Romanos 7 - Dios Iwene

Jilekwenö ju̧junö Pablo wanedö yöawina wene

¹ Chömöledö, ökwödöma Dios wei̧, Moisés iwȩyudina waisadöja. Dios ja̧ wei̧ weinama ¿tinö weinada? ¿Wobinadönöda weinaji̧ chömöledö? Wobinadönöma weinokobe chömöledö, sule ina 'yaba̧ladönöda weinobe, Moisés iwȩyudina ja̧bö tjö̧joböma, ¿jö̧tö? Ja̧danö, 'yaba̧löködö Moisés iwȩyudina ja̧bö tjö̧joböma jwiinobe ¿jö̧tö?

² Jau chömöledö, baikwö wanedö yötawa: Bakwuju, jilekwenö ju̧juma, jilekwekwöda jö̧jobö jo̧be. Ja̧danö, Diosma weinobe, Kwilekwe ina ö̧jayi jelo̧nöma kwema, jö̧ba̧lö. Jo̧kwaijayonö, jilekwenö wobekwinujunöma jejenöma, Jelo̧nöma kwema, jö̧ba̧löma weokoko.

³ Ja̧danö, jilekwe ina ö̧jayi jelo̧nö jemenama, Jilekwebö̧kö̧kwö sulabenö ja̧buju, yötja̧lena jobujunöma. Jo̧kwaijayonö, jilekwenö wobekwinujuma, wene jwibuju, jelo̧nö jemijayonö. Ja̧danö, jilekwenö wojekwinobetjö̧, jelo̧nö jemijayonö, jobujunö yötja̧lökena, Jilekwebö̧kö̧kwö sulabenö ja̧buju, jö̧ba̧lö.

⁴ Ökwödöbi ja̧danö chömöledö. Ökwödöbi ida̧ökö wodinobe chömöledö. Dios edemi Jesús woinenama, ökwödöbi bakobe Cristokwö a̧jö wodinobe. Jau chömöledö, Moisés iwȩyudina junibö, Jesúskwö a̧jö wodinobe. Ja̧danö jejenö wodinobetjö̧, Moisés iwȩyudinama ökwödönö weokobe babema, ida̧ökö wodinobetjö̧. Ja̧danö, babema Cristokwöda dö̧jobe. Jau chömöledö, Dios woawatjö tjeachajinö ja̧inökwekwöda dö̧jobe babema. Ja̧danö, jo̧bakwöda dö̧jobetjö̧, babema Dios ösödinö ja̧dobö jo̧be.

⁵ Jau chömöledö, suli̧ ömöayedödanö ina dö̧jayi, otiwanö ja̧bö dö̧joböma jwiinobe. Ja̧danö, Dios weina Moisés iwȩyudinama pjaatinokobe ökwödönöma. Moisésma iwȩyudinobe Dios ösödi̧ jawabi, Dios öpöjödi̧ jawabi, chömöledö. Ja̧danö, ja̧ jawa da̧ja̧kwenama, Dios ösödi̧ jawada ja̧do jö̧da̧linobe ¿jö̧tö? Jo̧kwaijayonö, waekwinobe chömöledö, Moisés iwȩyudina da̧ja̧kwenama, ju'wida baibinobe chömöledö. Dios öpöjödi̧ jawa da̧ja̧kwenama sulabe dujuna̧li̧ma ökwödönö weinobe ichejekwa. Ja̧danö, ökwödönö weenama, otiwanö Dios ösödinö ja̧doböma weinokobe, jwaikwöda Dios öpöjödi̧ jawada ja̧doböma weinobe ichejekwa. Ja̧danö, okobe jwiinö dö̧jinama, jwaikwöda woawa jawada ja̧bö ji̧adinobe chömöledö.

⁶ Jau chömöledö, ajayinöma Moisés iwȩyudinama ka̧lenadanö ichejekwinobe. Jo̧kwaijayonö, Moisés iwȩyudina junibö wodinobe. Ja̧danö, ida̧ökö wodinobetjö̧, babema Moisés iwȩyudina ja̧bö dö̧joböma jwiobe. Ida̧ökö wodinobetjö̧, Moisés iwȩyudinama ka̧lenadanö ichejekwokobe ökwödönöma. Ja̧danö, babema Dios ösödi̧da ja̧dobö jo̧be. Jau chömöledö, Dios O̧'wo̧ Luwo̧ ökwödönö pjaatobetjö̧, Dios ösödi̧da ja̧bö dö̧jobö jo̧be babema.

