Romanos 8 - Dios Iwene

Dios O̧'wo̧ Luwo̧ma ökwödönö ja̧kwawa iyo̧ jö̧ba̧lö Pablo yöawina wene

¹ Ja̧danö chömöledö, babema Cristo Jesúskwö a̧jö dö̧jobetjö̧ bakwo̧bi deobe ökwödönö yöba̧lo̧ma, Bidöma sulabedö, Dios lȩebakwawö̧, jö̧ba̧lö.

² Jau chömöledö, Jesúskwö a̧jö dö̧jobetjö̧, O̧'wo̧ Luwo̧ Dios ujulunöda dö̧jibinobe. Dios O̧'wo̧ Luwo̧ ujulunöda, sulabe dujuna̧li̧tjöbi, woawatjöbi dö̧jibinobe chömöledö. Ja̧danö, jejenö dö̧jibinobetjö̧, ba̧kwȩlö̧jatebö ja̧kwawa dujuna̧lobe babema Cristo Jesúskwö chömöledö.

³ Jau chömöledö, Dios weina, jojodö baikwö ja̧bö tjö̧jo jö̧ba̧lö iwȩyudinobe Moisésma. Jo̧kwaijayonö, ja̧ iwȩyudinama ökwödönö pjaatoböma jwiinobe. Sulabe dujuna̧linobetjö̧, ökwödönö pjaatoböma jwiinobe. Jo̧kwaijayonö, Moisés iwȩyudina ökwödönö pjaatinököjayonö, Diosda ökwödönö pjaatinobe. Diosma iteda itji̧nö weinobe, jojo baibanö, sulabe juna̧ladödanö ichejekwo̧ baibanö. Jo̧bama ökwödödanö ichejekwinajayonö, sulabe jwibina jo̧bama. Ja̧danö Diosma jo̧banöda weinobe, sulabe dujuna̧li̧tjö dö̧jibobö. Ja̧danö, midawö woinobe, ökwödö sulabe dujuna̧li söbebö loobö.

⁴ Jau chömöledö, Moisés iwȩyudinama baikwö laebobe: Biya̧ Dios wei̧ jawa ja̧bö̧kö̧ma Dios lȩebakwo̧ jö̧ba̧lö. Ja̧danö, Dios ökwödönö lȩebobö ji̧nobe, Dios wei̧ jawa ja̧dinokobetjö̧. Jo̧kwaijayonö, Jesúsda midawö woinobe, balekwo̧da woinobe, ökwödö dö̧jibobö. Balekwo̧da midawö woinobe, ökwödö Jesúsnö ösödadöma Dios O̧'wo̧ Luwo̧ ömöayedödanö baibanö dö̧jibobö. Jau chömöledö, ökwödö Jesúsnö ösödadöma, Dios O̧'wo̧ Luwo̧ wei̧ ja̧bö ju̧kwadösa babema, suli̧ wei̧tjömaökö.

⁵ Jau chömöledö, suli̧ ömöayedödanö ju̧kwadöma, jwaikwöda sulabe tjujuna̧li̧ ösödi̧ jawada omukwatadö. Ja̧danö, Dios O̧'wo̧ Luwo̧ ömöayedödanö ju̧kwadöma, jwaikwöda Dios O̧'wo̧ Luwo̧ ösödi̧ jawada omukwatadö.

⁶ Jau chömöledö, suli̧ ömöayedödanö ju̧kwadöma, wotjakwedö. Jo̧kwaijayonö, Dios O̧'wo̧ Luwo̧ ömöayedödanö ju̧kwadöma, wene jwiinö ba̧kwȩlö̧jatebö tjuju̧kwakwedö Dioskwö.

⁷ Jau chömöledö, suli̧ ömöayedödanö ju̧kwadöma, Dios öpöjojodö. Ja̧danö, Dios wei̧ma ja̧böködö. Ju'wibi, Dios wei̧ ja̧tjoböma jwibadö, tjujulu jwitjobetjö̧.

⁸ Jau chömöledö, suli̧ ömöayedödanö ju̧kwadöma, Dios ösödi̧danöma ja̧böködö, la'akatjöda.

