Romanos 2 - Dios Iwene

Diosma jweinö lȩbebo̧ jö̧ba̧lö Pablo yöawina wene

¹ Chömöledö, babe sulabenö ja̧badö ja̧tji̧ wene yöta̧laja̧ kwa̧ja̧kwaduwenama, idöma sulabedö jö̧ka̧laduwena, Diosma jobadönö lȩebitjö̧ma otiwena, sulabenö ja̧tji̧ mikwa, jö̧ba̧lö. Jejenö jö̧ka̧laduwenama, isabenö idöda jawada jö̧ka̧laduwokobe, i̧seböbi kwi̧sekwaduwobe, Dios ökwödönöbi lȩebobö jo̧be, jö̧ba̧lö. Jobadö ja̧tji̧ma, sula jö̧ba̧lö kwöwaisaduwijayonö, ja̧tji̧danö ja̧badöja ökwödöbi. Ja̧danö, Diosma ökwödönöbi lȩebobö jo̧be, jö̧ba̧lö kwi̧sekwaduwobe.

² Kwöwawaisaduwa chömöledö, Diosma jejenö sulabenö ja̧badönö lȩebenama, jweinö lȩebobe, sulabenö ja̧tji̧ mikwa baibanö, ¿jö̧tö?

³ Ökwödöja? Ökwödöma jobadö ja̧tji̧ omukwatö, Jobadöma sulabenö ja̧tjobetjö̧, Diosma wainö lȩebawö̧, jö̧ka̧laduwobe ökwödöma, ¿jö̧tö? Jo̧kwaijayonö, Lȩebobö jo̧be, jö̧ba̧lö jö̧ka̧laduwijayonö, ökwödöbi jobadö sulabenö ja̧tji̧danö ja̧badöja. ¿Dakwö kwomukwataduwa? Jobadö ja̧tji̧danö ja̧köbaduwobema, ¿Dios lȩebitjö̧ kwö̧jibaduwenaji̧? Dios lȩebitjö̧ma ji̧böködöja.

⁴ Chömöledö, Diosma lekwe ite'ada̧lobe ökwödönöma. Lȩbebökönö lekwe ite'ada̧lobe, sulabenö ja̧köbaduwijayonö. Ja̧danö ite'ada̧lobema, ¿kwomukwataduwökenaji̧? Diosma lekwe ite'ada̧lobe ökwödönöma, sulabenö kwomukwataduwi̧ kwöbalewachaduwo jö̧ba̧lö, jweinö kwomukwataduwo jö̧ba̧lö.

⁵ Jo̧kwaijayonö, jejenö ite'ada̧lijayonö, jwaikwöda sulabenö omukwatadöja, kwomukwataduwi̧ balewachökönö. Ja̧danö, jwiinö labi̧ jawa lȩebakobe Diosma, ökwödönöma, jojodönö lȩebi̧ möle baibenama. Ja̧ möle baibenama, jweinöda lȩebakwo̧ Diosma, jojodö ja̧tji̧ mikwa baibanö.

⁶ Isabenö yötawaduwakwö chömöledö, Diosma jweinö yöawakwo̧ jojodö sulabenö ja̧tjinojobö, otiwanö ja̧tjinojobö jö̧ba̧lö.

⁷ Bakwainö otiwanö ja̧badönöma, jwaikwöda Dios ösödi̧da ja̧badönöma, ba̧kwȩlö̧jatebö ja̧kwawa iyakwo̧ Diosma. Jobadöma jwaikwöda Dios ösödi̧ jawada ja̧badö, Diosma jobadönö jö̧a̧lakobetjö̧, Bidöma otiwadö, suli̧ jwibadö, jö̧ba̧lö. Ja̧danö, Dios ösödi̧ jawada ja̧bö ba̧kwȩlö̧jatebö ja̧kwawa isakwadö jobadöma. Ja̧danö, Dios ösödi̧ jawa ja̧bö ba̧kwȩlö̧jatebö ja̧kwawa tjisakwobetjö̧, ja̧da iyakobe Diosma, jwaikwöda tjisakwobetjö̧.

