Romanos 4 - Dios Iwene

Pablo Abrahamnö yöawina

¹ Chömöledö ¿ökwödö Israel jojodö da'dömine Abrahamja? ¿Jo̧bama iteda ujulunö suli̧ jwibo̧ baibinaji̧?

^2-3 Iteda ujulunö suli̧ jwibo̧ baibinatjö̧ma, Aaa, ötjöma otiwo̧sa, jö̧a̧lo jö̧a̧linena chömöledö. ¿Dakwö laebobe Dios iwenema chömöledö? Iteda otiwanö ja̧inobetjö̧ ichibinobe, jö̧ba̧lö, ¿laebobeji̧? Laebokobe chömöledö. Baikwö laebobe: Abrahamma Dios yöawi̧ ösödinobe, Diosma jweinö yöbawo̧, jö̧ba̧lö. Jejenö ösödiökwe Diosma jo̧banö jö̧a̧linobe, Chedemi bitema suli̧ jwibo̧, jö̧ba̧lö, laebobe Dios iwenema. Jau chömöledö, Dios öba a'otjö, otiwo̧sa jö̧ba̧lö jö̧a̧loböma jwiinobe Abrahamma, iteda ja̧bö ichibinokobetjö̧.

⁴ Baikwö wanedö yötawa: Bakwo̧ otidenama, jo̧banö balada iyadö ¿jö̧tö? Ja̧ baladama ¿jo̧kwada tjiyobeji̧? Jo̧kwadama tjiyokobe, otidaja̧ mikwada tjiyobe.

⁵ Jo̧kwaijayonö, jejenömaökö suli̧ jwibadö babibadöma. Idöda otidibö ichiböködö la'akatjöda. Jau chömöledö, otiwa jawa ja̧böma ichikwokobe. Sule Dios yöawi̧ a̧ja̧kwö ösödöda ichikwobe. Ja̧danö, Diosma jweinö yöbawo̧, jö̧ba̧lö, tjösödiökwe, tjösödi̧ omukwatö jobadö̧ Dios yöawi̧ ösödadönöma yöawobe Diosma, Bidöma otiwadö, suli̧ jwibadö, jö̧ba̧lö.

Davidmine tjo̧'wo̧ ösöwanö ju̧kwadönö iwȩyudina wene

⁶ Jau chömöledö, Dios, Bidöma sulabe jwibadö, jö̧ba̧lö Dios jö̧a̧lawö̧ma, idöda ja̧bö ichiböködö. Jobadönö idöda ja̧bö ichiböködönö yöawinobe Davidminema chömöledö, baikwö: Dios jö̧a̧lökwema, Chedemi bitema suli̧ jwibo̧, jö̧ba̧lö, Dios jö̧a̧lökwema, jwiinö o̧'wo̧ ösöwanö jo̧, jö̧ba̧lö.

⁷ Baikwö laebobe Dios iwene Davidmine yöawinama: Isabenö tjo̧'wo̧ ösöwanö wene jwiinö ju̧kwadöma, sulabenö ja̧tji̧ Duluwo̧ Dios söbebö loinawö̧da. Dios jobadö sulabenö ja̧tji̧ omukwatokobetjö̧, jwiinö tjo̧'wo̧ ösöwanö ju̧kwadö.

⁸ Ja̧danö, Duluwo̧ Diosma bakwo̧ sulabenö ja̧i̧ omukwatö, lȩtebocha jö̧ba̧lö jö̧a̧lokobetjö̧, jwiinö o̧'wo̧ ösöwanö jo̧ jo̧bama, jö̧ba̧lö iwȩyudinobe Davidminema.