⁹ Jo̧kwaijayonö, jejenöböködöja ökwödöma. Ökwödöma suli̧ ömöayedödanöböködöja, Dios O̧'wo̧ Luwo̧ ömöayedödanöbedöja, kwo̧'wo̧ luwo̧duwinö ö̧jobetjö̧. Jau chömöledö, Dios O̧'wo̧ Luwo̧ma, okobe deinö Cristo ömöledö tjo̧'wo̧ luwo̧nö jo̧ chömöledö. Ja̧danö, Dios O̧'wo̧ Luwo̧ma bakwo̧ o̧'wo̧ luwo̧nö deitjö̧ma, Cristo ömöledöso̧bö̧kö̧ jo̧bama.

¹⁰ Jau, ökwödö a̧tji̧yedö kwiteba'oduwima isabenö woakobe chömöledö. Ökwödö böjȩ jojodö sulabe dujuna̧lobetjö̧, diteba'oma isabenö woakobe. Ja̧danö, diteba'oma ida̧ökö woinobedanö jo̧be. Jau chömöledö, diteba'oma woinobedanö jo̧be, jo̧kwaijayonö, Cristoma ökwödö kwo̧'wo̧ luwo̧duwinö ö̧jitjö̧ma, kwo̧'wo̧ luwo̧duwima woökena, Diosma ökwödönö ja̧inobetjö̧, suli̧ jwibadö bakibaduwanö.

¹¹ Jau chömöledö, Diosma Cristo Jesúsnö woawatjö tjeachajinö ja̧inobe. Ja̧danö, jo̧ba, Cristonö yemidanö tjeachajinö ja̧bina O̧'wo̧ Luwo̧da ökwödö kwo̧'wo̧ luwo̧duwinö ö̧jobe babema, ökwödönö ja̧kwawa iyö. Ja̧danö, kwo̧'wo̧ luwo̧duwinö ja̧nö, ja̧kwawa iyobetjö̧, kwiteba'oduwi ja̧kwawa jawabi iyobe ichejekwa. Jau, Cristo iteba'o woawatjö tjeachajinö ja̧inadanö, ökwödö kwiteba'oduwibi woawatjö tjeachajinö ja̧obedanö jo̧be chömöledö.

¹² Yötawaja̧danö jo̧be chömöledö, jo̧kwajabetjö̧ Dios O̧'wo̧ Luwo̧ wei̧da ja̧bö dö̧jobö jo̧be babema, suli̧ wei̧maökö.

¹³ Jau chömöledö, suli̧ ömöayedödanö ju̧kwadöma, wotjakwedö chömöledö. Jo̧kwaijayonö, Dios O̧'wo̧ Luwo̧ ömöayedödanö ju̧kwadöma, wotjökakwedö. Jobadöma, Dios O̧'wo̧ Luwo̧ pjaatobetjö̧, sulabe tjösödi̧ma kabatibadö. Ja̧danö sulabe tjösödi̧ kabatibö, sulabenö tjösödi̧ma kwabö lotjobedanö jo̧be, sulabe tjösödi̧ jawa katjatibobetjö̧. Ja̧danö, jobadöma ba̧kwȩlöjateböda tjuju̧kwakwedö.

¹⁴ Jau chömöledö, Dios O̧'wo̧ Luwo̧ma Dios i̧tji̧muböködönö öbibö webö̧kö̧, sule Dios i̧tji̧munöda öbibö webo̧ Dios O̧'wo̧ Luwo̧ma. Ja̧danö, okobe deinö Dios O̧'wo̧ Luwo̧ öbibö weawö̧ma, Dios i̧tji̧muda.

