ichobe— jö̧ba̧lö

¹⁶ Chösödawö̧ chö̧ja̧wo̧dö, jelobekwö kwomukwataduwoko Diosnö, Diosma sulabenö webo̧ ökwödönöma, jö̧ba̧lö.

¹⁷ Isabenö chö̧ja̧wo̧dö, Diosma suli̧ jawa iyoböma jwibo̧. Ja̧danö, ökwödö sulabenö ja̧dobö domukwati̧ma ¿Diostjö ichobeji̧? Ichokobe Diostjöma. Suli̧ jawa ja'yubebi ichokobe Diostjöma. Dios iyi̧ma bakwai̧ otiwi̧da ji̧. Ja̧danö chö̧ja̧wo̧dö, ja̧ otiwi̧ jawa iyi̧ma Diostjöda ichobe, okobe deinö mölejȩbe dejatinö lö̧jadönö otido̧tjöda. Ja̧danö, jobadö Dios otidinawö̧, mölejȩbe dejatinö lö̧jadöma ju'wikwenama nöinö dejatadö. Ja̧danö, ju'wikwenama ja'yubeda dejatadö. Ju'wi möle jwiinö ba̧kwȩlö̧jateböma dejatöködö. Ja̧danö, ju'wikwena tjidejatemima isa'wo tjöeba̧lawö̧. Jo̧kwaijayonö chö̧ja̧wo̧dö, Dios otiwi̧ma la'akatjöda tjöeba̧lokobe. Wajuwanö ji̧, tjöbeba̧lökönö. Ba̧kwȩlö̧jatebö bakwai̧da tjöbeba̧lökönö ichobe Dios otiwi̧ma, jo̧batjö. Ja̧danö, Diosma la'akatjöda balewachökö. Bakwainöda jo̧, otiwo̧da. Ja̧danö, jo̧ba iyi̧ma otiwi̧da iyo̧.

¹⁸ Jau chö̧ja̧wo̧dö, Diosma otiwanöda iyo̧. Ja̧danö, jo̧ba otiwanöda iyo̧ma ökwödönö otiwanö pjabatö weinobe iteda iwene, isabenö ji̧ wenema. Ja̧ iwenema ökwödö dö̧jibinö pjaati̧ wene, chö̧ja̧wo̧dö. Ja̧danö, ja̧ wene a̧ja̧kwö dösödinobetjö̧ yemidanö döbötjachijatö do̧'wo̧ luwo̧nö, iteda i̧tji̧mu, jwiinö mikwawadö babibö. Jejenö ösödinobe Diosma, iteda isabenö iwene a̧ja̧kwö dösödobö, iteda i̧tji̧mu babibö. Yelösöda Diosma otiwanö pjaatinobe ökwödönö, jo̧ba otidinatjö o̧penönö mikwawadö badibinö. Ja̧danö, Diosma iteda okobe jwiinö otidinatjö ökwödönö edö yöa̧lobe, Bidö chi̧tji̧muma jwiinö mikwawadö, jö̧ba̧lö. Isabenö chö̧ja̧wo̧dö, okobe jwiinö Diostjö ichi̧ma otiwobe.

Santiago yöawina wene: —Jweinö omukwatö kwö̧jaduwobö jo̧be— jö̧ba̧lö

¹⁹ Chösödawö̧ chö̧ja̧wo̧dö, biya̧ yötawi̧ma kwomukwataduwo: Ökwödötjö bakwo̧nökwena, Dios iwenetjö isabenö ji̧ jawa yöawobema ösödinö kwa̧ja̧kwa̧laduwo. Ja̧danö, ju'wibi kwomukwataduwo: Ökwödöma yöka̧lakwawaduwena tjo̧'omanö, tiyuwanö yöka̧laduwo. Ja̧danö ju'wibi: Juluwanöma kwölabiduwoko, omukwatökönö.

²⁰ Chö̧ja̧wo̧dö kwölabiduwena ¿jweinö omukwatö kwö̧jaduwobeji̧, Dios omukwatö kwö̧jaduwobö ösödi̧danö? Kwö̧jaduwokobe. Chö̧ja̧wo̧dö, Diosma weobe jweinö omukwatö kwö̧jaduwobö. Jo̧kwaijayonö kwölabiduwena jweinö omukwatö kwö̧jaduwobö jwiobe, Dios kwö̧jaduwobö ösödi̧danö.