Okobe deinö Dios yöawi̧ ösödadöma, Abraham i̧tji̧mu tupadanö jojodö jö̧ba̧lö Pablo yöawina wene

⁹ Chömöledö, Davidmine jö̧a̧li̧danö tjo̧'wo̧ ösöwanö ju̧kwadöma ¿sule tjötade bajalesado̧ 'wibekwadödaji̧? Tjötade bajalesado̧ 'wibekwöködöma jejenö ¿tjo̧'wo̧ ösöwanö tjuju̧kwökenaji̧? Biya̧ wene dedaduwo chömöledö. Jo̧da yötawatö Dios iwene Abrahamnö laebi̧ma: Abrahamma Dios yöawi̧ ösödinobe, Diosma jweinö yöbawo̧ jö̧ba̧lö. Jejenö ösödiökwe, Diosma jo̧banö jö̧a̧linobe, Chedemi bitema suli̧ jwibo̧, jö̧ba̧lö, laebi̧ yötawatö.

¹⁰ Chömöledö ¿dianö yöawinada Diosma, Chedemi Abrahamma suli̧ jwibo̧, jö̧ba̧lö? ¿Sule ötade bajalesado̧ 'wiekwaja̧ ikenada jö̧a̧linaji̧? 'Wiekwaja̧ ikenamaökö chömöledö, 'wiekwakwa̧ abönö yöawinobe Abrahamnöma, Chedemi bitema suli̧ jwibo̧, jö̧ba̧lö.

^11-12 Jau chömöledö, Abraham Dios yöawi̧ ösödiökwe, jo̧banö jö̧a̧linobe Diosma, Chedemi bitema suli̧ jwibo̧, jö̧ba̧lö. Ja̧danö, ja̧ suli̧ jwibo̧ ö̧ji̧ i̧sebö weinobe Diosma, ja̧ tjötade bajalesado̧ 'wiekwama. Ina ötade bajalesado̧ 'wibekwö̧kö̧ ö̧jayi, Diosma jo̧banö, Chedemi bitema suli̧ jwibo̧, jö̧a̧linobe. Ja̧danö, ja̧ suli̧ jwiinö ö̧ji̧ i̧sebö, ötade bajalesado̧ 'wiekwa weinobe Diosma. Ja̧danö, okobe deinö Dios yöawi̧ ösödadötjö ajayinö ji̧na jo̧bama, Abrahamma. Okobe deinö Dios, Chedemi bidöma suli̧ jwibadö, jö̧a̧lawö̧tjö ajayinö ji̧na. Jau chömöledö, isabenö Abraham i̧tji̧mu tupadanö jojodöma, ¿didöda chömöledö? Abraham i̧tji̧mu tupadanö jojodöma ¿sule tjötade bajalesado̧ 'wibekwadödaji̧? Jobadömaökö. Ja̧danö, 'wibekwadö tjuju̧kwijayonö, Abraham i̧tji̧mu tupadanö jojodöböködö tjö̧jena chömöledö. Sule Abraham Dios yöawi̧ ösödinadanö tjösöditjö̧da, ina 'wibekwö̧kö̧ ö̧jayi ösödinadanö tjösöditjö̧da, jo̧ba i̧tji̧mu tupadanö jojodö chömöledö, 'wibekwadöma. Ja̧danö, 'wibekwöködöbi, chömöledö. Dios yöawi̧ ösödadöma, 'wibekwöködö ösödadöma, jobadöbi Abraham i̧tji̧mu tupadanö jojodö, jo̧ba ösödinadanö ösödadöma chömöledö.

Moisés iwȩyudinama mikwawokobe dichibobö jö̧ba̧lö Pablo yöawina wene

¹³ Chömöledö, Diosma Abrahamnö jö̧a̧linobe, Böjȩma ökwönö chiyakwöjȩ, ja̧danö kwi̧tji̧mu tupadanö jojodönöbi chiyakwöjȩ, jö̧ba̧lö. Jejenö yöawinama, okobe jwiinö Dios weina ja̧iökwema yöawinokobe chömöledö. Abrahamma, Diosma jweinö yöbawo̧, jö̧ba̧lö, Dios yöawi̧ ösödobetjö̧, Diosma jo̧banö yöawinobe, Chedemi Abrahamma suli̧ jwibo̧, jö̧ba̧lö. Ja̧danö, Abrahamma Dios yöawi̧ ösödiökwe, Diosma yöawinobe ja̧ma, Böjȩma ökwönö chiyocha, jö̧ba̧lö.