⁸ Jo̧kwaijayonö, isabenö wene öpöjödibö, sulabeda ösödadönöma, idöda tjomukwati̧da ja̧badönöma lȩebakwo̧ Diosma. Jwiinö labi̧ jawa lȩebakwo̧ jobadönöma, sulabenö ja̧tjina öpöjödö lȩebakwo̧ chömöledö.

⁹ Okobe deinö sulabe jawa ja̧badöma, inia tjöbö usula tjemawakwedö chömöledö, judío jojodöbi, judío jojodöböködöbi.

¹⁰ Ja̧danö, okobe deinö otiwa jawa ja̧badöma, otiwanö tjö̧jakwedö. Diosma jobadönöma, bidöma otiwadö, wene jwibadö, jö̧ba̧lö, yöa̧lakwo̧, judío jojodönöbi, judío jojodöböködönöbi.

¹¹ Jau chömöledö, Diosma wainökwena edö̧kö̧ jobadönöma, Bitenö lȩteba, bitenö lȩtebökö, jö̧ba̧lö. Bakwaibedödanö edo̧ judío jojodönöbi, judío jojodöböködönöbi.

Moisés iwȩyudina wene waisadöbi, wajwibadöbi wene juna̧ladö jö̧ba̧lö Pablo yöawina wene

¹² Jau chömöledö, isabenö jweinö lȩbebo̧ Diosma jojodönö. Baikwö yötawa: Ju'wedöma, judío jojodöböködöma, Dios weina wene, Dios Moisésnö iwȩyudobö weina wenema wajwibadö. Ja̧ weina wajwitjijayonö, Diosma jobadönö lȩebakwo̧ sulabenö ja̧tjobetjö̧. Ja̧danö, Dios weina wene juna̧ladönöbi lȩebakwo̧ Diosma, sulabenö ja̧tjobetjö̧. Dios weinadanö ja̧tjokobetjö̧, Dios lȩebakwawö̧ jobadönöma.

¹³ Jau chömöledö, Dios weina Moisés iwȩyudina juna̧ladönöma, wei̧danö ja̧tjökötjö̧ma, Aaa, bidöma wene jwibadö, ¿jö̧a̧lenaji̧ Diosma? Jö̧ba̧lö̧kö̧ chömöledö, Dios weinadanö ja̧tjitjö̧da jejenö jö̧ba̧lo̧ Diosma, Aaa bidöma wene jwibadö, jö̧ba̧lö.

^14-15 Ja̧danö, Dios weina Moisés iwȩyudina wajwibadö sulabenö ja̧tjenama, Moisés iwȩyudina wajwitjijayonö, isabenö Dios lȩebi̧tjö tjemobö jo̧be. Baikwö yötawa: Judío jojodöböködöma, Dios weina Moisés iwȩyudinama wajwibadö. Ja̧ wajwitjijayonö, ina suli̧bi otiwi̧bi tjöwaisobe tjo̧'wo̧ luwo̧nö. Jau chömöledö, Moisés iwȩyudina wajwitjijayonö, ina otiwi̧bi suli̧bi waisadö. Ja̧danö, otiwanö ja̧tjitjö̧böbi, sulabenö ja̧tjitjö̧böbi, tjo̧'wo̧ luwo̧nö tjöwaisi̧ma yöawobe, Biya̧ma otiwa, biya̧ma sula, jö̧ba̧lö. Jo̧kwajabetjö̧, Moisés iwȩyudina wajwitjijayonö, ina Moisés iwȩyudina ja̧bö tjö̧jena, tjo̧'wo̧ luwo̧nö otiwi̧bi, suli̧bi tjöwaisobetjö̧.

¹⁶ Jejenö jo̧be chömöledö, ja̧danö ju'winö Diosma yemidanö Cristo Jesúsnö weakobe, inesö lȩekwa luwo̧ baibanö. Ja̧danö, Cristo Jesúsda domajadenö domukwatina yöawakobe, sulojobö, otiwojobö, jö̧ba̧lö. Ja̧danö ja̧ möle baibenama, okobe deinö sulabenö ja̧badönö lȩebakobe, Moisés iwȩyudina junaladötjö sulabenö ja̧badönöbi, Moisés iwȩyudina jwibadötjö sulabenö ja̧badönöbi. Biya̧ wene yötawaduwakwö chömöledö, Dios yöawi̧ma.