Sulabe dujuna̧li̧ma ökwödönö suli̧ waedobe jö̧ba̧lö Pablo yöawina wene

⁷ Jau chömöledö, Moisés iwȩyudinama, ka̧lenadanö jo̧be. Ja̧danö ¿sulobeji̧ Moisés iwȩyudinama? Sulokobe chömöledö. Jo̧kwaijayonö, sulököjayonö, Moisés iwȩyudina cha̧ja̧kwenama, chusuli̧ chöwaisachibinobe chömöledö. Wanedö yötawa: Ajayinöma, ju'wedö tjitea ösödö chedinobe, ja̧ tjujuna̧li̧ma ötjöda chujuna̧lo jö̧ba̧lö. Jejenö chedijayonö, chomukwatinokobe, Sulabenö cheda, jö̧ba̧lö. Jemi ikenama, Dios weökwe, Moisés iwȩyudinama cha̧ja̧kwinobe, Ju'wedö tjiteama ösödö kweda, jö̧ba̧lö. Ja̧ Dios weina cha̧ja̧kwinökötjö̧ma, ösödö chedi̧ma chöwaisachiboko jö̧ta̧linena.

^8-9 Ja̧danö, Dios weina cha̧ja̧kwenama, sulabe chujuna̧li̧ ötjönö suli̧ waedinobe ichejekwa, ajayi ju'wedö tjujuna̧li̧ ösödö chedinemi bajalekwönönö ösödö chedinö. Jau chömöledö, ajayinöma, Ötjöma otiwo̧sa, jö̧ba̧lö, chomukwatinobe. Ikenama, Dios weina a̧ja̧kwö, sulabe chujuna̧li̧ chöwaisachibinobe. Ja̧danö, sulabe chujuna̧li̧ chöwaisachibenama, sulabe chujuna̧li̧ma jwiinö juluwinobe ötjönöma, jwaikwöda sulabenö ja̧tinö. Jau chömöledö, Dios weina chöwaisachibakwa̧ abönö, sulabe chujuna̧li̧ma ötjönö juluwinokobe ichejekwa. Jo̧kwaijayonö, chöwaisachibenama, jenada juluwinobe ötjönöma ichejekwa, ö'wö batibanö ja̧bö.

¹⁰ Jau chömöledö, Diosma Moisésnö iwȩyudobö weinobe, Okobe jwiinö biya̧ jawa ja̧bo̧ma, ja̧kwawa ujuna̧lakwo̧, jö̧ba̧lö. Ja̧danö, ja̧kwawa iyi̧ weawa baibanö weinobe ichejekwa. Jo̧kwaijayonö waekwinobe chömöledö. Ja̧kwawa ötjönö iyo jö̧a̧lijayonö, ju'wida, wobaleda iyinobe ichejekwa chömöledö.

¹¹ Jau chömöledö, wanedö yötawa: Sulabe chujuna̧li̧ma, ötjönö omöna yöba̧lö, suli̧ waedinobe ichejekwa. Ajayinöma, Moisés iwȩyudina cha̧ja̧kwenama, Biya̧nö ja̧bö chö̧jibocha, jö̧ba̧lö, chomukwatinobe. Ikenama, waekwinobe. Diosma otiwanö weinajayonö, sulabe chujuna̧li̧ma, ja̧ Dios otiwanö weina jawatjö ötjönö ö'wö batibanö ja̧inobe ichejekwa.

¹² Jau chömöledö, Moisés iwȩyudinama jwiinö otiwinobe, Diostjöda ichinobetjö̧. Ja̧danö, Moisés iwȩyudinama otiwanö yöawobe Dios ösödi̧ma. Jau chömöledö, okobe jwiinö Dios weina Moisés iwȩyudinama jwiinö otiwinobe.

¹³ Ja̧danö, Dios weina Moisés iwȩyudinada ¿ö'wö batibanö ja̧inaji̧ chömöledö? Ö'wö batibanö ja̧inokobe, sule i̧seböda i̧sebinobe chusuli̧ma. Ja̧danö, sulabe chujuna̧li̧da ö'wö batibanö ja̧inobe chömöledö. Diosma otiwa jawa iyö weinajayonö, sulabe chujuna̧li̧ma ja̧ otiwa jawatjö ötjönö ö'wö batibanö ja̧inobe ichejekwa chömöledö. Jau, sulabe dujuna̧li̧ma jwiinö sulobe chömöledö.

Dujulunöma Dios wei̧ ja̧böködösa jö̧ba̧lö Pablo yöawina wene

¹⁴ Jau chömöledö, Dios weinama jwiinö otiwobe, jo̧batjöda ichobetjö̧. Ötjödasa wene juna̧lo̧ma, böjȩ jojochobetjö̧. Ja̧danö, suli̧ ömöayo̧danö chichejekwa chömöledö.

