Romanos 3 - Dios Iwene

Diosma ba̧kwȩlö̧jatebö jö̧a̧li̧danö ja̧bo̧ jö̧ba̧lö Pablo yöawina wene

¹ Ja̧danö chömöledö, ¿dakwö kwomukwataduwa? Diosma judío jojodönöma, judío jojodöböködönötjö o̧penönö ¿pjaatinökiji̧? Isabenö pjaatinobe. Chömöledö, ja̧danö, ju'wibi, judío jojodö tjötade bajalesado̧ 'wiekwama ¿mikwawinökiji̧ chömöledö?

² Isabenö mikwawinobe chömöledö, baikwö yötawa: Judío jojodönöda iyinobe Diosma, iteda iwene tjite'ada̧lobö, te'ada̧lakwawa luwedö baibanö tjite'ada̧lobö. Ju'wedönö iyinokobe, judío jojodönöda iyinobe chömöledö.

³ Isabenö, judío jojodötjö ju'wedöma Dios wei̧danö ja̧dakwedösa jö̧tja̧lijayonö, waekwinobe, jö̧tja̧li̧danö ja̧tjinokobetjö̧. Ja̧danö, ¿dakwö kwomukwataduwa chömöledö? Jobadö jö̧tja̧li̧ waekwinobetjö̧, ¿Dios jö̧a̧li̧bi waekwenaji̧? Jö̧a̧linadanöma ¿ja̧ökenaji̧ Diosma?

⁴ Ja̧maökö chömöledö, okobe deinö böjȩ jojodö jö̧tja̧li̧ waekwijayonö, Diosda kabatökönö jö̧a̧li̧danö ja̧bo̧ma chömöledö. Dios iwene wȩyudinama, biya̧ wene iwȩyudinobe, Diosnö iwȩyudenama. Baikwö iwȩyudinobe: Dios, ökwö yöka̧lenama, otiwanö öwawachibakobe, jweinöda yöba̧lo̧ja jö̧ba̧lö. Ja̧danö, lȩekwa luwedö tjöba a'otjö yöka̧lenama, lȩekwa luwedöbi yötjawakwedö, Bitema isabenö jweinö yöba̧lo̧, jö̧ba̧lö, jö̧ba̧lö iwȩyudinobe.

^5-6 Chömöledö, Diosma sulabe jwibo̧, ¿jö̧tö? Ja̧danö, sulabe jwibo̧obetjö̧, sulabenö ja̧badönö lȩebobö jo̧be, ¿jö̧tö? Jejenö ji̧jayonö, jejenö omukwatöködö ju'wedö böjȩ jojodöma. Jobadöma wainö omukwatadö, Dios lȩeboböma jwia, jö̧ba̧lö omukwatadö. Ja'yubeda jobadö tjomukwati̧ma yötawa chömöledö. Baikwö tjomukwatobe: Böjȩ jojodöma okobe deinö bakwainö otiwa jawada ja̧bö tjö̧jitjö̧ma, jojodö tjomukwatökena Diosnöma, Jo̧bada inesö otiwanö ja̧bö jo̧, jö̧ba̧lö. Jo̧kwaijayonö, sulabenö ja̧bö tjö̧jobema, ju'wedö Diosnö tjomukwatobö jo̧be, Aaa, Diosda otiwanö ja̧bö jo̧ma, jö̧ba̧lö. Jejenö omukwatö, jemi tupakwöbi tjomukwatobe, Jojodö sulabenö ja̧bö tjö̧ji̧ma otiwobe, jö̧ba̧lö tjomukwatobe. Jojodö sulabenö ja̧bö tjö̧ji̧ma ju'wedö Diosnö tjösödobö ja̧obetjö̧, Diosnö pjabatadö sulabenö ja̧badöma, jö̧ba̧lö tjomukwatobe. Ja̧danö, jemi tupakwö ju'wibi tjomukwatobe. Diosma sulabenö ja̧badönö lȩeboböma jwia, jö̧ba̧lö tjomukwatobe. Sulabenö ja̧badöma Diosnö pjabatadö, jo̧kwajabetjö̧ jo̧banö pjabatadönö lȩeboböma jwibo̧ Diosma, jö̧ba̧lö omukwatadö. Jejenö omukwatadöma, ¿jweinö tjomukwatobeji̧ chömöledö? Jweinö omukwatöködö, ö'öbönöda omukwatadö chömöledö.

⁷ Jau chömöledö, ju'wedö yötja̧lena, Aaa, ötjö sulabenö ja̧ti̧ma, Dios suli̧ jwii̧ weneda i̧sebö yöawobe. Jojodö ötjö sulabenö ja̧ti̧ edö, Diosnö tjomukwatena, Aaa, Diosma wainö jo̧, suli̧ jwibo̧, jö̧ba̧lö. Ja̧danö, Diosnö pjabato̧sa, jö̧ba̧lö, omukwatadö. Ja̧danö, ¿tajawedö lȩebobö Diosma ötjönöma? Lȩebitjö̧ma sulena, jö̧ba̧lö, yötja̧lena.

