Romanos 5 - Dios Iwene

Dios ökwödönö ile niebi̧ wene

¹ Ja̧danö, ökwödö Jesúsda dö̧jibinö pjabato̧, jö̧ba̧lö dösödiökwe, Diosma jö̧a̧linobe, Chedemi bidöma suli̧ jwibadö, jö̧ba̧lö. Jejenö jö̧a̧linobetjö̧, wene jwibadö otiwanö dö̧jobe Dioskwö. Ja̧ wene jwibadö dö̧ji̧ma, Duluwo̧ Jesucristoda ja̧ina.

² Ja̧danö, ju'wibi chömöledö. Jesúsda dö̧jibinö pjabato̧, jö̧ba̧lö dösödiökwe, Diosma mikwa jwiinö otiwa jawa iyinobe ökwödönöma. Ja̧danö, do̧'wo̧ ösöwanö dö̧jobe, isabenö Dios dewinö idejatena duju̧kwakwedösa jö̧ba̧lö. Ja̧bi Cristoda ja̧ina chömöledö.

³ Ju'wibi chömöledö, ökwödönö wene baibenama, jwiinöma do̧'wo̧ tjo̧achökena. Jwaikwöda do̧'wo̧ ösöwanö ja̧nö domukwatena, Biya̧ wene baibi̧ma otiwanö baibobe, ökwödönö pjaati̧, jö̧ba̧lö. Baikwö pjaati̧ chömöledö: Wene baleditjö̧ma, baledajadöma, tupakwö dujuluwachibanö, juluwanö me'dawachiböködödanö baibanö dö̧jena.

⁴ Ja̧danö, juluwanö me'dawachiböködödanö dö̧jitjö̧ma, do̧'wo̧ luwo̧bi ujuluwachibena tupakwö. Jejenö ujuluwachibobetjö̧ yemidanö wene baibenama do̧'wo̧ tjo̧achökena, Biya̧bi ötjönö pjaati̧ jawa baibanö ja̧akwo̧ Diosma, jö̧ba̧lö.

⁵ Jau chömöledö, Diosma isabenö ökwödönö pjabato̧. Diosma öwaetjöda i̧sebinobe ökwödönö ile niebi̧ma chömöledö. Otiwa jawa mikwa jwiinö iyö, iteda o̧'wo̧ luwo̧nö iyinobe, ökwödö do̧'wo̧ luwo̧nö ö̧jobö. Ja̧danö, do̧'wo̧ luwo̧nö ja̧nö Dios ökwödönö ile niebi̧ma öba̧ja̧dobe ökwödönöma, Dios O̧'wo̧ Luwo̧ma chömöledö.

⁶ Jau chömöledö, Diosma isabenö ökwödönö ile niebobe. Ökwödöma ina dö̧jibobö dujulu jwiayi, Dios 'da̧batö ujunina möle badekwachinobe. Ja̧ möle badekwachenama, Cristoma midawö woinobe, ökwödö sulabedöma dö̧jibobö.

⁷ Jejenö dö̧jibobö midawö woinama isabenö öwaetjöda i̧sebobe Dios inesö ökwödönö ile niebi̧ma chömöledö. Baikwö yötawa: Ökwödö jojodöma jwiinö öpöjödadösa woawama, ¿jö̧tö? Ja̧danö, bakwo̧ ökwödönö jö̧a̧litjö̧ma, Ökwöda balekwo̧da woköbitjö̧ma, bite ö̧jibena, jö̧ba̧lö jö̧a̧litjö̧ma döpöjödena, ¿jö̧tö? Bakwo̧ jwiinö otiwanö ja̧bö jo̧ ö̧jibobö, ju'wedökwena balekwedö wotjobö tjöpöjödökena, jo̧kwaijayonö, sulabedö tjö̧jiboböma la'akatjöda balekwo̧ baibanö wodobö döpöjödena böjȩ jojodöma. Ja̧danö, otiwadö ötjabiwö̧ tjö̧jiboböbi balekwo̧ baibanö wodoböma döpöjödena, ¿jö̧tö?

⁸ Jo̧kwaijayonö, jojodödanömabö̧kö̧ Diosma chömöledö. Jo̧bama sule otiwanö ja̧badönöda pjaatoböma ja̧inokobe. Ja̧danö, Diosma wajuwanö i̧sebobe iteda ökwödönö ile niebi̧ma chömöledö. Ina sulabenö ja̧bö dö̧jayi, Cristoma midawö woinobe, ökwödö dö̧jibobö.

