Romanos 15 - Dios Iwene

Ju'wedönö pjabatö dö̧jo jö̧ba̧lö Pablo yöawina wene

¹ Chömöledö, do̧'wo̧ luwo̧nö ida̧ökö juluwadö dö̧jitjö̧ma, juluwöködönö pjadatobö jo̧be. Jau chömöledö, ökwödö dösödi̧da ja̧doböma domukwatoko,

² dö̧ja̧wo̧dönö pjadatobö domukwato, tjo̧'wo̧ luwo̧nö tjujuluwachibanö pjadatobö.

³ Jau chömöledö, Cristobi iteda ösödi̧danöma ja̧inokobe, jo̧bada otiwanö ö̧jo jö̧ba̧lö. Baikwö laebobe Dios iwene, Cristo yöa̧linama: Ökwödö jojodönö sulabenö jwötjeba̧li̧, Sulabedöja, jö̧ba̧lö jwötjeba̧li̧ma, ötjönöda baibinobe, jö̧ba̧lö laebobe Dios iwene Cristo yöa̧linama. Ja̧danö, ökwödö usula demawo jö̧da̧linama, jo̧bada emawinobe.

⁴ Jau chömöledö, Dios iwene damötjö tjiwȩyudina jawama, ökwödö döwaisachibobö tjiwȩyudinobe. Ja̧danö, tjiwȩyudina döwaisachenama, dujuluwachibanö döwaisachibena, ja̧danö juluwanö me'dawachibökönö, Diosnö do̧'wo̧ wana̧lö dö̧jena, Isabenö Dios jö̧a̧li̧danö baledakobe, jö̧ba̧lö.

⁵ Chömöledö, Diosda ökwödönö dujuluwachibanö dö̧jobö pjabato̧ma, Diosda me'dawachibökönö dö̧jobö pjabato̧ma chömöledö. Ja̧danö, jo̧banö ateba ökwödönö chömöledö, ökwödö bakwainö kwomukwataduwobö pjaato jö̧ba̧lö, Cristo Jesús omukwati̧danö kwomukwataduwobö pjaato jö̧ba̧lö.

⁶ Ja̧danö, okobe deinö bakwainö omukwatö, Diosnö kwösödaduwo, Duluwo̧ Jesucristo uluwo̧ Diosnö, Jesús Abe'do Diosnö kwösödaduwo chömöledö. Jau chömöledö, okobe deinö bakobe kwösodaduwonö, ökwöma otiwo̧ja jö̧ba̧lö.

Damötjö Dios iwene wȩyudinadö tjiwȩyudinadanö judío jojodöböködöbi ji̧badö jö̧ba̧lö Pablo yöawina wene

⁷ Jo̧kwajabetjö̧ baikwö yötawaduwakwö chömöledö: Kwömöledöduwi Cristonö ösödadönö kwöpöjödaduwoko chömöledö, Ökwödökwö babiböködö, jö̧ba̧lö. Cristoma ökwödönö öpöjödinokobe jo̧bakwö bakibaduwobö, ¿jö̧tö? Ja̧danö, Cristo ökwödönö ösödinadanö kwömöledönö kwösödaduwo. Jejenö ja̧köbaduwo chömöledö, ju'wedö Diosnö tjösödakobetjö̧, Otiwo̧ jö̧ba̧lö.

⁸ Jau chömöledö, Cristoma ökwödönö öpöjödinokobe, ja̧danö ökwödöbi kwömöledönö kwöpöjödaduwoko. Cristoma isabenö ökwödönö ösödö pjaatinobe. Baikwö yötawa chömöledö: Cristoma judío jojodönö pjabatö ichinobe, ja̧danö damötjö Dios yöbawö ujunina jawa badekwachinö ja̧inobe jobadönöma. Jejenö i̧sebinobe, Diosma isabenö jö̧a̧li̧danö ja̧bo̧, jö̧ba̧lö, Dios jobadötjö ajayinö ji̧nadönö yöbawö ujunina jawa badekwachinö ja̧inobetjö̧.