¹⁴ Kwomukwataduwena, Aaa, Dios chiyocha jö̧a̧linama, sule Dios weina Moisés iwȩyudina ja̧badönöda jö̧a̧linobe, jö̧ba̧lö. Isabenö yötawaduwakwö, Moisés iwȩyudina ja̧badönöda chiyocha, jö̧ba̧lö jö̧a̧linatjö̧ma, waekwo jö̧a̧linobe, bakwo̧nöbi chiyoko jö̧a̧linobe. Jau chömöledö, sule Moisés iwȩyudina ja̧badönöda chiyocha jö̧a̧linatjö̧ma, Dios yöawi̧ dösödi̧ma mikwawoko jö̧a̧linobe. Ja̧danö, Dios chiyocha jö̧a̧linabi mikwawoko jö̧a̧linobe, bakwo̧bi Dios wei̧ Moisés iwȩyudina ja̧bo̧ma deobetjö̧.

¹⁵ Jau chömöledö, Moisés iwȩyudinama Dios lȩebakwa̧da i̧sebobe. Jojodö Dios weökö jawa ja̧tjobema, Dios jobadönö lȩebobö jo̧be chömöledö. Jau chömöledö, Dios weina jo̧bema, Dios weökö jawa ja̧badösa, ¿jö̧tö? Jo̧kwaijayonö ja'yubetjinajayebi weinökötjö̧ma, ¿ina Dios weökö jawa ja̧denaji̧ chömöledö? Weawa jwiitjö̧ma, weökö jawa ja̧awabi jwiena, ¿jö̧tö? Ja̧danö, weawa jwiitjö̧da waekwökönö dö̧jo jö̧da̧linobe chömöledö.

¹⁶ Ja̧danö, Dios Abrahamnö chiyocha jö̧a̧lenama, Abraham Dios yöawi̧ ösödiökwe jö̧a̧linobe. Moisés iwȩyudina ja̧iökwema jö̧a̧linokobe. Jau, mikwa jwiinö otiwa jawa iyö, chiyocha jö̧a̧linobe. Ja̧danö, Dios jö̧a̧linada mikwawi̧ma, jojodö otiwanö ja̧tji̧maökö. Jo̧kwajabetjö̧, Dios jö̧a̧linada mikwawobetjö̧ jweinö döwaisa, Diosma isabenö Abraham i̧tji̧mu tupadanö jojodönö iyakobe, jö̧a̧linadanö. Jobadö Abraham i̧tji̧mu tupadanö jojodöma ¿didöda chömöledö? Sule jojodö ja̧bö tjö̧jo jö̧ba̧lö ¿Moisés iwȩyudina ja̧badödaji̧? Jobadömaökö, jo̧ba Dios yöawi̧ ösödinadanö ösödadöda Abraham i̧tji̧mu tupadanö jojodö chömöledö. Jau chömöledö, ökwödö okobe deinö Abraham ösödinadanö Dios yöawi̧ ösödadöma, Abraham i̧tji̧mu tupadanö jojodöbedösa.

¹⁷ Jau, chömöledö, baikwö laebobe Dios iwene, Diosma Abrahamnö yöawinama: Böjȩnö ju̧kwadö tjitebotenia ju̧kwadötjö ajayinö ji̧na baibanö pjatatakwö, jö̧ba̧lö laebobe. Ja̧danö, jö̧a̧linadanö jo̧be. Ökwödö okobe deinö jo̧ba Dios yöawi̧ ösödinadanö ösödadöma, Abraham i̧tji̧mu tupadanö jojodöbedösa, judío jojodöbi, judío jojodöböködöbi. Jau, Dios edemi, ökwödö okobe deinö Abraham Dios yöawi̧ ösödinadanö ösödadöma, Abraham i̧tji̧mu tupadanö jojodöbedösa, judío jojodöbi, judío jojodöböködöbi. Jau chömöledö, Dios, Abraham ösödinökwe Diosma, wobajadönö yemidanö 'yatjibajinö tjetjachajinö ja̧bo̧. Ju'wibi jo̧bama jwiobetjö otido̧ Abraham ösödinökwe Diosma chömöledö.