¹⁵ Jau chömöledö, isabenö Dios i̧tji̧mubedösa babema. Baikwö yötawa: Ajayinöma, suli̧ ömöayedödanö dö̧jinobe, ¿jö̧tö? Ja̧danö, suli̧ ömöayedödanö ja̧nö, yedabinobe, ¿jö̧tö? Jo̧kwaijayonö, yedaboböma jwiobe yelösöda babema. Jau chömöledö, Diosma weinobe iteda O̧'wo̧ Luwo̧nö, ökwödö do̧'wo̧ luwo̧nö ö̧jobö. Ja̧danö, jo̧ba Dios O̧'wo̧ Luwo̧ma, Diosda i̧tji̧mu badibobö ja̧inobe. Ja̧danö, Dios i̧tji̧mu badibobö ja̧inobetjö̧, babema yebabökönö adebena Dabe'do Diosnö, Chabe'dowe jö̧ba̧lö.

¹⁶ Jau chömöledö, Dios O̧'wo̧ Luwo̧bi, ökwödö do̧'wo̧ luwo̧bi, bakobe yötjawobe Dios i̧tji̧mu dö̧ji̧ma. Jau chömöledö, isabenö Dios i̧tji̧mu dö̧jobe babema, Dios O̧'wo̧ Luwo̧ yöawi̧danö.

¹⁷ Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.

Jwiinö otiwa jawa demakwa̧ wene Pablo yöawina wene

¹⁸ Jau chömöledö, ina böjȩnö ja̧nö, usula demawobe. Jo̧kwaijayonö, ötjö chedemi, ökwödö usula demawi̧ma mikwawokobe yelösöda chömöledö. Mölejȩbe dichibenama, jwiinö otiwakobe. Ja̧danö, jobe ja̧nö, Dios dewinö dejatinö ujulubi dujuna̧lakwedösa ökwödöma. Ja̧danö, jwiinö otiwa jawa dujuna̧lakwa̧bi, otiwanö dö̧jakwa̧bi chomukwatenama, babema usula demawokobedanö jo̧be ötjönöma chömöledö.

¹⁹ Jau chömöledö, ju'winö Diosma ökwödönö kabebö i̧sebakobe, Bidöma ötjöda chi̧tji̧mu, jö̧ba̧lö. Jejenö i̧sebenama, jwiinö otiwakobe chömöledö. Ja̧danö, okobe jwiinö Dios otidina jawama, böjȩbi, böjȩ jawabi ösödinö omukwatö te'ada̧lobe ichejekwa, ja̧ möle badekwachobö.

²⁰ Jau chömöledö, babema okobe jwiinö Dios otidina jawama, böjȩbi, böjȩ jawabi suli̧ jwöachobe, Diosda jejenö weinobetjö̧. Jau chömöledö, Diosma ökwödö da'dömine Adánnö lȩebenama, ju'wibi ja̧inobe chömöledö. Okobe jwiinö böjȩ jawabi lȩebinobedanö jo̧be, mölejȩbetjö iteda i̧tji̧munö kabebö i̧sebenanö kabatö. Ja̧danö, böjȩbi ja̧ möle badekwachobö te'ada̧lobedanö jo̧be chömöledö.

²¹ Ja̧danö chömöledö, ja̧ möle badekwachenama, böjȩbi ka̧lenatjö laebakobe ichejekwa. Jau chömöledö, okobe jwiinö böjȩ jawama, suli̧ jwöachobe babema. Ja̧ suli̧ jwöachi̧ma, ka̧lena bo̧bedanö ichejekwa. Jo̧kwaijayonö, ja̧ möle badekwachenama, ka̧lena bo̧betjö laebakobe böjȩma ichejekwa, ja̧danö Diosma okobe jwiinö otiwachibanö ja̧akwo̧, ja̧ mölema.

²² Jau chömöledö, baikwö wanedö yötawa: Bakwuju, jitji̧nö jemakwujuma, jemakwa̧ abönö nöinö usula jemawobe, inia tjöbö, ¿jö̧tö? Ja̧danö, jejenö usula emawö, Ö̧ö̧ö̧, jö̧ba̧lö jwöjobe, jitji̧nö jemenanö kabatö, ¿jö̧tö? Dios otidina böjȩ jawabi ja̧danö chömöledö. Böjȩbi jejenö, Ö̧ö̧ö̧ jö̧ba̧lö usula emawö jwöobedanö ichejekwa, Dios ökwödönö kabebö i̧sebenanö kabatö.

