Romanos 16 - Dios Iwene

Pablo Roma jojodönö Dokwa jö̧ba̧lö aebina wene

¹ Chömöledö, böja kwialusöja döjawuju Febe mikwujuma ökwödönö ichejebö jiyakobe. Jobujuma Cencreanö ju̧kwadö Jesúsnö ösödadönö pjaatakwawa jojosuju.

² Jobe jichibenama, kwösödaduwojö, Bisuma Duluwo̧ ömöayuju, jö̧ba̧lö. Ja̧danö, dömöledö Jesúsnö ösödadönö dösödobö Dios weinadanö, kwösödaduwojö kwömöledösujunöma. Febema ba̧jekwadönö pjabatuju, ja̧danö ötjönöbi pjabatinuju chömöledö. Ja̧danö, ökwödökwö jö̧jenama, ju'wi jaye jwibö jö̧jitjö̧ma, pjakataduwojö, ju'wedönö pjajatinadanö.

³ Chömöledö Aquilanöbi, ilekwo Priscanöbi dokwa ateba. Jobadöma ötjökwö otidadö Cristo Jesús weina jawama.

⁴ Ja̧danö, ötjökwö otidö, jobadöma debö tji̧'yo jö̧tja̧linobe, ötjönö sulabenö ja̧badötjö chö̧jibobö pjatjatinobetjö̧. Jejenö pjatjatinobe omukwatö, jobadönö chösöda, Otiwanö pjabatinadö, jö̧ba̧lö. Ja̧danö, okobe deinö ju'wedö judío jojodöböködö Jesúsnö ösödadö tjoko̧ko̧kwena ju̧kwadöbi, jobadönö tjösödobe ja̧danö, ötjönö pjatjatinobetjö̧.

⁵ Ja̧danö, ju'wedö Cristonö ösödadö Aquilabi, Priscabi tjejunö ko̧ko̧kwö ba̧jadönöbi dokwa ateba. Ja̧danö, chösödökwe chömöledöso̧ Epenetonöbi dokwa ateba. Jo̧ba Epenetoma, Asia niji ju̧kwadötjö Cristonö ajayinö ösödina.

⁶ Ja̧danö, Maríanöbi dokwa ateba. Jobujuma nöinö otiduju, ökwödö Roma jojodönö pjajatobö.

⁷ Ja̧danö, ötjöda chömöledö judío jojodö Andróniconöbi, Juniasnöbi dokwa ateba. Jobadöma ötjökwö ka̧lena ba̧jinadö, ja̧danö okobe deinö Jesús webawedöma tjöwaisawö̧ Andróniconö, Juniasnö, Otiwanö Duluwo̧ wei̧ ja̧badö, jö̧ba̧lö. Ötjötjö abönö Cristonö ösödinadö jobadöma.

⁸ Ja̧danö, Ampliasnöbi dokwa ateba, jo̧banö nöinö chösödökwe, Dios ömöledöso̧ jö̧ba̧lö.

⁹ Ja̧danö, Urbano, ötjökwö Cristo jawa otido̧nöbi dokwa ateba, ja̧danö chösödökwe Estaquisnöbi dokwa ateba.

¹⁰ Ja̧danö, Apelesnöbi dokwa ateba, jo̧bama öwaetjöda i̧sebinobe Jesúsnö ösödi̧ma, ja̧danö Aristóbulo ömöledönöbi dokwa ateba.

¹¹ Ja̧danö ötjöda yöne chömöledöso̧ Herodiónnöbi dokwa ateba, ja̧danö Narciso ömöledötjö Jesúsnö ösödadönö dokwa ateba.

¹² Duluwo̧ wei̧ jawa otidadö Trifenanöbi, Trifosanöbi dokwa ateba. Ja̧danö, chösödoko chömöledösuju Pérsidanö dokwa ateba, jobujuma nöinö otiduju Duluwo̧ wei̧ jawama.

¹³ Ja̧danö, Rufonö dokwa ateba, jo̧bama jwaikwöda Duluwo̧ wei̧ ja̧bö jo̧. Ja̧danö Rufo ojo'donö chojo'dodanö chösödokonö dokwa ateba.

¹⁴ Ja̧danö, Asíncrito, Flegonte, Hermas, Patrobas, Hermesnö, ja̧danö jobadökwö ju̧kwadö Jesúsnö ösödadönö dokwa ateba.

¹⁵ Ja̧danö, Filólogo, Julia, Nereo, Nereo öjawuju, Olimpasnö, jobadökwö ju̧kwadö Jesúsnö ösödadönöbi dokwa ateba.

¹⁶ Okobe deinö kwömöledöduwi Jesúsnö ösödadönö dokwa jö̧ba̧lö du̧kataduwo, dömöledö Jesúsnö ösödadönö du̧dati̧danö. Ja̧danö, okobe deinö bemi jojodö Cristonö ösödadö tjoko̧ko̧kwena ju̧kwadöma ökwödö Roma jojodönö dokwa atjebobe.

