Romanos 9 - Dios Iwene

Dios omudawö ujuninawö̧ Israel jojodönö Pablo yöawina wene

^1-3 Chömöledö, ötjöma isabenö ötjöda chömöledönö, Israel jojodönö jwiinö cho̧'wo̧ tjo̧acha, Diostjö 'da̧bachibö tjuju̧kwobetjö̧. Ja̧danö, kabatökönö chomajade niobedanö ichejekwa chömöledö, jwiinö cho̧'wo̧ tjo̧achobetjö̧. Ja̧ yötawaja̧ma Jesúskwö ja̧nö jweinö yötawobe, omöna yöta̧lökö. Ja̧danö, Dios O̧'wo̧ Luwo̧ma yötawi̧ a̧ja̧kwö, Jau jweinö yökawobe, jö̧ba̧lö chomajadenö yöawobe. Ja̧danö jejenö yöawobetjö̧, chöwaisa, Jweinö yötawobe chömöledönö cho̧'wo̧ tjo̧achi̧ma, jö̧ba̧lö. Jau chömöledö, isabenö chömöledö Israel jojodönö chösödobe. Ja̧danö jobadönö ösödö baikwö chomukwatobe: Chömöledö Israel jojodö tjö̧jibo jö̧ba̧lö, Diosma balekwo̧nö ötjönöda lȩbebö, ötjönö Cristo ö̧jelötjö 'da̧batö loitjö̧ma, otiwena, jobadö tjö̧jibobö, jö̧ba̧lö chomukwatobe.

⁴ Jobadö ötjöda chömöledöma, Israel jojodö chömöledö. Jobadönöda damötjö 'da̧batö ujuninobe Diosma, iteda ömöledö batjibanö. Ja̧danö, iteda i̧tji̧mu batjibobö ja̧inobe Diosma, ja̧danö jobadönöda iteda dejatinö ujulu i̧sebinobe. Ja̧danö jobadönöda isabenö ja̧akwa̧ wene yöbawö ujuninobe, ja̧danö jobadönöda weinobe, Baikwö ja̧bö kwö̧jaduwo, jö̧ba̧lö. Ja̧danö, jemi tupakwö jobadönöda yöawinobe Diosnö otiwanö ösödakwawa jawa, ja̧danö jobadönöda yöawinobe tjö̧jibinö ja̧akwa̧ wenema.

⁵ Ja̧danö, jobadö Israel jojodöma inesö ajayinö ji̧nadö, Diosnö ösödinadö tji̧tji̧mu tupadanö jojodö. Ja̧danö, jobadö tjömöledöso̧, Israelso̧ baibanö ichinobe Cristoma. Jo̧ba Cristoma okobe deinö tjuluwo̧ Dios, ja̧danö jo̧banöda böjȩ jojodö tjösödo ba̧kwȩlö̧jatebö. Jau chömöledö, jo̧banö tjösödobö chösöda.

Diosma isabenö jö̧a̧linadanö Abraham i̧tji̧mu tupadanö jojodönö pjabato̧ jö̧ba̧lö Pablo yöawina wene

⁶ Chömöledö, Diosma iteda isabenö ja̧akwa̧ wene yöbawö ujuninobe Israel jojodönö, ökwödönö pjatatocha jö̧ba̧lö, ¿jö̧tö? ¿Dakwö kwomukwataduwa? Jö̧a̧li̧danö pjatatocha jö̧a̧linawö̧nö ¿pjaatinökiji̧ Diosma? Ja̧maökö chömöledö, baikwö labebö lobö yötawa: Israel i̧tji̧mu tupadanö jojodötjöma, Israel jojodöböködö tjuju̧kwobe ju'wedöma, Dios ömöledö tjö̧jokobetjö̧.