Santiago yöawina wene: —A̧ja̧kwödamaökö i̧sekwöbi otiwanö kwi̧sekwaduwo Dios iwene yöawi̧danö— jö̧ba̧lö

²¹ Jo̧kwaobetjö̧ chö̧ja̧wo̧dö, okobe jwiinö suli̧ ja̧köbaduwi̧ma kakatibaduwo. Yelösöda kwomajadeduwinö suli̧ma su̧'bȩinö jo̧be. Ja̧danö, su̧'bȩinö jo̧betjö̧ suli̧ma kwomajadeduwitjö doibobe, ojwiyo doibi̧danö. Chö̧ja̧wo̧dö, ja̧ suli̧ma kabatibö, Suli̧ wei̧ cha̧ja̧kwökö, jö̧ba̧lö, kwöbalewachaduwo, Dios iwene ösödö, Jwiinö otiwa, jö̧ba̧lö. Wanedö yötawaduwakwö chö̧ja̧wo̧dö: Diosma iteda iwene önebia tjujuni̧danö kwo̧'wo̧ luwo̧duwinö ujuninobe. Ja̧ iwenema pjaati̧ wene, böjȩnö kwö̧jaduwena suli̧tjö kwö̧jibaduwinö pjaati̧ wenema. Ja̧danö chö̧ja̧wo̧dö, suli̧ wei̧ öpöjödö ökwödönöda omukwatökönuwi, Luwedösa, jö̧ba̧lö. Dios iweneda ösödö kwö̧jaduwo, jo̧ba yöawi̧ a̧ja̧kwö.

²² Ja̧danö chö̧ja̧wo̧dö, Dios iwene kwa̧ja̧kwaduwaja̧ ikena ¿dakwö ja̧köbaduwakwa̧da? Kwomukwataduwena, Dios iwene da̧ja̧kwobetjö̧ tjo̧wi̧ otiwa. Ja̧ da̧ja̧kwi̧ di̧sekwobö, ja̧danö Dios weina ja̧doböma jwiobe. Chö̧ja̧wo̧dö yötawaduwakwö. Dios iwene kwa̧ja̧kwaduwijayonö iwenetjö weina ja̧bö kwö̧jaduwökötjö̧ma mikwawokobe. Ja̧danö, kwomukwataduwitjö̧ma, A̧ja̧kwöda da̧ja̧kwobö otiwa. Dö̧ji̧ di̧sekwoböma jwia, jö̧ba̧lö, ökwödöda omöna yöba̧lö jelobekwö omukwatö ökikwaduwena. Chö̧ja̧wo̧dö, böjȩnö ja̧nö Dios iwenetjö yöawakwawa, iteda wei̧ma a̧ja̧kwö dö̧jobö jo̧be.

²³ Chö̧ja̧wo̧dö wanedö yötawaduwakwö: Bakwo̧ tjöba dekwawötenö ediakwawö, Jooo chöba yȩamajabe, jö̧ba̧lö, edo̧.

²⁴ Jo̧kwaijayonö edaja̧ ikena o̧'wo̧ jwibibö, dichawökönö i̧'yobe. Chö̧ja̧wo̧dö, jejenö bakwo̧ Dios iwene a̧ja̧kwijayonö ja̧ iwenetjö yöawi̧danö i̧sekwökönö jo̧ma. Jo̧bama a̧ja̧kwijayonö a̧ja̧kwaja̧ ikena Dios iwenetjö laebi̧, jo̧ba ö̧jobö yöawi̧ma o̧'wo̧ jwibibo̧. Chö̧ja̧wo̧dö, jejenöma kwö̧jaduwoko.