⁹ Jau, Cristoma midawö woinobe, iteda ökwösobu ebawinö. Jejenö ja̧inobe, Diosma ökwödönö yöawakobetjö̧, Chedemi bidöma suli̧ jwibadö, jö̧ba̧lö. Jejenö pjaatotö jö̧ba̧lö midawö woinobe. Ja̧danö ¿dakwö kwomukwataduwa? ¿Ökwödönö, jo̧banö ösödadönö babema öpöjödenaji̧ Jesúsma? Dios lȩebakwa̧ möle badekwachenama ökwödönö öpöjödö, Bidönö lȩkebo, jö̧ba̧lö, ¿weakwa̧ji̧?

¹⁰ Weökakobe chömöledö. Baikwö yötawa: Dios öpöjojodö dö̧jayi, Dios i̧tji̧ma midawö woinobe, Dios ömöledö badibanö ja̧bö, ¿jö̧tö? Jau chömöledö, Jesúsma ökwödö sulabedönö, jo̧banö öpöjödadönö pjaatinobe. Ja̧danö, jejenö jo̧banö öpöjödadönö pjaatinobema, ¿iteda ömöledönö pjaatökenaji̧? Babema woina tupakwö, woawatjö yemidanö tjeachajinobema, ¿pjaatökenaji̧? Pjaatena chömöledö. Jemi tupakwöda pjabato̧ chömöledö iteda ömöledönöma, Dios lȩebakwa̧tjö ja'yubebi demapji jö̧ba̧lö.

¹¹ Ja̧danö, ju'wibi chömöledö, babema jwiinö do̧'wo̧ ösöwanö dö̧jobe, Babema Dios ömöledösa jö̧ba̧lö. Jau chömöledö, ja̧ Dios ömöledö dö̧ji̧ma, Dios ja̧inada chömöledö, Duluwo̧ Jesucristoda midawö woinobetjö̧.

Adánnöbi, Jesucristonöbi Pablo yöawina wene

¹² Chömöledö, ju'wibi yötawa. Ajayinöma suli̧ jwiinobe böjȩnöma, ikenama bakwo̧da Dios weökö jawa ja̧inobe. Ja̧danö, jo̧ba Dios weökö jawa ja̧inobema, okobe deinö jo̧ba i̧tji̧mu tupadanö jojodöbi Dios weökö jawa ja̧tjinobe, woba jojodö batjibanö.

¹³ Jau chömöledö, Dios weökwe Moisés iwȩyudakwa̧ abönö, jojodöma ida̧ökö Dios weökö jawa ja̧binadö. Jo̧kwaijayonö, Dios weökö jawa ja̧tjobema wajwitjo jö̧tja̧linena, Dios Moisés iwȩyudina ina weokobetjö̧.

¹⁴ Jau chömöledö, Moisés iwȩyudina ina jwiayi, okobe deinö Adán i̧tji̧mu tupadanö jojodöma wotjinobe. Adánnöma weinobe Diosma, Bowitjö kwukwoko, jö̧ba̧lö. Ikenama, Dios weökö jawa ja̧bö, Dios weinokowitjö ukwinobe Adánma. Ja̧danö, Adán i̧tji̧mu tupadanö jojodöma Dios weinokowitjö tjukwinokobe chömöledö, jo̧kwaijayonö ina Dios weökö jawa ja̧binadö jobadöbi. Ja̧danö, Dios weökö jawa ja̧tjinobetjö̧, okobe deinö wotjinobe, Dios Moisésnö iwȩyudobö weenanö baibanö. Jau chömöledö, ajayinö ji̧na Adánma, jemi tupakwö ichakwo̧ Jesúsdanö ichejekwinö̧kö̧.

¹⁵ Ja̧danö, Dios mikwa jwiinö otiwa jawa iyi̧ma, Adán Dios weökö jawa ja̧inadanö ichejekwokobe. Baikwö yötawa: Ajayinöma, bakwo̧da Dios weökö jawa ja̧inobetjö̧, okobe deinö woba jojodö batjibinobe. Jo̧kwaijayonö, Dios mikwa jwiinö otiwa jawa iyi̧ma wainö ji̧. Jesucristoma mikwa jwiinö otiwa jawa iyö ja̧inobetjö̧, mikwa jwiinö otiwa jawa iyawa jo̧be, ba̧jekwadönöma. Ja̧danö, Adánma ba̧jekwadö wotjawinö ja̧bina, ja̧danö Jesucristoma ba̧jekwadö ba̧kwȩlö̧jatebö tjö̧jinö ja̧bina.