⁹ Ja̧danö, judío jojodöböködönöbi pjaatinobe, Dios jobadönö lȩlö̧jinö edobö ja̧inobe. Ja̧danö, judío jojodöböködöbi Diosnö ösödadö batjibinobe, Diosma otiwanö lȩlö̧jinö edo̧, jö̧ba̧lö. Baikwö laebobe Dios iwenema, judío jojodöböködö Diosnö tjösödakwa̧ma: Jo̧kwajabetjö̧ judío jojodöböködökwö ja̧nö, ökwönö chösödocha, Otiwo̧ja, jö̧ba̧lö, ja̧danö ökwönö ösödö lo̧tocha, jö̧ba̧lö laebobe Dios iwenema.

¹⁰ Ja̧danö ju'wibi baikwö laebobe Dios iwenema: Ökwödö judío jojodöböködöma, Dios ömöledökwö kwo̧'wo̧ luwo̧duwi ösöwachibanö kwö̧jaduwo, jö̧ba̧lö laebobe.

¹¹ Ju'wibi baikwö laebobe: Okobe deinö ökwödö judío jojodöböködöma Duluwo̧nö kwösödaduwo, otiwanö ja̧bo̧ja jö̧ba̧lö, ja̧danö okobe deinö böjȩ jojodö Duluwo̧nö kwösödaduwo, jö̧ba̧lö laebobe.

¹² Ja̧danö Dios iwene wȩyudina Isaíasma baikwö iwȩyudinobe Jesús judío jojodöböködönö pjaatakwa̧ma: Jesé itji̧ tupadanö jojoma ichakobe, ja̧danö jo̧bama webö yöawakobe judío jojodöböködönöma, tjuluwo̧ baibanö. Ja̧danö, jo̧banö tjösödakwedö judío jojodöböködöma, Bitema ökwödönö pjaatakwo̧, jö̧ba̧lö laebobe Dios iwenema. Jau chömöledö, Jesúsma judío jojodönöbi, judío jojodöböködönöbi ösödö pjaatinobe, jo̧kwajabetjö̧ ökwödöbi kwömöledöduwi Jesúsnö ösödadönö kwösödaduwo, öpöjödökönö.

¹³ Chömöledö, Diosma ökwödönö pjabato̧, Aaa, isabenö Dios jö̧a̧linadanö otiwanö ja̧akwo̧, jö̧ba̧lö domukwatobö. Jo̧banö ateba, kwo̧'wo̧ luwo̧duwi ösöwachibanö kwö̧jaduwobö, wene jwiinö kwö̧jaduwobö. Ja̧danö, jo̧banö kwösödaduwobetjö̧, jejenö kwö̧jaduwobö pjaatakwo̧ ökwödönöma chömöledö. Ja̧danö Dios O̧'wo̧ Luwo̧ ökwödönö pjaatobetjö̧, tupakwö kwo̧'wo̧ kwöwana̧laduwakwedöja, isabenö Dios jö̧a̧linadanö ja̧akwo̧ jö̧ba̧lö.

Pablo judío jojodöböködönö yöbawö ö̧jina wene

¹⁴ Chömöledö, chedemi kwömöledöduwinö ida̧ökö otiwanö ösödadöja, ja̧danö chedemi ida̧ökö waisadöja ökwödönö yötawaja̧ma. Ja̧danö, chedemi ida̧ökö waisadöja biya̧ jawa ju'wedönöbi yökawaduwo jö̧ba̧lö.

^15-16 Jo̧kwaijayonö, ida̧ökö waisadöja jö̧ba̧lö chomukwatijayonö, ina wȩyudö weta ökwödönöma biya̧ jawa kwomukwataduwobö, biya̧ jawa kwo̧'wo̧ jwikibaduwapji jö̧ba̧lö. Diosma otiwa jawa iyö judío jojodöböködönö yötawobö weinobetjö̧, yebabökönö wȩyudö wetajabe, Diosma ötjönö 'da̧batö ujuninobetjö̧ judío jojodöböködönö yöbawo̧ batibanö. Jau chömöledö, Cristo Jesús ömöayo̧sa, ja̧danö jo̧ba wei̧ ja̧bö judío jojodöböködönö pjatatobe. Wanedö yötawa, Jjudío jojodöböködönö pjatati̧ma: Diostjö judío jojodöböködötjö ö'weje pjabato̧danö chichejekwa chömöledö, jobadönö otiwa jawa wene yötawobetjö̧. Ja̧danö, ö'weje jojo chotidobema, judío jojodöböködönö Dios ö̧jobekwö ötibobedanö ichejekwa. Ja̧danö, jobadönö chiyobedanö ichejekwa Diosnöma, jobadönö edö iteda ömöledö batjibanö ösödö emo jö̧ba̧lö. Ja̧danö, Dios O̧'wo̧ Luwo̧ jobadönö 'da̧batö ujunobetjö̧, Diosma jobadönö emö ösödobe chömöledö.