⁷ Kwöwaisaduwa chömöledö, Abraham i̧tji̧muma, sule bakwo̧nöda itji̧kwinokobe Abrahamma, ¿jö̧tö? Jau chömöledö, Abrahamma Isaacnöbi, ju'wedönöbi itji̧kwinobe, ja̧danö jobadö okobe deinö tji̧tji̧munöbi tjitji̧kwinobe. Jo̧kwaijayonö, okobe deinö jobadönö yöa̧linokobe Diosma, Abraham i̧tji̧mu tupadanö jojodö jö̧ba̧löma. Okobe deinö Abrahamtjö 'yatjebinajayonö, jobadötjö sule ju'wedönöda Abraham i̧tji̧mu tupadanö jojodö jö̧ba̧lö yöa̧linobe Diosma, Isaac i̧tji̧mu tupadanö jojodönöda. Baikwö laebobe Dios iwene, Abraham i̧tji̧mu jawama: Ökwötjö tupadanö jojodöma, ajayinö yöbawö junö yötawinawö̧ma, Isaactjö 'yatjebakwedö, jö̧ba̧lö laebobe, Dios Abrahamnö yöawinama.

⁸ Ja̧danö, biya̧ wene waisachö, baikwö döwaisachibobe chömöledö: Ju'wedöma, Abrahamtjö 'yatjebinajayonö, Abraham a̧dekwanö i̧tji̧muböködö, sule Dios yöbawö ujuninawö̧da Abraham a̧dekwanö i̧tji̧mu tupadanö jojodöma.

⁹ Jau chömöledö, baikwö laebobe Dios iwene, Abraham a̧dekwanö itji̧nö jemakwa̧ma: Babedajayena ju'wi o̧banö yemidanö tebachö chichocha. Chichenama kwilekwo Sara ida̧ökö jitji̧nö jujuna̧lakwuju, jö̧ba̧lö laebobe Dios iwene, Dios Abrahamnö yöawinama.

¹⁰ Ja̧danö, ju'wibi chömöledö. Ökwödö Israel jojodötjö ajayinö ji̧na Isaac ilekwo Rebecama, du̧ju̧tajanö jeminobe, Isaac i̧tji̧munöma, ¿jö̧tö?

^11-12 Ja̧danö, jobadönö jemakwa̧ abönö, otiwanöbi, sulabenöbi ina ja̧tjakwa̧ abönö, Diosma jobadönö yöawinobe Rebecanöma. Baikwö laebobe Dios iwene, Rebeca ji̧tji̧munöma: Abönö pöema öjawo̧ wei̧da ja̧akwo̧, jö̧ba̧lö laebobe, Dios Rebeca ji̧tji̧munö yöawina, ina jemakwa̧ abönö. Jejenö yöbawö, Diosma i̧sebö yöawinobe, Ötjödasa omudawö juno̧ma, jö̧ba̧lö. Ja̧danö, iteda omukwati̧danöda, jobuju ji̧tji̧mutjö, bakwo̧nö omudawö ujuninobe. Jau chömöledö, jobadö ja̧tji̧ jawa omukwatökönö, Diosma itedada omukwati̧danöda omudawö ujuninobe.

¹³ Baikwö laebobe Dios iwene, Isaac i̧tji̧munöma: Jacobnö chösödijayonö, Esaúnöma chöpöjödijatö, jö̧ba̧lö laebobe Dios iwenema. Ja̧danö, ja̧ laebi̧ waisachö, öwaetjöda öwawobe, Dios Abrahamnö yöbawö ujunina wenema, okobe deinö Abraham i̧tji̧mu tupadanö jojodönö badekwachokobe jö̧ba̧lö, Dios omudawö ujunajawö̧nöda badekwachobe jö̧ba̧lö.

Diosma iteda omukwati̧danöda ja̧bo̧ jö̧ba̧lö Pablo yöawina wene

¹⁴ Biya̧ wene a̧ja̧kwö, ¿dakwö kwomukwataduwa chömöledö? Iteda omukwati̧danöda omudawö ujuninobetjö̧, ¿sulabenö omudawö ujuninaji̧ Diosma? Ja̧maökö chömöledö.

¹⁵ Baikwö laebobe Dios iwene, Moisésnö yöawinama: Bakwo̧nö lȩlö̧jinö chedobö jö̧ta̧litjö̧ma, lȩlö̧jinö chedocha. Ja̧danö lȩlö̧jinö edö pjatatobö chösöditjö̧ma, lȩlö̧jinö edö pjatatocha, jö̧ba̧lö laebobe Dios Moisésnö yöawinama.

¹⁶ Ja̧ laebi̧ waisachö, baikwö döwaisachibobe chömöledö: Dios lȩlö̧jinö edi̧da mikwawi̧ma, jojodö tjomukwati̧maökö, jojodö ja̧tji̧maökö.