Judío jojodöma Dios wei̧ wene tjöwaisijayonö, Dios wei̧danöma ja̧böködö jö̧ba̧lö Pablo yöawina wene

¹⁷ Babema judío jojodönö yötawa. ¿Ökwödö judío jojodöja? ¿Diostjö wene jwiköbaduwobeji̧? Ökwödöma baikwö kwomukwataduwena, Aaa, ötjöma judioso̧sa, ju'wedönötjö o̧penönö otiwanö jo̧sa. Ja̧danö Dios weina, Moisésnö iwȩyudobö weinama cho̧'wo̧ wana̧lo̧sa. Ja̧danö, Dios ömöledöso̧sa, jö̧ba̧lö, kwomukwataduwena.

¹⁸ Dios weina kwujuna̧laduwobetjö̧, Dios ösödi̧ma kwöwaisaduwena, ja̧danö okobe jwiinö biya̧ma otiwa, biya̧ma sula, jö̧ba̧lö kwöwaisaduwena.

¹⁹ Jau chömöledö, jejenö kwöwaisaduwobetjö̧, Aaa, ju'wedönötjö o̧penönö waisadösa, jö̧ba̧lö kwomukwataduwena. Ja̧danö, ju'wibi, kwomukwataduwi̧ wanedö yötawa: Baikwö kwomukwataduwena, Ötjöma judioso̧ma, tjöbajale tjewawadönö tötöba̧lö pjabato̧sa. Ja̧danö yȩa'wo okwa ju̧kwadönö otiwanö dewinö dejatinö jo̧sa, jö̧ba̧lö.

²⁰ Ja̧danö, wajwibadönö jwebebo̧sa, tjemunöbi waisato̧sa, jö̧ba̧lö, kwomukwataduwena ökwödö judío jojodöma. Dios weina kwujuna̧laduwobetjö̧, okobe jwiinö waiso̧sa, okobe jwiinö jweinöda yöbawo̧sa, jö̧ba̧lö, kwomukwataduwena, ökwödö judío jojodöma.

²¹ Ökwödöma, ju'wedönö jweinö ba̧ja̧dadösa jö̧ka̧laduwijayonö, ökwödöda jawama la'akatjöda waisachiböködöja. Ökwödöma, ju'wedönö kwönaukwaduwa jö̧ka̧laduwijayonö, naukwabidöja.

²² Ökwödöma ju'wedönö kwilekwobökujukwöbi, kwilekwebö̧kö̧kwöbi sulabenö ja̧köba jö̧ka̧laduwijayonö, kwi̧lȩkwa̧muböködökwö sulabenö ja̧badöja. Ökwödöma jojodö tjösödawö̧ o̧'wo̧ jawabi ösödöködösa jö̧ka̧laduwijayonö, o̧'wo̧ jawa ösödakwawejutjö naukwabidöja.

²³ Ökwödöma, Aaa, ökwödöma otiwadösa, Dios weina, Moisés iwȩyudina wene juna̧ladösa jö̧ba̧lö, jö̧ka̧laduwijayonö Dios weinama ja̧böködöja. Ja̧danö, ju'wedö judío jojodöböködö ökwödö judío jojodö Dios weina ja̧köbaduwokobe edö, sulabenö tjomukwatobe Diosnöma.

²⁴ Jau chömöledö, ju'wedö sulabenö Diosnö tjomukwatobö ja̧badöja, Dios iwene laebi̧danö. Dios iwenema baikwö laebobe: Ökwödö judío jojodö sulabenö ja̧köbaduwobetjö̧, ju'wedö judío jojodöböködöma sulabenö Diosnö yöba̧lö obadö, jö̧ba̧lö, laebobe, ja̧danö ja̧ laebi̧danö isabenö ja̧badöja.