Pablo Roma jojodönö bajaleapo weina wene

¹⁷ Chömöledö, ökwödönö budekwö ateba, te'ada̧lakwawönö kwuju̧kwaduwo chömöledö. Suli̧ waedadöma tjuju̧kwobe, jojodö idöda tjömöledökwö tjölakwabikwawo jö̧ba̧lö isakwadö. Ja̧danö, jobadöma Jesúsnö ösödadönö omöna yöba̧ladö, Duluwo̧ weökö jawa tjomukwato jö̧ba̧lö. Jau chömöledö, isabenö wene kwa̧ja̧kwinaduwa wene laebi̧danöma omukwatöködö jobadöma, ja̧danö jobadötjö 'da̧bachibö kwuju̧kwaduwo chömöledö.

¹⁸ Jau chömöledö, jejenö ja̧badöma Duluwo̧ Cristo wei̧ma ja̧böködö chömöledö, sule idöda tjösödi̧da ja̧bö ju̧kwadö. Jobadöma wajwibadönö dösölö̧jinö yöba̧ladö, ja̧danö, jojodö tjösödi̧ jawa yöba̧ladö jojodö jobadö omöna yötja̧li̧ a̧ja̧kwö tjösödobö.

¹⁹ Jau chömöledö, okobe deinö jojodöma ökwödönö tja̧ja̧kwobe, Roma jojodöma jwaikwöda otiwa jawa wene ösödadö, jö̧ba̧lö. Ja̧danö, ötjöma ja̧ wene a̧ja̧kwö chösöda chömöledö. Ja̧danö, otiwa jawa Dios ösödi̧ jawada waisadö kwö̧jaduwoböma chösöda, Dios öpöjödi̧ jawa ja̧bökönö.

²⁰ Jau chömöledö, do̧'wo̧ luwo̧nö wene jwiinö dö̧jobö pjabato̧ma Diosda, ja̧danö juluwanö söbebö loakobe döpöjojo Awetja ujuluma. Jejenö söbebö loenama, Awetjanö kwömasapaduwinö kwöja̧taduwobedanö ja̧kobe chömöledö, ökwödönö ujuluwokobetjö̧. Ja̧danö, Duluwo̧ Jesús kabatökönö mikwa jwiinö otiwa jawa iyö ökwödökwö ja̧nö pjaatobö ateba Diosnö chömöledö.

²¹ Ju'wedöbi ökwödönö dokwa atjebobe. Timoteoma ötjökwö otidobe, ja̧danö jo̧ba Timoteoma ökwödö Roma jojodönö dokwa aebobe, ja̧danö chömöledö judío jojodö Luciobi, Jasónbi, Sosípaterbi ökwödö Roma jojodönö dokwa atjebobe.

²² Ja̧danö Tercio mikwo̧ma, böja kwialusöja wȩyudo̧bi dokwa aebobe, Ökwödö Roma jojodöbi Chuluwo̧ ömöledöja, jö̧ba̧lö.

^23-24 Gayobi dokwa aebobe, jo̧ba ejunö ötjö Pablo chö̧ja babema, ja̧danö beju Gayo ejunö bemi jojodö Jesúsnö ösödadö ko̧ko̧kwö tjö̧bobe. Erastobi dokwa aebobe, jo̧bama bemi comunidad jawa balada te'ada̧lo̧. Ja̧danö döjawo̧ Cuartobi dokwa aebobe ökwödönöma.

Diosnö dösödaduwo jö̧ba̧lö Pablo yöawina wene

²⁵ Jau chömöledö, Diosnö dösödaduwo, Ökwöma juluwo̧ja, jö̧ba̧lö. Jo̧bada juluwo̧ ökwödönö ujulu iyo jö̧ba̧lö, jwaikwöda Jesucristonö ösödö kwö̧jaduwobö. Jejenö yötawobe, otiwa jawa wene yötawenama. Otiwa jawa wenema biya̧ chömöledö, Jesucristo jawa wene. Ja̧ wenema ajayinö jojodö wajwitjina wene chömöledö,

²⁶ jo̧kwaijayonö babema wajuwanö i̧sekwobe, okobe deinö a̧ja̧kwö tjösödo jö̧ba̧lö, ba̧kwȩlö̧jatebö jo̧ Dios weinadanö. Damötjö Dios iwene wȩyudinadö tjiwȩyudinobe ja̧ wenema, ja̧danö babema wajuwanö i̧sekwobö weinobe Diosma, okobe deinö böjȩ ju̧kwadö ösödö, Dios wei̧ ja̧tjo jö̧ba̧lö.

²⁷ Okobe jwiinö ja̧i̧ waisanö ja̧bo̧ma Diosda, jelo̧ma deobe. Jo̧banöda kabatökönö dösödo, Otiwo̧ja, waiso̧ja, juluwo̧ja, jö̧ba̧lö, Jesucristo ökwödö dö̧jibinö pjaatinobetjö̧. Jobekwö chösöda chömöledö, jo̧banö dösödobö. Biya̧data.