²⁵ Baikwö kwö̧jaduwobö jo̧be: Dios yöawi̧, iteda iwenetjö yöawi̧ma ö'wiawakwa̧lö̧jönö a̧ja̧kwö kwomukwata̧laduwo. Chö̧ja̧wo̧dö, Dios iwenema tjöba dekwawöte i̧sebi̧danö ökwödönö i̧sebobe Dios ösödi̧ma. Ja̧danö, ökwödö sulabe dujuna̧li̧ i̧sebobe. Ja̧danö, Dios ösödi̧danö ja̧kwawa i̧sebobe. Nöinö i̧sebobe Dios iwenema. Jo̧kwaobetjö̧ Dios iwene kwa̧ja̧kwaduwaja̧ ikena kwo̧'wo̧duwi̧ jwibibökönuwi Dios wei̧ma. Dios wei̧ a̧ja̧kwö kwi̧sebaduwobö jo̧be chö̧ja̧wo̧dö. Ju'wi wanedö yötawa chö̧ja̧wo̧dö: Ökwödöma böjȩ sulabenö ji̧kwö 'dii̧ osiju ka̧lenasijunö yö̧dekwinobe. Ja̧danö, Dios yöawi̧ma ejachajibinö pjabatö dö̧jibinö pjaatinobe, Dios otiwanö omukwati̧danö omukwatö dö̧jobö. Chö̧ja̧wo̧dö, kwo̧'wo̧duwi jwikibaduwoko Dios yöawi̧, iteda iwenetjö yöawi̧ma. Dios yöawi̧ a̧ja̧kwö yöawi̧danö omukwatö ja̧köbaduwo chö̧ja̧wo̧dö, kwö̧jaduwi̧ma. Ja̧danö, Dios yöawi̧danö ja̧bö jo̧ma Dios jwiinö pjaatökwe, okobe jwiinö böjȩnö ja̧nö ja̧i̧ma.

Santiago yöawina wene: —Dios inesö ösödi̧danö kwö̧jaduwo, usulasedönö pjabatö, ja̧danö, suli̧tjö 'da̧bachibö— jö̧ba̧lö

²⁶ Chö̧ja̧wo̧dö Diosnö ösödadöma, ju'wedönö otiwanö yötja̧lobö jo̧be. Bakwo̧, Ötjöma Diosnö ösödo̧sa, jo̧banö ba̧kwȩlö̧jatebö abebö, ja̧danö jo̧ba wei̧ a̧ja̧kwö, jö̧ba̧lö, yöa̧lijayonö jojodönö sulabenö yöa̧litjö̧ma ¿isabenö otiwanö ö̧jobeji̧, Dios ösödi̧danö? Otiwanö jö̧kö̧. Ja̧danö, jo̧ba Dios iwene yöawakwawejube i̧'yi̧ma, ¿mikwawobeji̧? Mikwaokobe. Ja̧danö, Diosnö ösödo̧sa, jö̧ba̧lö, yöa̧li̧ma ¿mikwawobeji̧? Mikwawokobe. Chö̧ja̧wo̧dö, jojodönö sulabenö yöba̧lo̧ma itenöda omöna yöba̧lo̧danö itedada omajadenö jelobekwö omukwatobö öibökwe, Otiwanö jo̧sa, jö̧ba̧lö. Jo̧kwaobetjö̧ jo̧ba Diosnö ösödi̧ma mikwawokobe chö̧ja̧wo̧dö. Ja̧ Diosnö ösödi̧ma inesö ösödi̧maökö.

²⁷ Ja̧danö, Dios, ökwödö Dabe'do Diosma ¿dakwö yöawobeda, Biya̧ ötjönö inesö kwösödaduwi̧ kwi̧sekwaduwi̧ma, jö̧ba̧lö? Biya̧ chö̧ja̧wo̧dö, Diosnö jwiinö inesö dösödi̧ma: Usulasedönö, tjabe'do tjojo'do debadönöbi, tjilekwe wotjinawö̧nöbi pjadatobö jo̧be, usula tjemawena. Ju'wi jawabi chö̧ja̧wo̧dö, biya̧: Böjȩnö ju̧kwadö sulabenö ja̧tji̧tjö 'da̧bachibö dö̧jobö jo̧be, ja̧ suli̧kwö pjabacha̧lökönö. Jejenö kwö̧jaduwo chö̧ja̧wo̧dö, Dios kwö̧jaduwobö ösödi̧danö, jo̧ba iwene ösödinö a̧ja̧kwö.