Abraham Dios yöawi̧ ösödina wene

¹⁸ Jau chömöledö, Abrahamma Dios yöawi̧ ösödinobe, Isabenö Diosma juluwo̧, jö̧ba̧lö. Dios Abrahamnö yöawinama baikwö laebobe: Kwi̧tji̧mu tupadanö jojodöma, si̧li̧'i̧dödanö tjöba̧jekwachakwedö, jö̧ba̧lö laebobe. Jejenö Dios yöawenama, waekwena jö̧ba̧lö ichejekwinobe, Abrahamma ida̧ökö yelösöda pöe ö̧jobetjö̧. Jo̧kwaijayonö, jwaikwöda Dios yöawi̧ ösödinobe Abrahamma, Diosma jö̧a̧li̧danö ja̧akwo̧ jö̧ba̧lö.

¹⁹ Jwiinö pöe ö̧jijayonö, cien o̧biya bo̧ ö̧jijayonö, jwaikwöda Diosma jö̧a̧li̧danö ja̧akwo̧ jö̧ba̧lö omukwatinobe Abrahamma. Itji̧nö 'yaebökenanö pöe ö̧jijayonö, ilekwo Sarabi ji̧tji̧mu debuju jö̧jijayonö, yayonö jwaikwöda omukwatinobe, isabenö Dios jö̧a̧li̧danö chilekwo Sarama jitji̧nö jemakobe, jö̧ba̧lö.

²⁰ Jwaikwöda Dios yöawi̧ ösödö omukwatinobe, ja'yubebi wainö omukwatökönö. Ja̧danö, o̧'wo̧ luwo̧ma ujuluwachibinobe tupakwö. Ja̧danö, Diosnö ösödö jö̧a̧linobe, Chuluwo̧ Dios, isabenö juluwo̧ja, isabenö jö̧ka̧li̧danö ja̧bo̧ja, jö̧ba̧lö.

²¹ Jau chömöledö, Abrahamma jwaikwöda omukwatinobe, Diosma ja̧tocha jö̧a̧litjö̧ma, ja̧akwo̧, ujulubi jö̧a̧li̧danö ja̧oböma juna̧lo̧, jö̧ba̧lö, omukwatinobe Abrahamma.

²² Ja̧danö, jejenö omukwatiökwe, Diosma jo̧banö yöawinobe, Chedemi bitema suli̧ jwibo̧, jö̧ba̧lö.

^23-24 Ja̧ Dios iwene laebi̧ma, Dios jö̧a̧lina, Chedemi bitema suli̧ jwibo̧, jö̧ba̧lö, laebi̧ma, sule Abrahamda omukwatobö laebokobe. Ökwödö bajaliya jojodöbi domukwatobö laebobe chömöledö. Ja̧danö, ökwödöbi Dios yöawi̧, Duluwo̧ Jesúsnö woawatjö yemidanö tjeachajinö ja̧bina yöawi̧ dösöditjö̧ma, ökwödönöbi yöawakwo̧ Diosma, Chedemi bidöma suli̧ jwibadö, jö̧ba̧lö.

²⁵ Jau chömöledö, Diosma Cristonö weinobe, ökwödö sulabe dujuna̧li̧ midawö woobö. Ja̧danö, jo̧banö woawatjö tjeachajinö ja̧inobe, ökwödö sulabe jwibadö badibanö ja̧bö.