¹⁵ Jau chömöledö, ötjö ja̧bö chö̧ji̧ma waiya, ötjöbi wajwita chö̧ji̧ma. Baikwö yötawa chömöledö, ötjöda chujulunö chö̧ji̧ma: Otiwanö ja̧tobö chösödijayonö, waekwobe, otiwanö ja̧tökö. Ja̧danö, otiwa jawa chösödi̧ma ja̧bökönö, chöpöjödi̧ jawada ja̧bo̧sa, sulabenö.

¹⁶ Chömöledö, Moisés iwȩyudinama chösöda ötjöma, Jweinö iwȩyudinobe, jö̧ba̧lö. Isabenö jweinö iwȩyudinobe Dios öpöjödi̧ jawa, ja̧danö ötjöbi ja̧ jawa chöpöjöda, Isabenö sula, jö̧ba̧lö chömöledö. Ja̧danö, ötjöma chösöda Moisés iwȩyudinama chömöledö, Otiwa jö̧ba̧lö. Jo̧kwaijayonö, jejenö chomukwatijayonö, yayonö ja̧ chöpöjödi̧ jawada ja̧bo̧sa.

¹⁷ Jau chömöledö, isabenö chöpöjödobe, sulabenö ja̧awama. Ja̧danö, ötjö chöpöjödi̧ jawada ja̧titjö̧ma, ötjömaökö sulabenö ja̧bo̧ma, sulabe chujuna̧li̧da sulabenö ja̧obe ichejekwa chömöledö.

¹⁸ Jau chömöledö, biya̧ wene chöwaisa: Ötjö böjȩ jojoma, ja'yubebi otiwa jawa jwibo̧sa, jö̧ba̧lö. Ja̧danö, ötjö chujulunö otiwa jawa ja̧tobö chösödijayonö, waekwobe, sulabe jawada ja̧bo̧sa.

¹⁹ Jau chömöledö, otiwa jawa chösödi̧ma, ja̧ jawa ja̧bö̧kö̧sa. Ja̧danö sulabe jawa chöpöjödi̧ma, ja̧ jawada ja̧bo̧sa.

²⁰ Ja̧danö chöpöjödinö ja̧titjö̧ma, ötjömaökö chöpöjödinö ja̧bo̧ma, sulabe chujuna̧li̧da chömöledö.

²¹ Jau chömöledö, kabatökönö, otiwanö ja̧tobö chösödenama, otiwa jawa chösödi̧ma ja̧bö̧kö̧sa, sulabe jawa chöpöjödi̧da ja̧bo̧sa. Jejenö ja̧bö chi̧sebobe, sulabema ina ötjökwö jo̧be jö̧ba̧lö.

²² Isabenö chösödobe Dios weinama, Biya̧da ja̧bö chö̧jo, jö̧ba̧lö.

²³ Jo̧kwaijayonö, ju'wibi jo̧be chömöledö. Wanedö yötawa, ötjö chujulunö chö̧ji̧ma: Ötjöma otiwanö chomukwatobe chömöledö. Jo̧kwaijayonö, otiwanö chomukwatijayonö, chiteba'onö chomukwati̧ öpöjojo ö̧jobe ichejekwa. Ja̧danö, ölakwabikwawobe jo̧be ichejekwa chömöledö. Ja̧danö, ölakwabikwawobe jo̧bema, ka̧lena chö̧bobedanö ichejekwa chömöledö. Ja̧danö, ka̧lena chö̧bobema, sulabenö ja̧tobe chömöledö.

^24-25 Jau chömöledö, otiwanö omukwato̧sa. Dios ösödinö ja̧tobö omukwato̧sa. Jo̧kwaijayonö, otiwanö ja̧tobö chomukwatijayonö, waekwobe chömöledö. Sulabe chujuna̧li̧ ötjönö juluwobetjö̧, waekwobe chömöledö. Ja̧danö, sulabe jawa, Dios öpöjödi̧ jawada ja̧bo̧sa chömöledö. ¡Ayö, Ötjöwe! Sulabe chujuna̧li̧tjö ¿dakwö chö̧jibakwajö chömöledö? ¿Tida ötjönö pjaatakwo̧ma, sulabe chujuna̧li̧tjö chö̧jibobö chömöledö? Diosda otiwanö pjaatinobe chömöledö. Jesucristoda midawö woinobetjö̧, Diosma ökwödönö pjaatinobe chömöledö.