Tjötade bajalesado̧ 'wibekwö loawama mikwawokobe Dios wei̧danö ja̧böködönöma jö̧ba̧lö Pablo yöawina wene

²⁵ Ökwödö judío jojodöma, Aaa, dötade bajalesado̧ 'widekwobetjö̧, otiwadösa, jö̧ba̧ladöja. Jejenö jö̧ka̧laduwijayonö, Dios weinadanö ja̧böködöja. Ja̧danö, Dios weinadanö ja̧köbaduwokobetjö̧, ja̧ 'wiekwama mikwawokobe ökwödönöma. Jau chömöledö, okobe jwiinö Dios weina ja̧köbaduwökötjö̧ma, mikwawokobe yelösöda ja̧ 'wiekwama chömöledö. Ja̧danö, okobe jwiinö Dios weina ja̧köbaduwokobema, sulabedöda babibadöja, tjötade bajalesado̧ 'wibekwöködödanö.

²⁶ Ja̧danö, ¿dakwö kwomukwataduwa? Bakwo̧, ötade bajalesado̧ 'wibekwö̧kö̧ma, okobe jwiinö Dios weina ja̧itjö̧ma, ¿'wibekwo̧danö baibökenaji̧? ¿Diosma jo̧banö öpöjödenaji̧, bitema sulabo̧ jö̧ba̧lö? Öpöjödökena chömöledö, ösödena, Bitema otiwanö ja̧bo̧, jö̧ba̧lö.

²⁷ Chömöledö, ökwödö judío jojodöma 'wibekwöködönöma, Sulabedö jö̧ka̧laduwobe, ¿jö̧tö? Jo̧kwaijayonö, jobadö 'wibekwöködö ötjabiwö̧ma, Dios wei̧ ja̧tjitjö̧ma, Diosma jobadönö ösödena, ¿jö̧tö? Ja̧danö, jobadöda Dios wei̧ ja̧tjitjö̧ma, ökwödö Dios wei̧ ja̧böködönö i̧sebö yötjawena, Judío jojodöma sulabedö, Dios wei̧ ja̧böködö, jö̧ba̧lö. Jau chömöledö, ökwödö judío jojodöma Dios wei̧ wȩyukwa'ye juna̧ladöja, ja̧danö 'wibekwadöja ökwödöma. Jo̧kwaijayonö, 'wibekwadö kwö̧jaduwijayonö, ja̧danö Dios wei̧ kwöwaisaduwijayonö, Dios wei̧ma ja̧böködöja.

²⁸ Jau chömöledö, ökwödöma, Aaa, ökwödöma judío jojodödobetjö̧, Dios ömöledösa, jö̧ka̧laduwobe, ¿jö̧tö? Chömöledö, isabenö Dios ömöledöma ¿didöda? Ja̧danö, isabenö judío jojodöma ¿didöda? ¿'Wibekwadödaji̧? Ja̧maökö chömöledö. Ja̧danö, Dios ömöledöso̧ ö̧ji̧, isabenö judíoso̧ ö̧ji̧ma ¿diya̧da chömöledö? Isabenö Dios weinadanö 'wiekwama ¿diya̧da? ¿Wame jawadaji̧? ¿Tjötade bajalesado̧ 'wiekwadaji̧, isabenö judíoso̧ ö̧ji̧ma? Ja̧maökö chömöledö.

²⁹ Isabenö judíoso̧ ö̧ji̧ Dios ömöledöso̧ ö̧ji̧ma, okwa jawada chömöledö, tji̧sȩdo̧ jawamaökö. Ja̧danö, isabenö Dios weinadanö 'wiekwama, tjomajade balewachinö ja̧awada, tji̧sȩdo̧ jawamaökö. Jau chömöledö, ja̧ tjomajade balewachinö ja̧awama, Dios O̧'wo̧ Luwo̧ ja̧i̧da, jojodö tji̧sȩdo̧ 'wiekwamaökö. Ja̧danö, isabenö judíoso̧ jo̧nöma, Diosda, Bitema otiwanö jo̧, jö̧ba̧lö yöawakwo̧. Jojodö yötjawökakobe chömöledö, Diosda yöawakwo̧.