²³ Ja̧danö, ökwödöbi, Dios i̧tji̧mubi, Ö̧ö̧ö̧ jö̧ba̧lö usula demawobe ichejekwa chömöledö. Jau chömöledö, Diosma ökwödönö kabebö i̧sebakwa̧ wene yöawinobe. Ja̧danö, ja̧ wene yöbawö, iteda O̧'wo̧ Luwo̧nö iyinobe, Isabenö tupakwö ökwödönö kabebö chi̧sebocha, jö̧ba̧lö. Ja̧danö, ökwödö, Dios O̧'wo̧ Luwo̧ ö̧jawö̧bi, usula emawö, Ö̧ö̧ö̧ jö̧ba̧lö jwödobe, ¡Ja̧ möle juluwanö baibowe! jö̧ba̧lö. Jau chömöledö, ja̧ möle badekwachenama, Diosma ökwödönö kabebö i̧sebakobe, Bidöma ötjöda chi̧tji̧mu, jö̧ba̧lö. Ja̧danö, ju'wibi iyakobe ja̧ mölema. Diteba'o damösa'o lobibö, balekwa'o 'yaya'oda iyakobe ja̧ mölema chömöledö.

^24-25 Jau chömöledö, Diosma biya̧ wene yöbawö ujuninobe ökwödönöma, Yötawi̧ ösödadönöma, tupakwö kabebö chi̧sebocha, jö̧ba̧lö. Ja̧danö, Isabenö jö̧a̧li̧danö ja̧akwo̧, jö̧ba̧lö Dios yöawi̧ ösödö dö̧jibinobe chömöledö. Jau, ja̧ Dios tupakwö ja̧akwo̧ jö̧a̧linama, Chi̧tji̧munö kabebö chi̧sebocha, jö̧ba̧lö jö̧a̧linama, ina badekwachokobe chömöledö. Ja̧danö, ina badekwachokobetjö̧, ösöwanö omukwatö dite'ada̧lobe, Isabenö Dios jö̧a̧linadanö ökwödönö kabebö i̧sebakobe, jö̧ba̧lö. Jau chömöledö, Dios jö̧a̧lina ida̧ökö badekwachinatjö̧ma, dite'ada̧lökena, ¿jö̧tö? Ida̧ökö badekwachinatjö̧ma, ¿tajawedö dite'ada̧lobö, ida̧ökö baibinobema? Jau chömöledö, ina badekwachokobe Dios jö̧a̧linama, ja̧danö, te'ada̧löda dite'ada̧lobe, Isabenö Diosma jö̧a̧linadanö ja̧akwo̧ jö̧ba̧lö.

Diosma ökwödönö jwiinö ile niebobe jö̧ba̧lö Pablo yöawina wene

²⁶ Ju'wibi yötawa chömöledö. Dujulu jwidiökwe, Dios O̧'wo̧ Luwo̧ma ökwödönö pjabato̧ chömöledö. Baikwö pjaati̧ma yötawa: Ökwödöma jweinö Dabe'do Diosnö adebobö wajwibadösa. Jo̧kwaijayonö, wajwidijayonö, Dios O̧'wo̧ Luwo̧ma ökwödönö pjabato̧ chömöledö, jo̧bada do̧'wo̧ luwo̧nö ja̧nö, Diosnö aebobe ökwödönöma. Jo̧ba Diosnö aebi̧ma döwaisoböma jwiena chömöledö. Ökwödö böjȩ jojodöma wajwibadösa, ja̧danö Dios O̧'wo̧ Luwo̧ ökwödönö aebi̧ da̧ja̧kwökena, wajwibadödobetjö̧.