¹⁷ Jau chömöledö, isabenö Dios omukwati̧da mikwawi̧ma, baikwö yötawa: Dios iwene, Dios Egipto jojodö tjuluwo̧nö, faraón mikwo̧nö yöawinama baikwö laebobe: Ökwönö kabebö chujunijatö Egipto jojodö tjuluwo̧ bakibanö, ötjö chujulu chi̧sebobe kwedaduwobö. Ja̧danö, okobe deinö böjȩnö ju̧kwadö jojodöma chujulu tja̧ja̧kwo jö̧ba̧lö, ökwönö kabebö chujunijatö, jö̧ba̧lö laebobe Dios faraónnö yöawinama.

¹⁸ Jau chömöledö, Diosma iteda ösödi̧danö ja̧bo̧. Lȩlö̧jinö edobö jö̧a̧litjö̧ma, lȩlö̧jinö edo̧, ja̧danö ju'wedönö tjuubiya 'dibadö batjibanö ja̧obö jö̧a̧litjö̧ma, tjuubiya 'dibadö batjibanö ja̧bo̧, Dios wei̧ tja̧ja̧kwökönö.

¹⁹ Biya̧ yötawaja̧ omukwatö, yöka̧laduwena, Diosma tjuu 'dibadö batjibanö ja̧itjö̧ma, a̧ja̧kwöködönö lȩeboböma jwiena, jo̧bada tjuu 'dibadö batjibanö ja̧obetjö̧, jö̧ba̧lö.

²⁰ Jejenö yöba̧lökönaduwi chömöledö. Ökwödö böjȩ jojodöma, Diosma sulabenö ja̧bo̧, jö̧ba̧lö yöka̧laduwoböma jwia chömöledö. Baikwö wanedö yötawa: Bakwo̧ isa̧yu̧ dadö otiditjö̧ma, ¿ödadajayu̧ma yöa̧lenaji̧, Sulabenö kwotidajabe, jö̧ba̧lö? Yöa̧lökena, ¿jö̧tö?

²¹ Chömöledö, letiyatjö dadö otido̧ma, iteda ösödi̧danö dadö otido̧. Ja̧danö, lete'o bakwa'otjö doyu̧lataja otidena, bakwayu̧ otiwa jawasayu̧ baibanö, jeleyu̧ sulabe jawasayu̧ baibanö. Jejenö otidijayonö, sulökö, iteda otido̧obetjö̧.

^22-23 Diosbi ja̧danö chömöledö, iteda omukwati̧danö ja̧bo̧. Jo̧bama iteda ujulu i̧sebobö jö̧a̧linobe, ja̧danö, Jojodö sulabenö ja̧tji̧ma öpöjödö lȩbebo̧sa, jö̧ba̧lö i̧sebobö jö̧a̧linobe. Jejenö i̧sebobö jö̧a̧lijayonö, lekwe o̧'wo̧ 'dibachibö ite'ada̧linobe, lȩbebökönö. Lekwe lȩebakwawö̧nö lȩbebökönö ite'ada̧linobe chömöledö. Ja̧danö, ju'wibi i̧sebobö jö̧a̧linobe chömöledö. Iteda dejatinö ujulu i̧sebobö jö̧a̧linobe, ökwödö lȩlö̧jinö edawö̧nö. Ja̧danö, ökwödönö 'da̧batö ujuninobe, Bidönö chujulu chiyocha, idöbi tjujuna̧lobö, jö̧ba̧lö.

²⁴ Jau chömöledö, iteda ujulu i̧sebobö jö̧a̧linobe ökwödönöma, iteda ömöledö badibobö jwöinawö̧nöma. Ja̧danö, sule judío jojodönödama jwöinokobe chömöledö, judío jojodönöbi, judío jojodöböködönöbi jwöinobe.

²⁵ Biya̧ judío jojodöböködönö jwöakwa̧ wene iwȩyudinobe Oseas, Dios iwene wȩyudinama. Baikwö iwȩyudinobe Oseasma Dios judío jojodöböködönö yöawi̧ma: Ajayinö chömöledöbinöködönöma, chömöledö ötabocha, ja̧danö ajayinö bidöma chöpöjödawö̧ jö̧ta̧linawö̧nöma, jwiinö chösödawö̧ yöta̧locha.

