Romanos 6 - Dios Iwene

Dios edemi, Jesúsnö ösödadöma Jesúskwö bakobe wodinobe jö̧ba̧lö Pablo yöawina wene

¹ Jau chömöledö, jojodö jwaikwöda sulabenö ja̧bö tjö̧jijayonö, ina lȩlö̧jinö edinobe Diosma. Jo̧kwajabetjö̧ ¿dakwö ja̧dakwa̧da ökwödöma chömöledö? ¿Jwaikwöda sulabenö ja̧bö dö̧jenaji̧ chömöledö? Aaa, sulabenö ja̧tijayonö, Diosma lȩlö̧jinö edakwo̧, jö̧ba̧lö, ¿jwaikwöda sulabenö ja̧bö dö̧jobö jo̧beji̧?

² Jejenömaökö chömöledö. Ina sulabedö dö̧jayi, sulabe dujuna̧li̧ juluwinobe ökwödönöma ichejekwa, jwaikwöda sulabenö ja̧dobö, ¿jö̧tö? Jo̧kwaijayonö ökwödö Jesúsnö ösödadöma, sulabedöböködösa ökwödöma babema. Ja̧danö, ju'wibi, ökwödö Jesúsnö ösödadöma, Jesús woenama, ökwödöbi wodinobe chömöledö, sulabe dujuna̧li̧ juluwökönö ökwödönöma. Jejenö wodinobetjö̧ ¿tajawedö ina sulabenö ja̧bö dö̧jobö chömöledö?

³ Kwöwaisaduwa chömöledö, Diosma ja̧inobe ökwödönöma, Cristo Jesúskwö bakobe badibanö, ¿jö̧tö? Ökwödönöma Jesúskwö aninobe chömöledö, ja̧danö Jesúskwö aninobetjö̧, Jesúskwö da̧jobe chömöledö. Ja̧danö, bakobe Jesúskwö da̧jobetjö̧, Jesús woinenama, ökwödöbi wodijatö chömöledö.

⁴ Ja̧danö, bakobe wodinobetjö̧, jo̧banö tjödinenama, bakobe ökwödönöbi tjödinobe. Ja̧danö, jemi tupakwö Abe'do Diosma, iteda ujulu i̧sebö Jesúsnö woawatjö tjebatajö ja̧inobe. Jejenö jo̧banö tjebatajö ja̧inenama, ju'wibi ja̧inobe chömöledö. Ökwödö jo̧bakwö a̧jadönöbi 'yadibajinö ja̧inobe. Ja̧danö, 'yadibajinö ja̧inobema, 'yayi̧ jawa, wainö ja̧bö dö̧jobö ja̧inobe. Jau chömöledö, yemidanö ajayinö ja̧bö dö̧jinadanö dö̧joböma ja̧inokobe, wainö ja̧bö dö̧jobö ja̧inobe Diosma.

⁵ Jau chömöledö, bakobe ja̧nö Jesús woina bakobe wodinobetjö̧, ju'wibi yemidanö woawatjö tjeachajenama ökwödöbi jo̧bakwö bakobe yemidanö tjedachajinobe. Jo̧kwajabetjö̧ isabenö wainö, otiwanö ja̧bö dö̧jobö jo̧be babema.

⁶ Tupakwö yötawaduwakwö chömöledö: Ökwödö do̧'wo̧ luwo̧ ajayi luwo̧ma woinobe, bakobe Cristokwö towisa'onö ja̧nö. Ja̧danö, ajayi luwo̧ do̧'wo̧ luwo̧ma woinobe, jemi tupakwö sulabe dujuna̧li̧ ökwödönö juluwökönö.

⁷ Jau chömöledö, kwöwaisaduwa, ida̧ökö wobinama, jo̧ba sulabe ujuna̧li̧ma juluwökökwe, ida̧ökö woinobetjö̧, ¿jö̧tö?

⁸ Chömöledö, bakobe ja̧nö Cristokwö wodinobetjö̧, ju'wibi döwaisena, Cristo yemidanö ö̧jenama, ökwödöbi jo̧bakwö bakobe dö̧jena, jö̧ba̧lö.