²⁷ Jo̧kwaijayonö, ökwödö da̧ja̧kwököjayonö, Dabe'do Diosda jo̧ba aebi̧ a̧ja̧kwö waiso̧ma chömöledö. Jau chömöledö, Diosma ökwödö domajadenö domukwati̧ma edö waiso̧. Ja̧danö, Dios O̧'wo̧ Luwo̧ ökwödönö aebi̧bi a̧ja̧kwö waiso̧ chömöledö. Jau chömöledö, Dios O̧'wo̧ Luwo̧ma, Dabe'do Dios omukwati̧danö bakwainö omukwatö aebobe ökwödönöma. Ja̧danö, bakwainö tjomukwatobetjö̧, Dabe'do Diosma a̧ja̧kwö waiso̧ chömöledö.

²⁸ Jau chömöledö, Diosma isabenö ökwödönö pjabato̧. Jo̧bada ökwödönö jwöinobe, iteda ömöledö badibobö. Ja̧danö, jemi tupakwöbi iteda jwöinawö̧nö pjabato̧ chömöledö. Ina böjȩnö ja̧nö, döpöjödi̧ jawa baledobe, ¿jö̧tö? Ja̧danö, sulabe jawa baledobe ökwödönöma, usula demawinö, ¿jö̧tö? Jo̧kwaijayonö, döpöjödi̧ jawa baledijayonö, ja̧danö sulabe jawa ökwödönö baledijayonö, okobe jwiinö ja̧ jawa balewö lobo̧ Diosma, ökwödönö pjaati̧ jawa baibanö. Jau chömöledö, ökwödö Diosnö ösödadöma, jo̧bada jwöinawö̧sa, iteda ömöledö badibobö. Ja̧danö, iteda ösödi̧danöda jwöinobe ökwödönöma chömöledö.

²⁹ Jau chömöledö, Diosma la'akatjöda öwaisinobe jo̧banö tjösödakwedönöma, iteda ömöledö batjibakwedönöma. Ja̧danö, jejenö waisö, jobadönö 'da̧batö ujuninobe, iteda itji̧ Jesúsdanö ichejekwadö batjibo jö̧ba̧lö. Ja̧danö, weinobe, Jesúsda iteda i̧tji̧mutjö abönö pöe baibobö, ökwödö döpöe baibobö chömöledö.

³⁰ Ja̧danö, 'da̧batö ujuninawö̧nöma, Bidöma chitji̧danö tjichejekwakwedö, jö̧ba̧lö, jobadönö jwöinobe, jo̧banö tjösödo jö̧ba̧lö. Ja̧danö, jejenö jwöajawö̧nöma, sulabe jwibadö batjibobö ja̧inobe. Ja̧danö, Bidöma sulabe jwibadö, jö̧ba̧lö jö̧a̧lajawö̧nö, iteda dewinö dejatinö ujulubi iyinobe, jobadöbi tjujuna̧lo jö̧ba̧lö.

³¹ Chömöledö, biya̧ babeda yötawaja̧ omukwatö, ökwödönö suli̧ waedo̧ma bakwo̧bi deobe ichejekwa. Diosda ökwödönö pjabato̧obetjö̧, bakwo̧bi deobe ökwödönö suli̧ waedo̧ma chömöledö.

³² Jau chömöledö, Diosbi, ökwödönö suli̧ waedö̧kö̧ chömöledö, pjabatöma otiwanö pjabato̧. Jo̧bama, a̧'dȩlökönö iteda itji̧nö iyinobe, dö̧jibobö, ¿jö̧tö? Ja̧danö, ökwödönö ile nibebö, iteda itji̧nö iyinobema, jemi tupakwö, ¿okobe jwiinö otiwa jawa iyökenaji̧ chömöledö? Iyena chömöledö, ökwödönö ile niebobetjö̧.

³³ Ja̧danö, ¿bakwo̧bi ö̧jobeji̧, ökwödö Dios omudawö ujuninawö̧nö wanedö yöawakwo̧ma? ¿Diosma ökwödönö wanedö yöawenaji̧, Bidöma sulabedö, jö̧ba̧lö? Yöbawö̧kö̧ chömöledö, Diosda ida̧ökö yöbawina, Bidöma sulabe jwibadö, jö̧ba̧lö.