¹⁷ Jo̧kwajabetjö̧, Cristo Jesúskwö ja̧nö biya̧ Dios wei̧ chotidobetjö̧, chotidi̧ chösöda, Otiwanö chotidobe, jö̧ba̧lö.

¹⁸ Jau chömöledö, tabada̧lökönö yötawa ötjö chotidinama, jo̧kwaijayonö ötjöda chotidinamaökö, Cristo ötjönötjö otidinada yötawa chömöledö. Judío jojodöböködönö yöbawöbi, i̧seböbi yötawijatö Dios iwene, jobadöbi Dios wei̧ ja̧tjo jö̧ba̧lö.

¹⁹ Ja̧danö Dios O̧'wo̧ Luwo̧ weitjö̧, Dios O̧'wo̧ Luwo̧ ujulunö jojodö edajitjökö jawa chi̧sebijatö, Dios ujulu chi̧sebijatö, edö Diosnö tjösödo jö̧ba̧lö, Dios wei̧ jobadöbi ja̧tjo jö̧ba̧lö. Ja̧danö, jejenö yötawiawö̧, judío jojodöböködöbi Diosnö tjösödinobe, jobadöbi Dios wei̧ ja̧bö. Jau chömöledö, nöinö yöbawö kwebachiachijatö, Jerusaléntjö jamatö, Ilírico niji baibanö. Jobe okobe jwiinö Cristo jawa otiwa jawa wene yöbawiachijatö.

²⁰ Ba̧kwȩlö̧jatebö ju'wedö yötjawokobe yötawobö chisakwijatö. Baikwö wanedö yötawa: Dios iwene yöbawadöma, o̧do tjotidobedanö otidadö, ja̧danö jelo̧ otidaja̧ wame chotidapji jö̧ba̧lö, ba̧kwȩlö̧jatebö ju'wedö yötjawokobeda yötawobö chisakwijatö.

²¹ Dios iwene laebi̧danö ju'wedö yötjawokobe yötawijatö. Baikwö laebobe Dios iwene, damötjö tjiwȩyudinama: Jo̧banö ajayinö a̧ja̧kwöködöma jo̧banö tjedakwedö, ja̧danö jo̧banö ajayinö a̧ja̧kwöködöma jo̧banö tjöwaisachibakwedö, jö̧ba̧lö laebobe Dios iwenema.

Pablo Romabe i̧'yakwa̧ yöawina wene

²² Jau chömöledö, lekwe möle ökwödönö chedobö chösödajabe, jo̧kwaijayonö nöinö kwebachö ina a̧ja̧kwöködönö yötawinobetjö̧, ökwödönö chedobö jö̧ta̧li̧ma waekwijatö chömöledö.

²³ Jo̧kwaijayonö, babema okobe jwiinö bemi niji chotidobö Dios weinama katatajabe. Ja̧danö, katatajabetjö̧ lekwe o̧biya ökwödönö chedobö jö̧ta̧lajabema, bajaliyanö babema ökwödönö edö chi̧'yobö chomukwata chömöledö.

²⁴ Jau chömöledö, chedemi Españabe chi̧'yenama, ja'ö ökwödö Roma jojodönö edö chi̧'yena. Ja̧danö, ökwödönö edö chösödena chömöledö. Ja̧danö, ökwödökwö ja̧nö chösödocha ja'yubenö lekwe. Ja̧danö jemi ikenama, ja'yubenö lekwe ökwödökwö chö̧jajabema, jemi tupakwö pjakataduwena, Españabe chi̧'yobö.