¹⁶ Jau chömöledö, Adánma Dios weökö jawa ja̧emi, okobe deinö iteda i̧tji̧mu tupadanö jojodöma sulabedö batjibanö ja̧inobe. Ja̧danö, okobe deinö jo̧ba i̧tji̧mu tupadanö jojodönö jö̧a̧linobe Diosma, Chedemi bidöma suli̧ juna̧ladö, jö̧ba̧lö. Jo̧kwaijayonö, Dios mikwa jwiinö otiwa jawa iyi̧ma wainö ji̧. Okobe deinö Dios weökö jawa ja̧tjijayonö, Diosma, mikwa jwiinö otiwa jawa iyö, Chedemi bidöma suli̧ jwibadö, jö̧a̧lobe.

¹⁷ Isabenö bakwo̧ sulabenö ja̧inobetjö̧, woawa jamatinobe. Ja̧danö, jo̧ba sulabenö ja̧inama jwiinö juluwinobe ichejekwa, ba̧jekwadö wotjawinö ja̧bö. Jo̧kwaijayonö, jelo̧ Jesucristo ja̧inama, jemi bajalekwönönö juluwi̧ ji̧. Jau chömöledö, Jesús midawö woinobetjö̧, mikwa jwiinö otiwa jawa iyö, Diosma ba̧jekwadönö jö̧ba̧lo̧, Chedemi bidöma suli̧ jwibadö, jö̧ba̧lö. Ja̧danö bakwo̧, Jesucristoda midawö woinobetjö̧, ba̧jekwadöma ji̧badö, ja̧danö ba̧kwȩlöjateböda tjö̧ja̧kwedö.

¹⁸ Jau chömöledö, bakwo̧ bakwötanöda Dios weökö jawa ja̧inobetjö̧, okobe deinö jojodönö jö̧a̧linobe Diosma, Chedemi bidöma suli̧ juna̧ladö, lȩtebakwawö̧, jö̧ba̧lö. Ja̧danö, Jesucristoma bakwötanöda Dios wei̧ ja̧inobetjö̧, Jesucristonö ösödadönö jö̧ba̧lo̧ Diosma, Chedemi bidöma suli̧ jwibadö, jö̧ba̧lö.

¹⁹ Jau chömöledö, bakwo̧da Dios weökö jawa ja̧inobetjö̧, okobe deinö suli̧ juna̧ladö batjibinobe. Ja̧danö, bakwo̧da Dios wei̧ ja̧inobetjö̧, ba̧jekwadö suli̧ jwibadö batjibobe. Jau chömöledö, bakwo̧da Dios wei̧ ja̧inobetjö̧, ba̧jekwadönö jö̧ba̧lo̧ Diosma, Chedemi bidöma suli̧ jwibadö, jö̧ba̧lö.

²⁰ Chömöledö, Diosma iteda wei̧ jojodö ja̧bö tjö̧jo jö̧ba̧lö wei̧ma Moisésnö iwȩyudobö weinobe. Jojodö Dios weökö jawa ja̧tji̧ma tjöwaisachibotö jö̧ba̧lö weinobe, ja̧ Moisés iwȩyudinama. Iwȩyudakwa̧ abönö, ida̧ökö Dios weökö jawa ja̧tjinajayonö, Moisés iwȩyudinelöda tjöwaisachibobö ji̧nobe, Aaa, Dios weökö jawa ja̧badösa, jö̧ba̧lö. Ja̧danö, jemi tupakwö, ina jwaikwöda sulabenö ja̧bö tjö̧jinobe jojodöma. Ja̧danö, jemi tupakwö jojodö sulabenö ja̧tji̧ma nöachinobe ichejekwa. Jo̧kwaijayonö, jojodö sulabenö ja̧tji̧ma nöachijayonö, Diosma ina lȩlö̧jinö edinobe jojodönöma. Ja̧danö, jojodö sulabenö ja̧tji̧ nöachemi o̧pekwönönö nöachinobe Dios lȩlö̧jinö edi̧ma ichejekwa. Ja̧danö lȩlö̧jinö edö, mikwa jwiinö otiwa jawa iyö, jojodönö pjaatinobe Diosma.

²¹ Jau chömöledö, jojodö sulabenö ja̧tji̧ma isabenö juluwinobe, jojodö wotjawinö ja̧bö. Ja̧danö Dios mikwa jwiinö otiwa jawa iyi̧bi juluwi̧, jojodö ba̧kwȩlö̧jatebö tjö̧jakwedö batjibanö ja̧bö. Jau chömöledö, Duluwo̧ Jesucristoda midawö woinobetjö̧, Diosma, ökwödönö mikwa jwiinö otiwa jawa iyö, Chedemi bidöma suli̧ jwibadö, jö̧ba̧lö, ba̧kwȩlö̧jatebö ja̧kwawa iyobe ökwödönöma.