⁹ Chömöledö, döwaisa, Diosma Cristonö tjeachajinö ja̧inobe woawatjöma, ja̧danö, jemi tupakwö, yemidanö woökena Jesúsma. Babema woawama juluwokobe yelösöda jo̧banöma.

¹⁰ Jau chömöledö, Cristoma bakwötanöda woinobe, ökwödö sulabe dujuna̧li̧ imidawinobe, ¿jö̧tö? Ja̧danö, jejenö woinemi o̧pema, babema woawama yelösöda juluwokobe jo̧banöma, dötölatajanö woökena chömöledö. Babe tjebachajö ö̧jobema, otiwanö bakobe Dioskwöda ö̧jobe.

¹¹ Ja̧danö, ökwödöbi baikwö kwomukwataduwo chömöledö: Ökwödö Jesucristonö ösödadöma, jo̧bakwö bakobe wodinobetjö̧, wodinemi tupakwö sulabe dujuna̧li̧ma ökwödönöbi juluwokobe. Ja̧danö, ju'wibi domukwatobö jo̧be chömöledö. Bakobe Jesúskwö 'yadibajinobetjö̧ babema Cristo Jesúskwö bakobe dö̧jobe, otiwanö. Ja̧danö, jo̧bama Dioskwö babema ö̧jobetjö̧, ökwödöbi otiwanö bakobe dö̧jobe Dioskwö chömöledö.

¹² Jau chömöledö, wanedö yötawa: Ajayima, suli̧ ömöayedödanö ji̧nadöja ajayima. Jo̧kwaijayonö, babema suli̧ ömöayedödanöböködöja. Jo̧kwajabetjö̧, suli̧ wei̧tjöma ja̧köbaduwa chömöledö, böjȩ jojodö sulabe jawa tjösödi̧ma.

¹³ Ja̧danö, ja'yubebi suli̧ wei̧tjöma ja̧köbaduwa chömöledö. Wainö ja̧köbaduwo chömöledö. Ökwödönöma Dios ja̧inawö̧ja woawatjö tjekachajaduwinö chömöledö. Jo̧kwajabetjö̧, jo̧bada ömöayedö baibanö kwö̧jaduwo chömöledö. Jwaikwöda Dios wei̧da ja̧bö kwö̧jaduwo, suli̧ wei̧tjöma ja'yubebi ja̧bökönö. Ja̧danö, Dios ömöayedö ja̧nö, otiwanö ja̧bö kwö̧jaduwo, jo̧ba wei̧danö.

¹⁴ Jau chömöledö, suli̧ma ökwödönö juluwoböma jwiobe yelösöda babema, Diosma suli̧tjö kwö̧jibaduwanö ja̧inobetjö̧. Jo̧kwajabetjö̧, jwaikwöda otiwanö ja̧bö kwö̧jaduwo, sulabenö ja̧bökönö. Jau chömöledö, Diosma ökwödönö weinokobe, Okobe jwiinö Moisés iwȩyudina ja̧bö kwö̧jaduwo, jö̧ba̧lö. Ju'wida ja̧inobe, itedada mikwa jwiinö otiwa jawa iyö, suli̧tjö kwö̧jibaduwanö ja̧inobe. Ja̧danö jejenö pjaatinobetjö̧, suli̧ma ja'yubebi ökwödönö juluwoböma jwiobe chömöledö.

Ajayima, suli̧ ömöayedödanö dö̧jijayonö, babema Dios ömöayedödanö dö̧jobe jö̧ba̧lö Pablo yöawina wene

¹⁵ Jau chömöledö, Diosma mikwa jwiinö otiwa jawa iyö, suli̧tjö dö̧jibanö ja̧inobe, ¿jö̧tö? Ja̧danö, okobe jwiinö Moisés iwȩyudina ja̧bö kwö̧jaduwo, jö̧ba̧lö weinokobe, ¿jö̧tö? Jo̧kwajabetjö̧, ¿dakwö ja̧dakwa̧da chömöledö? Okobe jwiinö Moisés iwȩyudina ja̧bö kwö̧jaduwo, jö̧ba̧lö weinokobetjö̧, ¿jwaikwöda sulabenö ja̧bö dö̧jenaji̧ chömöledö? Jejenömaökö chömöledö.