³⁴ Ja̧danö, ¿bakwo̧bi ö̧jobeji̧, ökwödönö, Bidöma Dios lȩebakwawö̧, jö̧ba̧lö yöawakwo̧ma? ¿Cristo Jesúsda jejenö yöawenaji̧? Yöbawö̧kö̧ chömöledö, Cristoda midawö woinobe, ökwödö dö̧jibobö. Ja̧danö, midawö wobajo̧, woawatjö tjeachajinobe. Ja̧danö, tjebachajo̧, babema Abe'do Dios öwaisobekwöchobe jo̧ jo̧bama. Ja̧danö, öwaisobekwöchobe ja̧nö, Bidönö ötjönö ösödadönö lȩkeba, jö̧ba̧lö webo̧ chömöledö.

³⁵ Jau chömöledö, Cristoma jwiinö ile niebobe ökwödönöma. Ja̧danö, Cristo jejenö ile niebobetjö̧ ¿ökwödönö 'da̧batö loawa jawa jo̧beji̧ chömöledö? Wene baibitjö̧ma, ¿'da̧bachibö dö̧jenaji̧? Inia tjöditjö̧ma, ¿'da̧bachibö dö̧jenaji̧? Ju'wedö usula demawinö ja̧tjitjö̧ma, ¿'da̧bachibö dö̧jenaji̧? A̧wi̧chi̧ tjöditjö̧ma, ¿'da̧bachibö dö̧jenaji̧? Balada jwibö, usula jojodö jwödachitjö̧ma, ¿'da̧bachibö dö̧jenaji̧? Labi̧ baledi̧ jawa ökwödönö baleditjö̧ma, ¿'da̧bachibö dö̧jenaji̧? Woditjö̧ma, ¿'da̧bachibö dö̧jenaji̧? Ja̧maökö chömöledö. Okobe jwiinö yöta̧laja̧ baledonöbi, ina jwiinö ile niebobe Jesúsma, ökwödönöma chömöledö.

³⁶ Isabenö wodena chömöledö. Dios iwene baikwö laebobe Diosnö ösödadönöma: Diosnö dösödobetjö̧, ju'wi möle jwiinö ökwödönö kwabö loawa tjösödobe ju'wedöma. Ja̧danö, o̧bȩja̧dödanö, kwabö lotjakwawö̧danö ichejekwadösa ökwödö Diosnö ösödadöma, jö̧ba̧lö laebobe.

³⁷ Jau chömöledö, okobe jwiinö yötawaja̧ baleditjö̧böbi, woditjö̧böbi, ja̧ jawa okobe junibö, ida̧ökö abönö ichibinadösa ökwödöma chömöledö, Jesúsda ökwödönö pjaatinobetjö̧. Jo̧bama ökwödönö ile nibebö pjaatinobetjö̧, ida̧ökö abönö ichibinadösa chömöledö.

³⁸ Jau chömöledö, biya̧ wenema isabenö wene. Jesúsma ökwödönö ile niebobetjö̧ 'da̧batö loawama jwiobe yelösöda ökwödönöma. Dö̧jitjö̧böbi, woditjö̧böbi, ina bakwainö 'da̧bachibö dö̧jökena. Ja̧danö, ángelesdötjöbi, ju'wedö mölejȩbe ju̧kwadötjöbi, juluwadötjöbi, bakwo̧bi deobe, ökwödönö 'da̧batö lobo̧ma. Ja̧danö, babe baledi̧bi, tupakwö baledakwa̧bi, ju'wi jayetjöbi jwiobe yelösöda ökwödönö 'da̧batö loawa jawama.

³⁹ Isabenö jwiobe yelösöda ökwödönö 'da̧batö loawa jawama chömöledö. Mölejȩbe ju̧kwi̧tjöbi, böjȩ teebe ju̧kwi̧tjöbi okobe jwiinö Dios otidina jawatjö, ju'wi jayebi jwiobe yelösöda, ökwödönö 'da̧batö loawa jawama, Dios ökwödönö ile niebobetjö̧ chömöledö. Jau chömöledö, ja̧ Dios ökwödönö ile niebi̧ma, Duluwo̧ Cristo Jesúsda wajuwanö i̧sebinobe ökwödönöma.