⁸ Ja̧danö, jejenö omukwatö yötja̧lena, Sulabenö ja̧bö dö̧ji̧ma, sulökö, Dios suli̧ jwii̧ weneda i̧sebö yödawobetjö̧, jö̧ba̧lö. Jejenö omukwatadö tjuju̧kwobe chömöledö. Ja̧danö, ju'wedöbi sulabenö ötjönö wanedö omöna yöba̧ladö, Pablobi jejenö yöbawo̧, jö̧ba̧lö. Jejenö yöbawö̧kö̧sa ötjöma chömöledö. Ju'wibi ökwödönö isabenö yötawa, Diosma jejenö yöba̧ladönö lȩebenama, jweinöda lȩbebo̧ chömöledö.

Okobe deinö böjȩ jojodöma sulabenö ja̧badö jö̧ba̧lö Pablo yöawina wene

⁹ Jau chömöledö, isabenö Diosma judío jojodöböködönötjö o̧penönö pjaatinobe ökwödönö judío jojodönöda chömöledö. Jejenö pjaatinobetjö̧, ¿dakwö kwomukwataduwa chömöledö? ¿Dakwö omukwatö yöka̧laduwa? ¿Judío jojodöböködönötjö o̧penönö otiwadödobeji̧, ökwödö judío jojodöma? Ja̧maökö. Ida̧ökö i̧sebö yötawajabe, okobe deinö otiwöködösa, jö̧ba̧lö, bakwaibedösa, suli̧ ömöayedödanöbedösa, jö̧ba̧lö, judío jojodöbi, judío jojodöböködöbi, jö̧ba̧lö, yötawajabe.

¹⁰ Dios iwene damötjö tjiwȩyudinama baikwö laebobe: Suli̧ jwibadöma deobe yelösöda, bakwo̧bi deobe suli̧ jwibo̧ma.

¹¹ Ja̧danö, isabenö waisadöbi deobe, Diosnö isakwö ösödadöbi deobe.

¹² Okobe deinö Diostjö 'da̧bachibö tji̧'yinobe, bakobe sulabenö ja̧tjobö. Okobe deinö sulabenö ja̧badö, bakwo̧bi deobe otiwanö ja̧bo̧ma.

¹³ Ja̧danö, jojodönö tjö'wötotö jö̧ba̧lö omöna yöba̧ladö, kabatökönö suli̧ tjöwaedotö jö̧ba̧lö omöna yöba̧ladö. Ja̧danö, wanedö yöta̧la: Yötja̧lenama, tjomadeba juna̧ladö a̧ko̧'dö̧ nibadödanö ichejekwadö.

¹⁴ Ja̧danö ju'wedö jobadönö sulabenö ja̧tjenama, tjo̧'wo̧ jwibiböködö. Ja̧danö, tjo̧'wo̧ sulawö̧, o̧'wo̧ jawa tjo̧'wo̧ tjöwana̧lawö̧nö, tjuluwedö jö̧tja̧lawö̧nö webachadö, tjöpöjojodönö sulabenö ja̧tjo jö̧ba̧lö.

¹⁵ Juluwanö kwabö lobadö jojodönöma.

¹⁶ Ju'wibi okobe jwiinö kwetjachobema, suli̧ waedö kwebachadö. Ja̧danö, kwetjachajabe okobema, okobe ju̧kwadö jojodö usula tjemawinö ja̧badö.

¹⁷ Ja̧danö jobadö tjö̧ji̧ma, tjo̧'wo̧ söinöma jö̧ködö, sule ölakwabikwawöda ju̧kwadö.

¹⁸ Ju'wibi, jweinö yebabinöma omukwatöködö Diosnöma, ¡Ayö! Ju'winö okobe deinö lȩebakwo̧, jö̧ba̧lö. Jejenö laebobe Dios iwenema, böjȩ jojodönöma.

^19-20 Jau chömöledö, döwaisa, Diosma Moisésnö weinobe, iwȩyudobö, jojodö ja̧bö tjö̧jo jö̧ba̧lö wei̧ma. Ja̧danö, ja̧ weinama, Israel jojodönö weinobe, okobe jwiinö ja̧bö tjö̧jo jö̧ba̧lö. Jo̧kwaijayonö, okobe jwiinö ja̧bö tjö̧jo jö̧tja̧lijayonö, ja̧tjinokobe, yelösöda waekwinobe. Jau chömöledö, böjȩ jojodöma okobe jwiinö Dios weina ja̧bö jö̧ködö, bakwo̧bi deobe ja'yubebi junibökönö ja̧bo̧ma. Jau chömöledö, bakwo̧bi deobe, okobe jwiinö Dios weina waekwökönö ja̧bo̧ma. Ja̧danö, Dios weina Moisés iwȩyudinama suli̧ jwibadö badiboböma pjaatokobe chömöledö, okobe jwiinö ja̧bö dö̧jokobetjö̧. Jau chömöledö, Moisés iwȩyudinama sule sulabe dujuna̧li̧ weneda yöawobe. Ja̧danö, Dios lȩebenama, okobe deinö ökwödö böjȩ jojodöma atadakwawa jwidakwedösa, lȩkeboko yöda̧lo jö̧ba̧lö.