¹⁶ Baikwö wanedö yötawa: Bakwo̧, Weköbi̧da ja̧bö chö̧jo, kwömöayo̧ baibanö, jö̧ba̧lö, jwaikwöda uluwo̧ wei̧ ja̧bö ö̧jitjö̧ma, uluwo̧ ömöayo̧da ö̧jena, ¿jö̧tö? Ja̧danö, suli̧ ömöayedödanöbedöbi tjuju̧kwobe, ja̧danö Dios ömöayedöbi tjuju̧kwobe. Suli̧ ömöayedödanöbedöma, wotjakwedö, sulabenö ja̧awa mikwawi̧ma wobaledaobetjö̧. Jo̧kwaijayonö, Dios ömöayedöbi tjuju̧kwobe. Jobadönöma, Bidöma sulabe jwibadö, jö̧ba̧lö jö̧a̧lakwo̧ Diosma.

¹⁷ Ja̧danö, ökwödöma ajayinöma suli̧ ömöayedödanö kwuju̧kwinaduwobe. Jo̧kwaijayonö, suli̧ ömöayedödanö kwuju̧kwaduwemi ja'ötjö, Dios iwene kwa̧ja̧kwinaduwobe. Ja̧danö, isabenö wene a̧ja̧kwibö, jwaikwöda Dios iwene kwösödinaduwobe chömöledö.

¹⁸ Jejenö kwösödaduwiökwe, suli̧tjö kwö̧jibaduwanö ja̧inobe Diosma, iteda ömöayedö bakibaduwanö. Ja̧danö, Dios ömöayedö babibö, otiwa jawa ja̧tjakwedö bakibinaduwobe. Jau chömöledö, Diosma otiwanö pjaatinobe ökwödönöma. Ja̧danö, otiwanö pjaatina omukwatö, jo̧banöda dösödena, otiwanö pjabato̧ja jö̧ba̧lö.

¹⁹ Jau chömöledö, biya̧ yötawi̧ma, waiya böjȩ jojodönöma. Jo̧kwajabetjö̧, wanedöda yötawa, otiwanö kwöwaisachibaduwobö: Ajayima, suli̧ ömöayedödanö kwuju̧kwinaduwobe. Ja̧danö, jwaikwöda sulabenö ja̧bö kwuju̧kwinaduwobe, taba lö̧ji̧ jawabi, Dios weökö jawabi ja̧bö. Babema, suli̧ ömöayedödanöma bö̧ködöja. Babema, Diosda ömöayedöja. Jau chömöledö, ajayinö suli̧ wei̧tjö jwaikwöda ja̧bö kwö̧jinaduwobe ¿jö̧tö? Ja̧danö, babema suli̧tjö 'da̧bachibö, balekwa jwaikwöda Dios wei̧da ja̧bö kwö̧jaduwo, otiwa jawada ja̧bö.

²⁰ Jau chömöledö, ajayinöma suli̧ ömöayedödanö kwö̧jinaduwobe. Ja̧danö, suli̧ ömöayedödanö ja̧nö, Dios wei̧ma ja̧böködö kwö̧jinaduwobe.

²¹ Jejenö kwö̧jinaduwama, ¿taji mikwawinada chömöledö? Babema, ajayinö ja̧köbinaduwi̧ omukwatö, kwötabakwaduwobe, ¿jö̧tö? Ja̧danö, ju'wibi, jejenö ja̧awa mikwawi̧ma wobaleda.

²² Jo̧kwaijayonö, Diosma suli̧tjö kwö̧jibaduwanö ja̧bö, iteda ömöayedö bakibaduwanö ja̧inobe. Ja̧danö, ja̧ Dios ömöayedö kwö̧jaduwi̧ mikwawi̧ma biya̧da chömöledö: Babema sulabetjö 'da̧bachibö ja̧nö, ba̧kwȩlö̧jatebö ja̧kwawa juna̧ladöja.

²³ Jau chömöledö, sulabenö ja̧di̧ mikwawi̧ma wobaleda. Jo̧kwaijayonö, Dios mikwa jwiinö otiwa jawa iyi̧ mikwawi̧ma ja̧kwawa jawada chömöledö. Dios mikwa jwiinö otiwa jawa iyi̧ mikwawi̧ma, ba̧kwȩlö̧jatebö ja̧kwawa Duluwo̧ Cristo Jesúskwö chömöledö.