²⁵ Jobekwö chomukwatijayonö, abönö jelobe chi̧'ya, Jerusalénbe, jobe ju̧kwadö Dios ömöledö babibinadönö pjatatobö.

²⁶ Jau chömöledö, Jesúsnö ösödadö Macedonianö ju̧kwadöma, Acayanö ju̧kwadöbi tja̧ja̧kwinobe, Jerusalénnö ju̧kwadö Jesúsnö ösödadöma usula emawadö, jö̧ba̧lö. Jejenö usula tjemawi̧ wene a̧ja̧kwö, pjatjatobö tjomukwatinobe. Ja̧danö, jobadönö pjatjatobö tjösödobetjö̧, balada 'da̧batö tjujuninobe, Jerusalénnö ju̧kwadö Jesúsnö ösödadötjö usulasedönö tjiyobö.

²⁷ Jejenö pjatjatobö tjösödinobe, ja̧danö jweinö tjomukwatinobe chömöledö. Jerusalénnö ju̧kwadöma jobadönö pjatjatinobe, tjo̧'wo̧ luwo̧ jawama, ¿jö̧tö? Ja̧danö, tjo̧'wo̧ luwo̧ jawa pjatjatinobetjö̧ judío jojodöböködö Jesúsnö ösödadöma jobadö Jerusalénnö ju̧kwadö Jesúsnö ösödadönö tjumusidobedanö ichejekwa. Jau chömöledö, Jerusalénnö ju̧kwadö tjo̧'wo̧ luwo̧ jawa pjatjatinobetjö̧, babema, balekwa mikwa balada jawa pjatjatoböma otiwa chömöledö.

²⁸ Ja̧danö, 'da̧batö tjujunina baladama Jerusalénbe e'ewö chi̧'ya, jobadönö chiyobö. Ikenama, jobadönö iyajo̧, Españabe chi̧'yocha. Ja̧danö Españabe chi̧'yenama, ja'ö ökwödönö edö chi̧'yocha.

²⁹ Ja̧danö chi̧'yenama, biya̧ chöwaisa, ökwödönö yötawenama, Cristoma nöinö pjaatakobe ökwödönöma, kwo̧'wo̧ luwo̧duwi jawama.

³⁰ Chömöledö, ökwödö Duluwo̧ma bakwo̧da, Jesucristoda. Ja̧danö Dios O̧'wo̧ Luwo̧ma ökwödönö pjabato̧, dömöledönö dösödoböma. Jo̧kwajabetjö̧ bakwo̧da ömöayedö dö̧jobetjö̧, ja̧danö kwömöledöso̧ kwösödaduwökwechobetjö̧, ökwödönö ateba, Diosnö abebö pjakataduwotjö chömöledö.

³¹ Biya̧ akebaduwobö ateba chömöledö: Diosnö abebaduwi Jerusalénnö ju̧kwadö Jesúsnö öpöjödadötjö chö̧jibinö ja̧o jö̧ba̧lö. Ja̧danö ju'wibi: Biya̧ judío jojodöböködö tjiyina jawa Jerusalénnö ju̧kwadö Jesúsnö ösödadönö chiyenama, Aaa, otiwanö tjiyinobe, jö̧ba̧lö tjösödobö akebaduwo Diosnö chömöledö.

³² Ja̧danö, biya̧ judío jojodöböködö tjiyina Jerusalénnö ju̧kwadönö chiyaja̧ ikenama, Dios ösöditjö̧ma ökwödö Roma jojodönö edö chi̧'yena. Dios jejenö weitjö̧ma, cho̧'wo̧ ösöwanö ökwödökwö Roma jojodökwö chichibocha, ja̧danö ökwödökwö ja̧nö chösödocha chömöledö. Jejenö nöinö chotidajabetjö babema chö'wachibakobe chömöledö.

³³ Chömöledö, Diosda pjabato̧, do̧'wo̧ luwo̧nö wene jwiinö dö̧joböma, ja̧danö jo̧banö ateba ökwödönö pjaatobö chömöledö, biya̧da atebanö chömöledö, tjo̧wi̧ta.