²⁶ Ja̧danö, bemi niji jojodöma chömöledöböködö jö̧ta̧linemi jojodönöma, jemi jojodönö ötjabikobe, 'Yaba̧lo̧ Dios i̧tji̧mu, jö̧ba̧lö iwȩyudinobe Oseasma.

^27-28 Ja̧danö, Dios iwene wȩyudina Isaíasma Israel jojodönö iwȩyudinobe. Baikwö iwȩyudinobe Isaíasma, Israel jojodönö: Duluwo̧ Diosma juluwanö böjȩ jojodönö labinö lȩebakobe. Ja̧danö, lȩebenama, Israel jojodö tjöba̧jekwijayonö, ojwe ö'öbö ba̧pu̧ so̧bi̧ya̧pu̧danö tjöba̧jekwijayonö, ja'yubenöda tjö̧jibakwedö, Israel jojodöma, jö̧ba̧lö iwȩyudinobe Isaíasma.

²⁹ Ja̧danö, tupakwöbi iwȩyudinobe Isaíasma, Israel jojodönö tupakwö baledakwa̧ma. Baikwö iwȩyudinobe: Okobe jwiinö juluwo̧ Diosma Israel jojodötjö ja'yubenö tjö̧jibinö ja̧inobe. Jejenö ja̧inökötjö̧ma, ökwödö Israel jojodöma okobe deinö debö di̧'yo jö̧da̧linena, ja̧danö Sodoma jojodödanö, Gomorra jojodödanö badibo jö̧da̧linobe, bakwo̧bi ji̧bökönö, jö̧ba̧lö iwȩyudinobe Isaíasma. Jobekwö laebobe damötjö tjiwȩyudina Dios iwenema, Israel jojodöböködö Dios ömöledö batjibakwa̧ wenebi, Israel jojodönö lȩebakwa̧ wenebi.

Israel jojodöma tjö̧jibököjayonö, Israel jojodöböködöma ji̧badö jö̧ba̧lö Pablo yöawina wene

³⁰ Chömöledö, ja̧ laebi̧ omukwatö, ¿dakwö döwaiso jö̧da̧lobeda? Baikwö yötawa chömöledö: Judío jojodöböködöma, la'akatjöda tjisakwinokobe sulabe jwibadö batjiboböma, ¿jö̧tö? Jo̧kwaijayonö, jejenö tjisakwököjayonö, Dios yöawi̧ tjösödiökwe, Diosma jobadönö jö̧a̧linobe, Bidöma sulabe jwibadö, jö̧ba̧lö.

³¹ Judío jojodönöbi yötawa, baikwö: Jobadöma isabenö sulabe jwibadö batjibobö tjisakwinobe. Ja̧danö, Moisés weina ja̧do jö̧ba̧lö sulabe jwibadö batjibobö tjisakwinobe. Jejenö tjisakwinajayonö, waekwinobe chömöledö.

^32-33 ¿Tajawedö waekwinadaja̧ chömöledö? Biya̧ wene labebö lobö yötawa: Jobadöma Jesúsnö tjösödinokobe, dö̧jibinö pjabato̧ jö̧ba̧lö. Ja̧danö Jesúsnö tjösödinokobetjö̧, waekwinobe, sulabe jwibadö batjibinokobe. Jau chömöledö, Jesúsnö ösödökönö, idöda otiwanö ja̧tji̧da tjo̧'wo̧ tjöwana̧linobetjö̧, waekwinobe chömöledö. Biya̧ wene wanedö yöawinobe Diosma, baikwö laebobe Dios iwene, Dios Jesúsnö wanedö yöawinama: Jerusalénnö inawa chöda, jojodö töbö metjawa baibanö. Ja̧danö, ba̧jekwadö metjakwedö, jawa töböma. Jo̧kwaijayonö, bakwo̧ inawadanöbo̧ chödinökwenö ösöditjö̧ma, waekwökena, ötjö Diosda jo̧banö pjatatobetjö̧, jö̧ba̧lö laebobe Dios wanedö yöawinama, Jesúsnöma inawadanö chödinobe, jö̧ba̧lö. Jau chömöledö, wanedö yötawa: Bidö Israel jojodöma, Dios ödinawa öpöjödö, töbö metjinobe ichejekwa, Jesúsnö tjöpöjödinobetjö̧. Ja̧danö, waekwinobe, sulabe jwibadö batjibinokobe.