Jesúsnö ösödadönöma sulabe tjujuna̧li̧ söbebö lobo̧ Diosma jö̧ba̧lö Pablo yöawina wene

²¹ Chömöledö, babema Diosma iteda ja̧i̧ma i̧sebinobe, suli̧ jwibadö badibobö. Ja̧ suli̧ jwibadö baibakwawama, Moisés iwȩyudina ja̧bö ichikwokobe chömöledö. Jo̧kwaijayonö, Moisés iwȩyudina ja̧bö ichikwököjayonö, Moisés iwȩyudinabi, ju'wedö Dios iwene yöbawadö tjiwȩyudinabi yöawinobe Dios jejenö jojodö suli̧ jwibadö badibanö ja̧akwa̧ma.

^22-23 Ja̧danö, Jesucristoda dö̧jibinö pjabato̧, jö̧ba̧lö, Jesucristonö dösödobetjö̧, jejenö ja̧obe Diosma ökwödönöma, suli̧ jwibadö badibanö. Jau chömöledö, okobe deinö suli̧ jwibadö badibobö jo̧be, bakwaibedödobetjö̧. Bakwaibedödanö, okobe deinö sulabenö ja̧badösa, ökwödö dujulunö Dios ö̧jobe, bakwainö otiwo̧ Dios ö̧jobe ichibökönö. Ja̧danö, okobe deinö bakwaibedödobetjö̧, okobe deinö Jesucristonö ösödadöma bakwainö suli̧ jwibadö badiboböma jo̧be.

²⁴ Jau chömöledö, ökwödö böjȩ jojodö okobe deinö sulabenö ja̧dijayonö, Cristo Jesúsda dö̧jibinö pjaatinobe. Ja̧danö, Cristo Jesúsda midawö woinobetjö̧, Diosma, mikwa jwiinö otiwa jawa iyö, ökwödönö suli̧ jwibadö badibanö ja̧obe.

²⁵ Jau chömöledö, Jesúsda woinobetjö̧, Jesúsnö ösödadönö lȩbebö̧kö̧ Diosma. Jejenö ja̧bö i̧sebobe Diosma, iteda suli̧ jwii̧bi, jojodönö suli̧ jwitjinö ja̧i̧bi. Jau chömöledö, damötjö Diosma lȩlö̧jinö edö, jojodö sulabenö ja̧tji̧ lȩebinokobe.

²⁶ Ja̧danö, babema, Jesúsnö ösödadönö jö̧ba̧lo̧ Diosma, Bidöma suli̧ jwibadö, jö̧ba̧lö. Jau chömöledö, Jesúsma woinobetjö̧, Dios suli̧ jwii̧ wenema öwawobe, ja̧danö Dios jojodönö suli̧ jwitjinö ja̧i̧ wenebi öwawobe.

²⁷ Ja̧danö, bakwo̧, Aaa, otiwo̧sa, ¿jö̧a̧loböma jo̧beji̧? Jwiobe yelösöda chömöledö. Bakwo̧bi deobe iteda ja̧bö suli̧ jwibo̧ baiboböma, bakwo̧bi Dios weina ja̧bo̧ma deobetjö̧. Okobe deinö Jesúsnö ösödöda ichibadö chömöledö. Jo̧kwajabetjö̧ bakwo̧bi ötjöma otiwo̧sa jö̧a̧loböma jwiobe yelösöda, iteda ja̧bö suli̧ jwibo̧ baibokobetjö̧.

²⁸ Jau chömöledö, Bidöma suli̧ jwibadö, jö̧ba̧lö, Dios jö̧a̧lawö̧ma, Jesúsnö tjösödiökweda jejenö jö̧ba̧lo̧ Diosma, Moisés iwȩyudina ja̧tjiökwemaökö.

²⁹ Ju'wibi yötawa, Diosma sule judío jojodö tjuluwo̧maökö, judío jojodöböködöbi tjuluwo̧ Diosma chömöledö.

³⁰ Bakwo̧da tjuluwo̧ Diosma, judío jojodöbi, judío jojodöböködöbi. Ja̧danö, judío jojodönöbi, judío jojodöböködönöbi Jesúsnö tjösödobetjö̧ bakwainö suli̧ jwibadö batjibanö ja̧bo̧ Diosma.

³¹ Jau chömöledö, Jesúsnö ösödöda dö̧jibobe, Moisés iwȩyudina ja̧bömaökö. Jo̧kwaijayonö, Moisés iwȩyudinama mikwawökö, jö̧ba̧lö, lodibokobe chömöledö. Wainö, Moisés iwȩyudinama otiwa, jwea, jö̧ba̧lö, yödawobe.